ⵣⴰⵀⵉⵔⴰ ⵜⵉⴳⵟⴰⵟ ⵜⴰⵏⴰⵥⵓⵕⵜ ⵜⴰⵎⵙⵉⵍⵖⵜ ⵜⴰⵎⴰⵣⵉⵖⵜ
ⵣⴰⵀⵉⵔⴰ ⵜⵉⴳⵟⴰⵟ ⴷ ⵜⴰⵏⴰⵥⵓⵕⵜ ⵜⴰⵎⵙⵉⵍⵖⵜ ⵜⴰⵎⵙⵙⵓⴷⴷⵓⵜ, ⵉⵍⵍⵉⵙ ⵏ ⵓⴳⴰⴷⵉⵔ, ⵖⵓⵔⵙ ⵢⴰⵏ ⵓⵙⴰⴽⴰ ⴰⵥⵓⵕⴰⵏ ⴷ ⵓⵎⵙⵎⵓⵏ ⵉⵖⵣⵣⵉⴼⵏ, ⵜⴷⵔⴰ ⴳ ⵜⵓⴳⵜⵜ ⵏ ⵉⵙⴼⵙⴰⵔ ⴷ ⵉⵏⵎⵓⵇⵇⴰⵔⵏ ⵉⵥⵓⵕⴰⵏⵏ ⴷ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ, ⵜⵙⵙⵓⵜⵉ ⵜⵉⵙⴰⵡⵔⵉⵏ ⴳ ⵓⵙⵙⵓⵏⵖ ⴷ ⵜⵡⵓⵔⵉⵡⵉⵏ ⵏ ⵓⴼⵓⵙ ⵉ ⵉⵎⵥⵥⵢⴰⵏⵏ ⴷ ⵜⵎⵖⴰⵔⵉⵏ ⴷ ⵡⵉⴷ ⵉⵍⵍⴰⵏ ⴳ ⵜⵎⵔⵙⴰⵍ ⵜⵉⵏⴰⵎⵓⵏⵉⵏ ⴷ ⵜⵙⴳⵏⴼⴰⵏⵉⵏ, ⵜⵉⵡⵉ ⵜⵓⴳⵜⵜ ⵏ ⵉⵙⵍⴽⵉⵏⵏ ⴷ ⵉⴽⴰⵙⵏ ⵏ ⵓⵙⵉⵜⴳ, ⵙ ⵜⵓⵙⵏⵜ ⵙ ⴰⵢⵍⵍⵉ ⵜⵙⵙⵎⵏⵉⴷ ⴳ ⵜⵏⵓⴼⴰ ⴼⵓⵍⴽⵉⵏⵉⵏ ⵃⵎⴰ ⴰⴷ ⵜⵣⵓⵣⵣⵔ ⵜⴰⴷⵍⵙⴰ ⵏ ⵜⵥⵓⵕⵉ ⴷ ⵜⴰⵢⵔⵉ ⴷ ⵓⴼⵔⴰ ⵙⴳ ⵓⵎⴰⴹⴰⵍ.
ⵜⵓⵎⵥ ⵜⵏⴰⵥⵓⵕⵜ ⵏⵏⵖ ⴰⵙⵍⴽⵉⵏ ⵏ ⵜⵓⵔⴰⴳⵜ ⴳ ⵜⵙⴽⵍⴰ ⵜⴰⵄⵕⴰⴱⵜ ⴳ ⵜⵙⴷⴰⵡⵉⵜ ⵏ ⵉⴱⵏ ⵥⵓⵀⵕ ⴳ ⵓⴳⴰⴷⵉⵔ ⴰⵙⴳⴳⵯⴰⵙ ⵏ 1988, ⴷ ⵓⴷⵉⴱⵍⵓⵎ ⵏ ⵜⵉⵔⵔⴰ ⵜⴰⵎⵙⵙⵓⴳⵓⵔⵜ ⴳ ⵓⵙⵉⵏⴰⴳ ⵏ ⵜⴰⵜⵉⴽⵏⵓⵍⵓⵊⵉⵜ ⵜⴰⵏⵖⵎⴰⵙⵜ ⴳ ⵓⴳⴰⴷⵉⵔ, ⵜⴳ ⵜⴰⵎⴰⵣⵣⴰⵍⵜ ⵜⴰⵎⵙⵎⵓⵏⵜ ⴳ ⵢⵉⴳⵔ ⴰⵏⴰⵎⵓⵏ ⴷ ⵓⴷⵍⵙⴰⵏ ⴷ ⵓⵥⵓⵕⴰⵏ.
ⵜⴽⵛⵎ ⵜⵏⴰⵥⵓⵕⵜ ⵣⴰⵀⵉⵔⴰ ⴳ ⵜⵎⵓⵏⵜ ⵏ ⵉⵏⴰⵥⵓⵕⵏ ⵉⵎⵙⵉⵍⵖⵏ ⵉⵎⵖⵔⴰⴱⵉⵢⵏ ⵜⴳ ⴳⵉⵙ ⵜⴰⴳⵎⴰⵎⵜ, ⵜⴽⴽⴰ ⵜⵜ ⵉⵏⵏ ⴷ ⵜⴰⵎⵛⵛⵉⵡⴰⵕⵜ ⴳ ⵜⵎⵙⵎⵓⵏⵜ ⵏ ⵜⵡⵜⵎⵉⵏ ⵏ ⵓⵙⴰⵎⵙ ⵉ ⵜⵥⵓⵕⵉⵡⵉⵏ ⵜⵉⵎⵙⵉⵍⵖⵉⵏ ⴷ ⵉⴳⴳⵉⵜⵏ ⵉⵏⴰⵎⵓⵏⵏ, ⵜⴽⴽ ⵜⵜ ⵉⵏⵏ ⵜⴳⴰ ⵜⵉⵎⵉⵔⵉⵜ ⵜⴰⵎⴰⵜⴰⵢⵜ ⵏ ⵜⵎⵙⵎⵓⵏⵜ ⵜⴰⴳⵔⴰⵖⵍⴰⵏⵜ ⵏ ⵜⵥⵓⵕⵉⵡⵉⵏ ⵜⵉⵎⵙⵉⵍⵖⵉⵏ ⴰⵢⵢⴰⵡ ⵏ ⵓⴳⴰⴷⵉⵔ, ⵜⴳ ⴰⵡⴷ ⵜⴰⵎⵙⵙⵓⴳⴰⵔⵜ ⵜⴰⵎⵅⴰⵙⵜ ⴳ ⵡⴰⵎⵎⴰⵙ ⵏ ⵜⵙⵏⵉⵊⵊⵉⵜ ⵏ ⵓⵏⴳⴰⴹ, ⵉⴹⴼⵕⵏ ⵉ ⵜⵎⵔⵙⵍⵜ ⵏ ⵎⵓⵃⵎⵎⴰⴷ ⵡⵉⵙ ⵙⵎⵎⵓⵙ ⵉ ⵓⵎⵢⴰⵡⴰⵙ ⴳ ⵓⴳⴰⴷⵉⵔ.
ⵜⴷⵔⴰ ⵎⴰⵙⵙⴰ ⵣⴰⵀⵉⵔⴰ ⵜⵉⴳⵟⴰⵟ ⴳ ⵜⵓⴳⵜⵜ ⵏ ⵉⵙⴼⵙⴰⵔ ⵉⵎⴷⴰⵏⵏ ⵣⵓⵏ ⴷ:
2023: ⴰⵙⴼⵙⵔ ⴰⵎⴷⴰⵏ ⴳ ⵜⵖⵔⵎⵜ ⵏ ⵇⴰⴷⵉⵛ ⵜⴰⵚⴱⵍⵢⵓⵏⵜ
2022: ⴰⵙⴼⵙⵔ ⴳ ⵙⴱⵜⴰ ⴷ ⵎⵍⵉⵍⵢⴰ.
2022: ⴰⵙⴼⵙⵔ ⴰⵎⴷⴰⵏ ⴳ ⵓⵙⴰⵢⵔⴰⵔ ⵏ ⵜⵎⵔⵙⵍⵜ ⵜⴰⵚⴱⵍⵢⵓⵏⵜ- ⵜⴰⵄⵕⴰⴱⵜ ⴳ ⵜⵖⵔⵎⵜ ⵏ ⴳⵕⴰⵏⴰⴷⴰ ⴳ ⵚⴱⴰⵏⵢⴰ.
2022: ⴰⵙⴰⵢⵔⴰⵔ ⵏ ⵜⴳⴰⴷⵉⵔⵜ ⵏ ⵜⴳⵔⴰⵡⵜ ⵏ ⵓⴳⴰⴷⵉⵔ.
2019: ⵓⴷⴷⵉⵙ ⴰⴷⵍⵙⴰⵏ ⴳ ⴰⵢⵜ ⵎⵍⵍⵓⵍ.
2016: ⵜⵉⴼⵍⵓⵜ ⵏ ⵓⵣⵔⴳⴰⵏ ⴳ ⵜⵖⵔⵎⵜ ⵏ ⵜⵔⵓⴷⴰⵏⵜ.
ⵎⴽⵍⵍⵉ ⵜⴷⵔⴰ ⴳ ⵉⵙⴼⵙⴰⵔ ⵉⵎⴳⵔⴰ ⴷ ⵉⴳⵔⴰⵖⴰⵏⵏ ⵣⵓⵏ ⴷ:
2022: ⴳ ⵓⴷⴷⵉⵙ ⴰⴷⵍⵙⴰⵏ ⴳ ⴰⵢⵜ ⵎⵍⵍⵓⵍ.
2021: ⴰⵙⴼⵙⵔ ⴰⴳⵔⴰⵖⵍⴰⵏ ⴰⵎⵔⴷⵓ ⴳ ⵙⵙⵡⵉⴷ.
2019: ⴰⵙⴼⵙⵔ ⴰⵎⴳⵔⵓ ⴳ ⵜⵖⵔⵎⵜ ⵏ ⵎⵓⵏⴱⵓⵍⵢⵉ ⴳ ⴼⵕⴰⵏⵙⴰ.
ⴰⵙⴼⵙⵔ ⴰⵎⴳⵔⵓ ⴳ ⵎⵉⵚⵕⴰ.
ⵜⴰⵣⴷⴷⵓⵖⵜ ⵜⴰⴷⵍⵙⴰⵏⵜ, ⴷ ⵓⵙⴼⵙⵔ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵕⵕⴱⴰⵟ.
2017: ⴰⵙⴼⵙⵔ ⴰⴳⵔⴰⵖⵍⴰⵏ ⵏ ⵓⵏⵎⵓⵇⵇⴰⵔ ⵏ ⵙⵓⵙ ⴳ ⵓⴳⴰⴷⵉⵔ.
2017: ⴰⵏⵎⵓⵇⵇⴰⵔ ⴰⴳⵔⴰⵖⵍⴰⵏ ⵏ ⵜⵥⵓⵕⵉⵡⵉⵏ ⴳ ⵜⵔⵓⴷⴰⵏⵜ.
2017: ⵜⴰⵎⵚⵕⵉⵜ ⵜⴰⴳⵔⴰⵖⵍⴰⵏⵜ ⵏ ⵜⵥⵓⵕⵉ ⵜⴰⵜⵔⴰⵔⵜ ⴳ ⵜⵖⵔⵎⵜ ⵏ ⵟⴰⵏⵊⴰ.
2017: ⴰⵏⵎⵓⵇⵇⴰⵔ ⴰⴳⵔⴰⵖⵍⴰⵏ ⵏ ⵜⵥⵓⵕⵉ ⵜⴰⵎⵙⵉⵍⵖⵜ ⴳ ⵜⵖⵔⵎⵜ ⵏ ⵎⵓⴳⴰⴹⵓⵕ.
2016: ⴰⵙⴼⵙⵔ ⴰⴳⵔⴰⵖⵍⴰⵏ ⴳ ⵓⵎⵣⴳⵓⵏ ⴰⴳⵍⴷⴰⵏ ⴳ ⵎⵕⵕⴰⴽⵛ.
2014: ⴰⵙⴼⵙⵔ ⴰⴳⵔⴰⵖⵍⴰⵏ ⵏ ⵓⴼⵔⴰ ⴳ ⵓⴳⴰⴷⵉⵔ.
2014: ⴰⵙⴼⵙⵔ ⴰⴳⵔⴰⵖⵍⴰⵏ ⵊⵓⵚⵓⵕ ⴳ ⵜⵖⵔⵎⵜ ⵏ ⵟⴰⵟⴰ.
2012: ⴰⵙⴼⵙⵔ ⴰⴷⵖⵔⴰⵏ ⴳ ⵜⴷⴰⵍⴰ ⵏ ⵓⵎⵣⴳⵓⵏ ⵏ ⵡⴰⴹⵓ ⴰⵎⵏⵏⵓⵕⵥⵎ ⴳ ⵓⴳⴰⴷⵉⵔ.
2008: ⴰⵙⴼⵙⵔ ⴰⵎⴳⵔⵓ ⴳ ⵜⴷⴰⵍⴰ ⵏ ⵜⵎⵚⵕⵉⵜ ⵜⴰⵎⵙⵖⵏⵣⵉⵜ ⴳ ⵓⴳⴰⴷⵉⵔ.
ⵜⴰⵥⵓⵕⵉ ⵜⴰⵎⵙⵉⵍⵖⵜ ⵜⵓⵜⵍⴰⵢⵜ ⵙⴳ ⵢⵉⵏⴰⵡ ⵏⵏⴰ ⵉⵜⵜⵚⴽⵓⵏ ⵢⴰⵏ ⵓⵎⴰⴹⴰⵍ ⵙⴳ ⵜⵉⵍⵉⵜ ⴳ ⵓⴷⵍⵙⴰⵏ ⴰⵎⵙⵏⴼⵍⵓⵍ ⵎⴽⵍⵍⵉ ⵜⵎⵎⴰⵖ ⵜⵏⴰⵥⵓⵕⵜ ⵜⴰⵎⵖⵔⴰⴱⵉⵜ ⵣⴰⵀⵉⵔⴰ ⵜⵉⴳⵟⴰⵟ ⴰⴷ ⵜ ⵜⴳⵔ ⵙⴳ ⵜⵡⵓⵔⵉⵡⵉⵏ ⵏⵏⵙ ⵏⵏⴰ ⵉⵥⴹⴰⵕⵏ ⴰⴷ ⵜⵙⵏⵉⵢ ⵢⴰⵏ ⵓⵔⵎⴰⵙ ⵉ ⵢⵉⴳⵔ ⴰⵎⵖⵔⴰⴱⵉ ⴰⵎⴰⵣⵉⵖ ⴳ ⵓⵎⴰⵍⵓ ⵏ ⵜⵓⴳⵜⵜ ⵏ ⵜⵎⵢⴰⴷⴰⵙⵉⵏ ⵢⵓⵙⵉⵏ ⵜⵓⵎⴰⵢⵉⵏ ⵅⴼ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵎⵣⵔⵓⵢ ⴰⵏⴰⵎⵓⵏ ⵉ ⵜⵙⴳⴰ ⵙ ⵜⵡⵉⵍⴰ ⵜⴰⵎⵚⴽⴰⵡⵜ ⵏⴽⴹⵏⵜ ⴳⵉⵙ ⵜⵍⴳⴳⵯⵉⵜⵉⵏ ⵏ ⵉⴽⵯⵍⴰⵏ ⵖⵓⵔ ⴰⵎⵎⴰⴽⵏ ⵉⵎⵚⴽⴰⵡⵏ ⴷⵔⴰⵏⵉⵏ ⵉⵜⵜⴰⵡⵉⵏ ⵙ ⵢⴰⵏ ⵡⴰⵏⴰⵡ ⵏ ⵜⵎⵓⵏⵓⴳⵕⴰⴼⵉⵜ ⵜⴰⵙⵓⵙⵉⵜ ⵙ ⵓⵎⵏⴰⴷ ⵏⵏⵙ ⴰⵙⵓⵙⵢⵓⵍⵓⵊⵉ ⴷ ⵜⵉⵏⴷⵉ ⵏⵏⵙ ⵜⴰⵙⵏⴰⴼⴳⴰⵏⵜ.
ⵄⴱⴷⵍⵡⴰⵃⴷ ⴱⵓⵜⴱⴰⵖⴰ