5yulyu(Semmus yulyu)
Semmus yulyu
Ass deg xemsa yulyu
Ay imeɣrasen n tmurt
Ɣef uḍar ad neddu
Deg ufus taseṭṭa n tzemmurt
Nebɣa tilelli ad d-tedlu
Nebɣa ad d-treẓ tawwurt
Nebɣa tamurt n tlelli
Nebɣa tamurt n yizerfan
Nebɣa leqder ad d-yili
Nugi tudert n waklan
Nebɣa lbaṭel ad yeɣli
Ad d-tuɣal tmurt i yimawlan
Taɣdemt nebɣa ad tager
Tamurt akk ad tt-id-tnadi
Nebɣa ad yeḥfu umger
Tudert taɣarmant ad d-temɣi
Asif n ddel ad t-nezger
Tamurt, tafat ad tt-id-twali.
Tilelli
D lǧemɛa ad neddez abrid
Di tmanya u rebɛin d agzdu
Nebges ad nesɣers lqid
D ayen nebɣa ad nezhu
Ass ad d-ilalen d ajdid
Agdud, lḥif ad s-yebru
Nebɣa tigduda tis snat
Nebɣa ad ɣ-telhu ddunit
Nugi itran neɣ tamart
Ad aɣ-sfungen talwit
D tamara ad d-tezzi tafat
D ayen neɛya deg twaɣit.
…. Tafat
Malek Houd