Temẓi iɛeddan
Ttmektayeɣ-d ayen iɛeddan
Iruḥ uqerruy (de)g ttxamim
Allen-iw lesqent deg yitran
Ur iyi-icɣib zzhu d udrim
Ttmektayeɣ-d ayen iɛeddan
Anida-kem a temẓi-w?
Temɣer tceyyeb aqerruy-iw
Asmi i nella zik d arrac
Ɣur-neɣ yal ass d tafsut
Nteddu ddac ɛqac
Glilez a mmi ɣef tmurt
Nteddu ddac ɛqac
Glilez a mmi ɣef tmurt
Temẓi-inu tezga d turart
Temẓi tlehhu s tezmart
Fell-aɣ ur yettfakka wurar
Gar tzemmrin nettazzal
“Ma d azeqqur ad nqedder
Ma d tteryel ad nerwel!”
Fell-aɣ ur yettfakka wurar
Temẓi-inu terwa tazzla
Imiren tazmart tella
Seg wasmi i d-iṣubb (se)g dduḥ
Aqcic (de)g turart ur icuḥ
“Yemma Jida fuḥ fuḥ
Tečča acedluḥ ifuḥ!”
Temẓi-inu terwa taḍsa
D talaba n tayri i telsa
Taḍsa tella imeṭṭi ulac
Imi yezga d afermac
« Ay arrac iberurac
A tiqerray n yimcac! »
Taḍsa tella imeṭṭi ulac
Imi yezga d afermac
A wi yeqqimen d agrud
Temẓi ternuḍ-as afud
Ṭṭlam yeɣli ɣef tudrin
Neqqar-as i Muḥ yeggrin
“Ahya-k win d win
Isenṣalen aglim!”
Ṭṭlam yeɣli ɣef tudrin
Ameẓẓyan d bu texba
Tikelḥiwin s nnuba
Mi d-neɛdel nečča tamjuḍt
Nezzi merra (ɣe)f lkanun
Ad nsel i tmacahut n Blaɛjuṭ
D uɣbel n Zelguma yettrun
Nezzi merra (ɣe)f lkanun
Ad nsel i tmacahut n Blaɛjuṭ
Nettru ɣef temẓi iɛeddan
Tɛedda amzuni d targit
Ḥaca asaru-s i d-yeggran
Deg (u)qerruy, wi s-icfan yeffer-it .