ⴰⵏⵎⵓⵇⵇⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⴷ ⵉⴱⵕⵍⴰⵎⵏⴰⵏⵉⵢⵏ ⵉⴱⴰⵚⴽⵉⵢⵏ ⴷ ⵉⴽⴰⵟⴰⵍⵓⵏⵉⵢⵏ
ⵉⵍⵍⴰ ⵓⴽⴰⴱⴰⵕ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⴳ ⵓⵙⵏⵓⴱⴳ ⵏ ⵎⵏⵏⴰⵡⵜ ⵜⵔⵓⴱⴱⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⴽⴰⴱⴰⵕ ⵉⵙⵎⵓⵏⵏ ⵎⴰⵙⵙ ⵕⴰⵛⵉⴷ ⵔⴰⵅⴰ ⴰⵎⵖⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⴷ ⵓⵏⵙⵙⵉⵅⴼ ⵏ ⵡⴰⵢⵢⴰⵢ ⵏ ⴷⴷⵣⴰⵢⵔ ⵎⴰⵙⵙ ⵅⴰⴹⵉⵕ ⵙⴽⵓⵜⵉ ⴷ ⵎⴰⵙⵙⴰ ⴰⵎⵉⵏⴰ ⴱⵏⵛⵛⵉⵅ ⵜⴰⵏⵙⵙⵉⵅⴼⵜ ⵏ ⵡⴰⵢⵢⴰⵡ ⵏ ⵍⵎⵖⵔⵉⴱ ⴷ ⵎⴰⵙⵙⴰ ⵏⴰⵣⵉⵀⴰ ⴰⵍⵉⴷⵔⵉⵙⵉ ⴷ ⴷⵓⴽⵜⵓⵕ ⴰⵏⵟⵓⵏⵢⵓ ⴰⵔⵏⵉⵣ ⴼⵉⵍⵉⵏⴰ. ⵜⵙⵏⵓⴱⴳ ⵜⵏ ⵜⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⵏ ⵉⵙⴽⵢⵉⵔⴰ ⵔⵉⴱⵓⴱⵍⵉⴽⴰⵏⴰ ⴷⵉ ⴽⴰⵟⴰⵍⴰⵏⵉⵢⴰ ⴷ ⵓⴳⵔⴰⵡ ⴰⴽⴰⵟⴰⵍⵓⵏⵉ ⴷ ⵓⴽⴰⴱⴰⵕ ⴰⵏⴰⵎⵓⵔ ⵏ ⵍⴱⴰⵚⴽ, ⵓⵙⵙⴰⵏ ⵏ 10 ⴷ 11 ⵏⵓⵡⴰⵏⴱⵉⵔ 2021.
ⵉⵍⵍⴰ ⴳ ⵓⵏⵎⵓⵇⵇⴰⵔ ⴰⴷ ⵓⵎⴹⴰⴽⴰⵕ ⵏ ⵜⵓⴳⵜ ⵏ ⵉⵎⵔⵙⵉⵡⵏ, ⴳⵉⵙⵏ ⴰⵙⵉⵙⵙⵏ ⵏ ⵓⵡⴰⵏⴽ ⵏ ⵚⴱⴰⵏⵢⴰ ⵙ ⵓⵙⵎⵔⵙ ⵏ ⵉⴳⴰⵣⵏ ⵉⴽⵉⵎⴰⵡⵉⵢⵏ ⴳ ⵜⵎⴰⵖⵜ ⵏ ⵔⵔⵉⴼ, ⵖⵎⴽ ⴰⵏⵏ ⴰⴼ ⵉⵜⵜⵔ ⵓⴽⴰⴱⴰⵕ ⴰⵎⴰⵣⵉⵖ ⴰⵙⵏⴰⵍ ⵏ ⵉⵎⵙⴽⴰⵔⵏ ⴳ ⵚⴱⴰⵏⵢⴰ ⵃⵎⴰ ⴰⴷ ⵉⵙⵙⵏ ⵓⵡⴰⵏⴽ ⵏⵏⵙⵏ ⵙ ⵜⵎⴰⵙⴰⵢⵜ ⵏⵏⵙ ⵎⵏⵉⴷ ⵏ ⵉⵎⵣⴷⴰⵖⵏ ⵏ ⵔⵔⵉⴼ.
ⵙⴰⵡⵍⵏ ⴽⵓ ⵉⵎⵓⵔⴰ ⴼ ⵓⵎⵢⴰⵡⴰⵙ ⵏⵏⵙⵏ ⵎⵏⵉⴷ ⵏ ⵓⵎⴰⴷⴰⵏ ⴰⵎⴰⵣⵉⵖ ⴳ ⵜⵙⴳⴰ ⵏ ⵔⵔⵉⴼ, ⵉⵏⵉⵏ ⵎⴰⵙ ⵔⴰⴷ ⵏⵏ ⴳⵉⵏⵏ ⵜⵓⴳⴳⴰⵙ ⵏⵏⵙⵏ ⵉ ⴽⵉⴳⴰⵏ ⵏ ⵜⵎⵙⴽⴰⵔ ⵖ ⵉⵍⵍⴰ ⵓⵙⵏⴼⵍ ⵏ ⵓⵙⵍⴳⵏ ⵏ ⵜⵎⴽⵯⵜⵉⵜ ⵜⴰⴷⵉⵎⵓⵇⵔⴰⵟⵉⵜ, ⴷ ⵓⵎⵢⴰⵡⴰⴹ ⴰⴽⴷ ⵜⴰⵏⴱⴰⴹⵜ ⴷ ⵓⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⵃⵎⴰ ⴰⴷ ⵜⵉⵍⵉ ⵜⵣⵔⴼⵜ ⴷ ⵓⴱⴷⴷⴰⴷ ⴰⴽⴷ ⵉⵎⵏⴳⴰⵙⵏ ⵏ ⵜⵎⴰⵖⵜ ⴰⴷ ⴼ ⵜⵣⵔⵉ ⵜⴰⵙⵓⵜ ⵏ ⵉⵙⴳⴳⵯⴰⵙⵏ.
ⴳ ⵓⵏⵎⵓⵇⵇⴰⵔ ⵊⴰⵔ ⵉⵎⵓⵔⴰ ⵉⴱⴰⵚⴽⵉⵢⵏ ⴷ ⵉⴽⴰⵟⴰⵍⵓⵏⵉⵢⵏ ⴷ ⵉⴳⵏⵙⴰⵙⵏ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ, ⵉⵍⵍⴰ ⵓⵎⴹⴰⴽⴰⵕ ⵓⵍⴰ ⴼ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵙⴳⴳⵉⵡⵉⵏ ⵖ ⵉⵍⵍⴰ ⵓⵏⴱⴰⴹ ⴰⵏⵉⵎⴰⵏ, ⵖⵎⴽ ⴰⵏⵏ ⴷ ⵓⵙⵓⴷⵙ ⵏ ⵜⵉⵍⴰⵍ ⵜⵉⴷⵍⵙⴰⵏⵉⵏ ⵍⵍⵉ ⵥⴹⴰⵕⵏⵉⵏ ⴰⴷ ⵎⵍⵉⵏⵜ ⵜⵉⵣⴷⴰⵢⵉⵏ ⵙⵎⵓⵏⵏⵉⵏ ⵊⴰⵔ ⵉⵎⴰⴷⴰⵏ ⵏ ⵢⵉⵍ ⵓⵎⵍⵉⵍ ⴰⵏⴰⵎⵎⴰⵙ.