ⴰⵙⴼⵓⴳⵍⵓ ⵙ ⵡⴰⵙⵙ ⴰⵎⴰⴹⵍⴰⵏ ⵏ ⵓⵎⵢⴰⵏⴰⵡ ⴰⴷⵍⵙⴰⵏ ⵉ ⵓⵎⵙⴰⵡⴰⵍ ⴷ ⵜⴳⵎⵉ
ⵉⵙⴼⵓⴳⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴰⵙⵙ ⵏ ⵓⵙⵉⵏⴰⵙ 21 ⵎⴰⵢⵢⵓ ⵙ ⵡⴰⵙⵙ ⴰⵎⴰⴹⵍⴰⵏ ⵏ ⵓⵎⵢⴰⵏⴰⵡ ⴰⴷⵍⵙⴰⵏ ⵉ ⵓⵎⵙⴰⵡⴰⵍ ⴷ ⵜⴳⵎⵉ, ⵏⵏⴰ ⵉⵜⵜⵎⵙⴰⵙⴰⵏ ⴰⴽⴷ 21 ⵎⴰⵢⵢⵓ ⵙⴳ ⴽⵓ ⴰⵙⴳⴳⵯⴰⵙ, ⴳ ⵓⵙⵖⵉⵎ ⵏ ⵓⵙⵉⵏⴰⴳ ⴳ ⵕⵕⴱⴰⵟ.
ⵉⵡⴰⵜⵜⵙ ⵓⵏⵎⵓⵇⵇⴰⵔ ⴰⴷ, ⵏⵏⴰ ⵉⵙⵏⵎⴰⵍⴰ ⵡⴰⵎⵎⴰⵙ ⵏ ⵜⵣⵔⴰⵡⵉⵏ ⵏ ⵜⵙⵏⴰⴼⴳⴰⵏⵜ ⴷ ⵜⵙⵓⵙⵢⵓⵍⵓⵊⵉⵜ ⵉⴹⴼⵕⵏ ⵉ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴰⵙⴷⵓⵙ ⵏ ⵜⵓⵙⵙⵏⴰ ⵏ ⵓⵎⵢⴰⵏⴰⵡ ⴷ ⵓⵙⴳⵔ ⵏ ⵜⵉⴼⴰⵡⵜ ⵅⴼ ⵜⵎⵍⴰⵍⵜ ⵏ ⵜⴷⵍⵙⴰ ⴳ ⵡⴰⵍⴽⴰⵎ ⵏ ⵜⴳⵎⵉ ⴰⴳⵯⵏⵙ ⵏ ⵡⴰⵎⵓⵏ.
ⴳ ⵢⴰⵜ ⵜⴳⵓⵔⵉ ⵙ ⵜⵎⵍⴷⴰ ⴰⴷ, ⵉⵙⴷⴷⵉⴷ ⵓⵏⴱⴷⴰⴷ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵃⵎⴰⴷ ⴱⵓⴽⵓⵙ ⵎⴰⵙ ⴷ ⴰⵏⵎⵓⵇⵇⴰⵔ ⴰⴷ ⵉⵡⴰⵜⵜⵙ ⴰⴱⵟⵟⵓ ⵏ ⵜⵓⵙⵙⵏⴰ ⵅⴼ ⵡⴰⵢⴷⴰ ⴰⵎⴰⵣⵉⵖ ⴰⴷⵍⵙⴰⵏ ⴰⵎⴰⵣⵉⵖ ⵙⵍⴰⵡⴰⵏ ⴰⴽⴽⵯ ⴳ ⵓⵎⵏⴰⴷ ⵏⵏⵙ ⵡⴰⵔⴰⴽⵎⴰⵎ, ⵉⵣⵎⵎⴻⵎ ⵎⴰⵙ ⵉⵍⵍⴰ ⵓⴳⵓⴷⵉ ⵏ ⵜⵣⵔⴰⵡⵉⵏ ⵏⵏⴰ ⵅⴼ ⵉⵎⵎⴰⵖ ⵓⵙⵉⵏⴰⴳ ⵖⵉⵍⴰ ⴰⴷ ⵜⵏⵜ ⵉⵙⵎⵓⵟⵟⵓⵏ ⴼⴼⵖⵏⵜ ⴷ ⴳ ⵢⴰⵜ ⵜⵙⵉⵍⴰ ⵏ ⵉⵙⴼⴽⴰ.
ⵉⵔⵏⵓ ⵎⴰⵙⵙ ⴱⵓⴽⵓⵙ ⵎⴰⵙ ⴷ ⴰⵏⵎⵓⵇⵇⴰⵔ ⵉⵡⴰⵜⵜⵙ ⴰⵡⴷ ⴰⵙⵉⵜⴳ ⵏ ⵜⵓⴳⴳⴰⵙ ⵏ ⵉⵎⴰⵣⵣⴰⵍⵏ ⴳ ⵢⵉⴳⵔ ⵏ ⵡⴰⵢⴷⴰ ⴰⴷⵍⵙⴰⵏ ⴳ ⵓⵙⵡⵉⵔ ⴰⵏⵎⵏⴰⴹ ⴷ ⵓⴷⵖⴰⵔⴰⵏ, ⵉⵙⵙⴽⵜⵉ ⴷ ⵎⴰⵙ ⵜⴰⵎⴳⴳⵉⵜ ⵏ ⵜⵍⵙⴰⵔⵉⵜ ⴷ ⵓⵙⵎⵓⵏ ⵏ ⵜⵡⵏⵏⵉⵜⵉⵏ ⵜⵉⴷⵍⵙⴰⵏⵉⵏ ⵖⵓⵔⵙ ⵜⵉⵏⴷⵉ ⵉⵅⴰⵜⵔⵏ ⵉ ⵓⵙⵉⵏⴰⴳ, ⵎⴽⵍⵍⵉ ⵉⵎⵎⴰⵍ ⵓⴹⴰⵀⵉⵕ ⵏⵏⴰ ⵜ ⵉⵙⴱⴷⴷⵏ ⴳ ⵜⵎⵜⵜⴰ ⵏⵏⵙ ⵜⵉⵙ ⴽⵕⴰⴹⵜ.
ⴳ ⵜⵙⴳⴰ ⵏⵏⵙ, ⵉⵏⵏⴰ ⵓⵏⵎⵀⴰⵍ ⵏ ⵡⴰⵎⵎⴰⵙ ⵏ ⵜⵣⵔⴰⵡⵉⵏ ⵏ ⵜⵙⵏⴰⴼⴳⴰⵏⵜ ⴷ ⵜⵙⵓⵙⵢⵓⵍⵓⵊⵉⵜ ⵉⴹⴼⵕⵏ ⵉ ⵓⵙⵉⵏⴰⴳ, ⵎⴱⴰⵕⴽ ⵡⵏⴰⵄⵉⵎ, ⵎⴰⵙ ⴷ ⵜⴰⵎⵙⴽⵉⵔⵜ ⵏ ⵡⴰⵎⵎⴰⵙ ⵜⵡⴰⵜⵜⵙ ⵙ ⵜⵓⵥⵍⴰⵢⵜ ⴰⵙⵉⵙⴼⵉⵡ ⴷ ⵓⴼⵔⴰⴳ ⵏ ⵡⴰⵢⴷⴰ ⴰⴷⵍⵙⴰⵏ ⵡⴰⵔⴰⴽⵎⴰⵎ ⵏⵏⴰ ⵙ ⵜⴽⵜⴰⵔ ⵜⴳⵍⴷⵉⵜ.
ⵉⵜⵜⵓⵣⵎⵎⴰⵎ ⵎⴰⵙ ⴷ ⴰⵏⵎⵓⵇⵇⴰⵔ ⴰⴷ ⵉⵡⴰⵜⵜⵙ ⴰⵡⴷ ⴰⵙⵙⵉⵙⴼⵉⵡ ⵏ ⵜⵎⵍⴰⵍⵜ ⵏ ⵉⵎⴰⵣⵣⴰⵍⵏ ⴳ ⵢⵉⴳⵔ ⴷ ⵜⴱⵔⵉⴷⵉⵏ ⵏ ⵓⵙⵡⵓⵔⵉ ⵏⵏⵙⵏ ⴷ ⵓⵙⴽⴰⵔ ⵏ ⵢⵉⵎⵎⴰⵙⵏ ⵏ ⵓⵣⴷⴷⵓⵢ ⵉ ⵓⵙⵉⵜⴳ ⴷ ⵓⴼⵔⴰⴳ ⵏ ⵡⴰⵢⴷⴰ ⴰⴷⵍⵙⴰⵏ ⴰⵡⴷ ⴰⵏⵏⴰⵍ ⴷ ⵓⴹⴼⵓⵕ ⵏ ⵜⵓⴳⴳⴰⵙ ⵏⵏⴰ ⵏⵏ ⵉⵜⵜⴳⴳⴰ ⴳ ⵓⵙⵉⵙⵏ ⴷ ⵓⵙⵉⵜⴳ ⵏ ⵡⴰⵢⴷⴰ ⴰⴷ.
ⵙⵙⵓⵜⵍⵏⵜ ⵜⴽⵛⵛⵓⵎⵉⵏ ⵏ ⵉⵎⴰⴷⵔⴰⵡⵏ ⵏ ⵓⵏⵎⵓⵇⵇⴰⵔ, ⵅⴼ ⵢⵉⴳⵔ ⵏ ⵓⵙⵡⵓⵔⵉ ⵏⵏⵙ ⴷ ⵜⵖⴰⵔⴰⵙⵉⵏ ⵏⵏⴰ ⵙⵙⵎⵔⵙⵏ ⴳ ⵓⵙⵎⵓⵏ ⴷ ⵜⵍⵙⴰⵔⵉⵜ ⵏ ⵜⴰⵢⵙⵉ ⵜⴰⴷⵍⵙⴰⵏⵜ ⴷ ⵓⵙⵉⵜⴳ ⴷ ⵓⵙⵎⵓⵙⵙⵓ ⵏⵏⵙ ⴳ ⵓⴷⵉⵙⵏ ⵙ ⵜⵙⴳⴳⵉⵡⵉⵏ ⵜⵉⵎⵏⵜⴰⵢⵉⵏ ⴷ ⵜⴳⵎⵉ ⵏⵏⵙⵏⵜ.
ⵉⵙⴷⴷⵉⴷ ⵓⵎⵔⵣⵓ ⵎⵚⵟⴰⴼⴰ ⵎⵕⵡⴰⵏ ⵅⴼ ⵜⵙⵜⵕⴰⵜⵉⵊⵉⵜ ⵏ ⵜⵡⵓⵔⵉ ⵏ ⴰⵢⵜ ⴱⵏ ⵃⴷⴷⵓ ⴳ ⵡⴰⵔⵣⴰⵣⴰⵜ, ⵉ ⵓⴼⵔⴰⴳ ⵏ ⵡⴰⵢⴷⴰ ⴰⵔⴽⵎⴰⵎ, ⵉⴼⵔ ⵓⵎⵔⵣⵓ ⴰⵢⵜ ⴱⵏⵉⴷⵉⵔ ⵜⵓⴳⴳⴰⵙ ⵉⵜⵜⵓⴼⴽⴰⵏ ⵉ ⵓⴼⵔⴰⴳ ⵏ ⵡⴰⵢⴷⴰ ⵏ ⵜⵣⵏⵉⵜ ⵙⴳ ⵓⵎⴷⵢⴰ ⵏ ⵓⴳⵍⵓ.
ⵉⴼⵙⵔ ⵓⵙⵍⵎⴰⴷ ⵄⴱⵍⵎⵊⵉⴷ ⵍⵄⵣⵣⵓⵣⵉ ⵜⵉⵏⴷⵉ ⵏ ⵡⴰⵢⴷⴰ ⴰⵔⴽⵎⴰⵎ ⴰⵔⵉⴼⵉ ⴷ ⵜⵉⵏⴷⵉⵜⵉⵏ ⵅⴰⵜⵔⵏⵉⵏ ⵏⵏⴰ ⵉⵙⴽⴰⵔ ⵃⵎⴰ ⴰⴷ ⵉⵜⵜⵓⴼⵔⴰⴳ, ⵎⴽⵍⵍⵉ ⵉⵙⴰⵡⵍ ⵅⴼ ⵜⵏⴰⴼⵓⵜ ⵏ ⵜⵎⵙⵎⵓⵏⵜ ⵏ ⵜⵎⵙⵙⴽⵜⵉⵜ ⵏ ⵔⵔⵉⴼ ⵉ ⵓⵎⵣⵔⵓⵢ ⴷ ⵡⴰⵢⴷⴰ ⵏ ⵜⵙⴳⴰ.
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ