ⴰⵍⵖⵓ ⴰⵎⴳⴳⴰⵔⵓ ⵏ ⵓⴳⵔⴰⵡ ⵡⵉⵙ ⵎⵔⴰⵡ ⵏ ⵉⵎⴰⵣⵉⵖⵏ ⵏ ⵓⵎⴰⴹⴰⵍ
ⴳ ⵓⵙⴰⵜⵉ ⵏ ⵜⵎⵔⴰⵡⵜ ⵜⴰⴳⵔⴰⵖⵍⴰⵏⵜ ⵏ ⵜⵓⵜⵍⴰⵢⵉⵏ ⵏ ⵉⵎⴰⴷⴰⵏⵏ ⵉⵎⵣⵡⵓⵔⴰ 2022-2032, ⴷⴷⵓ ⵜⵎⴰⵜⴰⵔⵜ:”ⵎⴰⵏ ⵉⵙⵡⵓⴷⴷⵓⵜⵏ ⵉⵖⴰⵡⴰⵍⵏ ⵉ ⵓⴼⵔⴰⴳ ⴷ ⵓⵙⵙⵉⴷⵔ ⴷ ⵓⵙⴷⵓⵙ ⵏ ⵜⵓⵜⵍⴰⵢⵜ ⵜⴰⵎⵣⵡⴰⵔⵓⵜ ⵏ ⵉⵎⵣⴷⴰⵖⵏ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⴷ ⵜⵙⴳⴰ ⵏ ⵙⴰⵃⵉⵍ”, ⵙ ⵓⵎⵢⴰⵡⴰⵙ ⴰⴽⴷ ⴰⵖⵎⵉⵙ “ⴰⵎⴰⴹⴰⵍ ⴰⵎⴰⵣⵉⵖ” ⴷ ⵜⵎⵙⵎⵓⵏⵜ “ⵜⴰⵔⵡⴰ ⵏ ⵜⵉⵏⵉⵔⵉ”, ⴷ ⵓⵙⵏⴰⵍ ⵏ ⵜⵎⴰⴷⴷⴰⵙⵜ ⴼⵔⵉⴷⵉⵔⵉⵛ ⵏⵢⵓⵎⴰⵏ ⵉ ⵜⵍⴻⵍⵍⵉ, ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ, ⵜⴰⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵡⴰⵔⵜⵓⵏⴱⵉⴹⵜ ⵉ ⵓⵎⵣⴰⵖ ⵏ ⵉⵣⵔⴼⴰⵏ ⵏ ⵓⵎⴰⴷⴰⵏ ⴰⵎⴰⵣⵉⵖ, ⴰⴳⵔⴰⵡ ⵡⵉⵙ ⵎⵔⴰⵡ ⵏ ⵉⵎⴰⵣⵉⵖⵏ ⵏ ⵓⵎⴰⴹⴰⵍ ⴳ ⵜⴳⵔⴰⵡⵜ ⵏ ⵜⵔⵎⵉⴳⵜ ⴳ ⵜⵖⵔⵎⵜ ⵏ ⵡⴰⵔⵣⴰⵣⴰⵜ ⵙⴳ 25 ⴰⵔ 27 ⵎⴰⵕⵚ 2022/2972.
ⵃⴰⴹⵔⵏ ⴳ ⵓⴳⵔⴰⵡ ⴰⴷ ⴽⵉⴳⴰⵏ ⵏ ⵉⵎⵖⵏⴰⵙⵏ ⴷ ⵜⵎⵖⵏⴰⵙⵉⵏ ⴷ ⵉⴳⵏⵙⴰⵙⵏ ⵏ ⵜⵎⵙⵎⵓⵏⵉⵏ ⵜⵉⵎⴰⵣⵉⵖⵉⵏ ⵙⴳ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⴷ ⴱⵕⵕⴰ ⵏⵏⵙ, ⴷ ⵉⴳⵏⵙⴰⵙⵏ ⵏ ⵉⵎⴰⴷⴰⵏⵏ ⵉⵎⴷⴷⵓⴽⴽⵯⴰⵍ ⵙⴳ ⴳⵉⵙⵏ ⵎⴰⵙⵙⴰ ⵎⴰⵔⵢⴰ ⴷⴰⵏⵜⴰⵙ (ⴰⴽⴰⴱⴰⵕ ⴰⴳⴷⵓⴷⴰⵏ ⴰⴽⴰⵟⴰⵍⴰⵏⵉ), ⴷ ⵎⴰⵙⵙⴰ ⴽⴰⵔⵢⵓⵏⴰ ⵉⵢⴰⵎⵓⵍⴰ ⴷⵓⵙⴰ (ⴰⴽⴰⴱⴰⵕ ⵏ ⵎⴰⵕⵕⴰ ⵏⵏⵖ ⴰⴽⴷ ⴽⴰⵟⴰⵍⴰⵏⵓⵢⴰ, ⴷ ⵉⴽⵓⵔⴷⵉⵢⵏ (ⵎⴰⵙⵙ ⴱⵕⴰⵀⵉⵎ ⵃⵉⴽⵎⴰ) ⴷ ⵉⴳⵎⴰⵎⵏ ⵏ ⵜⴰⵡⵊⵉⵡⵉⵏ ⵏ ⵜⵏⵣⴱⴰⵢⵜ ⴷ ⵓⵙⵔⴷⴰⵙ ⵏ ⵓⵙⵍⴻⵍⵍⵉ ⴰⵏⴰⵎⵓⵔ ⴰⵎⵖⵔⵉⴱⵉ ⴳⵉⵙⵏ ⵎⴰⵙⵙ ⵅⴰⵍⵉⵍ ⵍⵎⵙⴰⵄⴷⵉ, ⵎⴰⵙⵙ ⵅⴰⴹⵉⵕⵉⵟⵓ ⵎⵃⵏⴷ ⵃⴰⵎⵓⵜⵉ, ⵎⴰⵙⵙ ⵎⵓⵃⴰⵎⵎⴰⴷ ⵛⵟⴰⵟⵓ, ⵎⴰⵙⵙⴰ ⴰⵎⵉⵏⴰ ⴱⵏ ⵛⵛⵉⵅ, ⴷ ⵉⵡⵔⵉⴽⵏ ⵙⴳ ⴷⴷⵣⴰⵢⵔ ⴳⵉⵙⵏ ⵎⴰⵙⵙ ⵀⵉⵛⴰⵎ ⵄⴰⴱⴱⵓⴷ…
ⴰⵔ ⵉⵙⵏⵉⵎⵎⵉⵔ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⴽⵓ ⵉⵎⴷⵔⴰⵡⵏ ⵙⴳ ⵜⴰⵎⴰⵣⵖⴰ ⴷ ⵓⵕⵓⴱⴱⴰ, ⵖⵎⴽ ⴰⵏⵏ ⵓⵍⴰ ⵜⵉⵏⴱⴰⴹⵉⵏ ⵜⵉⴷⵖⴰⵔⴰⵏⵉⵏ, ⵙⵍⴰⵡⴰⵏ ⴰⴽⴽⵯ ⵎⴰⵙⵙ ⴰⴱⵕⵍⴰⵎⴰⵏⵉ ⵢⵓⵙⵓⴼ ⵛⵉⵔⵉ ⴰⵏⵙⵙⵉⵅⴼ ⵏ ⵜⴳⵔⴰⵡⵜ ⵏ ⵜⴰⵔⵎⵉⴳⵜ, ⴷ ⵡⵉⴷⴰ ⵉⵡⵙⵏⵉⵏ ⴳ ⵓⵎⵓⵔⵙ ⵏ ⵓⴳⵔⴰⵡ ⴰⴷ ⵡⵉⵙ ⵎⵔⴰⵡ.
ⴳ ⵜⵣⵡⵉⵔⵉ, ⵉⵙⵎⵏⵉⴷ ⵓⵏⵙⵙⵉⵅⴼ ⵉⵣⵔⵉⵏ ⵏ ⵓⴳⵔⴰⵡ ⵎⴰⵙⵙ ⵕⴰⵛⵉⴷ ⵕⴰⵅⴰ ⵜⴰⴳⵓⵔⵉ ⵏⵏⵙ, ⵢⵉⵍⵉ ⵓⵍⴰ ⵓⵙⵎⵖⵔ ⵏ ⴽⵉⴳⴰⵏ ⵏ ⵉⵡⵔⵉⴽⵏ ⵉⵎⴰⵣⵉⵖⵏ ⴳⵉⵙⵏ: ⵎⴰⵙⵙⴰ ⴱⵍⵇⵉⵙ ⴰⵏⵚⴰⵕⵉ ⵜⴰⵏⵙⵙⵉⵅⴼⵜ ⵏ ⵜⵎⵔⵙⵍⵜ ⵎⵓⵃⴰⵎⵎⴰⴷ ⵄⵍⵉ ⴰⴳ ⵄⵍⵉ ⵟⴰⵀⵉⵕ ⴰⵏⵚⴰⵕⵉ, ⵎⴰⵙⵙ ⵃⴰⵎⴰ ⴰⴳ ⵎⴰⵃⵎⵓⴷ ⴰⵎⴰⵡⵙⴰⵙ ⵉⵣⵔⵉⵏ ⵙⴳ ⵉⵎⵓⵀⴰⵖ, ⵎⴰⵙⵙ ⵎⵓⵃⴰⵎⴰⵎⴷ ⵎⴰⵎⵎⴰⴷ, ⴰⵎⵏⵀⴰⵍ ⵏ ⵜⴱⴰⴷⵓⵜ ⵏ ⵜⵎⴰⵣⵉⵖⵜ, ⵎⴰⵙⵙ ⴱⵕⴰⵀⵉⵎ ⴰⵇⴷⵉⵎ ⵙⴳ ⵍⵎⵖⵔⵉⴱ, ⵎⴰⵙⵙ ⵄⵍⵉ ⴰⵢⵜ ⵊⵓⴷⵉ ⴰⵏⵙⵙⵉⵅⴼⵜ ⵏ ⵜⵎⴰⴷⴷⴰⵙⵜ ⵜⴰⴷⵣⴰⵢⵔⵉⵜ “ⵔⵉⴱⵓⵙⵜ ⵉⵏⵜⴻⵔⵏⴰⵙⵢⵓⵏⴰⵍ”, ⵎⴰⵙⵙ ⵏⵓⵔⵉ ⵏⵉⵎⵔⵉ ⵙⴳ ⵜⵓⵏⵙ, ⵎⴰⵙⵙ ⵎⵓⵃⴰⵎⵎⴰⴷ ⵎⴰⵙⵄⵓⴷ ⵇⵉⵏⴰⵏ ⵙⴳ ⵍⵉⴱⵢⴰ, ⵎⴰⵙⵙ ⴼⵓⴰⴷ ⴰⵃⵉⴷⴰⵔ ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⴱⵔⵓⴽⵙⵉⵍ.
ⴳ ⵜⵉⵍⴰⵍ ⵏ ⵓⴳⵔⴰⵡ, ⵉⵍⵍⴰ ⵓⵙⵎⵏⵉⴷ ⵏ ⵓⵙⴰⵔ ⵏ ⵓⵎⵙⵓⴼⵖ ⵕⵉⴹⵡⴰⵏ ⵀⵔⴱⴰⵍ ⴼ ⵜⵓⵜⵍⴰⵢⵜ ⵜⴰⵢⵢⵎⴰⵜ, ⴰⵙⴰⵔⵓ ⴰⴷ ⵍⵍⵉⴷ ⵜⴼⵔⵙ ⵜⴱⴰⴷⵓⵜ ⵜⴰⴱⵉⵍⵊⵉⴽⵉⵜ ⵜⴰⴼⵕⴰⵏⴼⵓⴽⵓⵏⵉⵜ ⵙ ⵜⴷⵔⴰⵡⵜ ⴷ ⵜⵎⵙⵙⵓⵔⵓⵜ ⵜⴰⵏⴰⵎⵓⵔⵜ ⵜⴰⵎⵖⵔⵉⴱⵉⵜ ⵉ ⵜⵏⵣⵡⴰⵢⵜ ⴷ ⵜⵉⵍⵉⴼⵉⵣⵢⵓⵏ, ⵙ ⵓⵙⵏⴰⵍ ⵏ ⵜⵎⴰⴷⴷⴰⵙⵜ ⵏ ⵢⵓⵏⵉⵙⴽⵓ. ⵖⵎⴽ ⵍⵍⵉ ⵉⵍⵍⴰ ⵓⵙⵎⵏⵉⴷ ⵏ ⵜⴳⵓⵔⵉ ⵏ ⵎⴰⵙⵙⴰ ⵎⴰⵔⵢⴰ ⴰⵏⵟⵓⵏⵢⵓ ⵜⵔⵓⵅⵉⵍⵓ ⵔⵉⵏⴽⵓⵏ ⵜⴰⵎⵛⵛⵉⵡⵔⵜ ⴳ ⵜⵎⵙⵇⵇⴰⴷⵜ ⵏ ⵚⴱⴰⵏⵢⴰ ⵜⴰⵎⴰⵡⵙⴰⵙⵜ ⵉⵣⵔⵉⵏ, ⴼ ⵜⵙⵜⴰⵢⵜ ⵏ ⵓⵙⵎⵖⵔ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵡⴰⵎⵎⴰⵙⵏ ⵏ ⵚⴱⴰⵏⵢⴰ ⴳ ⵍⵎⵖⵔⵉⴱ. ⵉⵙⵎⵏⵉⴷ ⵎⴰⵙⵙ ⵎⵓⵃⴰⵎⵎⴰⴷ ⵛⵟⴰⵟⵓ, ⴰⵙⴰⵍⵎⴰⴷ ⴳ ⵜⵙⴷⴰⵡⵉⵜ ⵜⴰⴳⵔⴰⵖⵍⴰⵏⵜ ⵏ ⵕⵕⴱⴰⵜ, ⵢⴰⵜ ⵜⵉⵏⵏⴰⵡⵜ ⴼ ⵓⵙⴷⵓⵙ ⴷ ⵓⴼⵔⴰⴳ ⴷ ⵓⵙⵙⵉⴷⵔ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⴷⴼⴼⵉⵔ ⵏ ⵜⵡⵡⵓⵔⵉⵡⵉⵏ ⴰⴷ, ⵉⵜⵜⵔ ⵓⴳⵔⴰⵡ ⴰⵎⴰⴹⴰⵍⴰⵏ ⴰⵎⴰⵣⵉⵖ ⴳ ⵉⴳⵎⴰⵎⵏ ⵏⵏⵙ ⴰⴷ ⵉⵡⵙⵏ ⴳ ⵓⵙⴷⵓⵙ ⵏ ⵓⵥⵟⵟⴰ ⴰⵏⴰⵎⵓⵏ ⴷ ⵓⵙⵎⵓⵙⵙⵓ ⵏ ⵜⵎⴰⴷⴷⴰⵙⵉⵏ ⵡⴰⵔⵜⵓⵏⴱⵉⴹⵉⵏ ⵉ ⵓⵎⵣⴰⵖ ⵏ ⵉⵣⵔⴼⴰⵏ ⵏ ⵓⵎⴰⴷⴰⵏ ⴰⵎⴰⵣⵉⵖ, ⴷ ⵜⵡⵉⵣⵉ ⴳ ⵓⵙⵎⵀⵍ ⵏ ⵜⵎⵔⵔⴰⵡⵜ ⵜⴰⴳⵔⴰⵖⵍⴰⵏⵜ ⵏ ⵜⵓⵜⵍⴰⵢⵉⵏ ⵏ ⵉⵎⴰⴷⴰⵏⵏ ⵉⵎⵣⵡⵓⵔⴰ 2022-2032, ⵖⵎⴽ ⴰⵏⵏ ⵓⵍⴰ ⵉ ⵜⵉⵍⵉⵜ ⵏ ⵜⵡⵡⵓⵔⵉ ⵜⴰⴱⵉⴷⴰⴳⵓⵊⵉⵜ ⵉ ⵚⴰⵃⴰ ⵏ ⵜⵙⵔⵜⵉⵜ ⵏ ⵜⵎⵏⴹⴰⵡⵜ ⵉⴱⴷⴷⵏ ⴼ ⵓⵏⴱⴰⴹ ⴰⵏⵉⵎⴰⵏ ⵏ ⵜⵎⵏⴰⴹⵉⵏ ⵎⴽ ⵍⵍⴰⵏⵜ ⴳ ⵓⵎⵇⵏ ⵏ ⵜⵎⴰⵣⵖⴰ ⵉⵜⵜⵓⵙⵖⵣⴰⵏⵏ ⴳ ⵓⴳⵔⴰⵡ ⵏ ⵜⵖⵔⵎⵜ ⵏ ⵜⵉⵣⵏⵉⵜ ⴳ 2013-2963.
ⵉⵙⵓⵜⴳ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⴰⴷⴷⴰⴷ ⵏ ⵜⵏⴱⴰⴹⵜ ⵏ ⵍⴰⵍⵎⴰⵏ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵓⵍⴰⴼ ⵛⵓⵍⵜⵣ ⵖⵎⴽ ⴰⵏⵏ ⵓⵍⴰ ⵜⴰⵏⴱⴰⵟ ⵏ ⵚⴱⴰⵏⵢⴰ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⴱⵉⴷⵔⵓ ⵙⴰⵏⵛⵉⵣ ⵅⴼ ⵜⵎⵙⴰⵔⵜ ⵏ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⴰⵢⵍⵍⵉ ⵉⵎⵙⴰⵙⴰⵏ ⴷ ⵓⵙⵏⴼⴰⵔ ⵏ ⵓⴳⵔⴰⵡ ⴰⵎⴰⵣⵉⵖ ⵉⵜⵜⵓⴱⴷⴰⵔⵏ ⴳ ⵓⵎⵇⵏ ⵏ ⵜⵎⴰⵣⵖⴰ.
ⴰⵔ ⵢⴰⴽⴽⴰ ⵓⴳⵔⴰⵡ ⴰⵎⴰⴹⴰⵍⵏ ⴰⵎⵣⵉⵖ ⵜⵓⵜⵔⴰⵡⵉⵏ ⴰⴷ:
ⴳ ⵎⴰⴷ ⵉⵥⵍⵉⵏ ⵙ ⵍⵎⵖⵔⵉⴱ
ⴷⴰ ⵉⵙⴱⵔⵔⴰⴽ ⵓⴳⵔⴰⵡ ⵙ ⵜⵉⵔⴰⵜ ⵏ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ ⵜⴰⵎⴰⵢⵏⵓⵜ ⵏ ⵉⵙⵜⴰⵢⵏ ⵏ 8 ⵛⵓⵜⴰⵏⴱⵉⵔ 2021/2971 ⵅⴼ ⵓⵙⴷⴰⵡ ⵓⵎⴰⵣⵉⵖ ⵎⵓ ⵜⵥⵍⵉ ⵢⴰⵜ ⵜⵎⵙⴰⵙⵜⵍⵜ ⵜⴰⵙⴳⴳⵯⵙⴰⵏⵜ ⵉⵥⵍⵉⵏ.
ⴰⵔ ⵢⴰⵇⵔⴰ ⵓⴳⵔⴰⵡ ⵉ ⵓⵙⵎⵀⵍ ⵏ ⵉⵙⵍⴳⵏⵏ ⵣⴷⵉⵏⵉⵏ ⴷ ⵓⴼⵔⵉⵙ ⵓⵏⵚⵓⵉⴱ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⵓⵙⵎⴰⵜⴰ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⵏⵓⵎⵍ ⵏ ⵢⴰⵏ ⵡⴰⵡⵔⵉⴽ ⵉⵙⵙⵏⵏ ⵎⵣⵢⴰⵏ ⵜⵓⵜⵍⴰⵢⵜ ⵜⵎⴰⵣⵉⵖⵜ ⵖ ⵉⵅⴼ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵓⵜⵍⴰⵢⵉⵏ ⴷ ⵜⴷⵍⵙⴰ ⵜⴰⵎⵖⵔⵉⴱⵉⵜ.
ⴰⵔ ⵢⴰⵇⵔⴰ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⵉ ⵓⵙⵉⵙⵙⵏ ⵏ ⵓⵙⴳⴳⵯⴰⵙ ⴰⵎⴰⵣⵉⵖ, ⴷ ⵓⵙⵏⴼⵍ ⵏ ⵡⴰⵙⵙⴰⵖ ⵏ ⵓⵙⵏⵓⵃⵢⴰ “ⵍⵎⵖⵔⵉⴱ ⴰⵄⵕⴰⴱ” ⵙ “ⵍⵎⵖⵔⵉⴱ ⴰⵅⴰⵜⴰⵔ”, ⴷ ⵓⵙⵍⴻⵍⵍⵉ ⵏ ⵉⵏⴽⵔⴰⴼ ⵏ ⵓⵎⵓⵙⵙⵓ ⵏ ⴰⵔⵔⵉⴼ ⴷ ⵜⵎⵔⴰⵔⵓⵜ ⵉ ⵓⵙⴷⴰⵡ ⵏ ⵜⵓⵜⵔⴰⵡⵉⵏ ⵏ ⵉⵎⵣⴷⴰⵖⵏ ⵏ ⴰⵔⵔⵉⴼ ⴷ ⵓⵙⴱⴷⴷⵉ ⵏ ⵜⵓⴽⴽⵙⴰ ⵏ ⵉⴽⴰⵍⵉⵡⵏ ⵏ ⵉⵇⴱⵉⵍⵏ ⵉⵎⴰⵣⵉⵖⵏ.
ⴳ ⵎⴰⴷ ⵉⵥⵍⵉⵏ ⵙ ⴷⵣⴰⵢⵔ
ⴰⵔ ⵢⴰⵇⵔⴰ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⵉ ⵜⵏⴱⴰⴹⵉⵏ ⵏ ⴷⵣⴰⵢⵔ ⵉ ⵓⵕⵥⵥⵓⵎ ⴼ ⵉⵏⴽⵔⴰⴼ ⵉⵙⵔⵜⴰⵏⵏ ⴷ ⵓⵙⴱⴷⴷⵉ ⵏ ⵓⵙⵙⵉⵡⴷ ⵏ ⵉⵏⵖⵎⴰⵙⵏ ⴷ ⵉⵎⵖⵏⴰⵙⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⵏⵄⴰⵕⵏ ⵙⵍⴰⵡⴰⵏ ⴰⴽⴽⵯ ⴳ ⵜⵙⴳⴰ ⵏ ⵍⵇⴱⴰⵢⵍ.
ⵉⵜⵜⵔ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⵙⴳ ⵜⵏⴱⴰⴹⵉⵏ ⵏ ⴷⵣⴰⵢⵔ ⵜⴰⵎⵔⴰⵔⵓⵜ ⵜⴰⵖⴰⵡⴰⵍⵜ ⵉ ⵜⵓⵜⵔⴰⵡⵉⵏ ⵜⵉⴷⵉⵎⵓⵇⵔⴰⵟⵉⵢⵉⵏ ⵏ ⵓⵎⵓⵙⵙⵓ ⵏ ⴷⵣⴰⵢⵔ.
ⵉⵖⵔ ⵓⴳⵔⴰⵡ ⵉ ⵜⵏⴱⴰⴹⵉⵏ ⵏ ⴷⵣⴰⵢⵔ ⴰⴷ ⵢⵉⵍⵉ ⵓⵙⵔⴷⴰⵙ ⵏ ⴷⵣⴰⵢⵔ ⴷⴷⵓ ⵜⵏⴱⴰⴹⵜ ⵜⴰⵖⵔⵎⴰⵏⵜ ⴷ ⵓⵙⵏⵎⴰⵍⴰ ⵏ ⵉⵙⵜⴰⵢⵏ ⵉⴷⵉⵎⵓⵇⵔⴰⵟⵉⵢⵏ ⴷ ⵓⵖⵓⵍ ⵏ ⵜⵣⴷⴰⵢⵉⵏ ⵜⵉⴷⵉⴱⵍⵓⵎⴰⵙⵉⵢⵉⵏ ⴷ ⵜⴷⵎⵙⴰⵏⵉⵏ ⴰⴽⴷ ⵜⴰⴳⵍⴷⵉⵜ ⵏ ⵍⵎⵖⵔⵉⴱ, ⴷ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⵉⵍⵍⴰⵏ ⵎⴳⴰⵍ ⵏ ⵓⵎⴰⴷⴰⵏ ⴰⴷⵣⴰⵢⵔⵉ ⴷ ⵉⵎⴰⴷⴰⵏⵏ ⵢⴰⴷⵏⵉⵏ ⵙⵍⴰⵡⴰⵏ ⴰⴽⴽⵯ ⵡⵉⵏ ⵙⴰⵃⵉⵍ.
ⴳ ⵎⴰⴷ ⵉⵥⵍⵉⵏ ⵙ ⵍⵉⴱⵢⴰ
ⴰⵔ ⵢⴰⵇⵔⴰ ⵓⴳⵔⴰ ⴰⵎⴰⴹⵍⴰⵏ ⴰⵎⴰⵣⵉⵖ ⵉ ⵜⵎⵜⵜⴰ ⵎⵓⵏⵏⵉⵏ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ ⵉ ⴽⵉⴳⴰⵏ ⵏ ⵜⵡⵡⵓⵔⵉ ⵃⵎⴰ ⴰⴷ ⴼⴼⵓⵖⵏ ⵉⵖⵡⵡⴰⵖⵏ ⵉⴱⵕⵕⴰⵏⵉⵢⵏ ⴰⴽⴰⵍ ⵏ ⵍⵉⴱⵢⴰ, ⵖⵎⴽ ⴰⵏⵏ ⴷ ⵓⵙⴷⵔⵓ ⵏ ⵓⵎⴰⴷⴰⵏ ⴰⵎⴰⵣⵉⵖ ⴳ ⵉⵎⴹⴰⴽⴰⵕⵏ ⵡⴰⵜⵜⵙⵏⵉⵏ ⴰⴼⵙⵙⴰⵢ ⵏ ⵓⵎⵙⴰⵙⴰ ⵅⴼ ⵓⴼⵔⴰ ⴳ ⵍⵉⴱⵢⴰ ⴷⴼⴼⵉⵔ ⵏ ⵜⴳⵔⴰⵡⵍⵍⴰ.
ⴰⵔ ⵢⴰⵇⵔⴰ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⵉ ⵓⴼⵓⵖ ⵏ ⵓⴷⵓⵙⵜⵓⵔ ⴰⴷⵉⵎⵓⵇⵔⴰⵟⵉ ⴰⵎⴰⵢⵏⵓ ⵢⵓⵎⴰⵏ ⵍⵍⵉ ⵓⵔ ⵣⴳⴰⵏ ⵉⵙⵜⴰⵢⵏ ⵏ 24 ⴷⵓⵊⴰⵏⴱⵉⵔ 2021, ⵍⵍⵉ ⵔⴰⴷ ⵢⴰⵡⵉ ⵙ ⵓⵡⴰⵏⴽ ⵉⵎⵓⵏⵏ ⵢⴰⴽⴽⴰⵏ ⵉ ⵓⵎⴰⴷⴰⵏ ⴰⵍⵉⴱⵉ ⵜⵉⵔⴰⵜ ⵜⴰⵏⵉⵎⴰⵏⵏⵜ ⴷ ⵓⴼⵔⴰⴳ ⵏ ⵜⵎⵥⵍⴰⵢ ⵏⵏⵙ ⴳ ⵓⵙⴰⵜⵉ ⴰⴷⵉⵎⵇⵔⴰⵟⵉ ⴰⵎⴷⵔⴰⵡ.
ⴰⵔ ⵉⵙⵏⴰⵍ ⵓⴳⵔⴰⵡ ⴰⵎⴰⴷⵍⴰⵏ ⴰⵎⴰⵣⵉⵖ ⵉⵎⴰⵣⵉⵖⵏ ⵏ ⵍⵉⴱⵢⴰ ⴷ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵎⴰⵣⵉⵖⵏ ⵏ ⵍⵉⴱⵢⴰ.
ⴳ ⵎⴰⴷ ⵉⵥⵍⵉⵏ ⵙ ⴰⵥⴰⵡⴰⴹ ⴷ ⵏⵏⵉⵊⵉⵔ
ⵉⵙⵙⵀⵔⵛ ⵓⴳⵔⴰⵡ ⵉⴱⴽⴽⴰⴹⵏ ⵏ ⵓⴱⵔⵙⵙⵉⵡⴷ ⵎⴳⴰⵍ ⵏ ⵉⵎⵣⴷⴰⵖⵏ ⵏ ⵜⵙⴳⴰ ⵏ ⵙⴰⵃⵉⵍ ⵉⵖⵔ ⵉ ⵓⵙⴱⴷⴷⵉ ⵏ ⵉⴱⴽⴽⴰⴷⵏ ⴰⴷ.
ⴰⵔ ⵢⴰⵇⵔⴰ ⵓⴳⵔⴰⵡ ⵉ ⵓⵣⵣⵔⴰⵢ ⵏ ⵜⵎⵢⴰⵇⵇⴰⵏⵜ ⵏ ⴷⵣⴰⵢⵔ ⵅⴼ ⵜⴰⵙⴳⴰ ⵏ ⵙⴰⵃⵉⵍ ⴷ ⵚⵚⵃⵕⴰ ⵜⴰⵅⴰⵜⴰⵔⵜ ⴷ ⵜⵉⴽⴽⵉ ⵏ ⵓⵏⴱⴰⴹ ⴰⵏⵉⵎⴰⵏ ⵉ ⵜⵙⴳⴰ ⵏ ⴰⵥⴰⵡⴰⴹ.
ⵉⵙⵙⵀⵔⵛ ⵓⴳⵔⴰⵡ ⵉⵡⴰⵍⵉⵡⵏ ⵏ ⵓⵏⵙⵙⵉⵅⴼ ⴰⵏⵉⵊⵉⵔⵉ ⴰⵎⴰⵢⵏⵓ ⵎⴰⵙⵙ ⴱⴰⵣⵓⵎ ⵎⵓⵃⴰⵎⵎⴰⴷ ⴷ ⵉⴷⵔⵉⵣⵏ ⵏⵏⵙ ⴼ ⵓⴼⵔⴰ ⴰⵏⴰⵎⵓⵏ.
ⴰⵔ ⵢⴰⵇⵔⴰ ⵓⴳⵔⴰⵡ ⵉ ⵜⵎⴰⴷⴷⴰⵙⵉⵏ ⵜⵉⵎⴰⵣⵉⵖⵉⵏ ⴷ ⵜⵎⴰⴷⴷⴰⵙⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉ ⵓⵎⵢⴰⵡⴰⵙ ⴷ ⵜⵡⵉⵣⵉ ⴰⴽⴷ ⵉⵎⵓⵀⴰⵖ.
ⴳ ⵎⴰⴷ ⵉⵥⵍⵉⵏ ⴷ ⵉⵎⴰⵣⵉⵖⵏ ⴳ ⵜⵎⵉⵣⴰⵔ ⵏ ⵓⵕⵓⴱⴱⴰ
ⴰⵔ ⵢⴰⵇⵔⴰ ⵓⴳⵔⴰⵡ ⵉ ⵉⵎⴰⵣⵉⵖⵏ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⴷ ⵎⴰⵔⵉⴽⴰⵏ ⵏ ⵉⵥⵥⵍⵎⴹ ⵉ ⵓⵙⴽⵔ ⵏ ⵜⵎⵙⴽⴰⵔ ⵣⴷⵉⵏⵉⵏ ⴷ ⵓⴼⵔⴰⴽ ⵙ ⵜⵎⴰⴳⵉⵜ ⵜⴰⵎⴰⵣⵉⵖⵜ ⴷ ⵓⵙⵉⴷⴼ ⵏⵏⵙⵏ ⴷ ⵉⵎⴰⵣⵉⵖⵏ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ.
ⴰⵔ ⵢⴰⵇⵔⴰ ⵓⴳⵔⴰⵡ ⵉ ⵉⵡⴰⵏⴽⵏ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⴷ ⵜⵎⵔⵙⴰⵍ ⵏⵏⵙⵏⵜ ⵜⵉⴷⵉⴱⵍⵓⵎⴰⵙⵉⵢⵉⵏ ⴳ ⵜⵎⴰⵣⵖⴰ ⵃⵎⴰ ⴰⴷ ⴷⵔⵓⵏⵜ ⴳ ⵜⵎⵔⴰⵡⵜ ⵜⴰⴳⵔⴰⵖⵍⴰⵏⵜ ⵏ ⵜⵓⵜⵍⴰⵢⵉⵏ ⵏ ⵉⵎⴰⴷⴰⵏⵏ ⵉⵎⵣⵡⵓⵔⴰ 2022-2032 ⴷ ⵓⵎⵢⴰⵡⴰⵙ ⴰⴽⴷ ⵢⵓⵏⵉⵙⴽⵓ ⵉ ⵓⵙⵉⵙⵙⵏ ⵏ ⵜⵓⵜⵍⴰⵢⵜ ⴷ ⵜⴷⵍⵙⴰ ⴷ ⵜⵎⴰⴳⵉⵜ ⵜⴰⵎⴰⵣⵉⵖⵜ ⵙ ⵓⵙⵙⵍⵎⴷ ⵏⵏⵙⵏⵜ ⵉ ⵜⴰⵔⵡⴰ ⵏ ⴷⴷⵢⴰⵙⴱⵓⵔⴰ.
ⴰⵔ ⵢⴰⵇⵔⴰ ⵓⴳⵔⴰⵡ ⵉ ⵜⵏⴱⴰⴹⵉⵏ ⵏ ⵓⵕⵓⴱⴱⴰ ⵉ ⵓⵙⵉⵙⵙⵏ ⵏ ⵜⵎⴰⴳⵉⵜ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵉⵖⴰⵡⵙⴰⵏ ⵏ ⵓⵙⵙⵍⵎⴷ ⴷ ⵜⵙⵔⵜⴰⵢ ⵏ ⴱⵕⵕⴰ ⴷ ⵜⵣⴷⴰⵢⵉⵏ ⵏⵏⵙ ⴰⴽⴷ ⵉⵡⴰⵏⴽⵏ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ, ⵉ ⵓⵙⴱⴷⴷⵉ ⵏ ⵜⴻⵟⵟⵓⵕⴼⴰ ⴷⴰⵔ ⵉⵄⵔⵔⵉⵎⵏ ⴳⴰⵏⵉⵏ ⵙⴳ ⵉⵥⵥⵍⵎⴹ ⵏ ⵉⴼⵔⵉⵇⵢⴰ.
ⴷⴼⴼⵉⵔ ⵏ ⵓⵙⵎⵏⵉⴷ ⵏ ⵉⵏⵇⵇⵉⵙⵏ ⴰⵙⴽⵍⴰⵏ ⴷ ⵡⵉⵏ ⵜⴷⵔⵉⵎⵜ ⵉ ⵜⵡⴰⵍⴰ ⵉⵥⵍⵉⵏ ⴷ 2018-2021, ⵉⵍⵍⴰ ⵓⵙⵎⴰⵢⵏⵓ ⵏ ⵓⵙⵉⵔⴰ ⴷ ⵓⵙⵇⵇⵉⵎ ⴰⴽⵓⵏⴼⵉⴷⵉⵕⴰⵍⵉ. ⵉⵍⵍⴰ ⴳ ⵓⵙⵉⵔⴰ:
ⵎⴰⵙⵙ ⵕⴰⵛⵉⴷ ⵕⴰⵅⴰ, ⴰⵎⵖⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ.
ⵎⴰⵙⵙ ⵎⵉⵎⵓⵏ ⵛⵛⵔⵇⵉ, ⴰⵎⵖⴰⵔ ⵏ ⵓⴷⴷⵓⵔ, ⵉⵜⵜⵓⵙⵎⴰⴳⴰⵍ ⵏ ⵜⵖⴰⵡⵙⵉⵡⵉⵏ ⵜⵉⵣⵔⴼⴰⵏⵉⵏ.
ⵎⴰⵙⵙ ⵃⴰⵙⴰⵏ ⴷⵓⵃⵓ, ⴰⵎⵖⴰⵔ ⴰⵎⴰⵔⵉ ⵏ ⴼⵕⴰⵏⵚⴰ.
ⵎⴰⵙⵙⴰ ⵙⴰⵍⵡⴰ ⵖⵔⴱⵉ, ⵜⴰⵏⵙⵙⵉⵅⴼⵜ ⵜⴰⵎⴰⵔⵉⵜ ⵏ ⵚⴱⴰⵏⵢⴰ ⴷ ⴽⴰⵟⴰⵍⵓⵏⵢⴰ.
ⵎⴰⵙⵙ ⵙⴽⴽⵓⵜⵉ ⵅⴰⴹⵉⵕ, ⴰⵎⵖⴰⵔ ⴰⵎⴰⵔⵉ ⵏ ⴷⴷⵣⴰⵢⵔ.
ⵎⴰⵙⵙⴰ ⴰⵎⵉⵏⴰ ⴱⵏⵛⵛⵉⵅ, ⵜⴰⵏⵙⵙⵉⵅⴼⵜ ⵜⴰⵎⴰⵔⵉⵜ ⵏ ⵍⵎⵖⵔⵉⴱ.
ⵎⴰⵙⵙ ⴱⵍⵇⵉⵙ ⴰⵏⵚⴰⵕⵉ, ⵜⴰⵏⵙⵙⵉⵅⴼⵜ ⵜⴰⵎⴰⵔⵉⵜ ⵏ ⴰⵥⴰⵡⴰⴹ.
ⵎⴰⵙⵙ ⵙⵉⴷⵓ ⴽⴰⵡⵙⵉⵏ ⵎⴰⵢⴳⴰ, ⴰⵎⵖⴰⵔ ⴰⵎⴰⵔⵉ ⵏ ⵏⵏⵉⵊⵉⵔ.
ⵎⴰⵙⵙ ⵃⵎⴰ ⴰⴳ ⵎⴰⵃⵎⵓⴷ, ⴰⵎⵖⴰⵔ ⴰⵎⴰⵔⵉ ⵏ ⵎⵓⵕⵉⵟⴰⵏⵢⴰ.
ⵎⴰⵙⵙⴰ ⵜⵓⵔⵉⵢⵢⴰ ⴰⴱⵔⴽⴰⵏⵉ, ⵜⴰⵎⴰⵔⴰⵜ ⵜⴰⵎⴰⵜⴰⵢⵜ ⵜⴰⴳⵏⵙⴰⵙⵜ ⵏ ⵓⴳⵔⴰⵡ ⴳ ⵍⴰⵍⵎⴰⵏ.
ⵎⴰⵙⵙ ⵎⵓⵏⵜⴰⵚⵉⵕ ⴰⵃⵓⵍⵉ, ⴰⵎⴰⵔⵉ ⵏ ⵜⵎⴰⵔⴰⵜ ⵜⴰⵎⴰⵜⴰⵢⵜ.
ⵎⴰⵙⵙ ⵎⵓⵃⵎⵎⴰⴷ ⴱⵉⵀⵎⵉⴷⵏ, ⴰⵏⴼⵍⵓⵙ.
ⵎⴰⵙⵙ ⵄⵉⵙⴰ ⵄⵇⵇⴰⵡⵉ, ⴰⵎⴰⵔⵉ ⵏ ⵓⵏⴼⵍⵓⵙ.
ⵎⴰⵙⵙ ⵍⵃⵓⵙⴰⵢⵏⵉ ⴰⴳ ⵛⵉⵅⵓ, ⴰⵎⵙⵇⵇⴰⴷ ⴰⵎⴰⵔⵔⴰⵢ ⵏ ⵜⴷⵍⵙⴰ ⵏ ⵜⴷⵍⵙⴰ ⵏ ⵉⵎⵓⵀⴰⵖ.
ⵜⵓⵙⴽⴰⵔⵏⵜ ⵓⵍⴰ ⵜⵙⵇⵇⵉⵎⵉⵏ ⵏ ⵓⵙⵓⵊⴷ ⵉ ⵓⵙⴽⵔ ⵏ ⵓⴳⵔⴰⵡ ⴳ ⵍⵎⵖⵔⵉⴱ ⵍⵍⵉ ⵜⵙⵡⵓⴷⴷⵓ ⵎⴰⵙⵙⴰ ⵕⴰⵛⵉⴷⴰ ⵉⵎⵔⵣⵉⴳ, ⴷ ⴼⵕⴰⵏⵚⴰ ⵍⵍⵉ ⵉⵙⵡⵓⴷⴷⵓ ⵎⴰⵙⵙ ⵃⴰⵙⴰⵏ ⴷⵓⵃⵓ.