Taɣaḍt n Jeḥḥa
Ala aglim ɣef yiɣsan
Taddart n Ruḍa mačči d tameqqrant, taxlijt tɛedda-as ma d taddart ur tewwiḍ ara. Teḍra yid-s am taɣaḍt-nni n Jeḥḥa nettat tfukk akk ala aglim ɣef yiɣsan. Mi tt-yewwi ɣer ssuq ad tt-issenz yiwen n umsewweq ur d-yezzi fell-as akken ad s-tt-isawem, ad tt-walin kan ad kemmlen abrid-nsen. Jeḥḥa d Jeḥḥa, ixemmem, ixemmem yedla ɣer lǧib-is yeddem-d lmitra, yis-s yebda yettqissi taɣaḍt-nni ines ifukken. Ad iwexxer fell-as snat n lmitrat ad d-yuɣal ɣur-s ad tt-iqiss seg yixef n uqamum-is ɣer yixef n tseṭṭa-s, ad yuɣal diɣen ɣer deffir ad tt-id-iṭill netta adaḍ-is ires ɣef nnaḍer-is amzun yettxemmim, ad yuɣal ɣer tbeɛbuct-is tis snat tikkal ad tt-iqiss seg tama wadda almi d tama ufella. Kra din akk i ixeddem ur yensir ara ɣef yimsewwqen i d-izzin am umeqyas ɣef Jeḥḥa d taɣaḍt-is.
Ttemsteqsayen d acu i ixeddem akka Jeḥḥa, yiwen ur yegzi d acu i sen-d-ittheggi win yennumen ittkellix-iten. Yiwen seg yimsewwqen-nni ɛni tawnaft-is tugar tiyiḍ yekker yuɣ taɣaḍt n Jeḥḥa maca s ccerṭ, ad as-d-imel ayɣer i yettqissi taɣaḍt-is. Jeḥḥa mi d-yeṭṭef isurdiyen-is yenna i winna yugin ad yesber : “Mi ttqissiɣ taɣaḍt-iw, qqareɣ-as win ad tt-yaɣen wissen ma d-yekkes seg-s azal n dderbuka neɣ azal n ubendayer !”
Jeḥḥa bu texba