ⴱⵕⴰⵀⵉⵎ ⴰⵅⵢⵢⴰⵟ, ⴰⵏⴱⴷⴰⴷ ⵏ ⵓⵎⵓⵙⵙⵓ ⴰⵎⵙⵎⵓⵏ ⴰⵎⴰⵣⵉⵖ
1- ⵜⴰⵍⴰⵍⵉⵜ ⵏⵏⵙ
ⵉⵍⵓⵍ ⴱⵕⴰⵀⵉⵎ ⴰⵅⵢⵢⴰⵟ ⴳ ⵓⵙⴳⴳⵯⴰⵙ 1941 ⴳ ⴰⵢⵜ ⴱⴰⵀⴰ ⵏⵏⴰ ⵢⴰⵥⵏ ⵉ ⵓⴳⴰⴷⵉⵔ ⴳ ⵍⵎⵖⵔⵉⴱ. ⵉⵎⵎⴰⵜⵜⵉ ⵉⵎⵥⵥⵉ ⵏⵉⵜ ⵙⵓⵍ ⵙ ⵕⵕⴱⴰⵟ, ⵉⴹⴼⵕ ⴳⵉⵙ ⵜⵉⵖⵔⵉ ⵏⵏⵙ ⵙⴳ ⵓⵙⵍⵎⴷ ⴰⵎⵏⵣⵓ ⴰⵔ ⴰⵙⵍⵎⴷ ⴰⵎⵙⴷⴰⵡ.
2- ⴰⵙⵎⵓⵜⵜⴳ ⵏⵏⵙ
ⵉⵙⵙⵏⵜⵉ ⵓⵅⵢⵢⴰⵟ ⵜⵓⴷⵔⵜ ⵏⵏⵙ ⵜⴰⵣⵣⵓⵍⴰⵏⵜ ⵙ ⵓⵙⵍⵎⴷ ⵏ ⵜⵓⵙⵏⴰⴽⵜ ⴳ ⵍⵇⵏⵉⵟⵕⴰ ⴷ ⵕⵕⴱⴰⵟ, ⵖⵉⵏⵏ ⴰ ⴳ ⵉⴷⵡⵍ ⴰⵎⵙⵎⵓⵙⵙⵓ ⴰⵎⴰⵣⵉⵖ. ⴳ ⵓⵙⴳⴳⵯⴰⵙ ⵏ 1967, ⵉⴷⵔⴰ ⴳ ⵓⵙⴱⴷⴷⵉ ⵏ « ⵜⵎⵙⵎⵓⵏⵜ ⵜⴰⵎⵖⵔⵉⴱⵉⵜ ⵉ ⵓⵔⵣⵣⵓ ⴷ ⵓⵙⵏⴼⵍ ⴰⴷⵍⵙⴰⵏ » ⴳ ⵕⵕⴱⴰⵟ, ⵜⴳ ⵢⴰⵜ ⵜⵎⴰⴷⴷⴰⵙⵜ ⵜⴰⴷⵍⵙⴰⵏⵜ ⵜⴰⵎⴰⵣⵉⵖⵜ, ⵏⵏⴰⵏ ⵎⴰⵙ ⵜⴳⴰ « ⴰⵙⴰⵜⵉ ⴰⵎⵣⵡⴰⵔⵓ ⴰⵎⵙⵎⵓⵏ ⵏⵏⴰ ⵉⵏⵜⴰⵢⵏ ⵙ ⵓⵎⵣⴰⵖ ⵅⴼ ⵜⴷⵍⵙⴰ ⵜⴰⵎⴰⵣⵉⵖⵜ, ⴳ ⵢⴰⵏ ⵓⵎⵏⴰⴹ ⴰⵙⵔⵜⴰⵏ ⴰⵏⴰⵎⵓⵔ ⴷ ⵓⵙⴳⴰⵡⴰⵏ ⵉⵜⵜⵢⴰⵡⵙⵙⴰⵏⵏ ⵙ ⵜⵖⵍⵍⴰⴱⵉⵜ ⵏ ⵓⵙⵡⵉⵏⴳⵎ ⴰⵎⵖⴰⵍⴰⵛ. ⴳ ⵜⴰⵎⴰ ⵏ ⵄⴱⴷⵍⵍⴰⵀ ⴱⵓⵏⴼⵓⵔ ⴷ ⵃⵎⴰⴷ ⴰⴽⵡⴰⵡ ⴷ ⵄⵓⵎⴰⵕ ⵍⵅⵍⴼⴰⵡⵉ ⴷ ⵄⵍⵉ ⵍⵊⴰⵡⵉ. ⵉⴳⴰ ⴰⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵙⵎⵓⵏⵜ ⴰⵢⵍⵍⵉⵖ ⵉⵎⵎⵓⵜ.
ⵉⴽⴽⴰ ⵜⵜ ⵉⵏⵏ ⵓⵅⵢⵢⴰⵟ ⵉⵍⵍⴰ ⴰⵡⴷ ⴳ ⵓⵙⵇⵇⵉⵎ ⵏ ⵜⵎⵙⵙⵓⴳⵓⵔⵜ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵓⵙⴳⴳⵯⴰⵙ ⵏ 2002. ⵉⴳ ⴰⵡⴷ ⵢⴰⵏ ⵙⴳ ⵉⵎⵙⵔⵙⴰⵍ ⵏ ⵜⵎⵙⵎⵓⵏⵜ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ ⵜⴰⵎⴰⵣⵉⵖⵜ ⴳ ⵓⴳⴰⴷⵉⵔ ⴰⵙⴳⴳⵯⴰⵙ 1979, ⵉⴳ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵙⵎⴰⵜⵜⴰⴳⵜ ⵏ ⵜⵙⵓⵜⵍⵉⵏ ⵏⵏⵙ ⵙ ⴽⴽⵓⵥⵜ 1980 – 1982 – 1988 – 1991. ⵎⴽⵍⵍⵉ ⵉⵙⴱⴷⴷ ⵜⴰⵔⴰⴱⴱⵓⵜ ⵏ ⵓⵥⴰⵡⴰⵏ ⵜⴰⵜⵔⴰⵔⵜ ⵜⴰⵎⴰⵣⵉⵖⵜ ⵜⴰⵎⵣⵡⴰⵔⵓⵜ « ⵓⵙⵎⴰⵏ » ⴰⵙⴳⴳⵯⴰⵙ 1974. ⵉⴽⴽ ⵜⵜ ⵉⵏⵏ ⴷ ⴰⵎⵣⴷⴰⵢ ⴰⵎⵣⵡⴰⵔⵓ ⴰⵏⴰⵎⵓⵔ ⵏ ⵜⵙⵎⵓⵏⵉⵏ ⵜⵉⵎⴰⵣⵉⵖⵉⵏ ⴳ ⵍⵎⵖⵔⵉⴱ 1993 – 1996, ⴷ ⵓⵏⵙⵙⵉⵅⴼ ⵏ ⵜⵉⵍⴰⵍ ⵏ ⵍⴽⵓⵏⴳⵕⵉⵙ ⴰⵎⴰⴹⵍⴰⵏ ⴰⵎⴰⵣⵉⵖ ⵉⵜⵜⵓⵙⵏⵎⴰⵍⴰⵏ ⴳ ⵜⵖⵔⵎⵜ ⵏ ⵍⵢⵓⵏ ⴳ ⴼⵕⴰⵏⵙⴰ. ⵎⴽⵍⵍⵉ ⵉⵙⵡⴰⵍⴰ ⴽⵔⴰ ⵖ ⵜⵎⵙⵎⵓⵏⵉⵏ ⴰⴷ ⵙⴳⵎⴹⵏⵜ » ⵜⴰⵏⵜⵜⴰⵎⵜ ⵏ ⵓⴳⴰⴷⵉⵔ » ⵉⵙⵎⴰⵍ ⵙ ⵓⵢⴰ ⵏⵏ ⴰⵙⴱⴷⴷⵉ ⴰⵎⴰⴷⴷⵓⴷ ⵏ ⵓⵎⵓⵙⵙⵓ ⴰⴷⵍⵙⴰⵏ ⴰⵎⴰⵣⵉⵖ, ⵉⴳ ⵢⴰⵏ ⵓⵎⵓⵙⵙⵓ ⵉⵣⴷⵉⵏ ⵙ ⵜⴷⵍⵙⴰ ⴷ ⵜⵎⴰⴳⵉⵜ ⴷ ⵉⵣⵔⴼⴰⵏ ⴷ ⵜⵔⵡⴰⴽⵜ ⴷⴰ ⵜⴻⵜⵜⵉⵍⵉ ⵜⴰⵎⴰ ⵏ ⵜⴰⴳⴳⴰⵍⵉⵏ ⵉⵡⴰⵜⵙⵏ ⵜⵓⵚⴽⴰ ⵏ ⵍⵎⵖⵔⵉⴱ ⴰⴷⵉⵎⵇⵕⴰⵟⵉ.
ⵉⵏⵏⴰ ⵖⵉⴼⵙ ⵓⵎⵔⵣⵓ ⴳ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵍⵃⵓⵙⴰⵢⵏ ⴰⵢⵜ ⴱⴰⵃⵙⵉⵏ: « ⴰⵅⵢⵢⴰⵟ ⴷⴰⵔⵙ ⵉⵎⵏⴰⴷⵏ ⴷ ⵜⵎⴰⴷⴷⵓⵜⵉⵏ ⵃⵎⴰ ⴰⴷ ⵢⴰⵖⵓⵍ ⵡⴰⵜⵉⴳ ⵉ ⵜⵎⴰⵣⵉⵖⵜ, ⴷ ⵜⵏⴽⵔⴰ ⵏⵏⵙ, ⴰⵢⵍⵍⵉⵖ ⵜ ⴰⴽⴽⵯ ⵙⵙⵏⵏ ⵜⵓⴳⵜ ⵏ ⵉⵎⵖⵔⴰⴱⵉⵢⵏ, ⵙⵍⴰⵡⴰⵏ ⴰⴽⴽⵯ ⵡⵉⴷ ⵜⵜⵎⵓⵙⵙⵓⵏⵉⵏ ⴳ ⵢⵉⴳⵔ ⴰⵙⵔⵜⴰⵏ ⴷ ⵓⴷⵍⵙⴰⵏ ⵉⵣⴷⵉⵏ ⵙ ⵓⵙⴽⴽⵉⵏ ⴰⵎⴰⵣⵉⵖ. ⵎⴽⵍⵍⵉ ⵉⴱⴷⵔ ⴰⵢⵜ ⴱⴰⵃⵙⵉⵏ ⵜⴰⴷⵔⴰⵡⵜ ⵏⵏⵙ (ⴰⵅⵢⵢⴰⵟ) ⴳ ⵜⵙⵏⵜⴰⵢⵜ ⵏ ⵓⵙⵔⵓⵙ ⵏ ⵓⵎⴰⵡⴰⵍ ⵉⵛⵛⴰⵔⵏ ⴳⵔ ⵜⴰⵏⵜⵍⴰⵢⵉⵏ ⵜⵉⵎⴰⵣⵉⵖⵉⵏ.
ⵉⵏⵏⴰ ⴼⵍⵍⴰⵙ ⵓⵏⴱⴷⴰⴷ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵎⴰⵙ ⵉⴳⴰ » ⴰⵎⵙⵔⵙⵍ ⵏ ⵜⵉⴷⵜ » ⵏ ⵓⵎⵓⵙⵙⵓ ⴰⵎⴰⵣⵉⵖ, ⵉⵖ ⵏⵥⵕⴰ ⵜⴰⵙⴽⵯⴼⵍⵜ ⵏ ⵓⵍⵜⴰⵖ ⵏⵏⵙ ⴳ ⵉⵎⵓⵙⵙⵓⵜⵏ ⵉⵎⵏⵏⴰⵡⵏ, ⴷ ⵉⴷⵔⵓ ⴷⵉⵙ ⵜⴰⵏⵏⴰⵢⵜ ⴰⴷ, ⴰⵏⵙⵙⵉⵅⴼ ⵏ ⵓⵙⴰⴹⵓⴼ ⴰⵎⴰⵣⵉⵖ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ ⵃⵎⴰⴷ ⵄⴰⵚⵉⴷ. ⵉⵙⵏⵓⵎⵎⵍ ⵜ ⵙ ⵎⴰⵙ ⵉⴳⴰ ⴰⵡⴷ ⵢⴰⵏ ⵙⴳ ⵉⵙⴰⵜⵓⵔⵏ ⵏ ⵓⵎⵓⵙⵙⵓ ⴰⵎⴰⵣⵉⵖ, ⴷ ⵢⴰⵏ ⴳ ⵉⵣⴰⵢⴽⵓⵜⵏ ⵏⵏⵙ.
3- ⵜⴰⵎⵜⵜⴰⵏⵜ ⵏⵏⵙ:
ⵉⵎⵎⵓⵜ ⵎⴰⵙⵙ ⴰⵅⵢⵢⴰⵟ ⴳ 07 ⴱⵕⴰⵢⵕ 2018, ⵉⵙⵏⵎⴰⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵢⴰⵏ ⵡⴰⵙⵙ ⴰⵣⵔⴰⵡⴰⵏ, ⵉⴳ ⴰⵙⵙⵎⵖⵔ ⵉ ⵢⵉⵎⴰⵏ ⵏⵏⵙ ⴰⵙⵙ ⵏ ⵓⵙⵉⵎⵡⴰⵙ 30 ⵎⴰⵕⵚ 2018, ⴳ ⵓⵙⵖⵉⵎ ⵏ ⵓⵙⵉⵏⴰⴳ. ⵉⵙⵎⴰⵍ ⵢⵉⵡⵉⵙ ⵙ ⵓⴷⴱⴷⴷⵉ ⵏ ⵜⵎⵔⵙⵍⵜ ⵏ ⴱⵕⴰⵀⵉⵎ ⴰⵅⵢⵢⴰⵟ ⵉ ⵓⵎⵢⴰⵏⴰⵡ ⴰⴷⵍⵙⴰⵏ, ⴰⴼⴰⴷ ⴰⴷ ⵜⴳ ⴰⵙⴷⴰⵍ ⵏ ⵢⴰⵏ ⵓⴳⵣⵣⵓⵎ ⵙⴳ ⵓⵙⴰⴽⴰ ⵏ ⵜⵓⴷⵔⵜ ⵏⵏⵙ. ⵎⴽⵍⵍⵉ ⵉⵙⵎⴰⵍ ⵙ ⵓⵙⵎⵏⵉⴷ ⵏ ⵜⵎⵔⵙⵍⵜ ⵉ ⵜⵙⵎⵖⵓⵔⵜ ⵏ ⴱⵕⴰⵀⵉⵎ ⴰⵅⵢⵢⴰⵟ ⵉ ⵜⴷⵍⵙⴰ, ⴷ ⵓⵙⵏⵎⵉⵍⵉ ⵏ ⵜⵉⵏⴰⵡⵉⵏ ⴷ ⵜⵉⵍⴰⵍ ⵜⵉⴷⵍⵙⴰⵏⵉⵏ.
4- ⵉⴷⵍⵉⵙⵏ ⵏⵏⵙ
ⴰⵅⵢⵢⴰⵟ, ⴱⵕⴰⵀⵉⵎ (1992) ⵜⴰⴱⵔⴰⵜ
ⴰⵅⵢⵢⴰⵟ, ⴱⵕⴰⵀⵉⵎ (1994) ⵎⴰⵅⵅ ⵜⴰⵎⴰⵣⵉⵖⵜ?
ⴰⵅⵢⵢⴰⵟ, ⴱⵕⴰⵀⵉⵎ (2004) ⵉⵔⴳⴰⵣⵏ ⵏ ⵜⵉⴳⴰⵡⵜ ⵜⴰⵎⴰⵣⵉⵖⵜ: ⵡⵉⴷ ⴳⵉⵙⵏ ⵎⵎⵓⵜⵏⵉⵏ.
ⴰⵅⵢⵢⴰⵟ, ⴱⵕⴰⵀⵉⵎ (2207) ⵜⴰⵎⴰⵣⵉⵖⵜ ⵜⴰⵎⴰⴳⵓⵜ ⵏⵏⵖ ⵜⴰⵏⴰⵎⵓⵔⵜ.
ⵜⴰⵏⴽⵔⴰ ⵜⴰⵎⴰⵣⵉⵖⵜ ⵎⴽⵍⵍⵉ ⴷⴷⵔⵖ ⵜⴰⵍⴰⵍⵉⵜ ⵏⵏⵙ ⴷ ⵜⵎⵔⵏⵉⵡⵜ ⵏⵏⵙ, ⵜⴰⵎⵙⵎⵓⵏⵜ ⵜⴰⵎⵖⵔⵉⴱⵉⵜ ⵉ ⵓⵔⵣⵣⵓ ⴷ ⵓⵙⵏⴼⵍ ⴰⴷⵍⵙⴰⵏ, 2012.
ⴰⵙⵓⵖⵍ: ⵄⴱⴷⵍⵡⴰⵃⵉⴷ ⴱⵓⵜⴱⴰⵖⴰ