ⵍⵎⵖⵔⵉⴱ ⴷⴰ ⵉⵙⵎⴰⵢⵏⵓ ⴰⵙⴷⴷⵉⴷ ⵏ ⵓⵍⵜⴰⵖ ⵏⵏⵙ ⵙ ⵜⵙⵔⵜⵉⵜ ⵏ ⵛⵛⵉⵏⵡⴰ ⵜⴰⵎⵢⵉⵡⵏⵜ ⴰⵎ ⵜⵉⵔⵙⵍⵜ ⵉⵣⴳⴰⵏ ⵉ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ
ⵉⵙⵎⴰⵢⵏⵓ ⴰⵙⵙ ⴰⴷ ⵏ ⵓⴽⵡⴰⵙ ⴳ ⵛⵛⵉⵏⵡⴰ, ⴳ ⵢⴰⵏ ⵓⵙⵉⵡⴹ ⵏⵏⴰ ⴷ ⵉⵍⴽⵎⵏ MAP ⵎⴰⵙ ⴷ ⴰⵎⵏⴰⴷ ⴰⴷ ⵉⵣⴳⴰⵏ ⵉⴱⴷⴷ ⵅⴼ ⵉⵎⵏⵣⴰⵢⵏ ⵉⴷⵙⵍⴰⵏⵏ ⵉⴱⵕⵕⴰⵏⵏ ⵏ ⵜⴳⵍⴷⵉⵜ, ⵉⴳ ⵓⵣⴳⵓ, ⵜⴰⵎⴰⵙⴰⵢⵜ, ⵜⴰⵎⴰⴼⴰⵡⵜ ⴷ ⵓⵎⵢⴰⵡⴰⵙ ⵙⴳ ⵜⴼⵔⴰⵙ ⵏⵏⵙ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵣⴷⵉⵏ ⵙ ⵓⴱⴰⴹ ⴰⵏⴰⵎⵓⵔ, ⴷ ⵜⵎⵓⵏⵜ ⵜⴰⴽⴰⵍⴰⵏⵜ ⵏ ⵉⵡⴰⵏⴽⵏ ⴰⴽⴽⵯ ⵉⴳⵎⴰⵎⵏ ⴳ ⵜⵎⵜⵜⴰ ⵉⵎⵓⵏⵏ.
ⵉⵙⵎⴷ ⵓⵙⵉⵡⴹ » ⵜⴼⴽⴰ ⵜⴳⵍⴷⵉⵜ ⵏ ⵍⵎⵖⵔⵉⴱ ⵜⵉⵏⴷⵉ ⵜⴰⵅⴰⵜⴰⵔⵜ ⵏ ⵓⵙⴱⵓⵖⵍⵓ ⴷ ⵓⵙⵎⵙⵉ ⵏ ⵜⵣⴷⴰⵢⵉⵏ ⵏⵏⵙ ⴷ ⵜⴳⴷⵓⴷⴰⵏⵜ ⵏ ⵛⵛⵉⵏⵡⴰ ⵜⴰⵖⵔⴼⴰⵏⵜ ⴳ ⵢⵉⴳⵔⴰⵏ ⴰⴽⴽⵯ, ⵙ ⵓⵎⵙⴰⵙⴰ ⴷ ⵜⴰⵔⴰⵜⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ, ⴷ ⵓⵏⵙⵙⵉⵅⴼ ⵛⵉ ⵊⵉⵏ ⴱⵉⵏⴳ, ⵏⵏⴰ ⵉⵎⵙⴰⵙⴰⵏ ⵅⴼ ⵓⵙⵙⵕⵚⵓ ⵏ ⵜⵓⵛⵛⵔⴽⴰ ⵜⴰⵙⵜⵕⴰⵜⵉⵊⵉⵜ ⵜⴰⴳⵜⵉⵎⵏⴰⴷⵏ, ⵙ ⵓⵣⵎⵣⵣⵓ ⵏ ⵓⵔⵣⴰⴼ ⴰⵎⵣⵔⴰⵢ ⵏ ⴱⴰⴱ ⵏ ⵡⴰⴷⴷⵓⵔ ⵙ ⴱⵉⴽⵉⵏ ⴳ ⵎⴰⵢⵢⵓ 2016.
ⵜⵙⵙⵎⵏⵉⴷ ⵜⵎⵙⵇⴰⴷⵜ ⵜⴰⵎⵖⵔⵉⴱⵉⵜ ⵙ ⵓⵣⵎⵣⵣⵓ ⵏ ⵓⵙⴳⴳⵯⴰⵙ ⴰⵛⵉⵏⵡⵉ ⴰⵎⴰⵢⵏⵓ, ⵙ ⵉⵙⵙⵔⵖⵓⴷⵏ ⵏⵏⵙ ⵔⵖⴰⵏⵉⵏ, ⴷ ⵉⵙⵉⵜⴰⵎ ⴼⵓⵍⴽⵉⵏⵉⵏ, ⵙ ⵜⵣⵣⵉⴳⵣⵜ ⴷ ⵓⴱⵓⵖⵍⵓ ⵉ ⵜⵏⴱⴰⴹⵉⵏ ⴷ ⵓⵎⴰⴷⴰⵏ ⵏ ⵛⵛⵉⵏⵡⴰ ⵜⴰⵖⵔⴼⴰⵏⵜ, ⵜⵙⵉⵡⵍ ⴳ ⵜⵉⵣⵉ ⵢⴰⴽⵙⵓⵍⵏ ⵅⴼ ⵓⵙⵓⵏⴼⵓ ⵏⵏⵙ ⵎⵏⵉⴷ ⵏ ⵜⵣⴷⴰⵢⵉⵏ ⴷⵓⵙⵏⵉⵏ ⴷ ⵜⴷⴷⵓⴽⴽⵯⵍⴰ ⴷ ⵓⵎⵢⴰⵡⴰⵙ ⵉⵖⵓⴷⴰⵏ ⵏⵏⴰ ⵉⵙⵎⵓⵏⵏ ⵙⵏⴰⵜ ⵜⵎⵉⵣⴰⵜ ⴰⴷ ⵜⵉⵎⴷⴷⵓⴽⴽⵯⴰⵍ.
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ