ⵉⵎⵓⵙⵙⵓⵜⵏ ⵏ ⵓⵙⴳⵔⴰⵡ ⴰⵏⵎⵏⴰⴹ ⵡⵉⵙ ⵙⵉⵏ ⵏ ⵜⵎⴳⵓⵔⴰ ⵜⵉⴷⵍⵙⴰⵏⵉⵏ ⴳ ⵜⵎⵏⴰⴹⵜ ⵏ ⵓⴳⵍⵎⵉⵎ ⵡⴰⴷ ⵏⵓⵏ
ⵉⵙⴷⵍ ⵓⵙⵉⵏⴰⵏ ⵏ ⵜⵔⴰⵏⴰⵡⵜ ⴷ ⵓⵙⵏⵙⵓ ⵏ ⵃⵎⴰⵣⴰ ⴳ ⵜⵖⵔⵎⵜ ⵏ ⵓⴳⵯⵍⵎⵉⵎ ⵓⵙⵙⴰⵏ ⵏ 16 ⴷ 17 ⴱⵕⴰⵢⵕ 2024 ⵉ ⵜⵉⵍⴰⵍ ⵏ ⵓⵙⴳⵔⴰⵡ ⴰⵏⵎⵏⴰⴹ ⵡⵉⵙ ⵙⵉⵏ ⵏ ⵜⵎⴳⵓⵔⴰ ⵜⵉⴷⵍⵙⴰⵏⵉⵏ ⵏ ⵓⴳⵍⵎⵉⵎ ⵡⴰⴷ ⵏⵓⵏ, ⴷⴷⵓ ⵜⵎⴰⵜⴰⵔⵜ: ⴰⵢⴷⴰ ⴰⵥⵓⵕⴰⵏ ⴷ ⵓⵎⵥⴽⴰⵡ ⴳ ⵜⵎⵏⴰⴹⵜ ⵏ ⵓⴳⵯⵍⵎⵉⵎ ⵡⴰⴷ ⵏⵓⵏ : ⵜⵉⵥⵉⴹⴰⵕ ⴷ ⵜⵎⵍⴷⴰ ⵜⵉⵎⵣⵡⴰⵔ ⵏ ⵜⴳⵎⵉ.
ⵜⵡⴰⵜⵜⵙ ⵜⵙⵓⵜⵍⵜ ⵜⵉⵙ ⵙⵏⴰⵜ ⵏ ⵓⵙⴳⵔⴰⵡ ⵏ ⵜⵎⴳⵓⵔⴰ ⵜⵉⴷⵍⵙⴰⵏⵉⵏ ⴳ ⵜⵎⵏⴰⴹⵜ ⵏ ⵓⴳⵍⵎⵉⵎ ⵡⴰⴷ ⵏⵓⵏ, ⵏⵏⴰ ⵜⵙⵏⵎⵉⵍⵉ ⵜⵎⵙⵎⵓⵏⵜ ⵏ ⴱⵉⵣⴰⴽⴰⵔⵏ ⵉ ⵜⴳⵎⵉ ⴷ ⵜⴷⵍⵙⴰ ⵙ ⵜⴷⵔⴰⵡⵜ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⵜⵎⴰⵡⴰⵙⵜ ⵏ ⵜⵄⵄⵓⵔⵎⴰ ⴷ ⵜⴷⵍⵙⴰ ⴷ ⵓⵏⵢⴰⵍⴽⴰⵎ – ⵉⴳⵔ ⵏ ⵜⴷⵍⵙⴰ ⵙ ⵓⵎⵢⴰⵡⴰⵙ ⴷ ⵜⵎⵀⵍⴰ ⵜⴰⵙⴳⴰⵡⴰⵏⵜ ⵏ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵍⵎⴷ ⴰⵎⵣⵡⴰⵔⵓ ⴷ ⵜⵓⵏⵏⵓⵏⵜ ⴳ ⵓⴳⵯⵍⵎⵉⵎ ⴷ ⵜⵎⵀⵍⴰ ⵜⴰⵏⵎⵏⴰⴹⵜ ⵏ ⵜⵎⴰⵡⴰⵙⵜ ⵏ ⵜⴷⵍⵙⴰ ⴳ ⵜⵎⵏⴰⴹⵜ ⵏ ⵓⴳⵯⵍⵎⵉⵎ ⵡⴰⴷ ⵏⵓⵏ; ⴰⵏⵏⵓⵕⵥⵎ ⵏ ⵓⵎⵔⴰⵔⴰ ⴰⵎⴰⵙⵙⴰⵏ ⴷ ⵓⴽⴰⴷⵉⵎⵉ ⵅⴼ ⵡⴰⵢⴷⴰ ⴰⴷⵍⵙⴰⵏ ⴰⴽⵎⴰⵎ ⴳ ⵜⵎⵏⴰⴹⵜ ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵜⵜⵏⵢⴰⵍⴽⴰⵎⵏ ⴷ ⵜⵥⵓⵕⵉⵡⵉⵏ ⴷ ⵜⵙⴽⴰ, ⴷ ⵜⵣⵔⴰⵡⵜ ⵏ ⵜⴱⵔⵉⴷⵉⵏ ⵏ ⵓⵙⵉⵜⴳ ⵏⵏⵙ ⴷ ⵓⵙⵔⵙ ⵏⵏⵙ ⴷ ⵜⴰⵎⵙⵙⵉⵍⵉⵜ ⵏ ⵜⴳⵎⵉ ⵜⴰⵙⵓⵍⴰⵏⵜ ⵜⵙⴳⴰ, ⴷ ⵓⵙⵉⴷⴼ ⵏⵏⵙ ⴰⵎ ⴰⵎⵏⴰⴷ ⴰⴷⵙⵍⴰⵏ ⴳ ⵉⵙⵖⵉⵡⵙⵏ ⵏ ⵜⴳⵎⵉ ⴳ ⵜⵎⵏⴰⴹⵜ, ⴷ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵉⵎⴰⵣⵣⴰⵍⵏ ⴰⴽⴽⵯ ⴷ ⵉⵏⴽⵛⴰⵎⵏ ⴳ ⵓⵙⵡⵓⴷⴷⵓ ⴷ ⵓⵙⵉⵜⴳ ⴷ ⵓⵙⴳⴷⵣ ⵏ ⵡⴰⵢⴷⴰ ⴰⴷ.
ⵢⵓⵎⴰ ⵓⵖⴰⵡⴰⵙ ⵏ ⵡⴰⵙⵙ ⴰⵎⵣⵡⴰⵔⵓ ⵏ ⵓⵙⴳⵔⴰⵡ ⵙⵏⴰⵜ ⵜⵙⴰⵡⵔⵉⵏ ⵏ ⵓⵙⵎⵓⵜⵜⴳ ⵉ ⵜⵏⵍⵎⴰⴷⵉⵏ ⴷ ⵉⵏⵍⵎⴰⴷⵏ ⵏ ⵓⵙⵉⵏⴰⵏ ⵏ ⵜⵔⴰⵏⴰⵡⵜ ⵜⴰⵜⵉⵇⵏⵉⵜ ⴳ ⵓⴳⵯⵍⵎⵉⵎ, ⵜⴰⵎⵣⵡⴰⵔⵓⵜ ⵅⴼ: « ⵉⵎⴰⵙⵙⵏ ⵏ ⵓⵙⵉⴷⴼ ⵏ ⵡⴰⵢⴷⴰ ⴰⵥⵓⵕⴰⵏ ⴷ ⵓⵎⵥⴽⴰⵡ ⴳ ⵓⵙⵍⵎⴷ ⴰⵏⵎⵍⴰⵏ« ; ⵓⵜⵓⵢ ⵏ ⵓⵙⵍⵎⴰⴷ ⵍⵃⴰⵙⴰⵏ ⵜⵉⴽⴱⴰⴹⴰⵕ; ⵜⴰⵙⴰⵡⵔⵜ ⵜⵉⵙ ⵙⵏⴰⵜ ⵅⴼ: « ⵉⵎⴰⵙⵙⵏ ⵏ ⵓⵙⵡⵓⴷⴷⵓ ⴷ ⵓⵙⴳⴷⵣ ⵏ ⵡⴰⵢⴷⴰ ⴰⴷⵍⵙⴰⵏ ⴰⵥⵓⵕⴰⵏ ⴷ ⵓⵎⵥⴽⴰⵡ ⴳ ⵜⵙⴳⴰ ⵏ ⵡⴰⴷ ⵏⵓⵏ ⵜⴰⵏⴰⴼⵓⵜ ⵉ ⵉⵡⵜⵜⴰⵙⵏ ⵉⵏⴳⵎⴰ » ⵓⵜⵓⵢ ⵏ ⵓⵙⵍⵎⴰⴷ ⵄⴰⵣⵉⵣ ⵚⴰⴷⵉⵇ.
ⵎⴰⴷ ⵉⵥⵍⵉⵏ ⵙ ⵜⵉⵍⴰⵍ ⵏ ⵡⴰⵙⵙ ⵡⵉⵙ ⵙⵉⵏ, ⵔⴰⴷ ⵜⵥⵕ ⴰⵙⵏⵎⴰⵍⴰ ⵏ ⵢⴰⵜ ⵜⵉⵏⴰⵡⵜ ⵜⴰⵏⵎⵏⴰⴹⵜ ⵅⴼ « ⵡⴰⵢⴷⴰ ⴰⵥⵓⵕⴰⵏ ⴷ ⵓⵎⵥⴽⴰⵡ ⴳ ⵜⵎⵏⴰⴹⵜ ⵏ ⵓⴳⵯⵍⵎⵉⵎ ⵡⴰⴷ ⵏⵓⵏ: ⴰⵢⴷⴰ ⴰⵥⵓⵕⴰⵏ ⴳ ⵜⵏⴰⴼⵓⵜ ⵏ ⵜⴳⵎⵉ’ » ⵙ ⵜⴷⵔⴰⵡⵜ ⵏ ⵜⵓⴼⵔⵉⵏⵜ ⵏ ⵉⵙⵍⵎⴰⴷⵏ ⴷ ⵉⵎⵔⵣⵓⵜⵏ ⴷ ⵉⵎⵥⵍⴰⵢⵏ ⴷ ⵉⵎⵏⵜⴰⵢⵏ ⵙ ⵡⴰⵢⴷⴰ ⴷ ⵓⵎⵣⵔⵓⵢ ⴷ ⵉⴷⵔⵉⵣⵏ, ⵔⴰⴷ ⵜⵎⵔⴰⵔⴰ ⵜⵉⵏⴰⵡⵜ ⵅⴼ ⵢⴰⵜ ⵜⴳⵔⵓⵎⵎⴰ ⵏ ⵉⵙⴳⵓⵎⵏ, ⵣⵓⵏ ⴷ: ⵜⵉⵎⵥⵕⴰ ⵜⵉⵎⵥⴽⴰⵡⵉⵏ ⴳ ⵓⵎⴷⴰ ⵏ ⵡⴰⴷ ⵏⵓⵏ: « ⴰⵔⵣⵣⵓ ⵅⴼ ⵜⵎⵍⴷⴰ ⵏ ⵜⵙⵓⵍⴰⵏⵜ ⴷ ⵡⴰⵍⴰⵙ ⵏ ⵓⵙⴰⵜⵉⴳ« ; « ⴰⵃⵡⴰⵛ ⵏ ⴰⵢⵜ ⴱⴰⵄⵎⵕⴰⵏ: ⴰⵢⴷⴰ ⴰⵔⴽⵎⴰⵎ ⵉⵙⵖⴰⵡⵙⴰⵏ ⴰⵙⵉⵜⴳ« ; « ⴰⵥⴽⴽⴰ ⵏ ⵜⵖⵍⴰ ⴳ ⵡⴰⴷ ⵏⵓⵏ ⴷ ⵜⴱⵔⵉⴷⵉⵏ ⵏ ⵓⵍⴽⴰⵎ ⵏ ⵜⴳⵎⵉ ⵜⴰⵙⵓⵍⴰⵏⵜ« ; « ⴰⵢⴷⴰ ⴰⵥⵓⵕⴰⵏ ⴳ ⵜⵏⴰⴼⵓⵜ ⵏ ⵜⴳⵎⵉ: ⵉⵔⵉⵎ ⵏ ⵜⵎⵏⴰⴹⵜ ⵏ ⴼⴰⵙ – ⴰⵎⴽⵏⴰⵙ ⵙ ⵓⵎⴷⵢⴰ« .
ⴰⴷ ⵏⵙⵙⵎⵜⵔ ⵎⴰⵙ ⴷ ⴰⵙⴳⵔⴰⵡ ⴰⵏⵎⵏⴰⴹ ⵏ ⵜⵎⴳⵓⵔⴰ ⵜⵉⵥⵓⵕⴰⵏⵉⵏ ⴳ ⵜⵎⵏⴰⴹⵜ ⵏ ⵓⴳⵯⵍⵎⵉⵎ ⵡⴰⴷ ⵏⵓⵏ; ⵉⵎⵙⴰⵙ ⴳ ⵉⵡⵜⵜⴰⵙⵏ ⵏⵏⵙ ⴷ ⵜⴽⴰⵢⵍⴰⵍⵜ ⴷ ⵉⵙⴱⴷⴰⴷⵏ ⵏ ⵓⵣⵓⵔⵜ ⴰⵏⴳⵎⵓ ⴰⵎⴰⵢⵏⵓ ⴳ ⵜⵙⴳⴰ ⵏⵏⵙ ⵜⴰⴷⵍⵙⴰⵏⵜ. ⵎⴽⵍⵍⵉ ⵉⴳⴰ ⴰⵣⴷⴰⵡ ⵏ ⵜⴳⵔⵓⵎⵎⴰ ⵏ ⵉⵎⵓⵙⵙⵓⵜⵏ ⵏⵏⴰ ⵜⵙⵏⵎⴰⵍⴰ « ⵜⵎⵙⵎⵓⵏⵜ ⵏ ⴱⵉⵣⴰⴽⴰⵔⵏ ⵉ ⵜⴳⵎⵉ ⴷ ⵜⴷⵍⵙⴰ » ⵙ ⵜⵏⴰⵍⵉⵜ ⵏ ⵜⵎⴰⵡⴰⵙⵜ ⵏ ⵜⴷⵍⵙⴰ, ⵙⵍⴰⵡⴰⵏ ⴰⴽⴽⵯ ⵉⵏⵎⵓⵇⵇⴰⵔⵏ ⵉⵏⵎⵏⴰⴹⵏ ⵏ ⵜⴷⵍⵙⴰ ⵜⴰⵎⴰⵣⵉⵖⵜ ⴷ ⵜⵃⵙⵙⴰⵏⵉⵜ, ⴷ ⵜⵓⵏⵖⵉⵍⵜ ⵏ ⵓⵙⴳⵔⴰⵡ ⴰⵏⵎⵏⴰⴹ ⵏ ⵜⵎⴳⵓⵔⴰ ⵜⵉⴷⵍⵙⴰⵏⵉⵏ ⴳ ⵜⵎⵏⴰⴹⵜ ⵏ ⵡⴰⴷ ⵏⵓⵏ, ⵏⵏⴰ ⵉⵡⴰⵜⵜⵙⵏ ⴰⴷ ⵜⴱⴷⴷ ⵅⴼ ⵜⵉⵏⴷⵉ ⵏ ⵡⴰⵢⴷⴰ ⴰⴷ ⴷ ⵡⴰⵏⵙⴰ ⵏⵏⵙ ⴷ ⵜⵎⵍⴰⵍⵜ ⵏⵏⵙ ⴳ ⵓⵥⵟⵟⴰ ⴰⴷⵍⵙⴰⵏ ⴷ ⵓⵏⴰⵎⵓⵏ ⴳ ⵜⵙⴳⴰ ⵏ ⵡⴰⴷ ⵏⵓⵏ.