ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳⵉ ⵍⵃⵓⵙⵉⵎⴰ ⵙⵙⵏⵎⴰⵍⴰⵏ ⵉⵊⵊ ⵏ ⵓⴽⴰⴱⴰⵕ ⴷ ⴰⵙⴳⵎⴰⵏ ⵖⵔ ⵜⴳⵔⵓⵎⵎⴰ ⵜⴰⵏⵎⵍⴰⵏⵜ « ⴱⵓⵖⵎⴱⵓ » ⵉⴷ ⵢⵓⵙⵉⵏ ⴳ ⵓⵎⴰⴹⴰⵍ ⴰⴳⴰⵎⴰⵏ.
ⵜⵙⵙⵓⴷⵙ ⵜⵎⵙⵎⵓⵏⵜ ⵏ ⵉⵙⵍⵎⴰⴷⵏ ⴷ ⵜⵙⵍⵎⴰⴷⵉⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵏⴰⴹⵜ ⵏ ⵟⴰⵏⵊⴰ ⵜⵉⵟⵟⴰⵡⵉⵏ ⵍⵃⵓⵙⵉⵎⴰ – ⴰⵢⵢⴰⵡ ⵏ ⵍⵃⵓⵙⵉⵎⴰ – ⴷ ⵜⵎⵔⵙⵍⵜ ⵏ ⵓⵏⵓⵕⵥⵎ ⵏ ⵜⵥⵓⵕⵉ ⴷ ⵜⵙⴽⵍⴰ ⴳ ⵍⵃⵓⵙⵉⵎⴰ “ⴰⴽⴰⴱⴰⵕ ⴰⵙⴳⵎⴰⵏ ⴷ ⵓⵎⵙⵓⵔⴰⵔ” ⵖⵔ ⵜⴳⵔⵓⵎⵎⴰ ⵜⴰⵏⵎⵍⴰⵏⵜ ⴱⵓⵖⵎⴱⵓ ⵉⵍⵍⴰⵏ ⴳ ⵜⴳⵔⴰⵡⵜ ⵏ ⵕⵡⴰⴹⵉ, ⴰⵙⵙ ⵏ ⵓⴽⵡⴰⵙ 23 ⵎⴰⵢⵢⵓ 2024. ⵙⵙⴱⵖⵔⵏ ⵎⴰⵕⵕⴰ ⵉⵏⵍⵎⴰⴷⵏ ⴷ ⵜⵏⵍⵎⴰⴷⵉⵏ ⵏ ⵜⵎⵔⵙⵍⵜ ⴰ ⵙ ⵜⵙⴰⵡⵔⵉⵏ ⵏ ⵓⵙⵎⵓⵜⵜⴳ ⴳ ⵉⴳⵔⴰⵏ ⵏ:
ⴰⵙⵍⵓⵖⵎⵓ ⵏ ⵉⵏⵍⵎⴰⴷⵏ ⵅⴼ ⵡⴰⵍⵍⴰⵙ ⵏ ⵜⵏⴼⵓⵙⵜ: ⵉⴱⴷⴷ ⵅⴼ ⵜⵙⴰⵡⵔⵜ ⴰ ⴰⵙⵍⵎⴰⴷ ⵄⴱⴷⵍⴽⴰⵔⵉⵎ ⵜⵜⵓⵣⴰⵏⵉ, ⵉⵎⵍⴰ ⴳⵉⵙ ⵜⴰⴱⵔⵉⴷⵜ ⵏ ⵡⴰⵍⵍⴰⵙ ⵏ ⵜⵏⴼⵓⵙⵜ. ⵜⴰⵙⴰⵡⵔⵜ ⴰ, ⵜⴻⵜⵜⵡⴰⴳⴳ ⵉ ⵉⵏⵍⵎⴰⴷⵏ ⵏ ⵉⵙⵡⵉⵔⵏ 1 ⴷ 2.
ⵜⴰⵙⴰⵡⵔⵜ ⵏ ⵡⵓⵏⵓⵖ ⵏ ⵉⵙⴽⴽⵉⵍⵏ ⵏ ⵜⵎⴰⵣⵉⵖⵜ: ⵉⴱⴷⴷ ⵅⴰⴼⵙ ⵓⵙⵍⵎⴰⴷ ⵎⵓⵃⵎⵎⴷ ⴰⴼⵇⵇⵉⵔ, ⵉⴳⴳⵉ ⵜⵜ ⵉ ⵉⵙⵡⵉⵔⵏ 1 ⴷ 2.
ⵜⴰⵙⴰⵡⵔⵜ ⵏ ⵢⵉⴽⵣ ⵏ ⵜⵙⵏⵙⵉⵡⵉⵏ ⵏ ⵜⵎⴰⵣⵉⵖⵜ: ⵜⴰⵙⴰⵡⵔⵜ ⴰ ⵉⵎⵍⴰ ⴳⵉⵙ ⵓⵙⵍⵎⴰⴷ ⵢⵓⵏⵙ ⵍⵓⴽⵉⵍⵉ ⵉ ⵉⵏⵍⵎⴰⴷⵏ ⵏ ⵉⵙⵡⵉⵔⵏ 3 ⴷ 4 ⴷ 5 ⴷ 6 ⵎⴰⵕⵕⴰ ⵜⵉⵙⵏⵙⵉⵡⵉⵏ ⵏ ⵜⵎⴰⵣⵉⵖⵜ ⴷ ⵎⴰⵎⴽ ⵖⴰ ⴳⴳⵏ ⴰⴷ ⴰⵔⵉⵏ ⵙ ⵜⴼⵉⵏⴰⵖ ⴳ ⵜⵜⵉⵍⵉⴼⵓⵏ ⴷ ⵓⵎⵙⵙⵓⴷⵙ.
ⵜⴰⵙⴰⵡⵔⵜ ⵏ ⵜⵡⴰⴼⵉⵜⵉⵏ: ⵉⴼⵙⵔ ⵓⵙⵍⵎⴰⴷ ⴼⵓⴰⴷ ⴰⵄⵕⵓⵚ ⴰⵟⵟⴰⵚ ⵏ ⵜⵡⴰⴼⵉⵜⵉⵏ ⴳ ⵜⴼⵍⵡⵉⵜ ⵙ ⵓⵙⵎⵔⵙ ⵏ ⵉⵙⵓⴳⴰⵎ ⵉⵎⵓⵟⵟⵓⵏⵏ, ⵉⵜⵜⵔ ⵙⴳ ⵉⵏⵍⵎⴰⴷⵏ ⴰⴷ ⴰⴼⵏ ⵜⵉⵎⵔⴰⵔⵓⵜⵉⵏ ⵏⵏⵙⵏⵜ.
ⵜⴰⵙⴰⵡⵔⵜ ⵏ ⵓⵎⵣⴳⵓⵏ: ⴷⴰ ⴳ ⵜⵙⴰⵡⵔⵜ ⴰ, ⵉⵙⵙⵉⵙⴼⵉⵡ ⵓⵙⵍⵎⴰⴷ ⴼⵓⴰⴷ ⵍⴱⵏⵏⵓⴹⵉ ⴰⵙⵍⵎⴰⴷ ⵏ ⵓⵎⵣⴳⵓⵏ ⴳ ⵜⵎⵔⵙⵍⵜ ⵏ ⵓⵏⵓⵕⵥⵎ ⵏ ⵜⵥⵓⵕⵉ ⴷ ⵜⵙⴽⵍⴰ ⴳ ⵍⵃⵓⵙⵉⵎⴰ ⴽⵔⴰ ⵏ ⵜⴼⵔⴽⵉⵡⵉⵏ ⵜⵉⵎⵣⵡⵓⵔⴰ ⵏ ⵓⵙⵎⵓⵜⵜⴳ ⵉ ⵜⵎⵣⴳⵓⵏⵜ.
ⴳ ⵓⵎⴳⴳⴰⵔⵓ, ⵏⵙⵏⵉⵎⵎⵉⵔ ⵎⴰⵕⵕⴰ ⵉⵙⵓⵜⴰⵢ ⵏ ⵓⵙⴳⵎⵉ ⴷ ⵓⵎⵙⵙⵓⴳⵓⵔ ⴳ ⵜ.ⵜ ⴱⵓⵖⵎⴱⵓ ⵅⴼ ⵓⵙⵏⵓⴱⴱⴳ ⵏⵏⵙⵏ ⴰⵎⵇⵇⵔⴰⵏ ⵉ ⴷ ⴰⵏⵖ ⴳⴳⵉⵏ, ⵏⵙⵏⵉⵎⵎⵉⵔ ⵄⴰⵡⴷ ⵎⴰⵕⵕⴰ ⵉⵙⵓⵜⴰⵢ ⵏ ⵜⵎⵔⵙⵍⵜ ⵏ ⵓⵏⵓⵕⵥⵎ ⵏ ⵜⵥⵓⵕⵉ ⴷ ⵜⵙⴽⵍⴰ ⴳ ⵍⵃⵓⵙⵉⵎⴰ ⵅⴼ ⵓⵎⵢⴰⵡⴰⵙ ⴷ ⵓⵣⴷⴰⵢ ⵏⵏⵙⵏ.