Ta d tifuhrit
Allaɣ n tegrawla
Ayen yeḍran yid-neɣ aseggas-a.
Ar tura mazal agdal-nni maɛna s wudem-nniḍen…
Kra n warrac d yiwet n tlemẓit ha-ten deg lḥebs n tmurt-nsen. Acimi ? Ukren ? Nɣan ? Ssenzen tamurt-nsen ?… Ur tufiḍ d acu i xedmen deg wayagi akk. Ufan-d iman-nsen deg bu ikurdan d wid yukren s tukarḍa tameqqrant tamurt… I nutni d acu akka i xedmen ? Seknen-d iman-nsen d akken nutni mačči d Ifransisen, mačči d Ihendiwen, mačči d Iṭerkiyen, mačči d Aɛraben… Nnan-d s leɛyaḍ d urfad anay Amaziɣ, azamul n tmagit-nsen, win yesdduklen Taferka n Ugafa akken ma tella. Agrawliw-nni ameqqran i rnan ɣur-sen, Mass Buregɛa, amɣar n 86 n yiseggasen… Anef-as ad asen-iselmed amezruy n tidet mačči winna i d-snulfan…
Ar ass-a skiddiben fell-aneɣ. Ar ass-a ttcewwihen amezruy n tmurt. Wid ur neswi tigert rran-ten swan, smeɣren-asen azal ur sɛin; wid yeswan, fkan tudert-nsen akken tamurt d warraw-is ad idiren deg tlelli, ɣullen-ten deg wazal i ttayalen. Nudaɣ fell-asen deg yisbetren n yidlisen n umezruy i sselmaden deg yiɣerbazen-nneɣ, ur ten-ufiɣ ara. I ufiɣ d wid ur nuklal, wid issenzen tamurt, ama deg ṭṭrad-nni, ama, zaɛma tura imi tefra. Maca akken yeqqar wanzi-nni i ḥemmleɣ aṭas aṭas : Ayen tebɣuḍ tekkeḍ ay iḍ, d ulaqrar ad yali wass. Nekk umneɣ, ur tettɣimi ara akka, yiwen wass kan ad tbeddel, deg wasif, ala idɣaɣen ara d-yeqqimen, iḥucan-nni i d-yernan sufella ad ten-yawi anda ur d-ttuɣalen.
Ta d tafuhrit
Tamurt-a d tamaziɣt