ⵓⵏⴳⴰⵍ: ⵓⵎⵉⵏ ⵏ ⵎⴰⵙⵉⵏⵉⵙⵙⴰ
ⵉⵙⵙⴼⵓⵖ ⴷ ⵓⵎⴰⵔⴰ ⴰⴳⴰⴱⵓⵏⵉ ⵓⴳⵓⵙⵜ ⵏⴳⵓⵎⵓ ⴰⴷⵍⵉⵙ ⵏⵏⵙ ⴰⵎⵣⵡⴰⵔⵓ ⵉⴳⴰⵏ ⵓⵏⴳⴰⵍ ⵏ ⵓⵎⵣⵔⵓⵢ ⵎⵓ ⵉⵙⵜⵉ ⴰⵣⵡⵍ: ”ⵓⵎⵉⵏ ⵏ ⵎⴰⵙⵉⵏⵉⵙⵙⴰ”. ⵉⵜⵜⵢⵓⵔⴰ ⵓⴷⵍⵉⵙ ⴰⴷ ⵙ ⵜⵓⵜⵍⴰⵢⵜ ⵜⴰⴼⵕⴰⵏⵚⵉⵚⵜ.
ⵉⴳⴰ ⵓⴳⵓⵙⵜ ⵏⴳⵓⵎⵓ ⵢⴰⵏ ⵓⵎⴰⵔⴰ ⵉⵍⵓⵍⵏ ⵖ ⵜⵎⴰⵣⵉⵔⵜ ⵏ ⵍⴳⴰⴱⵓⵏ ⵖ 1970, ⴰⵔ ⵉⵙⵜⴰⵡⵀⵎⵎⴰ ⵙ ⵓⵎⵣⵔⵓⵢ ⴷ ⵜⴰⵏⵜⵔⵓⴱⵓⵍⵓⵊⵉⵜ ⴷ ⵜⴰⵔⴽⵢⵓⵍⵓⵊⵉⵜ ⵖⵎⴽ ⴰⵏⵏ ⴷ ⵜⵖⵓⵔⵉⵡⵉⵏ ⵏ ⵉⵎⴰⵍ, ⵉⴽⴽⴰ ⵜⵜⵉ ⵏⵏ ⵉⵙⵡⵓⵔⵉ ⵖ ⵢⵉⴳⵔ ⵓⵙⵍⵉⴳ ⴷⴰⵜ ⵎⴰⴷ ⵉⵙⵡⵓⵔⵉ ⵖ ⵢⵉⴳⵔ ⴰⴷⵉⴱⵍⵓⵎⴰⵙⵉ ⵍⵍⵉⵖ ⵉⴳⴰ ⴰⵎⵛⵛⵉⵡⵕ ⴰⴷⵉⴱⵍⵓⵎⴰⵙⵉ ⵖ ⵜⴰⵎⵓⵏⵜ ⵜⴰⴼⵔⵉⵇⵉⵜ ⵍⵍⵉ ⵉⴳⴰⵏ ⵢⴰⵜ ⵜⵎⴰⴷⴷⴰⵙⵜ ⵜⴰⵙⵔⵜⴰⵏⵜ ⵜⴰⵏⵎⵏⴰⴹⵜ.
ⵉⵏⵏⴰ ⵓⵎⴰⵔⴰ ⴰⴷ, ⵖ ⵓⵎⵙⴰⵡⴰⵍ ⴰⵏⵖⵎⴰⵙ ⵍⵍⵉ ⴷⵉⴷⵙ ⵉⵙⴽⵔ ⵢⴰⵏ ⵓⵙⵉⵜ ⵏ ⵍⵇⴱⴰⵢⵍ ⵎⴰⵙ ⵉⵡⴰⵜⵜⵙ, ⵙ ⵓⴷⵍⵉⵙ ⴰⴷ ⵏⵏⵙ ⴰⵎⴰⵢⵏⵓ ⵉⵙⴰⵡⴰⵍⵏ ⴼ ⵓⴳⵍⵍⵉⴷ ⴰⵎⴰⵣⵉⵖ ⴰⵇⴱⵓⵔ ⵎⴰⵙⵉⵏⵉⵙⵙⴰ, ⴰⴷ ⴷ ⵉⵔⴰⵔ ⵜⵓⴷⵔⵜ ⵉ ⵓⵎⵣⵔⵓⵢ ⵏ ⵉⴼⵔⵉⵇⵢⴰ, ⵉⴳ ⵓⵍⴰ ⵜⵉⵔⵎⵉⵜ ⴰⴷ ⵉⵎⵎⴰⵜⵜⵉ ⵓⵎⵣⵔⵓⵢ ⴰⴷ ⵙⴳ ⵜⵖⴰⵔⴰⵙⵜ ⵜⴰⵎⵉⵡⴰⵏⵜ ⵙ ⵜⵉⵔⵔⴰ.
ⵕⴰⵛⵉⴷ ⵓⵍⵃⵓⵙⴰⵢⵏ