... Tamegra
Tudert deg tudrin tetteddu almend n tsemhay
Tudert deg tudrin tetteddu almend n tsemhay. Tal tasemhuyt s tegnewt-is d lecɣal-is. Tafsut ddaqqes aya i teffeɣ. Werǧeǧǧi anza (9) n unebdu, seg wasmi yebda ccna-s ur yeḥbis. Deg wakken d azɣal, iṭij amzun iṣubb-d cwiṭ ɣer tmurt, dɣa netta igran n temẓin d yirden ḥeḍmen, yewweḍ-d lawan n tmegra-nsen.
Irgazen n taddart nnejmaɛen d agraw, awal yewwi-d ɣef tmegra n yigran n wat n taddart. Gren-d tasɣart seg wanwa iger ara bdun. Tasɣart tṣaḥ-d Dda Ɛacur Uciban. Imɣaren fkan-d urawen n lxir rnan-d lweɛd i uzekka ɣer wayla n Dda Ɛacur. Ihi tawacult n bab n wayla ad teqqim deg uxxam ad d-theggi učči n waɛwin ara n-tawi ɣer lexla mi ara izeggen wass. Ma d tiwaculin-nniḍen, argaz tameṭṭut, amger deg ufus, tabanta tɣumm idmaren d ddaw n wammas, ha-ten-id deg uɣeggad n Dda Ɛacur i d-yezgan tama n ugafa n taddart. Seg mi d-yuli wass, ifellaḥen d tfellaḥin ɛekfen am umger. Tal tarbaɛt n snat tmerwin n yiterrasen teṭṭef tirni tmegger timẓin. Afus azelmaḍ ad d-issemḥilleq i tgemmict n tyedrin s tama wadda, afus ayeffus ad iwwet s umger ad tt-id-yegzem. Tagemmict d tayeḍ ttuqalent d tadla ara icudd ufellaḥ u ad tt-idegger ɣef tmurt ad ternu ɣer tiyiḍ i yettugalen d lḥala mi ara timɣur tirect.
Mi ččan aɛwin-nni i d-yewwi Dda Ɛacur d imekli, ur rnin ara aṭas uɣalen yer tmegra. Maca azɣal d ɛeyyu ssefcalen tiḥerci n tnezzayt, amgeryuɣal ẓẓay, afus yuɣal ur yettaɣ awal.
ur rnin ara aṭas uɣalen yer tmegra
bu texba i ifaqen s wannect-a yenǧeɛ Leḥlu bab n wayla ad d-yecnu akken tabɣest yebdan tettaǧǧa ifellaḥen ad sen-d-tezzi. Nna Malḥa, tameṭṭut n Dda Ɛacur d mmi-tsen Leḥlu, sserḥen i taɣect-nsen s ṭṭelq n ugerjum:
Ay iwaziwen
Rebbi ad ken-iɛiwen
Kemmlet-ag-d tirni
Akka d asawen
Mḥend imegzi uḥric ibeddel-as akk i ccna-agi, netta yeqqar-as:
Ay iwaziwen
Rebbi ad ken-iɛiwen
Qasi d win iẓewren
Deg tmegra yugar-iken
Qasi mi yesla i lehdur am wi, Mḥend iwenneɛ-as acuffu n uqendur, dɣa yuɣal d mraw n yifellaḥen, ad s-tiniḍ tura kan i yebda lxedma. Imeddukal-is mi t-id-walan akken iɣeṭṭel-d acḥal d leḥwali, dɣa ɛunden-t. Send ad d-yeɣli yiṭij, tiyedrin n Dda Ɛacur yellan beddent tanezzayt uɣalent rsent d tirac tameddit. Iger-nni n ṣṣbeḥ rran-t yifellaḥen tameddit isettef d leḥwali n temẓin.
Ay iwaziwen Rebbi ad ken-iɛiwen Kemmlet-ag-d tirni Akka d asawen
Ass-a, iwaziwen dhan-d d yiger n Dda Ɛacur azekka d yiger n Dda Meqqran win akin d yiger n Nna Werdiya yiwet n taǧǧalt n taddart, akka alamma igran merra n taddart ad teḍru yid-sen am win n Dda Ɛacur.
Assen ara tfakk tmegra, s zzwayel, iserdyan d yiɣyal ara neqlen yifellaḥen timẓin deg yicebbaken ɣer ugni n Tɣalaḍt anda i ggten yinurar, anda ara tent-ssersen d taffa. Inurar ad qqimen zzint-asen-d taffwin n temẓin d yirden amzun ttrajun-tent ad d-kecment. D ayen ara yeḍrun imi inurar ttwaheggan, ttwaseggmen, ttwaɣerran s leɣbar. Afellaḥ s tazzert ad d-yessrusu timẓin seg taffa ɣer unnar. Yuɣ lḥal sin n yizgaren ikummen qqnen s umrar ɣer lmernuna, tigejdit ibedden deg tlemmast n unnar. Afellaḥ s uɛekkaz ad yettwehhi, izgaren ad tezzin ad sserwaten timẓin, amrar ad iberren i lmernuna. Deg tazwara izgaren ttilin deg ṭṭerf n unnar, skudmal amrar ad itezzi i lmernuna skudmal ttẓẓiẓin ɣer tlemmast n unnar. Imiren ad yuɣal ufellaḥ ad sen-ibeddel anamek n tuzzya. Yal ma rewtent temẓin, annar ad s-isseččay ufellaḥ timẓin seg taffa.Ma tama n ufella n unnar tenɣed ttqelliben-t s tuzzar. Asmi ara neɣdent akken i ilaq temẓin, ifellaḥen berrun-d i yizgaren, jemmɛen nneɛma d tirect deg unnar. Agni d amkan ɛlayen, tameddit n wass yettili-d lɛun, abeḥri swayes zuzuren yifellaḥen timẓin d yirden. Deg tazwara s tuzzar, mi ara tekkes ṭṭaqa n uclim d walim ttuɣalen imiren ɣer uzuzer s telwiḥt.Tikkelt ɣer tayeḍ ssirriwen-d tirect s yimeṣleḥ n umezzir neɣ n uẓebbuj, tekksen i lḥeb akerfa.Ɣer taggara maḍi tggerri-d tirect n temẓin i yesɛan cwiṭ kan n yixeclawen. Bab n temẓin ad d-yerfed lgelba ad yektil nneɛma, mi i ifukk ad tt-yerr ɣer daxel n teswalin ara ɛebbin yiɣyal s axxam. Imiren tamgart ad tt-terr deg yikufan. Bab n nneɛma yettektili ad iẓer acḥal i d-yerra uɣeggad-is d wayen ara ifek i yimegban d ccix n taddart. Aseggas-agi lxir yugar, ad tt-ikemmel kanakka Rebbi i dɛan yimɣaren n taddart.
Aserwet s yizgaren