...... Blek
Blek d yimeddukal-is
Ma d netta d yimeddukal-is deg ukkuẓ yid-sen, Rabaḥ, Qadar, sliman d netta Yidir, xedmen yiwet n terbaɛt iman-is. Assaɣen yellan gar-asen qwan almi d tama-ihin akkin. Yiwen ur ittakk afus deg wayeḍ. Yiwen n uɛekkaz i ten-yewwten i rebɛa yid-sen, d arraw n yixeddamen n ufus, d iẓawaliyen akken ma llan. Meɛna ḥemmlen ad ɣren, ḥemmlen diɣ ad uraren ddabax n uḍar, ahat d ayen akka i ḥemmlen i rran d ttawil swayes i tettun llaẓ-nsen.
Ḥemmlen taqbaylit, ḥemmlen diɣen tasekla tafransist. Taɣuri n yidlisen d yiɣmisen s tutlayt tafransist tezga ɣur-sen, ɣef way-a i tt-ttselliken deg tmeslayt n Molière. Taɣuri n yijurnanen s wunuɣen ɣur-sen d tameɣra ladɣa assen ara d-yeffeɣ ujurnan BLEK. Meɛna ulac ɣur-sen dima idrimen swayes ara t-id-aɣen. Tikwal ma sɛan cwiṭ yal yiwen ad d-yebzer ayen iwimi yezmer. Ula d Ṭawes teggar-d iman-is imi baba-s ittakk-as-d cwiṭ n umesruf, nettat tettɛiwin imeddukal n Yidir. Acḥal d abrid i teɛkes fell-asen, idrimen ulac, nutni ilaq ad t-ɣren imi kan akka i t-ttrajun. Yuɣ lḥal uṭṭunen yezrin ɣran-ten akken ma llan, aneggaru d wis 52. Bɣan ad walin amek yettkemmil wullis deg wuṭṭun amaynut wis 53. Lebɣi n tɣuri meqqer, yiwen ur yezmir ad asen-t-yekkes. Ihi ayen i xeddmen diri-t maca terra-ten tmara. Iɣmisen ttrusun berra i tnedlist i ten-yessnuzun. Deg ukkuẓ yid-sen ggaren-d tasɣart anwa ara iruḥen ad d-yaker ajurnan uṭṭun wis 53 n BLEK. Wissen deg waniwa ad d-teɣli tesɣart-nni tawezzlant. Deg win tebɣu teɣli-d, ur ittuɣal ara ɣer deffir. Ad iruḥ ɣer tḥanut-nni, ad yerr iman-is yeqqar izwal n yiɣmisen i d-yeffɣen, lexbar kan ad d-yeddem ayen i t-yehman, ad t-yerr ddaw n tkebbuḍt-is, ibeddi din yekfa.
Ad yaweḍ kan s tɣawsa-nni i gubren, anda akken i t-ttrajun, ad d-berrḥen ɣef tikkelt : « Gedha ! Teddez, tebrez, taɣdaḍt teḍra-d ! » Ad ǧelben merra fell-as, wa ad t-icekkeḥ cwiṭ, wa ad t-id-yejbed seg tecḍaḍt n tkebbuḍt-is, wayeḍ s ufus-is ad iserfeq tidikelt n ufus-is. Ara yeɣren d amezwru ajurnan-nni d win i t-id-yukren, simira. Ggaren-d diɣen tasɣert anwa ara t-yeɣren d wis sin, d wis kraḍ, d wis ukkuẓ. Deg uslagan i gan, d aneggaru ara t-yerren ɣer wanda akken i t-id-ukren. Taɣuri deg ukkuẓ yid-sen tettekk yiwen n wass. Azekka-nni tanezzayt, uṭṭun wis 53 n BLEK, ilaq ad yuɣal s adeg-is mebla ma ifaq usenzay. Ḥsan akk d akken tukarḍa ur tlaq ara, meɛna ḥemmlen ad ɣren, ilaq ad t-ɣren.
Taɣuri n yiɣmisen am Blek tesselmad i umeɣri tutlayt n tefransist, tettrebbi-t diɣen. Ullis n Blek d yimeddukal-is Roddy d Uprufisur Occultis d yiwen n usebter n umezruy n Marikan deg taggara n lqern wis mraw d ṭam. Marikan tekkat ad tawi timunnet-is sdat n tgelda tabritanikt i tt-iḥekmen. Blek d terbaɛt-is d iseyyaden n ubkur i yuɣalen d iferfanen imeqqranen, ttnaɣen mgal Igniziyen, mgal iserdasen-nsen iwimi ssawalen tiqnedyar tizewwaɣin, akken ad idiren d ilelliyen deg tmurt-nsen. Blek, d netta i d aɣella-nsen, tiɣariwin akk yelhan yeddem-itent am teɣdemt, aḥezzeb, leqder ula n ucengu, tuṭṭfa n wawal, aḥuddu n win yettuḥeqren, tikkin d win iḍeɛfen, atg… Imeẓẓyanen yeqqaren Blek ssaramen ad uɣalen sya ɣer sdat am netta. Wissen kan ma ad yeqbel tukarḍa n ujurnan i d-iḥekkun fell-as akken ad ḥsun d acu akk i ixeddem ? Daɣ netta Yidir aṭas n tɣariwin i d-yuwi s ɣur asaḍ-a n ujurnan n wunuɣen am tebɣest, tifferfent, tayri d waṭas-nniḍen n tɣariwin yettarran amdan d win ḥemmlen ad ɛacren yimdanen-nniḍen.
Blek asaḍ