ⴰⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⵢⵓⵣⵏ ⵉ ⵓⵎⴰⵡⵙⴰⵙ ⵏ ⴱⵕⵕⴰ ⴰⵎⵖⵔⵉⴱⵉ ⵙ ⵎⴰⴷ ⵉⵥⵍⵉⵏ ⵙ ⵓⵣⵔⴰⴽ ⵏ ⵉⵙⵖⵍⴰⴼ ⵏ ⵜⵎⵜⵜⴰ ⵉⵎⵓⵏⵏ ⵉⵣⴷⵉⵏ ⵏⵏⴰ ⵉⵣⴷⵉⵏ ⴷ ⵉⵣⵔⴼⴰⵏ ⵏ ⵉⵎⴰⵣⵉⵖⵏ
ⴱⴰⴱ ⵏ ⵜⵎⵎⵓⵖⵔⴰ ⵎⴰⵙⵙ ⵏⴰⵚⵉⵕ ⴱⵓⵕⵉⵟⴰ ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴷ ⵉⵎⵖⵔⴰⴱⵉⵢⵏ ⵣⴷⵖⵏⵉⵏ ⴳ ⴱⵕⵕⴰ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ.
ⴰⵙⵏⵜⵍ: ⴰⵙⵙⵔⵖⵓⴷ ⵙ ⵓⵙⵜⴰⵢ ⵏ ⵍⵎⵖⵔⵉⴱ ⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵍⵎⵖⵔⵉⴱ ⴳ ⵜⵎⵜⵜⴰ ⵉⵎⵓⵏⵏ ⵉ ⵓⵙⴳⴳⵯⴰⵙ 2024/2974, ⴷ ⵉⵙⵖⵍⴰⴼ ⵏ ⵜⵙⵇⵇⵉⵎⵜ ⵜⴰⵎⵛⵛⵉⵡⴰⵕⵜ ⵏ ⵜⵎⵢⴰⵇⵇⴰⵏⵜ ⵏ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⴰⵥⵓⵕⴰⵏ ⴷ ⵓⵣⵔⴰⴽ ⵏ ⵉⵣⵔⴼⴰⵏ ⵏ ⵉⵎⴰⵣⵉⵖⵏ.
ⵎⴰⵙⵙ ⴰⵎⴰⵡⵙⴰⵙ,
ⵔⵉⵖ ⴰⴷ ⵙⵙⵎⵏⵉⴷⵖ ⴰⵙⵙⵔⵖⵓⴷ ⵉⵏⵓ ⵉⴷⵔⴰⵏ ⵙ ⵓⵣⵎⵣⵣⵓ ⵏ ⵓⵙⵜⴰⵢ ⴰⵎⵣⵔⴰⵢ ⵏ ⵍⵎⵖⵔⵉⴱ ⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉ ⵓⵙⴳⴳⵯⴰⵙ 2024, ⵏⵏⴰ ⵉⵎⵙⴰⵙⴰⵏ ⴷ ⵓⵙⴳⴳⵯⴰⵙ ⴰⵎⴰⵣⵉⵖ ⴰⵎⴰⵢⵏⵓ, ⴷ ⵏⵏⴰ ⵉⴷⵡⵍⵏ ⵖⵉⵍⴰⴷ ⴰⵎⴰⴷⴷⵓⴷ, ⴳ ⵓⵙⴳⴳⵯⴰⵙ 2974.
ⴰⴷ ⵜⵙⵙⵏⵎ ⵎⴰⵙ ⴷ ⵜⴰⵔⵏⴰⵡⵜ ⴰⴷ ⵜⴰⵅⴰⵜⴰⵔⵜ ⵉ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⴷ ⵢⴰⵜⵜⵓⵢⵏ ⵏ ⵜⵍⵜⵜⴰ ⵉⵎⵓⵏⵏ, ⵢⵉⵡⵉ ⵎⴰⴷ ⵉⴳⴰⵏ 30 ⵏ ⵓⵙⵜⴰⵢ ⵎⵏⵉⴷ 17 ⵉ ⵢⵉⴼⴼⵓⵙ ⵏ ⵢⵉⴼⵔⵉⵇⵢⴰ, ⵓⵔ ⴰⵔ ⵉⵎⵎⴰⵍ ⵎⴰⵙ ⴷ ⵜⴰⴳⵍⴷⵉⵜ ⵏ ⵍⵎⵖⵔⵉⴱ ⴷⴰ ⵜⴻⵜⵜⵣⵔⴰⴽ ⵉⵣⵔⴼⴰⵏ ⵉⵜⵜⵢⴰⵔⴰⵏ ⴳ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵜⵜⵓⵙⵎⵔⴰⵙⵏ ⴳ 10 ⴷⵓⵊⴰⵏⴱⵉⵔ 1948, ⵏⵉⵖ ⵓⴳⴳⴰⵔ ⵏⵏⵙ ⴳ ⵓⵍⵖⵓ ⵏ ⵜⵎⵜⵜⴰ ⵉⵎⵓⵏⵏ ⴳ ⵎⴰⴷ ⵉⵥⵍⵉⵏ ⵙ ⵉⵣⵔⴼⴰⵏ ⵏ ⵉⵎⴰⴷⴰⵏⵏ ⵉⵕⵚⵍⵉⵢⵏ ⵏⵏⴰ ⵜⵙⵙⵎⵔⵙ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⴳ 13 ⴷⵓⵊⴰⵏⴱⵉⵔ 2007.
ⴰⵊⵊⴰⵜ ⴰⵖ ⴰⴷ ⴰⵡⵏ ⵏⵎⵍ ⴰⵎⵏⵓⵙ ⵏⵏⵖ ⵎⵏⵉⴷ ⵏ ⵓⵙⵙⵎⵔⵙ ⵏ ⵓⵙⵜⴰⵢ ⴰⴷ ⴰⵎⴱⴰⵕⴽⵉ ⴳ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⴷ ⴰⵏⵎⵜⵜⴰⵏ ⵉ ⵓⴼⵔⴰⴳ ⴷ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ ⴰⵔ ⵓⵔ ⵉⵜⵜⵉⵍⵉ ⵓⵙⵙⵎⵔⵙ ⵏⵏⵙ ⴳ ⵜⵉⴽⴽⵉ ⵏ ⵜⵎⵛⵓⵛⵛⴰⴹ ⴳ ⵎⴰⴷ ⵉⵥⵍⵉⵏ ⵙ ⵜⵉⵕⵥⵉ ⵏ ⵓⵡⴰⵏⴽ ⴰⵎⵖⵔⵉⴱⵉ ⵉ ⵉⵣⵔⴼⴰⵏ ⴰⵏⵏ, ⵉⵙ ⵏⵉⵜ ⵏⴻⵏⵏⵓⵔⵣ ⴰⴷ ⵉⴳ ⵓⵢⴰ ⵜⵉⵣⵡⵉⵔⴰ ⵏ ⵓⵎⴰⵡⴰ ⵏ ⵜⵎⴰⵣⵉⵔⵜ ⵏⵏⵖ ⵙ ⵜⵉⵔⵉⵜ ⵓⵔ ⵉⵜⵜⴰⵖⵓⵍⵏ ⵖⵔ ⵓⵙⴷⵓⵙ ⵏ ⵓⴱⴰⴹ ⵏ ⵓⵙⵍⴳⵏ ⴷ ⵓⵙⴷⵓⵙ ⵏ ⵜⴷⵉⵎⵓⵇⵕⴰⵟⵉⵜ ⴷ ⵓⵣⵔⴰⴽ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵖ ⵏⵉⵜ ⵍⵍⴰⵏ ⵡⵉⵏ ⵉⵎⴰⵣⵉⵖⵏ, ⵎⴽⵍⵍⵉ ⵉⵜⵜⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴳ ⵜⴱⵔⴰⵜ ⵏⵏⵙ ⵉ ⵓⴳⵔⴰⵡ ⴰⴳⵔⴰⵖⵍⴰⵏ ⵏⵏⴰ ⵉⵜⵜⵓⵏⵎⴰⵍⴰⵏ ⵙ ⵓⵣⵎⵣⵣⵓ ⵏ ⵓⴽⵜⵜⵓⵢ ⵡⵉⵙ ⵙⴰⵎⵔⴰⵡ ⴷ ⵙⵎⵎⵓⵙ ⵏ ⵓⵙⵖⵣⵏ ⵏ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⵏ ⵜⵎⵜⵜⴰ ⵉⵎⵓⵏⵏ ⵉ ⵓⵍⵖⵓ ⴰⵎⴰⵜⴰⵢ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰ ⵉⵜⵜⵓⵙⴽⴰⵔⵏ ⴳ ⵕⵕⴱⴰⵟ ⴳ 07 ⴷⵓⵊⴰⵏⴱⵉⵔ ⴷⴰ ⵉⵣⵔⵉⵏ: ‘’ ⵜⴳⴰ ⴰⵡⴷ ⵜⴼⵓⴳⵍⴰ ⴰⴷ ⵢⴰⵜ ⵜⵣⵎⵣⵜ ⴷ ⵢⵓⵙⴰⵏ ⵏ ⵓⵙⵜⴰⵍ ⵏ ⵜⵙⴽⵔⴰⵡⵉⵏ ⴳ ⵓⵎⵏⵉⴷ ⴰⴷ, ⴷ ⵓⵙⵡⵓⵜⵜⵓ ⵏ ⵉⵎⴰⵍⴰⴷⵏ ⴷ ⵜⵏⵎⴳⵍⵉⵡⵉⵏ ⵏⵏⴰ ⵉⵙⴽⵔⵏ ⵉⴹⵉⵚ ⵅⴼ ⵜⵎⴳⴳⵉⵜ ⵏ ⵓⵃⵟⵟⵓ ⵏ ⵓⵎⵎⵉⵥⵏ ⵏⵏⵖ, ⴷ ⴰⵡⴷ ⵉⵏⴰⵥⴰⵕⵏ ⵏⵏⴰ ⵓⵔ ⵉⵜⵜⴰⵊⵊⴰⵏ, ⴰⵔ ⵖⵉⵍⴰⴷ, ⴰⵎⵓⵏ ⴰⴳⵔⴰⵖⵍⴰⵏ ⵙⴳ ⵓⵙⴷⵓⵙ ⵏ ⵜⵎⵙⴰⵔⵉⵏ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⵡⵉⵍⴰ ⵜⴰⵎⴰⵜⴰⵢⵜ. ⵙ ⵜⵉⴷⵜ ⵜⴼⴰⵡ ⵜⵎⵔⵉⵙⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵖⵔ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ ⵓⵔ ⵉⴱⴷⴷ ⵖⴰⵙ ⴳ ⵓⵙⴷⵓⵙ ⵏⵏⵙⵏ ⴰⴷⵙⵜⴰⵔ, ⵎⴰⵛⴰ ⵔⴰⴷ ⵜⴳ ⵓⵍⴰ ⴰⵙⴰⵜⵓⵔⵏ ⵜⵙⵔⵜⴰⵢ ⵜⵉⵎⴰⵜⴰⵢⵉⵏ ⴷ ⵓⵙⵏⴼⵍ ⴰⴷⵙⵍⴰⵏ ⵉⵇⵇⴰⵏ ⴷ ⴰⴷ ⵜ ⵏⴳ ⴳ ⵢⵉⵅⴼ ⴳ ⵉⵙⵜⴰⵢⵏ ⵉⵙⵜⵕⴰⵜⵉⵊⵉⵢⵏ, ⵖ ⴳⴰⵏ ⵉⴷⵎⵙⴰⵏⵏ ⵏⵉⵖ ⵉⵏⴰⵎⵓⵏⵏ ⵏⵉⵖ ⵉⴷⵍⵙⴰⵏⵏ ⵏⵉⵖ ⵉⵡⵏⴹⴰⵏⵏ.
ⵔⵉⵖ ⴰⴷ ⴰⵡⵏ ⵙⵙⵍⴽⵎⵖ ⵎⴰⵙ ⵜⴰⵙⵇⵇⵉⵎⵜ ⵉⵥⵍⵉⵏ ⵙ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⴰⵥⵓⵕⴰⵏ (CERD) ⵜⴼⵙⵔ ⵉⵙⵖⵍⴰⴼ ⵏⵏⵙ ⵉⵎⴳⴳⵓⵔⴰ ⵙ ⵎⴰⴷ ⵉⵥⵍⵉⵏ ⵙ ⵜⴰⵏⴰⴹⵜ ⵜⴰⵎⴰⵜⴰⵢⵜ ⵏ ⵜⵏⴰⴹⵉⵏ ⵜⵉⵣⵎⵣⴰⵏⵉⵏ ⵙⴳ ⵜⵉⵙ ⵜⵥⴰ ⴷ ⵎⵔⴰⵡ ⴰⵔ ⵢⴰⵜ ⴷ ⵎⵔⴰⵡ ⵉⵜⵜⵓⵙⵎⵏⵉⴷⵏ ⵙⴳ ⴷⴰⵔ ⵍⵎⵖⵔⵉⴱ, ⴳ 08 ⴷⵓⵊⴰⵏⴱⵉⵔ ⵉⵣⵔⵉⵏ, ⵜⵎⵔⴰⵔⴰ ⵜⴰⵏⴰⴹⵜ ⴳ ⵜⵖⵉⴰ ⵏⵏⵙ 3024 ⴷ 3026 ⵓⵙⵙⴰⵏ ⵏ 22 ⴷ 23 ⵏⵓⵡⴰⵏⴱⵉⵔ, ⴷ ⵜⵖⵉⵎⴰ ⵏⵏⵙ 3043 ⴷ 3044 ⴳ 05 ⴷ 06 ⴷⵓⵊⴰⵏⴱⵉⵔ 2023. ⵢⵉⵍⵉ ⵓⵙⵖⵣⵏ ⵏ ⵉⵙⵖⵍⴰⴼ ⵏⵏⵙ ⵉⵎⴳⴳⵓⵔⴰ ⵙ ⵎⴰⴷ ⵉⵥⵍⵉⵏ ⵙ ⵜⵎⵏⵜⵉⵍⵜ ⵏ ⵉⵎⴰⵣⵉⵖⵏ ⴷ ⵜⵓⵜⵍⴰⵢⵜ ⵏⵏⵙⵏ, ⴷ ⵜⴻⵜⵜⵔ ⵜⵙⵇⵇⵉⵎⵜ ⵜⴰⵏⵎⵜⵜⴰⵏⵜ ⴳ ⵓⵡⴰⵏⴽ ⴰⵎⵖⵔⵉⴱⵉ, ⵙ ⵎⴰⴷ ⵉⵥⵍⵉⵏ ⵙ ⵓⵣⵓⵣⵣⵔ ⵏ ⵓⵎⵍⴰⵏ, ⴰⴷ ⵉⴼⵙⵔ ⵜⴰⵏⴰⴹⵉⵏ ⵏⵏⵙ ⵉ ⵓⴳⴷⵓⴷ ⴹⴰⵕⵜ ⵏ ⵓⵙⵙⵎⵏⵉⴷ ⵏⵏⵙⵏⵜ ⴷ ⵓⵍⴰ ⴰⵣⵓⵣⵣⵔ ⵏ ⵜⴰⵏⵏⴰⵢⵉⵏ ⵜⵉⵎⴳⴳⵓⵔⴰ ⵏ ⵜⵙⵇⵇⵉⵎⵜ ⵙⵉⵙ ⵉⵥⵍⵉⵏ ⴳ ⴷⴰⵔ ⵉⵎⴰⵙⵙⵏ ⴰⴽⴽⵯ ⵏ ⵓⵡⴰⵏⴽ ⴷ ⵉⴳⴰⵏ ⵉⵎⴰⵙⴰⵢⵏ ⴳ ⵓⵣⵣⴳⵉⵔ ⵏ ⵜⵎⵢⴰⵇⵇⴰⵏⵜ CERD/C/MAR/CO/19-21 13, ⴳ ⵍⵍⴰⵏⵜ ⵜⵎⵏⴰⴹⵉⵏ ⴷ ⵍⵡⵉⵍⴰⵢⴰⵜ ⴷ ⵜⵙⴳⵉⵡⵉⵏ ⴷ ⵜⴳⵔⴰⵡⵉⵏ, ⴷ ⵓⵣⵓⵣⵣⵔ ⵏⵏⵙⵏⵜ ⴳ ⵡⴰⵏⵙⴰ ⴰⵍⵉⴽⵟⵕⵓⵏⵉ ⵏ ⵜⵎⴰⵡⴰⵙⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⴰⴱⵉⵢⵏ ⵣⴷⵖⵏⵉⵏ ⴳ ⴱⵕⵕⴰ ⵏⵉⵖ ⴳ ⴽⵔⴰ ⵏ ⵡⴰⵏⵙⴰ ⵢⴰⴹⵏ ⵉⵜⵜⵓⴼⴽⴰⵏ ⵉ ⵓⴳⴷⵓⴷ ⵙ ⵜⵓⵜⵍⴰⵢⵉⵏ ⵜⵉⵎⴰⴷⴷⵓⴷⵉⵏ ⴷ ⵜⵓⵜⵍⴰⵢⵉⵏ ⵢⴰⴹⵏ ⴱⴰⵀⵔⴰ ⵉⵜⵜⵓⵙⵎⵔⴰⵙⵏ, ⵉⵖ ⵙⵉⵙⵏⵜ ⵜⵙⵖⴰⵡⵙⴰ ⵜⵉⵣⵉ.[1]
ⴳ ⵓⵙⴰⵜⵉ ⴰⴷ,ⵔⵉⵖ ⴰⴷ ⵙⵎⴰⵜⵔⵖ ⵙ ⵎⴰⵙ ⴷ ⵓⴳⴳⴰⵔ ⵏ ⵙⵉⵏ ⵢⵉⵔⵏ, ⵓⵔ ⵊⵊⵓⵏ ⵉⵙⴽⵔ ⵉⴳⵔ ⵏⵏⵓⵏ ⴰⵎⴰⵡⵙⴰⵙ ⵙ ⴽⵔⴰ ⵏ ⵜⵖⵜⴰⵙⵜ ⵙ ⵎⴰⴷ ⵉⵥⵍⵉⵏ ⵙ ⵉⵙⵖⵍⴰⴼ ⴰⴷ ⵉⵏⵎⵜⵜⴰⵏⵏ ⵉⵙⵜⴰⵡⵀⵎⵎⴰⵏ ⴷ ⵡⴰⵛⵛⵉⵍⵏ, ⵉⴳ ⴼⵍⵍⴰⵖ ⴰⵏⴱⵣⴰⵣ ⴰⴷ ⴰⵡⵏ ⵜⵏ ⵉⴷ ⵏⵙⵙⴽⵯⵜⵉ :
ⴳ ⵎⴰⴷ ⵉⵥⵍⵉⵏ ⵙ ⵜⵙⴷⴷⴰⵔⵜ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵉⵎⴰⵣⵉⵖⵏ:
ⴰⵔ ⵜⵙⵙⵖⵍⴼ ⵜⵙⵇⵇⵉⵎⵜ ⵜⴰⴳⵔⴰⵖⵍⴰⵏⵜ ⴰⵡⴰⵏⴽ ⴰⴳⵎⴰⵎ ⴰⴷ ⵜⵙⴽⵔ ⵉⵙⵡⵓⴷⴷⵓⵜⵏ ⴷ ⵉⵇⵇⴰⵏⵏ ⴷ ⵜⵏⴼⵔⵓⵜ ⵏ ⵓⴼⵊⵊⵉⵊ ⵏ ⵉⵎⴰⵣⵉⵖⵏ ⵙ ⵉⵣⵔⴼⴰⵏ ⵏⵏⵙ ⵙⵎⴷⵏⵉⵏ ⴳ ⵓⵎⴰⵍⵓ ⵏ ⵜⵎⵙⵓⵜⴰⵍ ⵎⵙⴰⵙⴰⵏⵉⵏ ⵙ ⵡⴰⵔ ⴰⵏⵓⵃⵢⵓ, ⴷ ⴰⵔ ⵜⵜ ⵜⵙⵖⵍⴰⴼ ⵙ ⵜⵓⵥⵍⴰⵢⵜ ⵙ:
ⴰⴷ ⵜⵜⴰⵡⵙⴽⴰⵔⵏⵜ ⵜⵎⴳⴳⵉⵢⵉⵏ ⵉ ⵓⵙⵎⵓⵏ ⵏ ⵓⵎⵍⴰⵏ ⵉⵜⵜⵓⵙⵏⴰⵡⴰⵢⵏ ⵙ ⵜⴰⴳⴳⴰⵢⵜ ⴷ ⵓⵡⵜⴰⵢ ⴳ ⵎⴰⴷ ⵉⵥⵍⵉⵏ ⵙ ⵜⴷⵔⴰⵡⵜ ⵏ ⵓⴼⵔⵉⴷⵏ ⵏ ⵜⴳⵔⴰⵡⵉⵏ ⵜⵉⵥⵓⵕⴰⵏⵉⵏ ⴳ ⵜⵓⴷⵔⵜ ⵜⴰⵙⵔⵜⴰⵏⵜ ⴷ ⵜⵎⴰⵜⴰⵢⵜ, ⴷ ⵓⵙⴳⵓⴷⵉ ⵏ ⵜⵎⴳⴳⵉⵢⵉⵏ ⵉⵡⴰⵜⵙⵏ ⵙ ⵜⵎⵔⵏⵉⵡⵜ ⵏ ⵜⴷⵔⴰⵡⵜ ⵏⵏⵙⵏ ⴳ ⵢⵉⴳⵔⴰⵏ ⴰⴷ, ⵙⵍⴰⵡⴰⵏ ⴰⴽⴽⵯ ⵜⵉⵡⵜⵎⵉⵏ ⵉⵡⴰⵍⴰⵏ ⵜⵉⴳⵔⴰⵡⵉⵏ, ⵙⵍⴰⵡⴰⵏ ⴰⴽⴽⵯ ⴳ ⵉⴷⵖⴰⵔⵏ ⵏ ⵢⵉⵎⵉⵥ ⵏ ⵜⵖⵜⴰⵙⵜ.
ⴰⵙⴼⵜⴰⵢ ⵏ ⵜⵓⴳⴳⴰⵙ ⵏⵏⵙ ⵉⵡⴰⵜⵜⵙⵏ ⴰⵙⴱⴷⴷⵉ ⵏ ⵥⵥⵍⴹ ⴳ ⵍⵍⴰⵏ ⵉⵎⴰⵣⵉⵖⵏ ⴷ ⵜⵏⴼⵔⵓⵜ ⵏ ⵡⴰⴷⴰⴼ ⵏⵏⵙⵏ ⵙ ⵜⵡⵓⵔⵉ ⴷ ⵓⵙⵍⵎⴷ ⴷ ⵜⵏⵓⴼⴰ ⵜⵉⴷⵓⵙⴰⵏⵉⵏ, ⴱⵍⴰ ⴰⵏⵓⵃⵢⵓ.
ⴰⴼⵔⴰⴳ ⵏ ⵉⵎⴰⵣⵉⵖⵏ ⴳ ⵜⵓⴽⵙⵙⴰ ⵏ ⵉⴽⴰⵍⵉⵡⵏ ⵏⵏⵙ, ⴷ ⵓⵙⵣⵡⴰⴳ ⵏⵏⵙ ⵓⵛⵛⵉⵍ, ⵙⵍⴰⵡⴰⵏ ⴰⴽⴽⵯ ⵜⵉⵎⵖⴰⵔⵉⵏ ⵜⵉⵙⵓⵍⴰⵍⵉⵢⵉⵏ, ⴷ ⴰⴷ ⵡⵉⵔⵔⵉⵏ ⵉⴽⴰⵍⵉⵡⵏ ⵜⵜⵓⴽⴽⴰⵙⵏⵉⵏ, ⵏⵉⵖ ⴰⵎⵙⴰⵙⴰ ⵅⴼ ⵡⴰⵔⵔⴰⵣ ⴷ ⵢⵓⵙⴰⵏ, ⴷ ⵜⵏⴼⵔⵓⵜ ⵏ ⵡⴰⴷⴰⴼ ⵏ ⵡⵓⵏⴳⵉⵙⵏ ⵙ ⵜⵡⵉⵍⴰ ⵜⴰⵎⵢⴰⴳⴰⵏⵜ ⵖⵔ ⵜⵣⵔⴼⵜ, ⴷ ⵓⵙⴽⴰⵔ ⵏ ⵉⵎⵛⵛⵉⵡⴰⵕ ⵉⵕⵡⴰⵏ ⴷ ⵓⴱⵖⵉⵔⵏ ⴷ ⵉⵎⴰⵣⵉⵖⵏ ⴷⴰⵜ ⵏ ⵓⵙⵓⵔⴳ ⵏ ⵓⵣⵣⴳⵉⵔ ⵏ ⴽⵓ ⴰⵖⴰⵡⴰⵙ ⴰⵏⴳⵎⵓ ⵏⵉⵖ ⴰⵙⵢⴰⴼⴰ ⵏ ⵉⵙⵓⴳⴰⵎ ⵉⴳⴰⵎⴰⵏⵏ ⵏⵏⴰ ⵉⵣⵎⵔⵏ ⴰⴷ ⵖⵓⵔⵙ ⵉⵍⵉⵏ ⵉⴷⵔⵉⵣⵏ ⵅⴼ ⵉⴽⴰⵍⵉⵡⵏ ⵏⵏⵙⵏ.
ⴰⴷ ⵜⵜⴰⵡⵙⴽⴰⵔⵏ ⵉⵔⵣⵣⵓⵜⵏ ⵙ ⵎⴰⴷ ⵉⵥⵍⵉⵏ ⵙ ⵡⴰⴷⴷⴰⴷⵏ ⴰⴽⴽⵯ ⵏ ⵓⵙⵙⵎⵔⵙ ⵉⴳⴳⵓⵜⵏ ⵉ ⵜⴰⴳⴳⴰⵍⵜ ⵙⴳ ⴷⴰⵔ ⵉⵎⵙⵖⴰⵏⵏ ⵉⵜⵜⵓⵙⵎⴰⴳⴰⵍⵏ ⵙ ⵓⵣⵣⴳⵉⵔ ⵏ ⵓⵙⵍⴳⵏ ⵎⴳⴰⵍ ⵉⵎⵙⵎⵓⵙⵙⵓⵜⵏ ⵉⵎⴰⵣⵉⵖⵏ ⴷ ⵉⵎⵏⵣⴰⵖ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⵙⴽⴰⵏⵏ, ⴷ ⵜⵏⴼⵔⵓⵜ ⵏ ⵓⵙⴰⵕⴰⴹ ⵏ ⵉⵎⴰⵙⴰⵢⵏ ⵅⴼ ⵓⵢⴰ ⵏⵏ, ⴷ ⵓⵎⵎⵔⵜ ⵏⵏⵙ ⵙ ⴰⵢⵍⵍⵉ ⴷ ⵢⵓⵙⴰⵏ ⴷ ⵜⵎⵙⴽⵉⵔⵉⵏ ⵏⵏⵙ ⴳ ⵡⴰⴷⴷⴰⴷ ⵏ ⵓⵏⴽⴰⴹ ⵏⵏⵙ, ⴷ ⴰⴷ ⴰⵎⵥⵏ ⵡⵓⵏⴳⵉⵙⵏ ⵏ ⵜⴰⵡⵏⵊⵉⵡⵉⵏ ⵏⵏⵙⵏ ⴰⵔⵔⴰⵣⵏ ⴷ ⵢⵓⵙⴰⵏ ⴷ ⵓⵣⵔⴼ ⵏⵏⵙⵏ ⵙⴳ ⵉⵎⴰⵍⴰⴷⵏ.
ⴰⴷ ⵜⵜⴰⵡⵙⴽⴰⵔⵏⵜ ⵜⵎⴳⴳⵉⵢⵉⵏ ⵉⵡⴰⵜⵜⵙⵏ ⴰⵙⵎⵔⵙ ⵏ ⵉⵣⵣⵔⴰⴼⵏ ⵥⵍⵉⵏⵉⵏ, ⵃⵎⴰ ⴰⴷ ⵢⵉⵍⵉ ⵓⵙⴷⵓⵙ ⴷ ⵓⴼⵔⴰⴳ ⵏ ⵉⵎⵣⴰⵖⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵖ ⵏⵉⵜ ⵍⵍⴰⵏ ⵉⵎⵙⵡⵓⵔⵉⵢⵏ ⴳ ⵢⵉⴳⵔ ⵏ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⴰⵥⵓⵕⴰⵏ, ⴷ ⵅⴼ ⵉⵣⵔⴼⴰⵏ ⵏ ⵜⴳⵔⴰⵡⵉⵏ ⵏⵏⴰ ⴱⴰⵀⵔⴰ ⵉⵙⵍⵍⵉ ⵡⴰⵏⴰⵡ ⴰⴷ ⵏ ⵓⵙⵏⵓⵃⵢⵓ.
ⴳ ⵎⴰⴷ ⵉⵥⵍⵉⵏ ⵙ ⵜⵙⴷⴷⴰⵔⵜ ⵉⵣⴷⵉⵏ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ:
ⴰⵔ ⵜⵙⵙⵖⵍⴰⴼ ⵜⵙⵇⵇⵉⵎⵜ ⵜⵙⵇⵇⵉⵎⵜ ⵜⴰⴳⵔⴰⵖⵍⴰⵏⵜ ⴰⵡⴰⵏⴽ ⴰⴳⵎⴰⵎ ⵙ ⵓⵙⴳⵓⴷⵉ ⵏ ⵜⵓⴳⴳⴰⵙ ⵉⵡⴰⵜⵜⵙⵏ ⴰⵣⵣⴳⵉⵔ ⵏ ⵉⵙⴱⴷⴰⴷⵏ ⵉⴷⵙⵜⴰⵔⵏ ⵏ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 26-16 ⵉⵣⴷⵉⵏ ⵙ ⵓⵙⵡⵓⵜⵜⵓ ⵏ ⵜⴼⵔⴽⵉⵡⵉⵏ ⵏ ⵓⵙⵎⵀⵍ ⵏ ⵓⴷⵔⵉⵣ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ, ⴷ ⵜⵎⴰⵎⴽⵉⵏ ⵏ ⵓⵙⵉⴷⴼ ⵏⵏⵙ ⴳ ⵢⵉⴳⵔ ⵏ ⵙⵓⵍⵎⴷ ⴷ ⵢⵉⴳⵔⴰⵏ ⵏ ⵜⵓⴷⵔⵜ ⵜⴰⵎⴰⵜⴰⵢⵜ ⵖⵓⵔ ⴰⵙⵉⵣⵡⵔ, ⴷ ⴰⵔ ⵜⵙⵙⵖⵍⴰⴼ ⵙ ⵜⵓⵥⵍⴰⵢⵜ ⵙ:
ⴰⵙⵉⵍⵉ ⴳ ⵜⴱⵔⵉⴷⵜ ⵏ ⵓⵙⵎⴰⵜⴰ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵉⵙⵡⵉⵔⵏ ⴰⴽⴽⵯ ⵉⵏⵎⵍⴰⵏⵏ, ⴳ ⵉⵍⵍⴰ ⵓⵙⵍⵎⴷ ⴰⵎⵣⵡⴰⵔⵓ, ⴷ ⵜⵎⵔⵏⵉⵡⵜ ⵏ ⵡⵓⵟⵟⵓⵏ ⵏ ⵉⵙⵍⵎⴰⴷⵏ ⵢⵉⵍⵉ ⵓⵙⵎⵓⵜⵜⴳ ⵏⵏⵙⵏ ⵉⴷⵓⵙⵏ ⴳ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⴰⵙⴷⵓⵙ ⵏ ⵜⵉⵍⵉⵜ ⵏ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ ⴳ ⵉⵎⴰⵙⵙⵏ ⵏ ⵓⵙⵏⵖⵎⵙ ⴰⵙⵍⵉⵥⵉⵕ.
ⴰⵣⵣⵔⴰⵢ ⵅⴼ ⵓⵙⴰⵜⵉ ⵓⵣⵔⵉⴼ, ⵙⵍⴰⵡⴰⵏ ⴰⴽⴽⵯ ⴰⵙⵍⴳⵏ ⵓⵟⵟⵓⵏ 15.38 ⵉⵥⵍⵉⵏ ⵙ ⵓⵙⵏⵎⴰⵍⴰ ⴰⵏⵣⵔⴰⴼ, ⴷⴷⵓ ⵜⵉⴼⴰⵡⵜ ⵏ ⵓⴷⵓⵙⵜⵓⵔ ⴷ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 26.16 ⵏⵏⴰ ⵉⵙⴽⴰⵔⵏ ⵙⴳ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴷ ⵜⵎⴰⵣⵉⵖⵜ ⵜⵓⵜⵍⴰⵢⵉⵏ ⵜⵉⵎⴰⴷⴷⵓⴷⵉⵏ ⵏ ⵓⵡⴰⵏⴽ ⴰⴳⵎⴰⵎ,ⵙ ⵜⵡⵉⵍⴰ ⵉⵜⵜⴰⵊⵊⴰⵏ ⴰⵙⵙⵎⵔⵙ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵣⵓⵏ ⴷ ⵜⴰⵄⵕⴰⴱⵜ ⵎⵏⵉⴷ ⵏ ⵜⵙⵏⴱⴹⴰⵢⵉⵏ, ⵖ ⵏⵉⵜ ⵍⵍⴰⵏ ⵉⵏⵄⴰⵕⵏ ⴷ ⵉⴱⴹⵉⵢⵏ.
ⴰⵙⵡⵓⵔⵉ ⵅⴼ ⵜⵏⴼⵔⵓⵜ ⵏ ⵓⵣⵔⴰⴽ ⵏ ⵉⵎⵙⵖⴰⵏⵏ ⵏ ⵉⵙⵉⵔⴰⵜⵏ ⵏ ⵡⴰⴷⴷⴰⴷ ⵓⵖⵔⵉⵎ ⵉ ⵉⵙⴱⴷⴰⴷⵏ ⵓⵍⴳⵉⵏⵏ ⵉⵣⴷⵉⵏ ⵙ ⵓⵣⵔⴼ ⵏ ⴽⵓ ⴰⵏⵎⵓⵔⵉ ⴳ ⵓⵙⵜⴰⵢ ⵏ ⵢⵉⵙⵎ ⵓⴷⵎⴰⵡⴰⵏ ⵉ ⵓⵔⴱⴰ ⵏⵏⵙ ⴷ ⵓⵣⵎⵎⴻⵎ ⵏⵏⵙ, ⵖ ⵏⵉⵜ ⵍⵍⴰⵏ ⵉⵙⵎⴰⵡⵏ ⵉⵎⴰⵣⵉⵖⵏ.
ⴰⵙⴼⵜⴰⵢ ⵏ ⵜⵓⴳⴳⴰⵙ ⵉ ⵜⵏⴼⵔⵓⵜ ⵏ ⵓⵙⵙⵎⵔⵙ ⴰⵎⵢⴰⴳⴰⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵏⵜⴰⵎⵉⵏ ⵜⵉⵎⴰⴷⴷⵓⴷⵉⵏ, ⵙ ⵜⴱⵔⵉⴷⵜ ⵉⵜⵜⵢⴰⵔⴰⵏ ⴳ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 26-16, ⴳ ⵓⵎⵏⵉⴷ ⴰⴷ, ⴰⵣⵣⵔⴰⵢ ⵏ ⵓⵙⵍⴳⵏ ⵓⵟⵟⵓⵏ 04-20 ⵉⵣⴷⵉⵏ ⵙ ⵜⴽⴰⵕⴹⴰ ⵜⴰⵏⴰⵎⵓⵔⵜ ⵏ ⵓⵙⵉⵙⵏ ⴰⵍⵉⴽⵟⵕⵓⵏⵉ, ⵏⵏⴰ ⴳ ⵓⵔ ⵜⵍⵍⵉ ⴰⵡⴷ ⴽⵔⴰ ⵏ ⵜⵎⴰⵜⴰⵔⵜ ⵉⵜⵜⴰⵊⵊⴰⵏ ⴰⵙⵎⵔⵙ ⵓⵛⵛⵉⵍ ⵏ ⵜⵓⵜⵍⴰⵢⵜ ⵏⵉⵖ ⵜⵉⵔⵔⴰ ⵜⴰⵎⴰⵣⵉⵖⵜ (ⵜⵉⴼⵉⵏⴰⵖ) ⵙⴳ ⵉⴱⴹⵉⵢⵏ ⵏⵏⵙ ⵓⵍⴰ ⵃⵜⵜⴰ ⵙ ⵓⵙⵍⴳⵏ ⴰⴷⵙⵍⴰⵏ ⵉⵜⵜⵢⴰⵡⴱⴷⴰⵔⵏ ⴳ ⵓⴼⵍⵍⴰ.
ⴹⴰⵕⵜ ⵏ ⵙⵉⵏ ⵢⵉⵔⵏ ⵏ ⵓⵣⵓⵣⵣⵔ ⵏ ⵉⵙⵖⵍⴰⴼ ⵉⵥⵍⵉⵏ ⵙ ⵉⵣⵔⴼⴰⵏ ⵏ ⵉⵎⴰⵣⵉⵖⵏ, ⵉⴳⴰ ⴰⵖ ⵜⴰⵏⴰⵜⴰⵎⵜ, ⵜⴰⵏⴰⴱⴱⴰⵢⵜ ⵏ ⵜⵎⵔⴰⵔⵓⵜ ⵙⴳ ⴷⴰⵔ ⵍⵎⵖⵔⵉⴱ ⵅⴼ ⵉⵙⵖⵍⴰⴼ ⴰⴷ ⵉⵏⵎⵜⵜⵉⵏ ⵙⵜⴰⵡⵀⵎⵎⴰⵏⵉⵏ, ⵙ ⵓⵎⴷⵢⴰ, ⵜⵥⵍⵉ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⵎⴰⴷ ⵉⴳⴰⵏ 52.000 ⵏ ⵜⵡⵓⵔⵉ ⴰⵎⴰⵢⵏⵓ ⵉ ⵓⵙⵎⴰⵜⴰ ⵏ ⵓⵙⵍⵎⴷ ⴰⵎⵣⵡⴰⵔⵓ ⵉ ⵉⵎⵥⵢⴰⵏⵏ ⵖⵓⵔ ⴰⵡⵜⴰⵢ ⵏ 4 ⴷ 5 ⵏ ⵉⵙⴳⴳⵯⴰⵙⵏ, ⴱⵍⴰ ⵉⵍⵍⴰ ⵓⵙⵎⴰⵜⵔ ⵙ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵏⵏⴰ ⵉⴳⴰⵏ ⵜⴰⴷⵙⵍⴰⵏⵜ ⵉ ⵓⵙⵎⵓⵔⵙ ⵏ ⵓⵙⵍⵎⴷ ⴰⴷ, ⵎⴽⵍⵍⵉ ⵜⵏⴽⴹ ⵜⵎⴰⵡⴰⵙⵜ ⴰⴷ ⴳ ⵜⵙⴳⵓⵔⵉⵡⵉⵏ ⵜⵉⵎⴳⵍⴰⵏⵉⵏ, ⵙ ⵎⴰⴷ ⵉⵥⵍⵉⵏ ⵙ ⵓⵙⵖⵏⵓ ⴰⴷ ⵓⵏⴱⵉⴹ ⵉⵙⵜⴰⵡⵀⵎⵎⴰⵏ ⴷ ⵖⵓⵔ ⴰⵙⵉⵣⵡⵔ, ⵏⵏⴰ ⵉⴳⴰⵏ ⴰⵙⵎⴰⵜⴰ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⴼⵔⴽⵜ ⵜⴰⵎⵏⵣⵓⵜ, ⵃⵎⴰ ⴰⴷ ⵢⵉⵍⵉ ⵓⵙⵎⴰⵜⴰ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵉⵏⵎⴰⵍ ⵜⵉⵎⵏⵣⴰ, ⵜⴰⵏⴰⴹⵜ ⵜⴰⵣⵎⵣⴰⵏⵜ ⵏ ⵓⵇⴰⵡⵍ ⴰⴳⵔⴰⵖⵍⴰⵏ ⵉⵥⵍⵉⵏ ⵙ ⵉⵣⵔⴼⴰⵏ ⵓⵖⵔⵎⵉⵏ ⴷ ⵉⵙⵔⵜⴰⵏⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ, ⴷ ⵉⴼⴼⵖⵏ ⴳ 01 ⴷⵓⵊⴰⵏⴱⵉⵔ 2016, ⵜⵙⵡⵓⵜⵜⴰ ⵓⵟⵟⵓⵏ ⵏⵏⵙ ⴳ ⵎⴰⴷ ⵉⴳⴰⵏ 100 ⵏ ⵢⵉⴼⴹ ⵏ ⵓⵙⵍⵎⴰⴷ, ⴳ ⵓⵎⵏⵉⴷ ⵢⴰⴹⵏ, ⴰⵎⴰⵡⵙⴰⵙ ⵏ ⵖⵉⵍⴰ, ⴳ ⵢⴰⵏ ⵓⵏⵎⵓⵇⵇⴰⵔ ⵉⵜⵜⵓⵙⴽⴰⵔⵏ ⴽ ⴽⵟⵓⴱⵕ 2021 ⴳ ⵜⵖⵔⵎⵜ ⵏ ⵏⵏⴰⴹⵓⵕ, ⵉⵙⵓⵎⵔ ⵖⴰⵙ ⴰⵙⵡⵓⵔⵉ ⵏ 17.000 ⵏ ⵓⵙⵍⵎⴰⴷ ⵉ ⵓⵙⵎⴰⵜⴰ ⵏ ⵓⵙⵍⵎⴷ ⴰⴷ, ⵙ ⵎⴰⴷ ⵉⴳⴰⵏ ⵢⴰⵏ ⵓⵙⵍⵎⴰⴷ ⵉ ⴽⵓ 8 ⵜⴷⴰⵍⵉⵡⵉⵏ! ⴳ ⵢⵓⵏⵢⵓ 2021, ⵉⵙⵓⵎⵔ ⴰⵖⴰⵎⵓⵙ ⵏ 50% ⵙⴳ ⵓⵙⵡⵓⵔⵉ ⴰⵙⴳⵯⵙⴰⵏ ⵉ 400 ⴰⵔ 600 ⵏ ⵓⵙⵍⵎⴰⴷ ⵙ ⵓⵙⵙⵓⴼⵓ. ⵢⴰⵙⵉ ⵙ ⵜⴰⵏⵏⴰⵢⵜ ⵓⵟⵟⵓⵏⵏ ⴰⴷ ⴷⵔⵓⵙⵏⵉⵏ, ⵔⴰⴷ ⴰⵖ ⵢⴰⵊⵊ ⴰⴷ ⵏⵜⵜⵇⵇⵍ ⵎⴰⴷ ⵉⴳⴰⵏ ⵙⵏⴰⵜ ⵜⵎⵔⴰⵡⵉⵏ ⵏ ⵉⵙⴳⴳⵯⴰⵙⵏ ⴰⴷ ⵏⵍⴽⵎ 50% ⵙⴳ ⵓⵙⵎⴰⵜⴰ ⵏ ⵜⵎⴰⵣⵉⵖⵜ ⴳ ⵓⵙⵡⵉⵔ ⵏ ⵓⵙⵍⵎⴷ ⴰⵎⵏⵣⵓ. [2]
ⴰⵎⴷⵢⴰ ⵢⴰⴹⵏ ⵙ ⵓⵎⵏⵉⴷ ⴰⴷ, ⵉⵣⴷⵉ ⵙ ⵍⵡⴰⵍⵉ ⵏ ⵍⴱⴰⵏⴽ ⵏ ⵍⵎⵖⵔⵉⴱ, ⵏⵏⴰ ⵉⵎⵎⴰⵍⵏ ⴰⵃⵇⵇⵔ ⵉ ⵜⵎⴰⵣⵉⵖⵜ, ⴷ ⵉⵎⵎⴰⵖ ⴰⴷ ⵓⵔ ⵉⵙⵏⴼⵍ ⴰⵎⵏⴰⴷ ⵏⵏⵙ ⵉⴽⵜⴰⵔⵏ ⵙ ⵓⵙⵏⵓⵃⵢⵓ ⴰⵥⵓⵕⴰⵏ ⵎⵏⵉⴷ ⵜⴰⵎⴰⵣⵉⵖⵜ, ⵙ ⵜⵙⵓⵍⵜ ⵏⵏⵙ ⴳ ⵜⵉⵕⵥⵉ ⵏ ⵜⵎⵜⵜⴰ ⵜⵉⵙ ⵙⵎⵎⵓⵙⵜ ⵏ ⵓⴷⵓⵙⵜⵓⵔ ⴷ ⵜⵎⵜⵜⴰ ⵜⵉⵙ ⵥⵥ ⵏ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 26-16 ⵙ ⵓⵙⵓⴼⵖ ⵏⵏⵙ ⵉ ⵢⴰⵜ ⵜⵡⵔⵉⵇⵜ ⵜⴰⵥⵕⴼⴰⵏⵜ ⵜⴰⵎⴰⵢⵏⵓⵜ ⵏ 200 ⵏ ⴷⴷⵔⵀⵎ, ⴹⴰⵕⵜ ⵏ ⵜⵡⵔⵉⵇⵜ ⵏ 100 ⵏ ⴷⴷⵔⵀⵎ, ⴱⵍⴰ ⵜⴰⵎⴰⵣⵉⵖⵜ, ⴷ ⵜⵉⵔⵔⴰ ⵏⵏⵙ ⵜⵉⴼⵉⵏⴰⵖ. [3]
ⴰⵎⴷⵢⴰ ⵡⵉⵙ ⴽⵕⴰⴹ, ⵉⵥⵍⵉ ⵙ ⵜⵎⴰⵡⴰⵙⵜ ⵏ ⵓⴳⵏⵙ ⵏⵏⴰ ⵉⴼⴽⴰⵏ ⵎⴰⴷ ⴷ ⵓⵔ ⵢⵓⴽⵉⵏ ⵉ 1.139.206 ⵏ ⵓⵎⵣⵣⵔⵉ ⵏ ⵉⵡⵜⵜⴰ ⴰⴱⵢⵓⵎⵉⵜⵔⵉ ⴳ ⵓⵙⴳⴳⵯⴰⵙ ⵉⵣⵔⵉⵏ 2023, ⴰⴱⴱⵉⴹⵕ ⴰⵡⵍⵉⵡⵍ ⴷ ⵜⵏⴰⴱⴱⴰⵢⵜ ⵏ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵜⵉⵙ ⵙⵏⴰⵜ ⵏ ⵜⵎⴰⵣⵉⵔⵜ ⴳ ⵜⵏⵜⴰⵎⵉⵏ ⴰⴷ ⵜⵉⵎⴰⴷⴷⵓⴷⵉⵏ. ⴰⴷⴷⴰⴷ ⴰⴷ ⵏⵉⵜ ⵙⵓⵍ ⵉⵣⴷⵉ ⴷ ⵜⴽⴰⵕⴹⵉⵡⵉⵏ ⵜⵉⵏⴰⵎⵓⵔⵉⵏ ⵏ ⵓⵙⵉⵙⵏ ⵏⵏⴰ ⴷ ⵜⵙⵙⵓⴼⵓⵖ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ! ⵜⵉⵎⵔⵙⴰⵍ ⴰⴷ ⵙ ⵏⴰⵜ, ⵉⵇⵇⴰⵏ ⴷ ⴰⴷ ⴳⵉⵏⵜ ⴰⵣⵓⵔⵜ, ⴰⵔ ⵖⵉⵍⴰⴷ ⵓⵔ ⵎⵍⵉⵏⵜ ⴽⵔⴰ ⵏ ⵜⵉⵔⵉⵜ ⵜⴰⵙⵔⵜⴰⵏⵜ ⵉ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵏⵜⴰⵎⵉⵏ ⴰⴷ ⵜⵉⵎⴰⴷⴷⵓⴷⵉⵏ ⵏⵉⵖ ⴳ ⵉⵎⴰⵙⵙⵏ ⵏ ⵡⴰⵙⵙⴰⵢ ⵣⵓⵏ ⴷ ⵜⵉⵀⵉⵔⵉⵜⵏ ⵏ ⵍⴱⵓⵍⵉⵙ, ⵜⵙⵓⵍ ⴳ ⵜⵉⵕⵥⵉ ⵏ ⵉⵙⴱⴷⴰⴷⵏ ⵏ ⵜⵎⵜⵜⴰ ⵜⵉⵙ 5 ⵏ ⵓⴷⵓⵙⵜⵓⵔ ⴷ ⵜⵎⵜⵜⴰ ⵜⵉⵙ 28 ⴳ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 26-16, ⵙ ⵜⵎⵔⵏⵉⵡⵜ ⵏ ⵓⵢⴰ, ⵜⴰⵎⴰⵡⴰⵙⵜ ⴰⴷ, ⵙⴳ ⵍⵡⴰⵍⵉ ⴰⵎⴰⵢⵏⵓ ⵏ ⵜⵎⵏⴰⴹⵜ ⵏ ⵙⵓⵙ ⵎⴰⵙⵙⵜ, ⵜⵙⵙⵓⴽⵉ ⴰⴽⴽⵯ ⵢⴰⵜ ⵓⵙⵓⵏ ⵏⵏⴰ ⴳ ⵉⵍⵍⴰ ⵎⴰⴷ ⵉⴳⴰⵏ 200 ⵏ ⵡⵓⴳⴳⵉⴷ, ⵉⵣⴷⵉ ⵓⵢⴰ ⴷ ⵓⵙⵓⵏ ⵏ ‘’ⵜⴼⵏⵉⵜ’’ ⵏ ⵉⵏⴳⵎⴰⵔⵏ ⵏ ⵉⵙⵍⵎⴰⵏ, ⵏⵏⴰ ⴳ ⴷ ⵓⵔ ⵢⴰⴳⵓⵔ ⵓⵎⵢⴰ ⴰⵙⵙ ⵏ 28 ⴷⵓⵊⴰⵏⴱⵉⵔ ⵉⵣⵔⵉⵏ. ! [4]
ⵎⴰⵙⵙ ⴰⵎⴰⵡⴰⵙ,
ⵎⴽⵍⵍⵉ ⴰⵡⵏ ⵏⴻⵏⵏⴰ ⴳ ⵜⵉⵣⵡⵉⵔⵉ, ⵏⵓⵎⵎⵔ ⴽⵉⴳⴰⵏ, ⴷ ⵉⴳ ⴰⵖ ⴰⴷⴷⵓⵔ ⴰⴷ ⵜⵡⴰⵍⴰ ⵜⵎⴰⵣⵉⵔⵜ ⵏⵏⵖ ⵍⵎⵖⵔⵉⴱ ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ ⴳ ⵓⵙⴳⴳⵯⴰⵙ ⵏ 2024/2974, ⵙ ⵓⵢⴰ ⵖⵓⵔⵏⵖ ⴰⵏⴰⵔⵓⵣ ⵎⵇⵇⵓⵔⵏ ⴰⴷ ⵜⵙⴰⵍⴼⵎ ⵙ ‘’ ⵜⵉⵔⵉⵜ ⵜⴰⵙⵔⵜⴰⵏⵜⵉⴼⴰⵡⵏ’’ ⵉ ⵓⴼⵔⴰⴳ ⴷ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵃⵎⴰ ⴰⴷ ⵜⴻⵜⵜⵓⵙⴽⴰⵔⵏⵜ ⵜⵎⴳⴳⵉⵢⵉⵏ ⴼⵓⵍⴽⵉⵏⵉⵏ ⴷ ⵜⵡⵓⵔⵉⵡⵉⵏ ⵜⵉⴽⵎⴰⵎⵉⵏ.
ⴳ ⵓⵎⵣⵡⴰⵔⵓ, ⴰⴷ ⵜⴻⵜⵜⵓⵙⴽⴰⵔⵏⵜ ⵜⵙⵏⵜⴰⵢⵉⵏ ⵜⵉⵎⵖⴰⵡⵍⵉⵏ ⴷ ⵜⵖⵉⵢⵉⵏ ⵉ ⵜⵏⴰⴼⵓⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵣⵓⵏ ⴷ ⴰⵏⵏⵓⵕⵥⵎ ⵉ ⵉⵏⴽⵔⴰⴼ ⵏ ‘’ ⵓⵎⵓⵙⵙⵓ ⵏ ⵔⵔⵉⴼ’’ ⵃⵎⴰ ⴰⴷ ⴼⵜⵓⵏⵜ ⵜⵎⴰⵜⴰⵔⵉⵏ ⵜⵓⵎⵏⵉⴳⵉⵏ ⵏ 30 ⵏ ⵜⵎⴰⵣⵉⵔⵜ ⵏⵏⴰ ⵉⴼⴽⴰⵏ ⵉⵙⵜⴰⵢⵏ ⵏⵏⵙ ⵉ ⵜⵎⴰⵣⵉⵔⵜ ⵏⵏⵖ, ⵃⵎⴰ ⴰⴷ ⵜⵙⵙⵉⵅⴼ ⴰⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵡⴷ ⵉ 17 ⵏ ⵓⵡⴰⵏⴽ ⵏⵏⴰ ⵓⵔ ⴰⵖ ⵓⵔ ⵉⵙⵜⵉⵏ ⴼⴽⵉⵏⵜ ⴰⵙⵜⴰⵢ ⵏⵏⵙ ⵉ ⵜⵎⴰⵣⵉⵔⵜ ⵏ ⵏⵉⵍⵚⵓⵏ ⵎⴰⵏⴷⵉⵍⵍⴰ.
ⴳ ⵡⵉⵙ ⵙⵉⵏ, ⵜⴰⵎⵔⴰⵔⵓⵜ ⵙ ⵜⵡⵉⵍⴰ ⵜⵓⵎⵏⵉⴳⵜ ⵉ ⵉⵙⵖⵍⴰⴼ ⵉⵥⵍⵉⵏ ⵙ ⵓⵣⵔⴰⴽ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⴰ ⵜⵙⵎⴽⵍ ⴷ ⵜⵎⵔⴰⵔ ⵜⵜ ⵜⵙⵇⵇⵉⵎⵜ ⵏ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⴰⵥⵓⵕⴰⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ (CERD) ⴳ ⵜⴰⵏⵏⴰⵢⵉⵏ ⵜⵉⵎⴳⴳⵓⵔⴰ ⵙ ⵎⴰⴷ ⵉⵥⵍⵉⵏ ⵙ ⵜⴰⵏⴰⴹⵜ ⵏ ⵍⵎⵖⵔⵉⴱ ⵉⵣⴷⵉⵏ ⵙ ⵜⵏⴰⴹⵉⵏ ⵜⵉⵣⵎⵣⴰⵏⵉⵏ ⵙⴳ ⵜⵉⵙ ⵜⵥⴰ ⴷ ⵎⵔⴰⵡ ⴰⵔ ⵢⴰⵜ ⴷ ⵎⵔⴰⵡ, ⵙⵍⴰⵡⴰⵏ ⴰⴽⴽⵯ ⵉⵣⵔⴼⴰⵏ ⵏ ⵓⴼⴳⴰⵏ ⵉⵥⵍⵉⵏ ⵙ ⵉⵎⴰⵣⵉⵖⵏ ⵃⵎⴰ ⴰⴷ ⵜⵉⵍⵉ ⵜⵏⴽⵔⴰ ⵙ ⵜⴷⵍⵙⴰ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵎⴽⵍⵍⵉ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ: ‘’ ⵉⵥⵕⴰ ⵓⵎⴰⴹⴰⵍ ⵜⵉⵎⵓⴽⵔⵉⵙⵉⵏ ⵜⵉⵎⵢⴰⵏⴰⵡⵉⵏ ⵉⵣⴷⵉⵏ ⴷ ⵜⵖⵣⵓⵔⴰⵏⵜ, ⴳ ⵍⵍⴰⵏ ⵉⵎⵏⴰⴷⵏ ⵉⵎⵢⴰⵏⴰⵡⵏ ⵅⴼ ⵜⵓⵥⵍⴰⵢⵉⵏ ⴷ ⵜⴷⵍⵙⴰ ⵏ ⴽⵓ ⵜⴰⵎⴰⵣⵉⵔⵜ ⵙⴳ ⵜⵖⵣⵓⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵍⴽⵎⵏ ⵉⵎⵏⴰⴷⵏ ⴷ ⵉⵎⵔⴰⵔⴰⵜⵏ ⵉⴳⵔⴰⵖⵍⴰⵏⵏ ⴰⵙⵉⵜⴳ ⵏ ⵜⴷⵍⵙⵉⵡⵉⵏ ⵜⵉⵎⵢⴰⵏⴰⵡⵉⵏ, ⵙ ⵎⴰⵙ ⴳⴰⵏⵜ ⴰⵣⵔⴼ ⴰⵥⵓⵕⴰⵏ ⴳ ⵓⴼⴳⴰⵏ, ⴷ ⵜⵓⵥⵍⴰⵢⵜ ⵓⵔ ⵜⴳⵉ ⴰⴱⴱⴰⵢⴹⴰⵕ ⵏ ⵓⴼⵊⵊⵉⵊ ⵙ ⵉⵣⵔⴼⴰⵏ ⵉⴷⵙⵍⴰⵏⵏ’’.
ⵡⵉⵙ ⴽⵕⴰⴹ, ⴰⵣⵓⵣⵣⵔ ⵏ ⵜⴰⵏⵏⴰⵢⵉⵏ ⵜⵉⵎⴳⴳⵓⵔⴰ ⵏ ⵜⵙⵇⵇⵉⵎⵜ ⵏ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⴰⵥⵓⵕⴰⵏ, ⴰⴳⵯⵏⵙ ⵏ ⵉⵎⴰⵙⵙⵏ ⴷ ⵜⵎⵔⵙⴰⵍ ⴷ ⵉⴳⵔⴰⵏ ⵉⵎⴰⵡⵙⴰⵙⵏ ⵏ ⵓⵡⴰⵏⴽ, ⴳ ⵏⵉⵜ ⵍⵍⴰⵏⵜ ⵜⵎⵏⴰⴹⵉⵏ ⴷ ⵜⵙⴳⵉⵡⵉⵏ ⴷ ⵜⵎⵏⴱⴰⴹⵉⵏ ⴷ ⵜⴳⵔⴰⵡⵉⵏ, ⴷ ⵓⵣⵓⵣⵣⵔ ⵏⵏⵙ ⴳ ⵜⵉ&