« ⵉⵣⵎ ⴰⴼⵔⵉⵇⵉ 2024 » .. ⴰⵙⴱⴷⴷⵉ ⵏ ⵓⵙⴳⵏⴰⴼ ⴰⵎⵙⵏⵉⵊⵊⵉ ⴰⵏⴼⵍⴰⵢ ⴰⵏⴱⴰⵔⴰⵣ ⴳ ⵜⵙⴳⴰ ⵏ ⵟⴰⵟⴰ
![« ⵉⵣⵎ ⴰⴼⵔⵉⵇⵉ 2024 » .. ⴰⵙⴱⴷⴷⵉ ⵏ ⵓⵙⴳⵏⴰⴼ ⴰⵎⵙⵏⵉⵊⵊⵉ ⴰⵏⴼⵍⴰⵢ ⴰⵏⴱⴰⵔⴰⵣ ⴳ ⵜⵙⴳⴰ ⵏ ⵟⴰⵟⴰ 14-80](https://i.servimg.com/u/f57/20/22/84/12/14-80.png)
ⴳ ⵓⵙⴰⵜⵉ ⵏ ⵜⵉⵍⴰⵍ ⵜⵉⵏⴼⴳⴰⵏⵉⵏ ⵜⵉⵎⵙⴰⴷⴰⵖⵉⵏ ⴰⴽⴷ ⵜⴰⵏⵏⴰⵏⵉⵏ ⵜⵉⵎⵖⵔⴰⴱⵉⵢⵉⵏ ⵜⵉⵎⵉⵔⵉⴽⴰⵏⵉⵢⵉⵏ ⵉⵛⵛⴰⵔⵏ » ⵉⵣⵎ ⴰⴼⵔⵉⵇⵉ » , ⵏⵏⴰ ⵉⵜⵜⵏⵎⴰⵍⴰⵏ ⵙ ⵜⴰⵔⴰⵜⵉⵏ ⵢⴰⵜⵜⵓⵢⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ, ⴰⵎⴰⵡⴰⵢ ⴰⵏⴰⴼⵍⵍⴰ ⴷ ⵓⵏⵙⵙⵉⵅⴼ ⵏ ⵜⵔⵙⴰⵍ ⵏ ⵉⵎⵏⵖⵉ ⴰⵎⴰⵜⴰⵢ ⵏ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ, ⵉⵜⵜⵓⵙⴽⴰⵔ ⵓⵙⴳⵏⴰⴼ ⴰⵎⵙⵏⵉⵊⵊⵉ ⴰⵏⴼⵍⴰⵢ ⴰⵏⴱⴰⵔⴰⵣ ⴳ ⵓⵙⵡⵉⵔ ⵏ ⵜⴳⵔⴰⵡⵜ ⵜⴰⵎⵓⵔⴰⵏⵜ ⵏ ⵓⵇⵇⴰ (ⵜⴰⵙⴳⴰ ⵏ ⵟⴰⵟⴰ).
ⴷⴰ ⵉⵙⵙⵎⵏⵉⴷ ⵓⵙⴳⵏⴰⴼ ⴰⴷ, ⵏⵏⴰ ⵉⵙⵙⵏⵜⵉⵏ ⴰⵙⵏⴽⴷ ⵏ ⵜⵏⵓⴼⴰ ⵏⵏⵙ ⵙⴳ 16 ⵎⴰⵢⵢⵓ ⴰⴷ, ⵜⵉⵏⵓⴼⴰ ⵜⵉⵎⵙⵏⵉⵊⵊⵉⵜⵉⵏ ⴷ ⵜⴼⵍⴰⵢⵉⵏ ⴷ ⵜⵏⴰⵎⵓⵏⵉⵏ ⵉ ⵜⵏⴰⴼⵓⵜ ⵏ ⵉⵎⵣⴷⴰⵖⵏ ⵉⴷⵖⴰⵔⴰⵏⵏ, ⵙⴳ ⵜⵔⵓⴱⴱⴰ ⵜⵉⵎⵙⵏⵉⵊⵊⵉⵜⵉⵏ ⵉⵜⵜⵓⵚⴽⴰⵏ ⵙⴳ ⵉⵙⴳⵏⴰⴼⵏ ⴷ ⵉⵏⵙⵎⴰⴳⴰⵍⵏ ⵙⴳ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴷ ⵓⵙⴷⵔⴰⵙ ⴰⵎⵉⵔⵉⴽⴰⵏ.
ⴳ ⵓⵙⴰⵜⵉ ⴰⴷ, ⵉⵙⴷⴷⵉⴷ ⵓⵙⴳⵏⴰⴼ ⴰⴽⵓⵍⵓⵏⵉⵍ ⵅⴰⵍⵉⴷ ⴼⵜⵜⵓⵃ, ⴰⵎⵙⴳⵏⴰⴼ ⴰⵏⵙⵙⵉⵅⴼ ⵏ ⵓⵙⴳⵏⴰⴼ ⴰⵏⴱⴰⵔⴰⵣ ⴳ ⵓⵇⵇⴰ, ⵎⴰⵙ ⴰⵙⴳⵏⴰⴼ ⴰⴷ ⵉⵙⵙⵓⵊⴷ ⵜⵉⵏⵓⴼⴰ ⵜⵉⵎⵙⵏⵉⵊⵊⵉⵜⵉⵏ ⴷ ⵜⵏⴼⵍⴰⵢⵉⵏ, ⵥⵍⵉⵏⵜ ⴱⴰⵀⵔⴰ ⵙ ⵜⵓⵥⵍⴰⵢⵉⵏ ⵏ ⵜⵎⵓⴹⴰⵏ ⵡⵓⵍ, ⵜⵉⵏⵅⴰⵔ ⴷ ⵉⵎⵥⵥⴰⵖ ⴷ ⵜⴰⵇⵇⴰⵢⵜ, ⵜⴰⵙⵏⵉⵊⵊⵉⵜ ⵏ ⵉⵎⵥⵥⵢⴰⵏⵏ, ⵜⴰⵙⵏⵉⵊⵊⵉⵜ ⵜⴰⴳⵯⵏⵙⴰⵏⵜ, ⵜⵉⵎⵓⴹⴰⵏ ⵏ ⵜⵎⵖⴰⵔⵉⵏ, ⴰⵣⵣⵔⴰⵢ ⵙ ⵓⵥⵏⵥⵕ, ⵜⴰⵙⵏⵉⵊⵊⵉⵜ ⵏ ⵜⵖⵎⴰⵙ, ⴷ ⵜⵙⵏⵉⵊⵊⵉⵜ ⵏ ⵜⵉⵟⵟⴰⵡⵉⵏ.
ⵉⵙⵙⵎⵜⵔ ⴳ ⵢⴰⵜ ⵜⵙⴳⵓⵔⵉ ⵉ ⵎⴰⴱ ⵎⴰⵙ ⴷ ⴰⵙⴳⵏⴰⴼ ⴰⴷ ⵉⵣⵎⵔ ⴰⵔ ⵉⴹⴳⴰⵎ ⵏ ⵓⵚⵉⴹⵢⴰⵙ ⴰⴷ ⵉⵙⵙⵎⵏⵉⴷ ⵎⴰⴷ ⵢⴰⵥⵏ ⵉ 28 ⵏ ⵢⵉⴼⴹ ⵏ ⵜⵏⴰⴼⵓⵜ ⵜⴰⵎⵙⵏⵉⵊⵊⵉⵜ, ⵉ 7600 ⵏ ⵓⵎⴰⴹⵓⵏ, ⵎⴽⵍⵍⵉ ⵜⴻⵜⵜⵓⵙⴽⴰⵔ 122 ⵏ ⵜⵎⴳⴳⵉⵜ ⵜⴰⵏⴼⵍⴰⵢⵜ, ⴷ ⵓⴱⵟⵟⵓ ⵏ ⵜⵙⵎⴰⵇⵇⴰⵍⵉⵏ ⵜⵉⵎⵙⵏⵉⵊⵊⵉⵜⵉⵏ ⵅⴼ 1213 ⵏ ⵡⵓⴳⴳⵉⴷ, ⴷ ⵉⵙⵙⴱⵖⵔ 5600 ⵏ ⵡⵓⴳⴳⵉⴷ ⵙⴳ ⵉⵙⴰⴼⴰⵔⵏ, ⴷ 17 ⵢⴰⴹⵏ ⵙⴳ ⵜⴳⵣⵣⴰⵢⵜ ⵎⴳⴰⵍ ⵏ ⵜⵎⴰⴹⵓⵏⵜ ⵏ ⴱⵓⵃⵎⵕⵓⵏ.
ⴰⴷ ⵏⵙⵙⵎⵜⵔ ⵎⴰⵙ ⴷ ⵉⵙⵎⵓⴷⴷⵓⵜⵏ ⵉⵙⵔⴷⴰⵙⵏ ⵖⵓⵔ ⴰⴷⵖⴰⵔ ⴰⴱⴰⵔⴰⵡ » ⵉⵣⵎ ⴰⴼⵔⵉⵇⵉ 2024″ ( ⵙⴳ 20 ⴰⵔ 31 ⵎⴰⵢⵢⵓ) ⵥⵕⴰⵏ ⵜⴰⴷⵔⴰⵡⵜ ⵏ ⵎⴰⴷ ⵉⴳⴰⵏ 7000 ⵏ ⵓⴼⵔⴷⵉⵙ ⵙⴳ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵙⴳ 20 ⵏ ⵓⵡⴰⵏⴽ, ⴷ ⵓⵍⴰ ⵜⴰⵎⵎⴰⴷⴷⴰⵙⵜ ⵏ ⵓⵎⵓⵍⵍⵉ ⵏ ⵢⵉⵥⵥⵍⵎⴹ ⴰⵟⵍⴰⵏⵜⵉ » ⵏⵏⴰⵜⵓ » ⴳ ⵜⴰⵎⴰ ⵏ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴷ ⵓⴽⵏⵉⵡ ⵏⵏⵙⵏⵜ ⵜⵉⵎⵉⵔⵉⴽⴰⵏⵉⵢⵉⵏ.
![« ⵉⵣⵎ ⴰⴼⵔⵉⵇⵉ 2024 » .. ⴰⵙⴱⴷⴷⵉ ⵏ ⵓⵙⴳⵏⴰⴼ ⴰⵎⵙⵏⵉⵊⵊⵉ ⴰⵏⴼⵍⴰⵢ ⴰⵏⴱⴰⵔⴰⵣ ⴳ ⵜⵙⴳⴰ ⵏ ⵟⴰⵟⴰ 14-80](https://i.servimg.com/u/f57/20/22/84/12/14-80.png)
ⵜⴳⵜ ⵜⴰⵏⵏⴰⵏⵜ ⵏ » ⵢⵉⵣⵎ ⴰⴼⵔⵉⵇⵉ 2024″ ⵙⴳ ⵜⵡⵉⵙⵉ ⵏⵏⵙ ⴳ ⵓⵙⴷⵓⵙ ⵏ ⵜⵣⵎⴰⵔⵜ ⵏ ⵓⵙⵡⵓⵔⵉ ⵉⵛⵛⴰⵔⵏ ⴰⵎⵙⴽⴰⵔⴰⵏ, ⴷ ⵓⵜⵉⵇⵏⵉ ⴷ ⵓⵎⵀⵉⵍ ⴳⵔ ⵉⵙⵔⴷⴰⵙⵏ ⴷⵔⴰⵏⵉⵏ, ⴰⵙⵎⵓⴷⴷⵓ ⴰⵅⴰⵜⴰⵔ ⵉⵜⵜⵓⵙⴽⴰⵔⵏ ⴳ ⵢⵉⴼⵔⵉⵇⵢⴰ, ⴷ ⵓⵏⵎⵓⵇⵇⴰⵔ ⵉⵅⴰⵜⵔⵏ ⴷⴰ ⴷⵉⴳⵙ ⵙⵏⴼⴰⵍⵏ ⵉⵙⵓⵜⴰⵢ ⵉⵙⵔⴷⴰⵙⵏ ⵓⵎⵍⴰⵏ ⴷ ⵜⵎⴳⴳⵉⵢⵉⵏ ⴷ ⵜⵎⵓⵣⴰⵜ, ⵙⵍⴰⵡⴰⵏ ⴰⴽⴽⵯ ⴳ ⵢⵉⴳⵔⴰⵏ ⵏ ⵓⵙⵎⵓⵜⵜⴳ ⴷ ⵜⴰⵏⵏⴰⵏⵜ ⵉⵛⵛⴰⵔⵏ.
ⵜⵙⴷⴷⵉⴷ ⵜⵙⵓⵜⵍⵜ ⵜⵉⵙ 20 ⵙⴳ ⵓⵍⴰⵖⵎⵓ ⵏ ⵢⵉⵣⵎ ⴰⴼⵔⵉⵇⵉ, ⵜⴰⵙⵓⵍⵜ ⵏ ⵓⵎⵢⴰⵡⴰⵙ ⴳⵔ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴷ ⵜⴰⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⵎⵉⵔⵉⴽⴰⵏⵉⵢⵉⵏ, ⵙ ⵓⵎⵙⴰⵙⴰ ⴷ ⵜⵣⴷⴰⵢⵉⵏ ⵜⵉⵎⵣⵔⴰⵢⵉⵏ ⵉⴷⵓⵙⵏ ⵉⴱⴷⴷⵏ ⴳⵔ ⵜⵎⵉⵣⴰⵔ ⴰⴷ.
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ