Leḥbus neɣ iskerfen (les prisons)
?Wissen melmi i d ass n tlelli
Asefru-a ad yili deg lxaṭer n kra n win i wimi tettwakkes tlelli netta ur yednib ur yeεṣi, gren-t, deg lbaṭel deffir rebεa leḥyuḍ tafat ur tt-yettwali. Ama deg tmurt-nneɣ ama deg umaḍal merra aṭas i yellan akka. S usefru-a ad sen-ssiwḍeɣ aṭas n tebɣest akken ad sebren lmeḥna ad tεeddi acku akken yeqqar wanzi-nni i ḥemmlen nezzeh: « Ayen tebɣuḍ tekkeḍ ay iḍ d ulaqrar ad yali wass ».
… Ifassen deg ssnasel tilelli ala deg targit
Leḥbus
Ass d yiḍ fell-i yeɛdel
Iberdi yencel
Taguni (ɣe)f tmurt tuɛer
Am uzrem aglim yenṣel
Ṣṣura-w tenbeddal
Tiɣerɣert s lbeq teɛmer
Tudert-iw amzun d urgal
Ur yewwi mazal
Qerḍen-t warrac s waẓar
Aqerruy yeɛya (se)g umekti
Yerra-tt i unadi
Yedla akk ɣef wussan-is
Ctaqeɣ nnul n yigenni
Ajeǧǧig ma yeldi
D ṣṣbeḥ mellulen s ugris
Ttwaliɣ iṭij m(i) ad yali
Agu ma yefsi
Targit tettawi-iyi ɣer yiri-s
A tɣri iɣeḍlen leḥyuḍ
Ḥader ad tettuḍ
Aweḍ ɣer yemma ḥell-itt
Ini-as mmi-m ur t-tessɛuḍ
Heggi-as leɣruḍ
Tanṭelt-is s yis-sen cebbeḥ-itt
Mmi-m ur yeddi ɣef uɛebbuḍ
Ur yeqlib akebbuḍ
Taluft t-yenɣan teẓriḍ-tt
Lmut-is tenɣa yagi
Acḥal i tewwi
Deg wid yugin azaglu
Tekkat deg wass ɛinani
Ur tugad Rebbi
Lxuf ɣur-s ur d-yettnulfu
Tezreɛ deg tmura d tirni
(de)G wulawen temɣi
Tettett lerwaḥ ur trewwu
Ilul-d cluc s waṭas
Aɛdaw yefrawes
Zzerriɛa yeẓẓa tsus
Taddukli tessemɣi-d tuɣmas
Acengu tezmer-as
Akken d-as-texdem drus
Mi ifukk yiḍ yettali wass
Tteddramen leḥbas
Wa yeṭṭef wayeḍ deg (u)fus.
Yal amdan ɣur-s azref ɣerd tudert, ɣer tlelli, ɣer laman n timmad-is.