Tesseɛreq abrid
Ad d-mmektin ayen srewten
Wissen ma ɣur-sen tafrit
Ad d-mmektin ayen srewten
Nwan ulac tameddit
Akken bɣan kan ad tt-wwten
Ma d kra i tettawi tbettit
Aman, ayefki d zzit
Taggara truḥ d isɣaren
Iliz-is iɛedda i wayyur
Cerwen-tt am tseṭṭa n uzemmur
Glan ula s yiferrawen
Tamurt, rẓan-tt deg (u)zagur
Ur tettadded ɣef yiḍarren
Ssaɣen-as times i uhicur
Iliz-is iɛedda i wayyur
Heggan-d akk anda ad rewlen
Tečča wid i tt-iḥemmlen
Tamurt-iw tuwi ddnub
Tečča wid i tt-iḥemmlen
Tefka lebɣi i ujerbub
D netta i tt-iseddawen
Ɣef uqadum-is tkubb
Cergen-tt wid terra d lerbub
Almi ur teswi dayen
Tuɣ abrid ur nessuffuɣ
Tikli-s mi tt-tebda tezleg
Tuɣ abrid ur nessuffuɣ
Asirem-is qqnen-t s rrebg
Ma d tamda n lebɣi-s tluɣ
Am ddjaj ɣef uẓru teddegdeg
Tenwa ɣef medden tedreg
S tssusmi-is agdud isuɣ
Ttleqqimen lekteb ad yaɣ
Ttleqqimen lekteb ad yaɣ
D tagi i d tafellaḥft-nsen
Aẓar, gullen ur d-itteffeɣ
Ddaw n tmurt ara t-neṭlen
Nnmara deg uẓar i tezdeɣ
Ass-a neɣ azekka ad d-yeffeɣ
Ad yeččar akk ilmawen
S upitrul igen tinnegnit
Allaɣ tezdeɣ teɣyulit
Yesquqer allaɣ n tidet
S upitrul igen tinnegnit
S yitran i yettɛebbi tayet
D tamurt i icedhan talwit
Seg zik nettat tettawi-t
Aqras yebɣan tafawet
Malek Houd