Tiɣirdemt d ugru
-Ḥemmleɣ wigi yesɛan tebɣest am kečč. I s-tenna tɣirdemt.
Amacahu, Rebbi ad tt-isselhu, ad tiɣzif amzun d asaru.
Zik-nni deg yiwet n teẓgi i yegzem yiwen wasif deg tlemmast-is, ttidiren aṭas n yiɣersiwen, gar-asen igra neɣ imqerqar.Wigi nezmer ad ten-naf ama deg waman ama deg lber. Mi ara kecmen daxel n waman, ttɣimin ddaqqes dinna, tessen neɣ ahat ttarwen timellalin-nsen.Ttuɣalen teffɣen-d iwakken ad snufsen azwu neɣ ad ččen kra n ubeɛɛuc iwimi d-yeɛreq ubrid.
Yiwet n tikkelt, tɛedda-d yiwet n tɣirdemt, d yelli-s n leḥram, ɣer teftis-nni anda ttidiren yigra-nni. Walan-tt kan bdan targigit seg tugdi nutni ttuɣalen ɣer deffir anda ur tezmir ara ad ten-taweḍ. Tiɣirdemt yessexlaɛen s tbeḥlust-is tuɛkift ɣer tama n sdat, teḥsa s wahruḥu i d-tesker deg yimqerqar isehlanen ur yeffiɣ ara ulwiweḍ n tfekkiwin-nsen. Ssnen akken iwata aɣersiw-ihin bu tsiqest ur nettqili yiwen ma yeqqes yiwen, d ssem-nni ara s-issureg mebla cceḥa, ad yexleḍ kan d yidammen ad iceyyeɛ bab-is s anda rrwaḥ yella, tuɣalin ulac, anda kullec yettfakka.
Acḥal deg yigra iwumi teḍra tedyant am ta, ɣef waya i ǧǧan ddeqs n lmitrat gar-asen d teɛdawt n Rebbi. Heggan akk iman-nsen ad ǧelban ɣer daxel n waman ad smenɛen tiqerray-nsen ma yella tuweḍ-iten-id.
Win yennum kra urǧin i t-yettu, dɣa tiɣirdemt tessenta tisiqest-is deg teglimt n ugru…
–Ur ttagadet ay imqerqar! Ur ttagadet! I sen-tenna tɣirdemt s tiẓeḍt n wawal. Usiɣ-d ad ssutreɣ deg yiwen seg-wen iwimi teqqur tasa ad iyi-izger asif ɣef uɛrur-is, acku, teẓram ur ssineɣ ara ad ccufɣeɣ yerna ilaq-iyi ad awḍeɣ akkin.
Yiwen ugru d ilemẓi, win akken yessnen ad izuxx i tizziwin-is, wehhan akk yiḍudan ɣur-s. D ayen, yenza yiri-s, ur yezmir ad yerr aḍar ɣer deffir, mačči ass-a ara yesseddrem akk ayen yebna acḥal aya, ilaq ad yizmir ad yexdem ayen akken yettreggim i yimeddukal-is ɣas ma tagnit n tikkelt-a ḥercawet cwiṭ.
Ihi, win iwimi fkan isem “Ccaṭer”, mebla lebɣi-s, yufa-d iman-is sdat n tin ur nreḥḥem ara imi t-id-sseggren yimeddukal-is ɣur-s.
-Ḥemmleɣ wigi yesɛan tebɣest am kečč. I s-tenna tɣirdemt.
-A wi kem-id-yesskecmen ɣer tasa-w ad twaliḍ amek i tettelwiwiḍ seg tugdi. I yenna deg wul-is Ccaṭer. Yuɣal almi yessaweḍ ad t-id-yali wawal. Yenna-as:
-Ad iyi-tɛahdeḍ s Rebbi ur iyi-teqqseḍ.
-Ɛuhdeɣ-k s Rebbi ur k-qqiseɣ, yerna ay aɛeggun, teẓriḍ ur s-ssineɣ ara i lɛumm. Amer ad k-qqseɣ, kečč ad temmteḍ nekk ad zedreɣ. Ɣer taggara ad aɣeɣ abrid ara tawiḍ.
… Yelli-s n lehram
– D ayen yellan, ur ḥsiɣ ara ad tenɣeḍ iman-im. I s-yerra mi t-id-yuɣal cwiṭ n tezweɣ ɣef wudem-is awraɣ yeffeɣ yidim, lxuf-nni i t-izedɣen yebda itekkes.
Mi d-mmezgen, tiɣirdemt tuli ɣef uɛrur n umqerqur izeɣben mi tnul aglim-is; kecmen s aman. Ccaṭer, lɛumm d tafellaḥt-is, yekkat s tqejjirin-is, yettcerrig aman am uɣerrabu. Mi uwḍen ɣer tlemmast n wasif anda i xejḍen nezzeh waman, tiɣirdemt ur d-ittwali umqerqur, yettbeddil wudem-is, ladɣa tuɣal kan amek i tettili tal tikkelt mi ara ad tɛeddi ad texdem ayen tennum txeddem-it: Tuqqsa. Akka i tt-id-yefka Rebbi, akka i d nettat, mačči deg ufus-is, ur tezmir ara ad tɛiwed, d agama-ines. Teḍra yid-s amzun d yiwen wafud udrig i tt-yettseggiren ad teg ayen iwumi i tt-id-yefka Rebbi: Ad teqqes. Ad d-tdegger ssem aqdim, ad t-tessureg deg tfekka n ugru ameɣbun.
Deg tallit-nni, iqmec-as Rebbi allen, amzun tesker, ur temlik ara iman-is. Tettu akk ma yella teqqes win akken i tt-ibbuben, ad yemmet, ma yemmut ad yezder, ma yezder ad yeglu yis-s acku ɣas ma mazal-itt d tamuddirt, ur tettaf ara ɣef wacu ar rsen yiḍarren-is.
Win yennum kra urǧin i t-yettu, dɣa tiɣirdemt tessenta tisiqest-is deg teglimt n ugru…
Agru meskin