ⵓⴼⵓⵖ ⵏ ⵓⴷⵍⵉⵙ ⵜⵉⵣⵔⴰⵡⵉⵏ ⴳ ⵜⵙⴽⵍⴰ ⵜⴰⵎⴰⵣⵉⵖⵜ (ⵜⵉⵥⵉⵕⵜ ⴷ ⵜⵙⵏⵙⵉ) ⵏ ⵓⴷⵓⴽⵜⵓⵔ ⵎⵓⵃⵎⵎⴰⴷ ⵅⵟⵟⴰⴱⵉ
ⵙⴳ ⵜⵥⵕⵉⴳⵉⵏ ⵏ ⵜⵖⵉⵡⴰⵏⵜ ⵏ ⵜⵙⴽⵍⴰ ⴷ ⵜⵎⴰⵙⵙⴰⵏⵉⵏ ⵜⵉⵏⴼⴳⴰⵏⵉⵏ ⵉⴹⴼⵕⵏ ⵉ ⵜⵙⴷⴰⵡⵉⵜ ⵏ ⵉⴱⵏ ⵥⵓⵀⵕ ⴳ ⵓⴳⴰⴷⵉⵔ, ⵉⴼⴼⵖ ⴷ ⴳ ⵎⴰⴷ ⵓⵔ ⵉⵎⴰⵟⵍⵏ ⵢⴰⵏ ⵓⴷⵍⵉⵙ ⵉⵍⴰⵏ ⵙ ⵓⵣⵡⵍ: ⵜⵉⵣⵔⴰⵡⵉⵏ ⴳ ⵜⵙⴽⵍⴰ ⵜⴰⵎⴰⵣⵉⵖⵜ, ⵜⵉⵥⵉⵕⵜ ⴷ ⵜⵙⵏⵙⵉ ⵏ ⵓⵙⵍⵎⴰⴷ ⴷ ⵜⴽⴰⴷⵉⵎⵉⵜ ⴰⴷⵓⴽⵜⵓⵔ ⵎⵓⵃⵎⵎⴰⴷ ⵅⵟⵟⴰⴱⵉ. ⵢⵓⵎⴰ ⵓⴷⵍⵉⵙ ⵎⴰⴷ ⵢⴰⵥⵏ ⵉ 215 ⵏ ⵜⵙⵏⴰ, ⴳⵉⵙ ⵜⴰⵎ ⵉⵎⴰⴳⵔⴰⴷⵏ ⵉⵎⴰⵙⵙⴰⵏⵏ ⵢⵓⵔⴰ ⵜⵏ ⵓⵙⵍⵎⴰⴷ ⵎⵓⵃⵎⵎⴰⴷ ⵅⵟⵟⴰⴱⵉ ⴳ ⵉⵣⵎⴰⵣ ⵉⵎⵣⴰⵔⴰⵢⵏ ⴳⵔ 1992 ⴷ 2017.
ⵜⵉⵣⵔⴰⵡⵉⵏ ⵜⵉⵎⴰⵙⵙⴰⵏⵉⵏ ⴷⴰ ⵉⵍⵍⴰⵏ ⴳ ⵓⴷⵍⵉⵙ ⴰⴷ ⴰⵔ ⴰⴽⴽⵯ ⵜⵙⵓⵜⵍⵏⵜ ⵅⴼ ⵓⴼⵔⴰⵏ ⴷ ⵜⵣⵔⴰⵡⵜ ⵏ ⵜⵙⴽⵍⴰ ⵜⴰⵎⴰⵣⵉⵖⵜ. ⵙ ⵓⵢⴰ ⵙⴷⵉⴽⵏⵜ ⵜⵣⵔⴰⵡⵉⵏ ⴰⴷ ⵅⴼ: ⵜⵉⵎⵓⴽⵔⵉⵙⵉⵏ ⵏ ⵓⵎⵣⵔⵓⵢ ⵏ ⵜⵙⴽⵍⴰ ⵜⴰⵎⴰⵣⵉⵖⵜ, ⵉⵙⵇⵙⵉⵜⵏ ⵏ ⵓⴼⵔⴰⵏ ⵏ ⵜⵙⴽⵍⴰ ⵜⴰⵎⴰⵣⵉⵖⵜ, ⵉⵙⵎⴰⵇⵇⴰⵍⵏ ⵅⴼ ⵜⵡⵛⴽⵉⵏⵜ ⵏ ⵜⵎⴷⵢⴰⵣⵉⵏ ⵏ ⵜⵎⵉⵜⴰⵔ ⵏ ⵓⵎⴷⵢⴰⵣ ⴰⵣⴰⵢⴽⵓ, ⴰⵙⴼⵙⵉ ⵏ ⵜⵎⴷⵢⴰⵣⵜ ⵜⴰⵎⴰⵣⵉⵖⵜ ⵜⴰⵎⵖⵔⵉⴱⵉⵜ ⵙⴳ ⵜⵎⴷⵢⴰⵣⵜ ⵜⴰⵎⵉⵔⴰⵢⵜ, ⴰⵜⴰⵎ ⴰⵙⴳⴷⴰⵏ ⴷ ⵓⵜⴰⵎ ⴰⵏⴰⵎⵓⵏ ⴳ ⵜⵎⴷⵢⴰⵣⵜ ⵏ ⵍⵃⴰⵊⵊ ⵎⵓⵃⵎⵎⴰⴷ ⴱⵏ ⵢⴰⵃⵢⴰ ⵓ ⵜⵣⵏⴰⵅⵜ, ⵜⴰⵎⴷⵢⴰⵣⵜ ⵜⴰⵎⴰⵣⵉⵖⵜ ⵜⴰⵎⵖⵔⵉⴱⵉⵜ ⴳ ⵢⵉⴼⴼⵓⵙ, ⴰⵃⵡⴰⵛ ⵏ ⵡⴰⵔⵣⴰⵣⴰⵜ: ⵜⴰⵙⵖⵏⵜ ⴷ ⵜⵙⵏⴰⵎⴽⵜ, ⴰⵙⵓⵖⵍ ⵙⴳ ⵜⴰⵎⴰⵣⵉⵖⵜ: ⴽⵔⴰ ⵏ ⵜⵉⵔⵎⵉⵜⵉⵏ ⵏ ⵓⵙⵓⵖⵍ ⵜⵎⴰⵣⵉⵖⵜ ⵙⴳ ⴷ ⵙ ⵜⵎⴰⵣⵉⵖⵜ. ⵉⵙⵎⴷ ⵉⵎⴰⴳⵔⴰⴷⵏ ⴰⴷ ⵙ ⵢⴰⵜ ⵜⵣⵔⴰⵡⵜ ⵏ ⵓⵙⵍⵎⴰⴷ ⵎⵓⵃⵎⵎⴰⴷ ⵍⵎⴰⴽⵔⵉ ⵅⴼ ⵜⴱⵔⵉⴷⵉⵏ ⵜⵉⴷⵍⵙⴰⵏⵉⵏ ⵙⴳ ⵉⵎⴷⵢⴰⵜⵏ ⵏ ⵜⵏⴼⵓⵙⵜ.
ⵉⵡⵙⵏ ⵉⵙⵍⵎⴰⴷⵏ ⵉⵎⵔⵣⵓⵜⵏ ⵎⴰⵙⵙ ⵎⵓⵃⵎⵎⴰⴷ ⴰⴼⴰⵇⵉⵔ ⴷ ⵎⴱⴰⵕⴽ ⴰⴱⴰⵄⵣⵣⵉ ⴳ ⵓⵙⵎⵓⵏ ⴷ ⵓⵣⴷⴰⵢ ⵏ ⵜⵓⵎⴰⵢⵜ ⵜⴰⴱⵖⵓⵔⵜ ⵏ ⵓⴷⵍⵓⵙ ⴰⴷ ⴰⵎⴰⵢⵏⵓ, ⵙⴳ ⵜⵙⴳⴰ ⵜⴰⵏⵉⵎⴰⵏⵜ ⵉⵣⴷⵉⵏ ⵙ ⵓⵙⵉⵙⵏ ⴰⵏⴼⴳⴰⵏ ⵙ ⵓⴷⵖⴰⵔ ⵉⵥⵉⵍⵏ ⵏ ⵓⵙⵍⵎⴰⴷ ⵎⵓⵃⵎⵎⴰⴷ ⵅⵟⵟⴰⴱⵉ ⴳ ⵓⵎⵓⵖⵍⵉ ⴰⴷⵍⵙⴰⵏ ⴷ ⵓⵙⴷⴰⵡⴰⵏ ⴰⵏⴰⵎⵓⵔ ⵎⵏⵉⴷ ⵏ ⵉⵙⴰⴽⴰⵜⵏ ⵏⵏⵙ ⵥⵉⵍⵏⵉⵏ ⴳ ⵉⵙⵡⵉⵔⵏ ⵉⵣⴷⵉⵏ ⵙ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵍⵎⴷ ⴰⵙⴷⴰⵡⴰⵏ ⴷ ⵓⵙⵎⴰⵜⵜⴰⴳ ⴷ ⵜⴷⵔⴰⵡⵜ ⴳ ⵜⵓⴳⵜ ⵏ ⵉⵏⵎⵓⵇⵇⴰⵔⵏ ⵉⴷⵍⵙⴰⵏⵏ ⴷ ⵉⵡⵏⴳⵉⵎⵏ. ⴷ ⵙⴳ ⵜⵙⴳⴰ ⵜⴰⵎⵙⵖⴰⵔⵓⵜ, ⵉⵣⴷⵉⵏ ⵙ « ⵓⵙⵎⵓⵏ ⵏ ⵉⴳⵔⵉⵡⵏ ⵉⵏⴼⵔⴰⵏⵏ ⵉⵎⴰⵣⵉⵖⵏ ⵙⴳ ⵉⵎⴰⴳⵔⴰⴷⵏ ⴷ ⵜⵣⵔⴰⵡⵉⵏ ⵏⵏⴰ ⵉⵙⵎⴽⵍⵏ ⵜⴰⵙⴽⵍⴰ ⵜⴰⵎⴰⵣⵉⵖⵜ ⵙ ⵜⵎⵙⵉⵔⵜ ⴷ ⵓⵙⴼⵙⵉ ⵙⴳ ⵉⴷⵓⵙⴰⵏ ⵏ ⵉⵖⵎⵉⵙⵏ ⴷ ⵜⵙⵖⵓⵏⵉⵏ ⴷ ⵓⵣⵓⵣⵣⵔ ⵏⵏⵙⵏⵜ ⴳⵔ ⵉⵏⴰⴼⵔⴰⵔⵏ, ⴰⵛⴽⵓ ⴳ ⴽⵉⴳⴰⵏ ⵏ ⵉⵣⵎⴰⵣ ⵓⵔ ⴰⵔ ⵜⴻⵜⵜⴰⴼⴰⵏ ⵉⵎⵔⵣⵓⵜⵏ ⴰⴱⵔⵉⴷ ⵙⵉⵙⵏ, ⵎⴽⵍⵍⵉ ⴷ ⵜⵉⵡⵉ ⵜⵣⵡⴰⵔⵜ ⵏ ⵓⴷⵍⵉⵙ.
ⴰⴷ ⴷ ⵏⵙⵙⴽⵯⵜⵉ ⵎⴰⵙ ⴷ ⴰⵙⵍⵎⴰⴷ ⵎⵓⵃⵎⵎⴰⴷ ⵅⵟⵟⴰⴱⵉ ⵉⵡⴰⵍⴰ ⵉ ⵜⵙⴳⴰ ⵏ ⵣⴰⴳⵓⵔⴰ, ⴷ ⴰⵙⵍⵎⴰⴷ ⵏ ⵓⵙⵉⵏⴰⵏ ⵏ ⵓⵙⵎⵓⵜⵜⴳ ⴳ ⵜⵣⵡⵉⵔⵉ ⵜⴰⵎⵜⵎⵔⴰⵡⵉⵏ ⴳ ⵜⵙⴳⴰ ⵏ ⵓⵎⴽⵏⴰⵙ, ⴹⴰⵕⵜ ⵏⵏⵙ ⵢⵓⴷⴼ ⵙ ⵓⴳⴰⵍⵓⴼ ⴰⴱⵉⴷⴰⴳⵓⵊⵉ ⴷ ⵓⵙⴳⵎⴰⵏ ⴷ ⵡⵓⵜⵓⵢ ⵏ ⵜⵣⵓⵏⵉ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴳ ⵜⵖⵉⵡⴰⵏⵜ ⵏ ⵜⵙⴽⵍⴰ ⴷ ⵜⵎⴰⵙⵙⴰⵏⵉⵏ ⵜⵉⵏⴼⴳⴰⵏⵉⵏ ⴳ ⵜⵙⴷⴰⵡⵉⵜ ⵏ ⵉⴱⵏ ⵥⵓⵀⵕ ⵜⵉⵣⵉ ⵏ ⵓⵙⴱⴷⴷⵉ ⵏⵏⵙ ⵏ ⵜⴰⵎⵜⵎⵔⴰⵡⵉⵏ ⵏ ⵜⴰⵙⵓⵜ ⴰⴷ ⵉⵣⵔⵉⵏ, ⵉⵜⵜⵓⵙⵙⴰⵏ ⵙ ⵜⴷⵔⴰⵡⵉⵏ ⵏⵏⵙ ⵜⵉⴽⴰⴷⵉⵎⵉⵢⵉⵏ ⴷ ⵉⵔⵣⵣⵓⵜⵏ ⵏⵏⵙ ⵉⵎⵢⴰⵏⵏⴰⵡⵏ, ⵣⵓⵏ ⴷ ⵜⴰⴷⵔⴰⵡⵜ ⵏⵏⵙ ⴰⴽⴷ ⵉⵙⵍⵎⴰⴷⵏ ⵢⴰⴹⵏ ⵙ ⵓⵙⵔⵓⵙ ⵏ ⵜⵉⵔⵙⴰⵍ ⵏ ⵜⵣⵓⵏⵉ ⵜⴰⵎⴰⵣⵉⵖⵜ ⴳ ⵜⵙⴷⴰⵡⵉⵜ ⵏ ⵉⴱⵏ ⵥⵓⵀⵕ ⵙⴳ ⵓⵙⴳⴳⵯⴰⵙ ⵏ 2006, ⵙ ⵓⵙⵙⵏⵜⵉ ⵙ ⵓⵙⴰⴽⴰ ⵏ ⵓⵎⴰⵙⵜⵔ ⴹⴰⵕⵜ ⵏⵏⵙ ⴰⵙⴰⴽⴰ ⵏ ⵜⵓⵔⴰⴳⵜ.