TIMMƔURA N TMƔART tullisin n umyaru Ɛumaṛ AYT SƐID
TIMMƔURA N TMƔART
TIMMƔURA N TMƔART iga azwl n wamud n tullisin amzwaru n umyaru Ɛumaṛ AYT SƐID. Amud a digs 11 n tullist ibḍan xf 123 n tasna s uskkil n tlatiniyt, talɣa nns d tanammast. Iga as umyaru Ɛumaṛ Drwic tazwarayt. Yaru as umyaru Ḥamid ṬALIBI “ Awal d inigi”. Izzry as xf tutlayt Mass Ɛbd lɛali AYT ƐDDI, ismyaksil as tasniwin Mass Ḥassan Ṛukni, iga as unaẓuṛ Muḥa MLLAL tawlaft i wɣamus.
Azwl n tadla a n tullisin, yusy azwl n tullist taɣzzaft digs. Timmuɣra n tmɣart da ittnaɣ xf izrfan n tmɣart ittuslkan, tmɣart ittukndn, tamɣart tar amur aflla n wakal n tmazirt nns aynnaɣ as nn nufa ɛica ttuḥuz s agadir allig trura iɣf nns tga Muḥa g tullist nna mi yusy akkʷ wamud a azwl nns, afad ad d tamẓ amur nns s ufus nns.
Tiyira n umata n tullisin a yaru Mass AYT SƐID mdznt, gant akkʷ amdaz tkurnt s isurim, d ad ur nttettu is awd llant digsnt tullisin ign zund timṣḍṣitin isnyuddun cigan n tinditin n wamun amaziɣ.
tkʷlal tadla ddɣ n tullisin ad as ggadin imɣran, ttugn as iṣlaḍn n ufran.
Ar ssitimɣ annaz iɣudan i wmyaru nnɣ Ɛumaṛ AYT SƐID g ubaraz n tskla.
Moha Bensaine