ⵉⴱⵔⵉⵔ 1980-ⵉⴱⵔⵉⵔ 2023: ⴰⵎⵣⵔⵓⵢ ⵏ ⵜⴼⵙⵓⵜ ⵏ ⵉⵎⴰⵣⵉⵖⵏ
ⴳ ⵉⴱⵔⵉⵔ 1980, ⵉⵍⵍⴰ ⵢⴰⵏ ⵓⵎⵓⵙⵙⵓ ⵉⵟⵟⴰⴼⵏ ⴰⴼⵔⵉⵙ ⴰⴷⵍⵙⴰⵏ ⴳ ⵜⵖⵔⵎⵉⵏ ⵏ ⵜⵉⵣⵉ ⵡⵓⵣⵣⵓ ⴷ ⴷⴷⵣⴰⵢⵔ ⵜⴰⵎⴰⵥⵓⵏⵜ. ⵉⵍⵍⴰ ⵓⵎⵓⵙⵙⵓ ⴰⴷ ⴷⴼⴼⵉⵔ ⵎⴰⴷ ⵙⴳⴷⵍⵏⵜ ⵜⵏⴱⴰⴹⵉⵏ ⵏ ⴷⴷⵣⴰⵢⵔ ⴰⵙⵏⵎⴰⵍⴰ ⵏ ⵢⴰⵜ ⵜⵉⵏⴰⵡⵜ ⴼ ⵓⵎⴰⵔⴳ ⴰⵎⴰⵣⵉⵖ ⴰⵇⴱⵓⵔ ⵍⵍⵉ ⵔⴰⴷ ⵉⵙⵎⵏⵉⴷ ⵓⵎⵔⵣⵓ ⴷ ⵓⵎⴰⵔⴰ ⴰⵎⴰⵣⵉⵖ ⵎⵓⵍⵓⴷ ⵎⵄⵎⵎⵔⵉ ⴳ ⵜⵙⴷⴰⵡⵉⵜ ⵏ ⵜⵉⵣⵉ ⵡⵓⵣⵣⵓ ⴳ ⵡⵉⵙⵙ 10 ⵎⴰⵕⵚ 1980.
ⴰⵎⵏⴰⴹ
ⴳⴰⵏ ⵉⵎⴰⵣⵉⵖⵏ ⵢⴰⵏ ⵓⴳⵣⵣⵓⵎ ⵉⵙⵜⴰⵡⵀⵎⵎⴰⵏ ⵙⴳ ⵓⵥⵟⵟⴰ ⴰⵏⴰⵎⵓⵏ ⴳ ⴷⴷⵣⴰⵢⵔ ⴷ ⵜⵙⴳⴰ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ, ⴰⵔ ⵜⵜⵉⵏⵉⵏⵜ ⵜⵖⵓⵔⵉⵡⵉⵏ ⵎⴰⵙ ⴳⴰⵏ ⵉⵎⴰⵣⵉⵖⵏ ⵉⵎⵣⴷⴰⵖⵏ ⵉⵎⵣⵡⵓⵔⴰ ⵏ ⴷⴷⵣⴰⵢⵔ ⴳ ⵜⵙⴳⴰ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⵙⴳ ⴰⵎⵣⵔⵓⵢ ⵢⴰⴳⴳⵓⴳⵏ.
ⵍⵍⵉⵖ ⵜⴼⴼⵓⵖ ⴼⵕⴰⵏⵚⴰ ⵜⴰⵎⴰⵣⵉⵔⵜ ⵏ ⴷⴷⵣⴰⵢⵔ, ⵜⵓⵎⵥ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴰⴷⵖⴰⵔ ⵏ ⵜⵓⵜⵍⴰⵢⵜ ⵜⴰⴼⵕⴰⵏⵚⵉⵚⵜ, ⵖⵎⴽ ⵍⵍⵉ ⵙⴽⵔⵏ ⴽⵓⵍⵍⵓ ⵜⵉⵏⴱⴰⴹⵉⵏ ⵍⵍⵉ ⴷ ⵓⵛⴽⴰⵏⵉⵏ ⵢⴰⵜ ⵜⵙⵔⵜⵉⵜ ⵏ ⵓⵙⵄⵕⵕⴱ ⵍⵍⵉ ⵉⴳⴰⵏ ⵜⴰⵢⵢⴰⴼⵓⵜ ⵏ ⵜⵙⵔⵜⵉⵜ ⵏ ⵍⵇⴰⵡⵎⵉⵢⵢⴰ ⵜⴰⵄⵕⴰⴱⵜ.
ⴷⴰⵜ ⵏ ⵓⵙⵓⵔⵙ ⴰⴷ, ⵙⴰⵡⵍⵏ ⵉⵎⴰⵣⵉⵖⵏ ⴼ ⵜⴰⴳⵯⵉⵜ ⵏⵏⵙⵏ ⵉ ⵓⵙⵉⵜⵜⵉ ⵏ ⵜⵓⵜⵍⴰⵢⵜ ⵏⵏⵙⵏ ⵙⴳ ⵓⵡⴰⵏⴽ ⵏ ⴷⴷⵣⴰⵢⵔ ⴷ ⵓⵙⵉⵜⵜⵉ ⵏ ⵡⴰⵢⴷⴰ ⵏⵏⵙⵏ ⴰⴷⵍⵙⴰⵏ. ⴰⵙⵉⵏ ⴽⵉⴳⴰⵏ ⵏ ⵉⴽⴰⴷⵉⵎⵉⵢⵏ ⴷ ⵉⵎⴰⵙⵙⴰⵏⵏ ⴰⵏⵄⴰⵕ ⵏ ⵓⵎⵓⴽⵔⵉⵙ ⴰⴷ ⴰⵙⵏⵉⵍⵙ, ⵖⵎⴽ ⴰⵏⵏ ⴰⴼ ⵎⵓⵏⵏ ⴳ ⵓⵙⴰⵜⵉ ⵏ ⵜⴽⴰⴷⵉⵎⵉⵜ ⵜⴰⵎⴰⵣⵉⵖⵜ ⵍⵍⵉ ⵉⵍⵍⴰⵏ ⴳ ⵓⵙⴳⴳⵯⴰⵙ ⵏ 1966, ⵢⵉⵍⵉ ⵓⵙⵖⵉⵎ ⵏⵏⵙ ⴳ ⵜⵖⵔⵎⵜ ⵏ ⴱⴰⵔⵉⵣ ⴳ ⴼⵕⴰⵏⵚⴰ.
ⵜⵉⵡⵙ ⵜⴽⴰⴷⵉⵎⵉⵜ ⵜⴰⵎⴰⵣⵉⵖⵜ ⴳ ⵓⴱⵓⵖⵍⵓ ⵏ ⵓⵎⴹⴰⴽⴰⵕ ⵅⴼ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ, ⵙⵍⴰⵡⴰⵏ ⴰⴽⴽⵯ ⵍⵍⵉ ⵜⵎⵎⴰⵖ ⵜⵙⵙⵉⴷⵔ ⴰⵙⴽⴽⵉⵍ ⵏ ⵜⴼⵉⵏⴰⵖ ⵉ ⵜⵉⵔⵔⴰ ⵏ ⵜⵎⴰⵣⵉⵖⵜ, ⵎⴰⵛⵛ ⵜⴰⵡⵡⵓⵔⵉ ⴰⴷ ⵓⵔ ⴱⴰⵀⵔⴰ ⵜⴻⵟⵟⴰⴼ ⴰⴷⵔⵉⵣ ⴷⴰⵔ ⵜⴰⵏⴱⴰⴹⵜ ⵏ ⴷⴷⵣⴰⵢⵜ. ⵎⴰⵛⵛ ⵉⵡⵙⵏⵜ ⵜⵉⵔⵔⴰ ⵏ ⴽⵉⴳⴰⵏ ⵏ ⵉⵎⴰⵙⵙⴰⵏⵏ ⵉⵎⴰⵣⵉⵖⵏ – ⵜⵓⴳⵯⵜ ⵏⵏⵙⵏ ⵍⵍⴰⵏ ⴳ ⵓⵣⵡⴰⴳ- ⴳ ⵜⵉⵍⵉⵜ ⵏ ⵓⵎⴹⴰⴽⴰⵕ ⵉⴷⴷⵔⵏ ⴷⴰⵔ ⵉⵎⴰⵣⵉⵖⵏ ⴳ ⵓⴳⵯⵏⵙ ⵏ ⴷⴷⵣⴰⵢⵔ, ⵙⵍⴰⵡⴰⵏ ⴰⴽⴽⵯ ⴳ ⵜⵖⵔⵎⵜ ⵏ ⵜⵉⵣⵉ ⵡⵓⵣⵣⵓ ⵍⵍⵉ ⴷⴷⵔⵏ ⴽⵉⴳⴰⵏ ⵏ ⵉⵎⴰⵣⵉⵖⵏ.
ⵜⵉⵎⵙⴰⵔⵉⵏ
ⴳ 10 ⵎⴰⵕⵚ 1980, ⵉⴽⴽⴰ ⵜⵜ ⵏⵏ ⵓⵎⴰⵔⴰ ⴰⵎⴰⵣⵉⵖ ⵎⵓⵍⵓⴷ ⵎⵄⵎⵎⵔⵉ ⵢⴰⵜ ⵜⵉⵏⴰⵡⵜ ⵅⴼ ⵓⵎⴰⵔⴳ ⴰⵎⴰⵣⵉⵖ ⴰⵇⴱⵓⵔ ⴳ ⵜⵙⴷⴰⵡⵉⵜ ⵏ ⵜⵉⵣⵉ ⵡⵓⵣⵣⵓ ⵉⵜⵜⵓⵙⴽⴰⵔⵏ ⵖⴰⵙ ⵢⴰⵏ ⴽⴽⵓⵥ ⵉⵙⴳⴳⵯⴰⵙⵏ ⴰⵢⴰ ⵏⵏ.
ⵓⴳⵯⵉⵏⵜ ⵜⵏⴱⴰⴹⵉⵏ ⴰⴷ ⴰⵊⵊⵉⵏⵜ ⴰⵙⵏⵎⴰⵍⴰ ⵏ ⵜⵉⵏⵏⴰⵡⵜ ⴰⴷ ⴱⵍⴰ ⴼⴽⴰⵏⵜ ⴽⵔⴰ ⵏ ⵜⵎⵜⵍⵉⵏ, ⵉⵏⵉⵏⵜ ⵎⴰⵙ ⴷ ⵜⴰⵖⵜⴰⵙⵜ ⵜⴳⴰ ⵜⵉⵏ ⵜⵏⴱⴰⴹⵜ ⵜⴰⵏⴰⵎⵎⴰⵙⵜ ⵙⴳ ⵜⵎⴰⵥⵓⵏⵜ ⵏ ⴷⴷⵣⴰⵢⵔ.
ⴳ ⵡⵉⵙ ⵙⵉⵏ ⵡⵓⵙⵙⴰⵏ, ⴼⴼⵓⵖⵏ ⴷ ⵉⵎⵓⵙⵙⵓⵜⵏ ⵙⵙⵀⵔⵛⵏⵉⵏ ⵜⴰⴳⵯⵉⵜ ⴰⴷ ⴳ ⵜⵖⵔⵎⵉⵏ ⵏ ⵜⵉⵣⵉ ⵡⵓⵣⵣⵓ ⴷ ⵜⵎⴰⵥⵓⵏⵜ ⵏ ⴷⴷⵣⴰⵢⵔ, ⵖⵎⴽ ⵍⵍⵉ ⵉⵍⵍⴰ ⵓⴱⵏⵏⵣ ⴰⵎⴰⵜⴰⵢ, ⵜⵉⵍⵉ ⵢⴰⵜ ⵜⵡⴰⴷⴰ ⴳ ⵉⵙⵡⴰⴽ ⵏ ⵜⵉⵣⵉ ⵏ ⵡⵓⵣⵣⵓ, ⵜⴱⴷⴷ ⴷⴰⵜ ⵏ ⵓⴽⴰⴱⴰⵕ ⵏ ⵉⴳⵏⵣⵉ ⵏ ⵓⵙⵍⴻⵍⵍⵉ ⴰⵏⴰⵎⴰⵓⵔ ⴷ ⵓⵙⵖⵉⵎ ⵏ ⵍⵡⵉⵍⴰⵢⴰ, ⴰⵙⵉⵏ ⵡⵉⴷⴰ ⴷⵔⵓⵏⵉⵏ ⴳ ⵜⵡⴰⴷⴰ ⴰⴷ ⵜⵉⵎⵉⵜⴰⵔ ⴰⵎ: ⵜⴰⴷⵍⵙⴰ ⵜⴰⵎⴰⵣⵉⵖⵜ…ⵜⴰⴷⵍⵙⴰ ⵜⴰⵎⴷⵏⴰⵏⵜ”, ⴷ “ⵢⵓⴷⴰ ⴳ ⵓⵎⵙⴰⵢ ⴰⴷⵍⵙⴰⵏ”.
ⵉⴳⴰ ⵓⵎⵓⵙⵙⵓ ⴰⴷ ⵏ ⵓⵙⵖⵓⵢⵢⵓ ⴰⵎⵣⵡⴰⵔⵓ ⵍⵍⵉ ⵉⵍⵍⴰⵏ ⴳ ⵜⵖⵔⵎⵉⵏ ⵏ ⵜⵉⵣⵉ ⵡⵓⵣⵣⵓ ⴷ ⴷⴷⵣⴰⵢⵔ ⴷⴼⴼⵉⵔ ⵏ ⵜⵙⵉⵎⴰⵏⵜ ⵏ ⵜⵎⴰⵣⵉⵔⵜ, ⵜⵎⴰⵟⵍ ⴰⴽⴽⵯ ⵜⵎⵔⴰⵔⵓⵜ ⵏ ⵓⵏⵙⵙⵉⵅⴼ ⵏ ⵜⴳⴷⵓⴷⴰⵏⵜ ⵛⵛⴰⴷⵍⵉ ⴱⵏⵊⴷⵉⴷ ⴼ ⵜⵎⵙⴰⵔⵉⵏ ⴰⴷ, ⵢⵉⵏⵉ ⴳ ⵉⵏⴰⵡ ⵏⵏⵙ ⵏ 17 ⵉⴱⵔⵉⵔ ⵎⴰⵙ ⵜⴳⴰ ⴷⴷⵣⴰⵢⵔ ⵜⴰⵎⴰⵣⵉⵔⵜ ⵜⴰⵄⵕⴰⴱⵜ ⴷ ⵜⵓⵙⵍⵉⵎⵜ.
ⴽⵛⵎⵏⵜ ⵜⴰⴳⴳⴰⵍⵉⵏ ⵏ ⵜⴼⵔⵓⵜ ⵙ ⵡⴰⵎⵎⴰⵙⵏ ⵍⵍⵉⵖ ⵍⵍⴰⵏ ⵉⴷ ⴱⴰⴱ ⵏ ⵓⵎⵓⵙⵙⵓ ⴰⵎ ⵜⴰⵙⴷⴰⵡⵉⵜ ⵏ ⵜⵉⵣⵉ ⵡⵓⵣⵣⵓ ⴷ ⵉⵙⴳⵏⴰⴼⵏ ⴷ ⴰⵙⴰⴽⵯⵏ. ⵜⵜⵢⵉⵎⵉⵥⵏ ⵖⵉⴷ 24 ⵏ ⵓⴼⴳⴰⵏ.
ⴳ ⵜⵉⵣⵉ ⵡⵓⵣⵣⵓ, ⵜⵜⵓⵇⵇⴰⵏⵜ ⵜⵉⵏⵎⴰⵍ ⵍⵍⵉ ⵙⴰⵇⵔⴰⵏⵉⵏ ⵜⴰⵄⵕⴰⴱⵜ, ⵢⵉⵍⵉ ⵓⵙⴽⵉⵟⵟⵉ ⵏ ⵜⴼⵉⵍⵉⵏ ⵏ ⵓⵙⵉⵙⵙⵏ ⵜⵜⵢⵓⵔⴰⵏⵉⵏ ⵙ ⵜⴰⵄⵕⴰⴱⵜ, ⵖⵎⴽ ⵍⵍⵉ ⵍⵍⴰⵏ ⴽⵉⴳⴰⵏ ⵏ ⵉⴷ ⴱⴰⴱ ⵏ ⵜⵏⴼⵔⵓⵜ ⴳ ⵜⵖⵔⵎⵜ ⵉⵜⵜⵓⵇⵇⴰⵏⵏ ⴷⴰⵜ ⵏ ⵓⵎⴰⴹⴰⵍ, ⴰⵢⵍⵍⵉ ⵍⵍⴰⵏ ⵎⴰⴷ ⵉⴳⴰⵏ 120 ⵏ ⵉⵎⵏⵖⵉ ⴷ 5000 ⵏ ⵓⵎⴰⴳⵓⵙ.
ⴰⵎⵓⵙⵙⵓ ⴰⴷⵍⵙⴰⵏ ⴰⵎⴰⵣⵉⵖ ⵏⵜⵜⴰⵏ ⵉⵙⵎⵔⵙ ⵉⵡⵔⵉⴽⵏ ⵏⵏⵙ ⵃⵎⴰ ⴰⴷ ⵜⵜⴰⵔⴰⵏ ⴼ ⵜⵎⵙⴰⵔⵉⵏ ⴰⴷ ⴷ ⵓⵎⵓⴽⵔⵉⵙ ⴰⴷⵍⵙⴰⵏ ⴰⵎⴰⵣⵉⵖ ⴳ ⵜⵏⵖⵎⴰⵙⵜ ⵜⴰⵎⴰⴷⵍⴰⵏⵜ ⴷ ⵜⵎⵏⴹⴰⵡⵜ.
ⵜⴰⵢⵢⴰⴼⵓⵜ
ⵍⵓⵃⵏ ⵉⵙⵖⵉⵢⵢⵓⵜⵏ ⴰⴷ ⵜⵉⴼⴰⵡⵜ ⴼ ⵜⵎⵙⴰⵔⵜ ⵜⴰⵎⴰⵣⵉⵖⵜ, ⴼⴽⵉⵏ ⴰⵙ ⵢⴰⵏ ⵓⴼⵔⵉⵙ ⴰⵎⴷⵏⴰⵏ ⵍⵍⵉ ⴰⴷⵍⵍⵉ ⵜⴳⴰ ⵖⴰⵙ ⵜⴰⵖⴰⵡⵙⴰ ⵏ ⵉⵎⴰⵙⵙⴰⵏⵏ, ⵖⵎⴽ ⵍⵍⵉ ⴷ ⵉⵡⵉⵏ ⴰⴷ ⵉⵍⵉⵏ ⵉⵎⵓⵙⵙⵜⵏ ⵉⵏⴰⵎⵓⵏⵏ ⵍⵍⵉ ⵔⴰⴷ ⵢⵉⵍⵉ ⴳ ⴷⴷⵣⴰⵢⵔ ⴳ ⵎⴰ ⵔⴰⴷ ⵢⴰⵛⴽ ⴰⵎ ⵜⵉⵎⵙⴰⵔⵉⵏ ⵏ ⵇⵓⵙⴰⵏⵟⵉⵏⴰ ⴳ 1986 ⴷ ⵜⵎⵙⴰⵔⵉⵏ ⵏ 5 ⴽⵟⵓⴱⵕ 1988 ⵍⵍⵉ ⴷ ⵉⵡⵉⵏ ⴰⴷ ⵜⵉⵍⵉ ⵜⵎⵏⵏⴰⵡⵜ ⵜⴰⵙⵔⵜⴰⵏⵜ ⴳ ⵓⵡⴰⵏⴽ.
ⵜⵉⵡⵉ ⴷ ⵜⴼⵙⵓⵜ ⵏ ⵉⵎⴰⵣⵉⵖⵏ ⴰⴷ ⵢⵉⵜⵜⵉ ⵓⵙⴳⴷⵍ ⵉⵍⵍⴰⵏ ⴼ ⵜⵎⵙⴰⵔⵜ ⵜⴰⵎⴰⵣⵉⵖⵜ, ⵖⵎⴽ ⵍⵍⵉ ⵉⵍⵍⴰ ⵓⵎⵓⵙⵙⵓ ⴰⵎⴰⵣⵉⵖ ⵉⴳⴰⵏ ⴰⵎⴷⵏⴰⵏ.
ⴳ ⵓⵣⵎⵣ ⵢⴰⴹⵏⵉⵏ, ⵜⵜⵓⵙⴽⴰⵔ ⵜⵙⵏⵓⵔⴰⵢⵜ ⵜⴰⵎⴰⵜⵜⵓⵢⵜ ⵉ ⵜⵎⴰⵣⵉⵖⵜ ⴳ 27 ⵎⴰⵢ 1995 ⴳ ⵓⵣⵎⵣ ⵏ ⵓⵏⵙⵙⵉⵅⴼ ⵏ ⴷⴷⵣⴰⵢⵔ ⵍⵢⴰⵎⵉⵏ ⵥⵕⵡⴰⵍ ⴷⴼⴼⵉⵔ ⵏ ⵓⴱⵏⵏⵣ ⵉⵏⵏⵓⵕⵥⵎⵏ ⵍⵍⵉ ⵉⵙⴽⵔ ⵓⵎⵓⵙⵙⵓ ⴰⵎⴰⵣⵉⵖ ⴳ ⵜⵙⴳⴰ ⵏ ⵍⵇⴱⴰⵢⵍ.
ⵜⵉⵡⵉ ⴷ ⵜⴼⵙⵓⵜ ⵏ ⵉⵎⴰⵣⵉⵖⵏ ⵓⵍⴰ ⴰⴷ ⵉⵍⵉⵏ ⵉⵏⵖⵎⵉⵙⵏ ⵙ ⵜⵎⴰⵣⵉⵖⵜ ⴳ ⵉⵎⴰⵙⵙⵏ ⵉⵎⴰⴷⴷⵓⴷⵏ ⵏ ⵓⵡⴰⵏⴽ ⴳ ⵉⵙⴳⴳⵯⴰⵙⵏ ⵏ 90, ⵢⵉⵍⵉ ⵓⵍⴰ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵉⵏⵎⵍ ⵜⴰⴳⴷⵓⴷⴰⵏⵜ.
ⴳ ⵓⵎⵏⵉⴷ ⵢⴰⴹⵏⵉⵏ, ⵜⵍⵍⴰ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵓⵜⵍⴰⵢⵜ ⵜⴰⵏⴰⵎⵓⵔⵜ ⴳ ⵓⴷⵓⵙⵜⵓⵔ ⵏ ⵜⵎⴰⵣⵉⵔⵜ ⵏ ⴷⴷⵣⴰⵢⵔ.
ⴰⵖⴱⴰⵍⵓ: ⴰⵙⵉⵜ ⵏ ⵍⵊⴰⵣⵉⵔⴰ (ⵙ ⵓⵙⴳⵣⵍ)
ⴰⵙⵓⵖⵍ: ⵕⴰⵛⵉⴷ ⵏⴰⵊⵉⴱ