Adrum s uɣrum neɣ KDS
Leqbayel n sserbis
Adrum s uɣrum
Neɣ
KDS
Ulac d acu n diri
Am win yekkaten deg gma-s
Ad s-yeḍlu ayen ur nelli
Ad yessenqas di lqima-s
Acengu, ccan-is yuli
Yezga yettefriwis fell-as
Zur wudem-is ur yettsetḥi
Lexdaɛ ɣur-s d lɛada
Ma sdat n bab-is d akli
Iṭtafar deg-s anda yedda
Ɣef warbaɛ-nni itezzi
Ɣef uɛrir-is tezga tberda
Ibeddel adrum s uɣrum
Nnif-is, yečča-t, issebleɛ-it
Sdat-s d ameẓẓyan umcum
Ddnub n medden yettɛebbi-t
D asemmam, yugar asemmum
D amessas, tiẓeḍt tugi-t
Anida i iwala thennan
Imir-nni ad t-teǧǧ lehna
D aberrani, d imawlan
Iger-iten deg yiwet lḥila
Ad sen-yekkes ula d aman
Yeg Ṛebbi llan di sseḥra
D imegzi, yecṭer, yessen
Sfaydayen seg tmussni-is
Iswi ma ɣur-s wwḍen
Ad yeɣli din wazal-is
Ma ur t-nɣin ad t-id-deggren
D lḥebs ad yeččen ibeṛdi-s
Am netta aṭas i yellan
Deg tirect yeqwa ukerfa
Tikli n umdan ur d-tettban
Alma ijerreb tilufa
Ad yawi abrid yelhan
Neɣ ad yeddu ɣef yisufa
Ma d win yeṭtfen di nnif-is
Wissen ma ad yidir aṭas
Tiyita yekkat s ufḍis
Yugi ad as-dergen ayla-s
.Afiniks yettuɣal-d seg yiɣed-is
Ma yella sefḍen lǧerra-s.
Idrimen n medden…
Malek Houd,