Sliman Azem
Amedyaz ameqqran
Sliman Azem, acennay ameqqran n teqbaylit ilul deg Ugni Geɣran ass n 18 cṭember deg useggas 1918. Yemmut ass n 28 deg yennayer 1983 deg Moissac (Fransa). Dda Sliman d amedyaz ameqqran, tal tikkelt ara nsell i usefru n tuɣac-is nettmmekti-d Afransis Jean De La Fontaine bu tneqqisin.
S usefru-a, rriɣ-as tajmilt aseggas deffir n tmettant-is, ass n 27 yennayer 1984.
Dda Sliman
Ay afrux ifirelles
Ad k-ceyyɛeɣ ar Fransa
Ɣef uẓekka n uɣrib ers
Ad t-tafeḍ dayen yerka
(de)G uncib ɣer wayeḍ d iɣes
Imi-s yezɛef ur yettaḍsa
Zzɛaf yezɛef ur itekkes
Alamma yefna laɛmer
Lufan mazal-as iles
Ad d-yenṭeq ad d-yini ayɣer
Menyif ad iyi-tečč tmes
Wala ad neṭleɣ d lkeffar
Ḥṣiɣ d tidet i iyi-infan
Acḥal d amedyaz tenfa
Ufgen s iṭij deg (yi)genwan
Rɣan ɣlin-d ar lqaɛa
Tidet d lɛafya yerɣan
Ẓaẓneɣ-tt tečča-iyi nnekwa
Nniɣ-as terwi tebberwi
Yegguma ad d-yedher yixef-is
D asawen asif yettawi
A-t-an yeɛreq deg ubrid-is
Lekteb (de)g zzux yettleɣwi
Aṭas i yeldi deg yimi-s
Tidet mi teḥzen tettru
Tenna anwa ad i-yinin
Deg wawal neɣ deg usefru
Wid d-isellen ad akin
Taftilt-iw ur tettnusu
Ma tesmentagem-d i tergin
Ay afrux siweḍ-as lehna
Kkes zzɛaf ɣef yimi-s
Ini-as eḍs ur ttru ara
Tasuta teḍfer iswi-s
Tidet ur tettfakk ara
Tura i meqqer wazal-is
!Ay amqerqur n umdun