ⵜⵉⴽⴽⵉ ⵏ ⵜⵙⴷⵍⵉⵙⵜ ⵏ ⴰⵔⴽⵓⵏ ⵉ ⵍⵎⵖⵔⵉⴱ
ⵜⵣⵔⵉ ⴰⵙⵙ ⵏ ⵓⴽⵕⴰⵙ 1 ⵎⴰⵕⵚ 2023 ⵜⴰⴼⴼⵓⴳⵍⴰ ⵏ ⵓⵣⵎⵎⴻⵎ ⵏ ⵜⵎⵢⴰⵇⵇⴰⵏⵜ ⵏ ⵜⵉⴽⴽⵉ ⵏ ⵜⵙⴷⵍⵉⵙⵜ ⵏ ⵓⵎⵓⵙⵏⴰⵡ ⴰⴷⵣⴰⵢⵔⵉ ⵉⴳⵍⵍⵉⵏ ⵏ ⵎⵓⵃⴰⵎⵎⴰⴷ ⴰⵔⴽⵓⵏ (1928-2010), ⵉ ⵚⴰⵃⴰ ⵏ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵍⵎⵖⵔⵉⴱ. ⵜⴰⴼⴼⵓⴳⵍⴰ ⴰⴷ ⵖ ⵃⴰⴹⵕⵏ ⵉⵡⵔⵉⴽⵏ ⵙⴳ ⵉⴳⵔⴰⵏ ⵏ ⵜⵙⵔⵜⵉⵜ ⴷ ⵜⵙⴽⵍⴰ ⴷ ⵜⴰⵡⵊⴰ ⵏ ⵉⴳⵍⵍⵉⵏ ⵏ ⵓⵎⵓⵙⵏⴰⵡ ⵉⴳⴰⵏ ⵙⴳ ⴷⵣⴰⵢⵔ.
ⵜⵣⵎⵎⵉⵎ ⵜⴰⵎⵢⴰⵇⵇⴰⵏⵜ ⴰⴷ ⵎⴰⵙⵙⴰ ⵜⵓⵔⵉⵢⵢⴰ ⵍⵢⴰⵄⵇⵓⴱⵉ ⴰⵔⴽⵓⵏ ⵜⴰⴷⴳⴰⵍⵜ ⵏ ⵉⴳⵍⵍⵉⵏ, ⴷ ⵎⴰⵙⵙ ⵎⵓⵃⴰⵎⴰⵎⴷ ⵍⴼⵕⵕⴰⵏ ⵓⵏⵎⵀⴰⵍ ⵏ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵍⵎⵖⵔⵉⴱ. ⵙ ⵓⵣⵎⵎⴻⵎ ⴰⴷ, ⵔⴰⴷ ⵜⵚⵉⵃⵉ ⵉ ⵜⵙⴷⵍⵉⵙⵜ ⴰⴷ ⵎⴰⴷ ⵉⴳⴰⵏ 5000 ⵏ ⵓⴷⵍⵉⵙ ⴷ ⵎⴰⴷ ⵉⴳⴰⵏ 7000 ⵏ ⵜⵙⵖⵓⵏⵜ ⵙⴳ ⴽⵉⴳⴰⵏ ⵏ ⵉⴷⵔⴰⵏ ⵉⵙⴽⵍⴰⵏⵏ ⴷ ⵉⵎⴰⵙⵙⴰⵏⵏ.
ⴳ ⵜⵙⴳⵓⵔⵉ ⵏⵏⵙ ⵍⵍⵉ ⵉⴼⴽⴰ ⵓⵏⵎⵀⴰⵍ ⵏ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ, ⵉⵏⵏⴰ ⵎⴰⵙ ⵜⵥⴹⴰⵕ ⵎⴰⵙⵙⴰ ⵍⵢⴰⵄⵇⵓⴱⵉ ⴰⴷ ⵜⵣⵔⵉ ⵜⵉⴱⴱⴰⵢⴹⴰⵕⵉⵏ ⴷⴰⵜ ⵏ ⵓⵙⴽⵔ ⵏ ⵜⵡⴰⵔⴳⵉⵜ ⵏⵏⵙ ⵃⵎⴰ ⴰⴷ ⵉⵖⴰⵎⴰ ⵡⴰⵕⵛⵉⴼ ⵏ ⵓⵎⵙⵏⴰⵡ ⴷ ⴱⴰⴱ ⵏ ⵓⵙⵡⵉⵏⴳⵎ ⵎⵓⵃⴰⵎⴰⵎⴷ ⴰⵔⴽⵓⵏ ⴳ ⵓⴼⵓⵙ ⵏ ⵜⴰⵙⵓⵜⵉⵏ ⵍⵍⵉ ⵜ ⵜⴽⴽⵓⵙⴰⵏⵉⵏ, ⵢⵉⵏⵉ ⵓⵍⴰ ⵎⴰⵙ ⵔⴰⴷ ⵜⴰⵡⵙ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵍⵎⵖⵔⵉⴱ ⵃⵎⴰ ⴰⴷ ⵢⵉⵍⵉ ⵓⵥⵏⵥⵕ ⵏ ⵓⵙⵡⵉⵏⴳⵎ ⴷ ⵜⵓⵙⵙⵏⴰ ⵏ ⵉⴳⵍⵍⵉⵏ ⵏ ⵎⵓⵃⴰⵎⵎⴰⴷ ⴰⵔⴽⵓⵏ.
ⵉⵜⵜⵓⵙⵙⴰⵏ ⵎⴰⵙⵙ ⵎⵓⵃⴰⵎⵎⴰⵙ ⴰⵔⴽⵓⵏ ⵎⴰⵙ ⵉⵍⵓⵍ ⴳ 1 ⴱⵕⴰⵢⵕ 1928 ⴳ ⵓⵙⵓⵏ ⵏ ⵜⴰⵡⵔⵉⵔⵜ , ⵎⵉⵎⵓⵏ ⴳ ⵜⵖⵔⵎⵜ ⵏ ⵜⵉⵣⵉ ⵡⵓⵣⵣⵓ ⴳ ⵜⵙⴳⴰ ⵏ ⵍⵇⴱⴰⵢⵍ ⴳ ⴷⴷⵣⴰⵢⵔ, ⵉⴳ ⵙⴳ ⵉⵎⴰⵙⵙⴰⵏⵏ ⵉⵎⵣⵡⵓⵔⴰ ⵍⵍⵉ ⴱⴷⴷⵏⵉⵏ ⴼ ⵜⵖⵔⵉ ⴷ ⵓⵙⴼⵙⵉ ⴷ ⵓⴼⵔⴰⵏ ⵏ ⵓⵙⵡⵉⵏⴳⵎ ⵓⵙⵍⵉⵎ.
ⵉⵣⵣⵔⵉ ⵜⵉⵖⵔⵉ ⵏⵏⵙ ⵜⴰⵎⵏⵣⵓⵜ ⴳ ⵓⵙⵓⵏ ⵏⵏⵙ, ⵉⵎⵎⴰⵜⵜⵉ ⵉⵍⵎⵎⴰ ⵙ ⵜⵖⵔⵎⵜ ⵏ ⵡⴰⵀⵕⴰⵏ ⵍⵍⵉⵖ ⵉⵖⵔⴰ ⴳ ⵢⴰⵏ ⵓⵙⵉⵏⴰⵏ ⵉⴹⴼⵕⵏ ⵉⴷ ⴱⴰⴱⴰⵜⵏ ⵓⵎⵍⵉⵍⵏ, ⵉⵎⵎⴰⵜⵜⵉ ⴷⴰⵖ ⵙ ⵜⵎⴰⵥⵓⵏⵜ ⴷⴷⵣⴰⵢⵔ ⵍⵍⵉⵖ ⵉⵖⵔⴰ ⵜⴰⵙⴽⵍⴰ ⵜⴰⵄⵕⴰⴱⵜ ⴷ ⵜⴼⵍⵙⴰⴼⵜ ⴷ ⵓⵙⵍⴳⵏ, ⴷⴼⴼⵉⵔ ⵏⵏⵙ ⴳ ⵉⵙⴳⴳⵯⴰⵙⵏ ⵏ ⵉⵙⵎⵎⵓⵙⵏ ⴳ ⵜⴰⵙⵓⵜ ⵍⵍⵉ ⵉⵣⵔⵉⵏ ⵉⵎⵎⵓⴷⴷⴰ ⵙ ⴼⵕⴰⵏⵚⴰ ⵍⵍⵉⵖ ⵢⵓⵎⵥ ⴰⵙⵍⴽⵉⵏ ⵏ ⴷⴷⵓⴽⵟⴰⵕⴰ ⴳ ⵜⴼⵍⵙⴰⴼⵜ ⴳ ⵜⵙⴷⴰⵡⵉⵜ ⵏ ⵙⵙⵓⵕⴱⵓⵏ ⴳ ⵢⵓⵏⵢⵓ 1969.
ⵉⵙⵡⵓⵔⵉ ⵎⵓⵃⴰⵎⵎⴰⴷ ⴰⵔⴽⵓⵏ ⴷ ⴰⵙⵍⵎⴰⴷ ⴰⵎⵔⵣⵓ ⴳ ⴽⵉⴳⴰⵏ ⵏ ⵜⵙⴷⴰⵡⵉⵢⵉⵏ ⵜⵉⵎⴰⴹⵍⴰⵏⵉⵏ ⴱⴰⵀⵔⴰ ⵜⵜⴰⵡⵙⵙⴰⵏⵏⵉⵏ ⴰⵎ ⵜⴰⵙⴷⴰⵡⵉⵜ ⵏ ⵙⵙⵓⵕⴱⵓⵏ ⴷ ⵜⵙⴷⴰⵡⵉⵜ ⵏ ⴽⴰⵍⵉⴼⵓⵔⵏⵢⴰ ⴷ ⵜⵙⴷⴰⵡⵉⵜ ⵏ ⵏⵢⵓⵢⵓⵔⴽ, ⵖⵎⴽ ⵍⵍⵉ ⵉⵡⴰⵍⴰ ⵜⴰⵎⵙⵙⵓⴳⵓⵔⵜ ⵏ ⵛⵉⴳⴰⵏ ⵜⵙⵇⵇⵉⵎⵉⵏ ⴷ ⵜⴳⵔⴰⵡⵉⵏ ⵜⵉⵎⴰⵙⵙⴰⵏⵉⵏ ⴳ ⴼⵕⴰⵏⵚⴰ ⴷ ⵎⴰⵔⵉⴽⴰⵏ.
ⵉⵥⵍⵉ ⴰⵔⴽⵓⵏ ⴰⵔⵔⴰⵜⵏ ⴷ ⵉⴷⵍⵉⵙⵏ ⵍⵍⵉ ⵢⵓⵔⴰ ⵉ ⵓⴼⵔⴰⵏ ⵏ ⵓⵙⵡⵉⵏⴳⵎ ⴷ ⵓⵏⵍⵉ ⵓⵙⵍⵉⵎⵏ, ⵉⴷⵍⵉⵙⵏ ⵏⵏⵙ ⴳⵉⵙⵏ: ⴰⵙⵡⵉⵏⴳⵎ ⴰⵄⵔⴰⴱ, ⴰⵎⵣⵔⵓⵢ ⵏ ⵓⵙⵡⵉⵏⴳⵎ ⴰⵄⵕⴰⴱ ⵓⵙⵍⵉⵎ, ⵙⴳ ⵍⵉⵊⵜⵉⵀⴰⴷ ⴰⵔ ⴰⴼⵔⴰⵏ ⵏ ⵓⵏⵍⵉ ⵓⵙⵍⵉⵎ. ⵉⴳⴰ ⵢⴰⵏ ⵓⵎⴰⵔⴰ ⵍⵍⵉ ⵢⵓⵔⴰⵏ ⴽⵉⴳⴰⵏ ⵏ ⵉⴷⵍⵙⵉⵏ ⴷ ⵡⴰⵔⵔⴰⵜⵏ ⴰⵢⵍⵍⵉⵖ ⵉⵎⵎⵓⵜ ⴳ 15 ⵛⵓⵜⴰⵏⴱⵉⵔ 2010, ⵢⵉⵍⵉ ⴷⴰⵔⵙ ⴳ ⵡⴰⵡⵜⴰⵢ 80 ⵏ ⵓⵙⴳⴳⵯⴰⵙ, ⵉⵜⵜⵓⵎⴹⴰⵍ ⴳ ⵓⵙⵎⴹⵍ ⵏ ⵛⵛⵓⵀⴰⴷⴰ ⴳ ⵜⵖⵔⵎⵜ ⵏ ⵜⴳⵎⵎⵉ ⵜⵓⵎⵍⵉⵍⵜ.
ⵉⵏⵏⴰ ⵓⴳⵍⵍⵉⴷ ⵏ ⵍⵎⵖⵔⵉⴱ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴳ ⵜⴱⵔⴰⵜ ⵏ ⵓⴼⵛⴰⴷ ⵍⵍⵉ ⵢⵓⵣⵏ ⵉ ⵜⵓⵡⵊⴰ ⵏ ⵉⴳⵍⵍⵉⵏ, ⵎⴰⵙ ⵉⴳⴰ ⵢⴰⵏ ⵓⵅⴰⵜⴰⵔ, ⵉⵙⵓⵜⴳ ⵓⵍⴰ ⴰⵙⵡⵉⵏⴳⵎ ⵏⵏⵙ ⴷ ⵜⵡⵉⵙⵉ ⵏⵏⵙ ⴳ ⵜⵖⵔⵉ ⵏ ⵓⵙⵡⵉⵏⴳⵎ ⵓⵙⵍⵉⵎⵏ ⵢⵉⵏⵉ ⵓⵍⴰ ⵎⴰⵙ ⵉⴳⴰ ⵢⴰⵏ ⵙⴳ ⵡⵉⵍⵍⵉ ⵎⵎⴰⵖⵏⵉⵏ ⴼ ⵜⵉⵍⵉⵜ ⵏ ⵜⴰⵎⵓⵏⵜ ⵜⴰⵎⴰⵖⴰⵔⵉⴱⵉⵜ ⴳ ⵉⵥⵥⵍⵎⴹ ⵏ ⵉⴼⵔⵉⵇⵢⴰ.
ⴳ ⵎⴰⵕⵕⴰ ⴰⵔⵔⴰⵜⵏ ⵏⵏⵙ ⴷ ⵉⵏⵎⵓⵇⵇⴰⵕⵏ ⵏⵏⵙ, ⵉⵎⵎⴰⵖ ⴱⴷⴷⴰ ⵎⵓⵃⴰⵎⵎⴰⴷ ⴰⵔⴽⵓⵏ ⴼ ⵜⵉⵍⵉⵜ ⵏ ⵜⴰⵎⵓⵏⵜ ⵜⴰⵎⴰⵖⴰⵔⵉⴱⵉⵜ ⴷ ⵓⵙⵉⵜⵜⵉ ⵏ ⵡⴰⵢⴷⴰ ⵍⵍⵉ ⴷ ⵉⴼⵍ ⵓⵎⵙⴷⵓⵔⵔⵉ, ⵖⵎⴽ ⴰⵏⵏ ⴷ ⵓⵙⵡⵓⵔⵉ ⵙ ⴽⵔⴰ ⵏ ⵜⵉⵔⵎⵉⵜⵉⵏ ⴳ ⵓⵕⵓⴱⴱⴰ ⴳ ⵓⵕⵓⴱⴱⴰ ⵍⵍⵉ ⵔⵎⵙⵏⵉⵏ ⴳ ⵓⵚⴽⵓ ⵏ ⵜⵣⴷⴰⵢⵜ ⵏ ⵓⴼⴳⴰⵏ ⵙ ⵓⴼⴳⴰⵏ.
ⵙⴳ ⴰⵙⵉⵜ: ⴰⵚⵡⴰⵜ ⵎⴰⵖⴰⵔⵉⴱⵉⵢⵢⴰ, ⴰⵙⵓⵖⵍ: ⵕ.ⵏⴰⵊⵉⴱ