ⴰⵏⴼⴰ: ⴰⵙⴳⴳⵯⴰⵙ ⴰⵎⵣⵡⴰⵔⵓ ⴼ ⵜⵎⵜⵜⴰⵏⵜ ⵏ ⵓⵎⵖⴰⵔ ⵃⵎⴰⴷ ⴷⵖⵉⵔⵏⵉ
ⵉⵙⵏⵎⴰⵍⴰ ⵓⵎⵓⵙⵙⵓ ⴰⵎⴰⵣⵉⵖ ⴳ ⵜⵖⵔⵎⵉⵏ ⵏ ⴰⵏⴼⴰ ⴷ ⵟⴰⵏⵊⴰ, ⴰⵙⴰⵎⴰⵙ 31 ⴽⵟⵓⴱⵕ 2021, ⴳ ⵜⴳⵎⵎⵉ ⵏ ⵓⵎⵙⵜⴰⵏ ⴳ ⵜⴳⵎⵎⵉ ⵜⵓⵎⵍⵉⵍⵜ ⵢⴰⵜ ⵜⵉⵏⴰⵡⵜ ⵉⴳⴰⵏ ⴰⵙⴼⵓⴳⵍⵓ ⵏ ⵓⵙⴳⴳⵯⴰⵙ ⴰⵎⵣⵡⴰⵔⵓ ⵏ ⵜⵎⵜⵜⴰⵏⵜ ⵏ ⵓⵎⵖⵏⴰⵙ ⴰⵎⴰⵣⵉⵖ ⴰⵎⵖⴰⵔ ⵃⵎⴰⴷ ⴷⵖⵉⵔⵏⵉ.
ⵜⴼⴽⴰ ⵎⴰⵙⵙⴰ ⴼⴰⵟⵉⵎⴰ ⵍⵎⵓⵅⵜⴰⵔⵉ ⵜⵓⵏⴰⵔⵓⵣ, ⵜⴰⴳⵏⵙⴰⵙⵜ ⵏ ⵓⵎⵓⵙⵙⵓ ⴰⵎⴰⵣⵉⵖ ⵖ ⵟⴰⵏⵊⴰ, ⵢⴰⵜ ⵜⴳⵓⵔⵉ ⴼ ⵉⵙⴼⴰⵙⴽⴰⵜⵏ ⵏ ⵓⵎⵖⵏⴰⵙ ⴰⵎⴰⵣⵉⵖ ⴰⵎⵖⴰⵔ ⵃⵎⴰⴷ ⴷⵖⵉⵔⵏⵉ ⴷ ⵓⴷⵖⴰⵔ ⵏⵏⵙ ⴰⵎⵇⵔⴰⵏ ⴳ ⵓⵎⵓⵙⵙⵓ ⴰⵎⴰⵣⵉⵖ.
ⵙ ⵉⵙⵎ ⵏ ⵜⴳⵔⴰⵡⵜ ⵏ ⵉⵎⵙⵜⴰⵏⵏ, ⵉⵙⴰⵡⵍ ⵎⴰⵙⵙ ⵎⵓⵃⴰⵎⵎⴰⴷ ⴰⵎⵖⴰⵔ ⴼ ⵃⵎⴰⴷ ⴷⵖⵉⵔⵏⵉ ⵍⵍⵉ ⵉⴳⴰⵏ ⵉⵡⵉⵙ ⵏ ⵉⴼⴼⵓⵙ ⵉⵥⴹⴰⵕⵏ ⴰⴷ ⵉⵍⴽⵎ ⴰⴷ ⵉⵖⵔ ⵖ ⵜⵖⵉⵡⴰⵏⵜ ⵏ ⵉⵣⵔⴼⴰⵏ, ⵉⵍⴽⵎ ⵓⵍⴰ ⴰⴷ ⵉⴳ ⴰⵎⵙⵜⴰⵏ ⵉⵎⵎⴰⵖⵏ ⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⴽⵔ ⵎⵏⵏⴰⵡⵜ ⵜⵡⵡⵓⵔⵉⵡⵉⵏ ⴳ ⵓⵎⵏⵉⴷ ⵏ ⵓⵎⵓⵙⵙⵓ ⴰⵎⴰⵣⵉⵖ ⵖ ⵓⴳⵯⵏⵙ ⴷ ⴱⵕⵕⴰ ⵏ ⵜⵎⴰⵣⵉⵔⵜ.
ⵢⵉⵡⵙ ⵖ ⵜⵉⵏⴰⵡⵜ ⴰⴷ ⵓⵍⴰ ⵎⴰⵙⵙ ⵃⵎⴰⴷ ⵍⵅⵏⴱⵓⴱⵉ ⵍⵍⵉ ⵉⵙⴰⵡⵍⵏ ⴼ ⵜⵉⵔⵎⵉⵜ ⵏ ⵜⵉⵔⵔⴰ ⴷ ⵓⵙⵡⵉⵏⴳⵎ ⴷⴰⵔ ⵓⵎⵖⴰⵔ ⵃⵎⴰⴷ ⴷⵖⵉⵔⵏⵉ ⵍⵍⵉ ⵉⵥⴹⴰⵕⵏ ⴰⴷ ⵢⴰⵔⴰ ⴳ ⵎⵏⵏⴰⵡ ⵉⴳⵔⴰⵏ ⵖ ⵉⵍⵍⴰ ⵓⵎⵣⵔⵓⵢ ⴷ ⵜⵙⴽⵍⴰ ⴷ ⵓⵙⵓⵖⵍ ⴷ ⵜⵙⵏⵉⵍⵙⵜ ⴷ ⵜⵙⵔⵜⵉⵜ…
ⵖ ⵓⵎⵏⵉⴷ ⵏⵏⵙ, ⵉⵙⴰⵡⵍ ⵎⴰⵙⵙ ⵃⵎⵎⵓ ⵍⵃⵙⵏⴰⵡⵉ ⴼ ⵓⴱⵔⵉⴷ ⵏ ⵜⵖⵏⵙⴰ ⴷⴰⵔ ⵃⵎⴰⴷ ⴷⵖⵉⵔⵏⵉ ⵖ ⵉⵍⵍⴰ ⵓⴱⴷⴷⴰⴷ ⵏⵏⵙ ⴷ ⵓⵎⵓⵙⵙⵓ ⴰⵎⴰⵣⵉⵖ ⴷ ⵓⵎⵓⵙⵙⵓ ⵏ ⴰⵔⵉⴼ ⴷ ⵜⵡⴰⴷⴰ ⵏ ⵡⴰⴽⴰⵍ ⵃⵎⴰ ⴰⴷ ⵢⵉⵍⵉ ⵓⵣⵔⴼ.
ⵖ ⵜⵙⴳⴰ ⵏⵏⵙ, ⵉⴷⵔⵓ ⵎⴰⵙⵙ ⵃⴰⵙⴰⵏ ⵉⴷⴱⵍⵇⴰⵙⵎ ⵜⵉⵔⵎⵉⵜ ⵏⵏⵙ ⴷ ⵎⴰⵙ ⵃⵎⴰⴷ ⴷⵖⵉⵔⵏⵉ ⵖ ⵎⴰⴷ ⵉⵥⵍⵉⵏ ⵙ ⵜⴷⴷⵓⴽⴽⵍⴰ ⴷ ⵜⵉⵖⵔⵉ ⴳ ⵜⵖⵔⵎⵜ ⵏ ⵜⵔⵓⴷⴰⵏⵜ ⴷ ⵓⵙⵡⵓⵔⵉ ⴳ ⵢⵉⴳⵔ ⵏ ⵜⵎⵙⵜⴰⵏⵜ.
ⵖⵎⴽ ⵍⵍⵉ ⵉⵙⴰⵡⵍ ⵎⴰⵙⵙ ⵄⴰⴱⴷⵍⵡⴰⵃⴷ ⴷⴰⵔⵡⵉⵛ ⴼ ⵡⵉⴷⴰ ⴳⴰⵏⵉⵏ ⵎⴳⴰⵍ ⵏ ⵜⵖⵏⵙⴰ ⵏ ⵃⵎⴰⴷ ⴷⵖⵉⵔⵏⵉ, ⵉⴱⴹⴰ ⵜⴰⵖⵏⵙ ⴰⵏⵏⵙ ⵙ ⴷⴰⵜ ⵏ 1991 ⴷ ⴷⴼⴼⵉⵔ ⵏⵏⵙ, ⵉⵙⴰⵡⵍ ⵓⵍⴰ ⴼ ⵎⵏⵏⴰⵡ ⵉⵎⵓⵙⵙⵓⵜⵏ ⵖ ⴱⴰⵀⵔⴰ ⵉⵙⵡⵓⵔⵉ ⵓⵎⵖⴰⵔ ⵃⵎⴰⴷ ⴷⵖⵉⵔⵏⵉ ⴳ ⵜⴳⵉⵔⴰ ⵏ ⵜⵓⴷⵔⵜ ⵏⵏⵙ ⵖ ⵜⵍⵍⴰ ⵜⵉⵏⵖⵉ ⵏ ⵉⵣⵎ ⴳ 2016 ⴷ ⵎⵓⵃⵙⵉⵏ ⴼⵉⴽⵔⵉ ⴳ 2017 ⴷ ⵓⵎⵓⵙⵙⵓ ⵏ ⴰⵔⵉⴼ ⴷ ⵜⵡⴰⴷⴰ ⵏ ⵡⴰⴽⴰⵍ.
ⵉⵙⴰⵡⵍ ⵓⵍⴰ ⵎⴰⵙⵙ ⵄⵓⵎⴰⵔ ⴷⴷⴰⵡⴷⵉ ⵍⵍⵉ ⵉⴼⴽⴰⵏ ⵉⵙⵉⵙⴼⵉⵡⵏ ⴼ ⵜⵡⵡⵓⵔⵉ ⵏ ⵃⵎⴰⴷ ⴷⵖⵉⵔⵏⵉ ⴷ ⴰⵎⵙⵜⴰⵏ ⴷ ⵓⵎⵙⴽⴰⵔ ⵏ ⵜⵉⵔⵎⵉⵜ ⵏ ⵓⴽⴰⴱⴰⵕ ⴰⴷⵉⵎⵓⵇⵔⴰⵟⵉ ⴰⵎⴰⵣⵉⵖ.
ⵉⵙⵎⴷ ⵎⴰⵙⵙ ⵎⵓⵏⵉⵔ ⴽⵊⵊⵉ ⵜⵉⴽⵛⵛⵓⵎⵉⵏ ⵙ ⵓⵙⵎⵏⵉⴷ ⵏ ⵜⵓⴳⴳⴰ ⵏ ⵎⴰⵙⵙ ⵎⵓⵃⴰⵎⵎⴰⴷ ⴱⵓⴷⵀⴰⵏ ⵍⵍⵉ ⵉⵥⵍⵉⵏ ⴰⴷ ⵉⵙⴰⵡⵍ ⴼ ⵓⴷⵍⵉⵙ ⵏ ⵃⵎⴰⴷ ⴷⵖⵉⵔⵏⵉ: »ⴰⵍⴱⴰⴷⵉⵍ ⴰⵍⴰⵎⴰⵣⵉⵖⵉ ».
ⴳ ⵜⴳⵉⵔⴰ, ⵜⵜⵓⴼⴽⴰⵏⵜ ⵎⵏⵏⴰⵡⵜ ⵜⵓⴳⴳⴰ ⴼ ⵜⵓⴷⵔⵜ ⴷ ⵓⴱⵔⵉⴷ ⵏ ⵜⵖⵏⵙⴰ ⵏ ⵓⵎⵖⴰⵔ ⵃⵎⴰⴷ ⴷⵖⵉⵔⵏⵉ, ⵜⵙⴰⵡⵍ ⴳⵉⵙⵏⵜ ⵜⵎⵖⴰⵔⵜ ⵏⵏⵙ ⵙ ⵢⵉⵙⵎ ⵏ ⵜⵓⵡⵊⴰ ⵏⵏⵙ, ⵜⵙⴰⵡⵍ ⵓⵍⴰ ⵎⴰⵙⵙⴰ ⴰⵎⵉⵏⴰ ⴱⵏⵛⵛⵉⵅ ⵍⵍⵉ ⵉⵏⵏⴰⵏ ⵎⴰⵙ ⵜⴳⴰ ⵜⵎⵙⴰⵔⵜ ⵏ ⵜⵎⵖⴰⵔⵜ ⵢⴰⵜ ⵖ ⵜⵎⵙⴰⵔⵉⵏ ⵍⵍⵉ ⴼ ⴱⴰⵀⵔⴰ ⵉⵎⵎⴰⵖ ⵃⵎⴰⴷ ⴷⵖⵉⵔⵏⵉ ⴳ ⵜⵓⴷⵔⵜ ⵏⵏⵙ, ⵖⵎⴽ ⵍⵍⵉ ⵉⵙⴰⵡⵍ ⵕⴰⵛⵉⴷ ⵔⴰⵅⴰ ⴼ ⵜⵉⵔⵎⵉⵜ ⵏ ⵜⵖⵏⵙⴰ ⴷ ⴷⵖⵉⵔⵏⵉ ⴳ ⵜⵎⴰⵣⵉⵔⵜ ⵏ ⵚⴱⴰⵏⵢⴰ.
ⵙⵎⵏⵉⴷⵏ ⵉⵎⴷⵢⴰⵣⵏ ⵎⴰⵙⵙ ⵍⵃⴰⵏⴰⴼⵉ ⴷ ⵎⴰⵙⵙⴰ ⵅⴰⴷⵉⵊⴰ ⵉⴽⴽⵏ ⵜⵉⵎⵢⴰⴷⵉⵣⵉⵏ ⵙ ⵜⵎⵍⴷⴰ ⴰⴷ.