ⵉⵏⴰⵡ ⴰⴳⵍⴷⴰⵏ 20 ⵖⵓⵛⵜ 2021 ⵙ ⵜⵎⵍⴷⴰ ⵏ ⵓⴽⵯⵜⵜⴰⵢ ⵡⵉⵙⵙ 68 ⵏ ⵜⴳⵔⴰⵡⵍⴰ ⵏ ⵓⴳⵍⵍⵉⴷ ⴷ ⵓⵖⵔⴼ
ⵜⵓⵎⴰⵢⵜ ⵉ ⵕⴱⴱⵉ, ⵜⴰⵥⴰⵍⵍⵉⵜ ⴷ ⵓⴼⵔⴰ ⴼ ⵓⵔⵇⵇⴰⵙ ⵏ ⵕⴱⴱⵉ…
ⴰⵖⵔⴼ ⵉⵏⵓ ⵉⵄⵣⵣⴰⵏ ,
ⵉⴳⴰ ⵓⴽⵯⵜⵜⴰⵢ ⵏ ⵜⴳⵔⴰⵡⵍⴰ ⵏ ⵓⴳⵍⵍⵉⴷ ⴷ ⵓⵖⵔⴼ ⵢⴰⵜ ⵜⵎⴽⵜⵉⵜ ⴰⴽⴽⵯ ⵢⵓⴼⵏ ⵏ ⵓⵙⴷⴷⵉⴷ ⵏ ⵉⵜⴳⴰⵔⵏ ⵏ ⵜⵖⵏⵙⴰ ⴷ ⵓⵙⵓⴼⵓ, ⵉ ⵜⵍⴻⵍⵍⵉ ⴷ ⵜⴷⵔⴼⵉⵜ ⵏ ⵡⴰⵎⵓⵏ ⴷ ⵜⵙⵉⵎⴰⵏⵜ.
ⵓⵔ ⵜⴳⵉ ⵖⴰⵙ ⵢⴰⵜ ⵜⵎⵙⴰⵔⵜ ⵜⴰⵎⵣⵔⵓⵢⴰⵏⵜ,ⵎⴰⵛⴰⵏ ⵢⴰⵜ ⵜⴳⵔⴰⵡⵍⴰ ⵜⴰⵙⵓⵍⴰⵏⵜ,ⵉ ⵜⵏⴰⴼⵓⵜ ⵏ ⵜⴰⵙⵓⵜⵉⵏ ⴼ ⵜⴰⵙⵓⵜⵉⵏ,ⵙ ⵢⴰⵏ ⵉⵎⴰⵏ ⵏ ⵜⵏⴰⵎⵓⵔⵜ ⵉⴷⵓⵙⵏ,ⵉ ⵓⵏⵣⴰⵖ ⵅⴼ ⵡⴰⵎⵓⵏ ⴷ ⵜⵎⵔⵙⴰⵍ ⵏⵏⵙ ⴷ ⵉⴳⵯⵔⵔⴰⵎⵏ ⵏⵏⵙ .
ⵎⴽⵍⵍⵉ ⴷ ⵢⵓⵛⴽⴰ ⴷⴰⵜ ⵏ ⵉⵙⵜⴰⵢⵏ ⵏⵏⴰⴷ ⵉⴷⴷⴰⵏ . ⵎⴽⵍⵍⵉ ⴷ ⵉⴷⴷⴰ ⴳ ⵢⴰⵜ ⵜⵉⵣⵉ ⴷ ⵜⴼⵔⴽⵜ ⵢⴰⴹⵏⵉⵏ ⵜⴰⵎⴰⵢⵏⵓⵜ ⵏ ⵉⵙⵏⴼⴰⵕⵏ ⵏ ⵓⵙⴳⴳⴷ, ⴳ ⵓⵣⵣⵓⴳⵣ ⵏ ⵓⵎⴷⵢⴰ ⴰⴳⴰⵎⴰⵏ,ⴷ ⵓⵙⵙⵖⵥⵏ ⵏ ⵜⵏⵜⵜⴰⵎⵜ ⵜⴰⵏⴰⵎⵓⵔⵜ ⵉ ⵜⴳⵎⵉ .
ⴳⵏ ⵉⵙⵜⴰⵢⵏ ⴰⴷ ⵡⵉⵍⵍⵉ ⵔⴰⴷ ⵉⵜⵜⵓⵙⴽⴰⵔ ⴳ ⵉⴳⵔ ⵏ ⵡⴰⵣⵔⴰⴼ ⴷ ⵓⵏⵎⵏⴰⴹ ⴳ ⵢⴰⵜ ⵜⵉⵣⵉ .
ⵎⴰ ⴰⴷ ⴰⴷ ⵉⵙⵙⴷⵓⵙⵏ ⴰⴷⵔⵓ ⵏ ⵜⴷⵉⵎⵓⵇⵕⴰⵟⵉⵜ ⴷ ⵜⵏⵡⵉ ⵏ ⵓⵙⴽⵓ ⴰⵙⵔⵜⴰⵏ ⴰⵎⵖⵔⵉⴱⵉ .
ⴰⵖⵔⴼ ⵉⵏⵓ ⵉⵄⵣⵣⴰⵏ,
ⵉⵙⵜⴰⵢⵏ ⵓⵔ ⴳⵉⵏ ⴰⵡⵜⵜⴰⵙ, ⵎⴰⵛⴰⵏ ⵜⴳⴰ ⵢⴰⵏ ⵉⵎⵉⵙⵙ ⵏ ⵓⵙⴽⵓ ⵏ ⵜⵎⵔⵙⴰⵍ ⵉⴷⵓⵙⵏ, ⵏⵏⴰ ⵉⵙⴽⴰⵔⵏ ⵜⵉⵏⴰⴼⵓⵜⵉⵏ ⵏ ⵉⵏⵎⵓⵔⵉⵏ,ⴰⵔ ⵏⵣⵣⵖⵏⵜ ⴼ ⵜⵎⵏⵜⵉⵍⵉⵏ ⵏ ⵡⴰⵎⵓⵏ .
ⴰⵛⴽⵓ ⵏⵖⴰⵍⵎⴰⵙⴷ ⴰⵡⴰⵏⴽ ⴰⵔ ⵉⵜⵜⴷⵓⵙ ⵙ ⵜⵎⵔⵙⴰⵍ ⵏⵏⵙ,ⴷ ⵓⵎⵙⴰⴷⴷⴰⵔ ⵏ ⵉⵜⴳⴰⵔⵏ ⵏⵏⵙ ⵉⵏⴰⵎⵓⵔⵏ. ⵡⴰⴷ ⴰⴷ ⵉⴳⴰⵏ ⵓⵍⵓⴼ ⵏⵏⵖ ⵏⵏⴰ ⵙ ⴰⵔ ⵏⴻⵏⵣⵣⵖ ⴼ ⵜⵎⴰⵣⵉⵔⵜ,ⴳ ⵜⵉⵣⵉ ⵏ ⵜⴰⵙⵙⴰⵙⵜ ⴷ ⵓⵙⴷⵉⴷⴷⵉⵢ .
ⵎⴰ ⴰⵏⵏ ⴰⴷ ⵉⵜⵜⵓⵙⵖⵥⴰⵏⵏ ⴳ ⵓⴱⴷⴰⴷ ⵎⵏⵉⴷ ⵏ ⵉⵙⵓⴳⵉⵜⵏ ,ⵏⵏⴰ ⵉⴱⵉⴷⴷⵏ ⴷⴰⵜ ⵏ ⵍⵎⵖⵔⵉⴱ,ⴳ ⵓⵣⵎⵣ ⴰⴷ ⴳ ⵏⵍⵍⴰ, ⴷⴰⵔ ⴽⵔⴰ ⵏ ⵜⵎⵓⵕⴰ ⴷ ⵜⵎⴰⴳⵔⴰⵡⵉⵏ ⵏⵏⴰ ⵉⵜⵜⵓⵙⵙⴰⵏⵏ ⵙ ⵜⵖⵡⵡⴰⵖⵜ ⵏⵏⵙ ⵎⵏⵉⴷ ⵏ ⵜⵎⴰⵣⵉⵔⵜ ⵏⵏⵖ .
ⵜⵜⵔⵙⵏⵜ ⵜⵉⵟⵟⴰⵡⵉⵏ ⵏ ⵡⵉⵢⵢⴰⴹ ⴼ ⵍⵎⵖⵔⵉⴱ ⵙ ⵓⵙⵔⴰⴳ ⵍⵍⵉⵖ ⵜⴳⴰ ⵢⴰⵜ ⵜⵎⴰⵣⵉⵔⵜ ⵜⴰⵣⴰⵢⴽⵓⵜ, ⵏⵏⴰ ⵉⵣⵔⵉⵏ ⵙⵉⵏ ⴷ ⵎⵔⴰⵡ ⵏ ⵜⴰⵙⵓⵜ, ⴷ ⵓⵎⵣⵔⵓⵢ ⵏⵏⵙ ⴰⵎⴰⵣⵉⵖ ⴰⵇⵇⴱⵓⵔ ;ⵉⴳⴰⵏ ⵜⴰⴳⵍⴷⵉⵜ ⵜⴰⵏⵎⵓⵔⵉⵜ, ⵙⴳ ⵎⴰⴷ ⵢⵓⵜⵉⵏ ⴽⴽⵓⵙⵟ ⵜⴰⵙⵓⵜⵉⵏ, ⴷ ⵜⵣⴷⴰⵢⵜ ⵉⴷⵓⵙⵏ ⵉⵍⵍⴰⵏ ⴳⵔ ⵓⴷⴰⴱⵓ ⴷ ⵓⵖⵔⴼ .
ⵍⵍⴰⵏⵜ ⵜⵉⵟⵟⴰⵡⵉⵏ ⵏ ⵡⵉⵢⵢⴰⴹ ⴼ ⵍⵎⵖⵔⵉⴱ ⵍⵍⵉⵖ ⴳⵉⵙ ⵜⴰⵏⴼⵔⵓⵜ ⴷ ⵓⵔⴳⴳⵉⴳ, ⵏⵏⴰ ⵓⵔ ⵉⵍⵉⵏ ⴰⵜⵉⴳ ,ⵙⵍⴰⵡⴰⵏ ⴰⴽⴽⵯ ⴳ ⵓⵣⵎⵣ ⵏ ⵜⵎⵅⴰⴱⴱⵍⵜ ⵏⵏⴰⵖ ⵉⴷⴷⵔ ⵓⵎⴰⴹⴰⵍ .
ⵎⵇⵇⴰⵔ ⵎⴽ ⴰⵏⵏ ⵍⵎⵖⵔⵉⴱ ⵜⵓⵎⴰⵢⵜ ⵏ ⵡⴰⴽⵓⵛ , ⵉⵜⵜⵓⵙⵙⴰⵏ ⵙ ⵡⴰⴷⴷⵓⵔ ⵏⵏⵙ ,ⵎⴰ ⴰⴷ ⵓⵔ ⴳⵉⵙ ⵜⵓⵔⴷⴰ, ⴷ ⵢⴰⵏ ⵓⵙⵟⵟⴰ ⵏ ⵜⵣⴷⴰⵢⵉⵏ ⵉⴷⵓⵙⵏ, ⵜⵜⵓⴼⴽⴰⵢⴰⵙ ⵜⴼⵍⵙⵜ ⴳ ⵉⵙⵡⵉⵔⵏ ⴰⴷⵖⵔⴰⵏ ⴷ ⵓⴳⵔⴰⵖⵍⴰⵏ .
ⴰⵖⵔⴼ ⵉⵏⵓ ⵉⵄⵣⵣⴰⵏ,
ⵜⵍⵍⴰ ⵢⴰⵜ ⵜⵖⵡⵡⴰⵖⵜ ⵉⴳⴳⵓⵜⵏ ⵎⵏⵉⴷ ⵏ ⵜⵎⵓⵕⴰ ⵏ ⵍⵎⵖⵔⵉⴱ ⴰⵎⵇⵕⴰⵏ .
ⵉⵏⵎⴳⴰⵍⵏ ⵏ ⵓⵎⵢⴰⵎⴰⵥ ⴷ ⵜⴰⵎⵓⵏⵜ ⵏ ⵜⴳⵍⴷⵉⵜ,ⴷⴰ ⵜⵜⴰⵡⵉⵏ ⴼ ⵉⵡⵏⵏⵉⵜⵏ ⵉⵣⵔⵉ ⵓⵣⵎⵣ, ⵓⵔ ⵔⵉⵏ ⴰⴷ ⵉⵖⴰⵎⴰ ⵍⵎⵖⵔⵉⴱ ⴷ ⵉⵍⴻⵍⵍⵉ ,ⴰⵎⴰⴷⵓⵙ ⵉⵍⴰⵏ ⴰⴷⴷⵓⵔ .
ⴷⵔⵓⵙⵏⵜ ⵜⵎⵓⵔⴰ ⵙⵍⴰⵡⴰⵏ ⴰⴽⴽⵯ ⵜⵉⵡⵕⵓⴱⴱⵉⵢⵉⵏ ⵏⵏⴰ ⵉⴳⴰⵏ ⵜⵉⵎⴷⵔⴰⵡⵉⵏ ⵜⵉⵜⵉⵇⵏⵉⵢⵉⵏ ,ⵏⵏⴰ ⵉⴳⴳⵯⴷⵏ ⴼ ⵜⵡⵡⵓⵔⵉⵡⵉⵏ ⵏⵏⵙⵏⵜ ⵜⵉⴷⵎⵙⴰⵏⵉⵏ ⴷ ⵉⴳⴰⴷⴰⵣⵏ ⵏⵏⵙⵏⵜ, ⴳ ⵜⵖⵔⵎⵜ ⵜⴰⵎⵖⵔⴰⴱⵉⵜ .
ⵎⴽⵍⵍⵉ ⵖⴰⵍⵏ ⵉⵎⵙⵜⴳⴳⴰⵔⵏ ⵏⵏⵙⵏⵜ ⵎⴰⵙⴷ ⴰⵎⵓⴽⵔⵉⵙ ⵓⵔ ⵉⵍⵍⵉ ⴳ ⵉⴷⴰⴱⵓⵜⵏ ⵏ ⵍⵎⵖⵔⵉⴱ ⴰⵎⵇⵕⴰⵏ,ⵎⴰⵛⴰⵏ ⴳ ⵜⵎⴰⴳⵔⴰⵡⵉⵏ ⵏⵏⴰ ⵉⴷⴷⵔⵏ ⵙ ⵎⴰⴷ ⵉⵣⵔⵉⵏ, ⵏⵏⴰ ⵓⵔ ⵉⵣⴹⴰⵕⵏ ⴰⴷ ⴷⴷⵓⵏⵜ ⴷ ⵓⴱⵓⵖⵍⵓ ⵏⵏⴰ ⵉⵍⵍⴰⵏ .
ⴳ ⵢⵉⵔⵏ ⴰⴷ ⵣⵔⵉⵏⵉⵏ ⵎⵍⴰⵏ ⵎⴰⵙⴷ ⵜⵉⵎⵉⵣⴰⵔ ⴰⴷ ⵛⵃⴰⵏⵜ ⴱⴰⵀⵔⴰ,ⴳ ⵓⵡⵇⵇⵕ ⵏ ⵜⵎⵔⵙⴰⵍ ⵏ ⵓⵡⴰⵏⴽ, ⴷ ⵜⵡⵡⵓⵔⵉⵡⵉⵏ ⵏⵏⵙ ⵜⵉⴷⵙⵍⴰⵏⵉⵏ .
ⵎⴰ ⴰⵏⵏ ⴰⴼ ⵔⴰⵏ ⴰⴷ ⵏⴳ ⵣⵓⵏⴷ ⵏⵜⵜⵏⵉ, ⵉⵔⵉⵏ ⴰⴷ ⵙⵙⵅⵙⵔⵏ ⴰⴷⴷⵓⵔ ⵏ ⵜⵎⵔⵙⴰⵍ ⵏⵏⵖ ⵍⵍⵉⵖ ⵉⵍⵍⴰ ⵢⴰⵏ ⵓⴱⵓⵖⵍⵓ ⴳ ⵉⴳⵔ ⵏ ⵓⵡⵇⵇⵕ ⵏ ⵉⵣⵔⴼⴰⵏ ⵏ ⵓⴼⴳⴰⵏ , ⵉⵔⵉⵏ ⴰⴷ ⵙⵙⵔⴽⵓⵏ ⴰⵙⵡⵉⵔ ⴷ ⵡⴰⴷⴷⵓⵔ ⵏⵏⵖ .
ⵓⴳⵉⵏ ⴰⴷ ⵔⵎⵙⵏ ⵎⴰⵙⴷ ⵜⵉⵎⵔⵙⴰⵍ ⵏ ⵓⵙⵏⵢⵓⴷⴷⵓ ⴷ ⵓⵙⵏⴼⵍ ⵏⴼⵍⵏⵜ, ⴰⵡⴰⵏⴽ ⵏⵏⵖ ⵉⵣⴹⴰⵕ ⴰⴷ ⵉⵙⵡⵓⴷⴷⵓ ⵜⵉⵡⵡⵓⵔⵉⵡⵉⵏ ⵏⵏⵙ,ⴷ ⴰⴷ ⵉⵙⵙⵔⵏⵓ ⵉⵙⵓⴳⴰⵎ ⵏⵏⵙ ⵉ ⵓⵖⵔⴼ .
ⵎⴰ ⴰⵏⵏ ⴰⴼ ⵣⵎⵔⵏⵜ ⴽⵉⴳⴰⵏ ⵏ ⵜⵏⴰⴼⵓⵜⵉⵏ,ⵙⵙⵎⵔⵙⵏ ⴽⵉⴳⴰⵏ ⵏ ⵜⵎⴰⵎⴽⵉⵏ ⴰⴼⴰⴷ ⴰⴷ ⵙⴽⵔⵏ ⵉⴱⴽⴽⵉⴹⵏ ⵉ ⵍⵎⵖⵔⵉⴱ ⴷ ⵜⵎⵉⵣⴰⵔ ⵢⴰⴹⵏⵉⵏ .
ⵉⵍⵉⵏ ⴽⵔⴰ ⵏ ⵉⵏⵇⵇⵉⵙⵏ ⵉⵣⵔⵉⵏ ⵉⵡⵓⵜⵜⴰ.ⴳ ⵓⴷⵖⴰⵔ ⵍⵍⵉⵖ ⵔⴰⴷ ⵜⵙⴽⵔ ⵜⴰⵏⴰⵍⵉⵜ ⵉ ⵓⵎⵙⴰⴷⴷⴰⵔ ⵏ ⵜⵣⵎⵎⴰⵔ ⵏ ⵍⵎⵖⵔⵉⴱ ⴷⴰⵜ ⵏ ⵜⵎⵓⵔⴰ ⵏ ⵜⵎⵏⴰⴹⵜ, ⵜⴼⴽⴰ ⵉⵏⵎⴰⵍⴰⵜⵏ ⴰⴼⴰⴷ ⴰⴷ ⵜⵙⴱⵉⴷⴷ ⵜⴰⵏⴼⵍⵉⵜ ⴷ ⵜⵡⴰⴷⴰ ⵏⵏⵙ ⵙ ⴽⵔⴰ ⵏ ⵉⴱⴽⴽⵉⴹⵏ ⴳⵔ ⴰⵙ ⴷ ⵜⵎⵉⵣⴰⵔ ⵜⵉⵎⵖⵔⴰⴱⵉⵢⵢⵉⵏ .
ⵎⴽⵍⵍⵉ ⵙⴽⵔⵏ ⵢⴰⵜ ⵜⵡⵍⴰⴼⵜ ⵉⴽⵏⴷⵏ ⴰⴼⴰⴷ ⴰⴷ ⵔⵡⵉⵏ ⴰⴷⴷⵓⵔ ⵏ ⵜⵎⵔⵙⴰⵍ ⵏ ⵜⵏⴼⵔⵓⵜ ⵏⵏⵖ, ⴳ ⵜⵏⴰⴼⵓⵜ ⵏⵏⵙ ⴼ ⵓⵃⵟⵟⵓ ⵏ ⵜⵏⴼⵔⵓⵜ ⴷ ⵓⵎⵙⴰⴷⴷⴰⵔ ⵏ ⵍⵎⵖⵔⵉⴱ, ⴷ ⵜⵡⵡⵓⵔⵉ ⵏⵏⵙ ⵜⴰⵎⴰⵣⴷⴰⴳⵜ ⵏⵏⴰ ⵜⵙⴽⴰⵔ ⴳ ⵓⵙⵡⵉⵔ ⴰⵏⵎⵏⴰⴹ ⴷ ⵓⴳⵔⴰⵖⵍⴰⵏ, ⵙ ⵓⵙⵖⵥⵏ ⵏ ⴽⵉⴳⴰⵏ ⵏ ⵉⵡⴰⵏⴽⵏ ⵙ ⵉⵅⴼⴰⵡⵏ ⵏⵏⵙⵏ .
ⵉⵣⴹⴰⵕ ⴰⴷ ⵉⴳ ⵓⵡⵏⵏⵉ ⵏ ⵜⵎⵓⵕⴰ ⴰⵏⵏ ⵜⴰⵍⵍⵉ ⵉⴽⴽⴰⵏ ⵎⵏⵉⴷ ⵏⵏⵖ, ⵙ ⵓⵙⵔⴰⴳ ⵍⵍⵉⵖ ⴰⵔ ⵜⵜⵙⵎⴰⴷ ⵉ ⵍⵎⵖⵔⵉⴱ ⴽⵔⴰ ⵏ ⵜⵣⵉⴹⴰⵕ ⴷ ⵜⵣⵎⵎⴰⵔ ⴰⴼ ⴰⴷ ⴰⴷ ⵜⵉⵍⵉ ⴳ ⵓⵙⵡⵉⵔ ⵏ ⵓⵏⵣⴰⵖ ⴼ ⵡⴰⵎⵓⵏ ⴷ ⵜⵏⴰⴼⵓⵜⵉⵏ ⵏⵏⵙ ⵜⵉⵎⴰⵜⴰⵢⵉⵏ .
ⵔⴰⴷ ⵏⵉⵏⵉ ⵎⴰⵙ ⵔⴰⴷ ⵏⵙⵎⴷ ⴰⴱⵔⵉⴷ ⵏⵏⵖ,ⵉⵔⴰ ⵡⴰⵏⵏⴰ ⵉⵔⴰⵏ,ⵢⴰⴳⵯⵉ ⵉⵏⵏⴰ ⵢⵓⴳⵉⵏ,ⵎⵇⵇⴰⵔ ⵖⵓⵍⴼⵏ ⵉⵎⵏⵎⴳⴰⵍⵏ .
ⴰⵖⵔⴼ ⵉⵏⵓ ⵉⵄⵣⵣⴰⵏ ,
ⵉⵍⵍⴰ ⵎⴰⴷ ⵉⵜⵜⵉⵏⵉⵏ ⵎⴰⵙⴷ ⵍⵎⵖⵔⵉⴱ ⵉⵍⵍⴰ ⵎⵏⵉⴷ ⵏ ⵉⵙⵓⴳⵉⵜⵏ ⴰⴷ ⵙ ⵓⵙⵔⴰⴳ ⵏ ⵓⵏⴼⴰⵍ ⵏ ⵓⴱⵔⵉⴷ ⵏⵏⵙ ⴰⵙⵔⵜⴰⵏ ⴷ ⵓⵙⵜⵕⴰⵜⵉⵊⵉ, ⴷ ⵜⵎⴰⵎⴽⵜ ⵏ ⵓⵙⵡⵓⴷⴷⵓ ⵏⵏⵙ ⴷ ⴽⵔⴰ ⵏ ⵜⵓⵎⴰⵏⵉⵏ ⵜⵉⴷⵉⴱⵍⵓⵎⴰⵙⵉⵢⵉⵏ, ⴳ ⵢⴰⵜ ⵜⵉⵣⵉ.
ⵎⴰ ⴰⴷ ⵓⵔ ⵉⵚⵃⵉ.ⵍⵎⵖⵔⵉⴱ ⵉⵏⴼⵍ ⵏⵉⵜ, ⵎⴰⵛⴰⵏ ⵓⵔⴷ ⵎⴽⵍⵍⵉ ⵙ ⵔⴰⵏ ; ⵙ ⵓⵙⵔⴰⴳ ⵍⵍⵉⵖ ⵓⵔ ⵉⵔⵉ ⵎⴰⴷ ⵉⵜⵜⴳⴳⵔⵏ ⵉ ⵉⵜⴳⴰⵔⵏ ⵏⵏⵙ ⴷ ⵜⵏⴰⴼⵓⵜⵉⵏ ⵏⵏⵙ ⵜⵉⵎⴰⵜⴰⵢⵉⵏ .
ⵢⵉⵔⵉ ⵏⵉⵜ ⴰⴷ ⵉⵙⴽⵔ ⵉⵙⵙⴷⵓⵙ ⵜⵉⵣⴷⴰⵢⵉⵏ ⵏⵏⵙ ⵙⵍⴰⵡⴰⵏ ⴰⴽⴽⵯ ⴷ ⵉⵡⴰⵏⴽⵏ ⵏ ⵜⴰⵎⴰ ⵏⵏⵙ .
ⵎⴰ ⴰⵏⵏ ⴰⴼ ⵏⵙⵡⵡⵓⵔⵉ ⴰⴷ ⵜ ⵏⵙⵙⴷⵓⵙ ⴰⵙⵙ ⴰⴷ, ⴳ ⵜⵣⴷⴰⵢⵜ ⵏⵏⵖ ⴷ ⵜⴷⴷⵊⴰⵕⵜ ⵏⵏⵖ ⵙⵙⴱⵍⵢⵓⵏ .
ⵉⴳⴰ ⵜⵉⴷⵜ ⵉⵙ ⵜⵣⵔⵉ ⵜⵣⴷⴰⵢⵜ ⴰⴷ ⴳ ⵢⴰⵏ ⵓⵏⵏⵓⴽⵎⵓ ⴳ ⵜⴳⵉⵔⵉⵡⵉⵏ ⴰⴷ ⵜⵙⵎⴷⵓⴷⵉ ⵜⴰⴼⵍⵙⵜ ⵏⵏⴰ ⵜⵜ ⵉⵏⵏ ⵉⴽⴽⴰⵏ , ⵜⵙⵔⵙ ⴽⵉⴳⴰⵏ ⵏ ⵉⵙⵇⵇⵙⵉⵜⵏ ⴼ ⵉⵎⴰⵍ ⵏⵏⵙ .
ⵎⴰⵛⴰⵏ ⵏⵙⵡⵡⵓⵔⵉ ⴷ ⵙⵙⴱⵍⵢⵓⵏ ⵙ ⵓⵙⵉⵙⴼⵉⵡ ⴷ ⵜⵎⴰⵙⴰⵢⵜ ⵉⴷⵔⴰⵏ .
ⵙ ⵓⵙⵎⴰⴷ ⵏ ⵉⵙⴽⵓⵜⵏ ⵉⵇⵇⴱⵓⵕⵏ,ⵏⵏⴰ ⵅⴼ ⵜⵙⴽⴰ,ⵏⵙⵡⵓⵔⵉ ⴰⵙⵙ ⴰⴷ ⵙ ⵓⵎⵙⴰⴷⴷⴰⵔ ⴰⵎⴰⵙⵙⴰⵔ ⵉ ⵜⵏⴰⴼⵓⵜ ⵏ ⵉⵡⴰⵏⴽⵏ ⴰⴷⴷⵊⴰⵕⵏ .
ⴹⴼⵕⵖ ⵙ ⵉⵅⴼ ⵉⵏⵓ, ⵙ ⵜⵖⴰⵔⴰⵙⵜ ⵜⵓⵙⵔⵉⴷⵜ,ⴰⵙⵡⵓⴷⴷⵓ ⵏ ⵓⵏⵢⴰⵍⴽⴰⵎ ⴷ ⵓⵙⴷⵓⵙ ⵏ ⵉⵎⵔⴰⵔⴰⵜⵏ .
ⵓⵔ ⵉⴳⵉ ⵓⵡⵜⵜⴰⵙ ⵏⵏⵖ ⴰⴷ ⵏⴼⴼⴰⵖ ⵖⴰⵔ ⴳ ⵜⴰⵙⵙⴰⵙⵜ ⴰⴷ, ⵎⴰⵛⴰⵏ ⴰⴷ ⵜⴳ ⵢⴰⵜ ⵜⵎⵍⴷⴰ ⵏ ⵓⵙⵉⵣⴷⵉⴳ ⵏ ⵉⵎⵔⴰⵔⴰⵜⵏ ⵏⵏⴰ ⵉⵍⵍⴰⵏ ⵅⴼ ⵜⵣⴷⴰⵢⵉⵏ ⴰⴷ .
ⵏⵣⵎⵔ ⵙ ⵢⴰⵏ ⵓⵙⵢⴰⴼⴰ ⵉⴷⵔⴰⵏ, ⴰⴼ ⴰⴷ ⴰⴷ ⵏⵙⵡⵡⵓⵔⵉ ⴷ ⵜⵡⵏⵏⴰⴹⵜ ⵜⴰⵙⴱⵍⵢⵓⵏⵉⵜ,ⴷ ⵓⵎⵣⵡⴰⵔ ⵏⵏⵙ ⵎⴰⵙⵙ Pedro Sanchez ,ⴰⴼⴰⴷ ⴰⴷ ⵏⵙⴽⵔ ⵢⴰⵏ ⵓⵣⵎⵣ ⵢⴰⴹⵏⵉⵏ ⵏ ⵜⵣⴷⴰⵢⵜ ⴷ ⵓⵣⵎⵣ ⴰⵎⴰⵢⵏⵓ,ⴳⵔⴰⵜⵏⵖ ⵙ ⵓⵙⴽⵓ ⵏ ⵜⴼⵍⵙⵜ ⴷ ⵜⵎⴰⴼⴰⵡⵜ ⴷ ⵓⵙⵏⴼⵍ,ⴷ ⵓⵙⵓⴼⵓ ⵙ ⵜⵎⵢⴰⵇⵇⴰⵏⵉⵏ .
ⵉⴳ ⵏⵉⵜ ⵜⴰⵣⴷⴰⵢⵜ ⵏⵏⴰ ⴼ ⵜⵜⵓⵙⴽⴰⵔⵏⵜ ⵜⵎⵢⴰⵇⵇⴰⵏⵉⵏ ⵏ ⵓⴷⵔⴰⵡ ⴳⵔ ⵍⵎⵖⵔⵉⴱ ⴷ ⴼⵕⴰⵏⵚⴰ, ⵏⵏⴰ ⵉⵢⵉ ⵉⵙⵎⵓⵏⴻⵏ ⴷ ⵎⴰⵙⵙ Emmanuel Macron , ⵜⵉⵣⴷⴰⵢⵉⵏ ⵏ ⵜⵉⴷⴷⵓⴽⵍⴰ ⴷ ⵓⵡⵇⵇⵕ ⵉⴷⵓⵙⵏ .
ⴰⵖⵔⴼ ⵉⵏⵓ ⵉⵄⵣⵣⴰⵏ,
ⵉⵖ ⵜⴳⴰ ⵜⴳⵔⴰⵡⵍⴰ ⵏ ⵓⴳⵍⵍⵉⴷ ⴷ ⵓⵖⵔⴼ ⵢⴰⵜ ⵜⵙⵓⵔⵉⴼⵜ ⵜⴰⵎⵣⵔⵓⵢⴰⵏⵜ,ⴳ ⵓⴱⵔⵉⴷ ⵏ ⵜⴷⵔⴼⵉⵜ ⵏ ⵍⵎⵖⵔⵉⴱ ⴷ ⵜⵙⵉⵎⴰⵏⵜ ⵏⵏⵙ,ⵏⴽⴽⵯⵏⵉ ⴰⵙⵙ ⴰⴷ ⵏⵍⵍⴰ ⵎⵏⵉⴷ ⵏ ⵢⴰⵜ ⵜⴼⵔⴽⵜ ⵜⴰⵎⴰⵢⵏⵓⵜ,ⵜⵙⵖⴰⵡⵙⴰ ⵙ ⵉⵎⴰⵏ ⵏ ⵜⵏⴰⴼⵓⵜ ⵏ ⵜⵉⴷⵜ,ⴰⴼⴰⴷ ⴰⴷ ⵏⵥⵥⵓ ⵏⴳ ⵎⴳⴰⵍ ⵏ ⵓⵏⴰⵣⴰⵕ ⴰⴳⵯⵏⵙⴰⵏ ⴷ ⵡⵉⵏ ⴱⵕⵕⴰ .
ⵔⴰⴷ ⵏⵙⴽⵔ ⵜⴰⵎⵍⴷⴰ ⴰⴷ ⴰⴼⴰⴷ ⴰⴷ ⵏⵉⵏⵉ ⵜⴰⵎⵍⵍⴰ ⵏ ⵡⴰⴽⵓⵛ ⵅⴼ ⵉⵎⴰⵏ ⵏ ⵉⵎⵙⴳⴳⴰⵢⵜⵓⵜⵏ ⵏ ⵡⴰⵎⵓⵏ ,ⴳⵉⵙⵏ ⴰⵏⴱⵔⴰⵣ ⵏ ⵜⵙⵉⵎⴰⵏⵜ , ⴷⴰⴷⴷⴰⵜⵏⵖ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵙⵎⵎⵓⵙ ⴷ ⵓⵙⵎⵓⵏ ⵏⵏⵙ ⴳ ⵜⵖⵏⵙⴰ ⴱⴰⴱⴰⵜⵏⵖ ⴰⴳⵍⵍⵉⴷ ⵍⵃⴰⵙⴰⵏ ⵡⵉⵙⵙ ⵙⵉⵏ ⴰⴷ ⵜⵏ ⵉⵡⴰⵍⴰ ⵕⴱⴱⵉ ⵙ ⵕⵕⵃⵎⵜ ⵏⵏⵙ.
ⴰⵙⵓⵖⵍ: ⵄⴰⴱⴷⵍⵡⴰⵃⴷ ⴱⵓⵎⵉⵚⵕ