ⵜⴰⵙⵓⵜⵍⵜ ⵜⵉⵙ 3 ⵏ ⵓⵏⵎⵓⵇⵇⴰⵔ ⴰⵏⴰⵎⵓⵔ ⵏ ⵉⵎⴰⵣⵉⵖⵏ ⵏ ⵍⵎⵖⵔⵉⴱ
ⵉⵙⵏⵎⴰⵍⴰ ⵓⵖⵎⵉⵙ “ⴰⵎⴰⴹⴰⵍ ⴰⵎⴰⵣⵉⵖ” ⴷ ⵜⴳⵔⴰⵡⵜ ⵏ ⵉⵎⴰⵙⵜⴰⵏⵏ ⴳ ⵕⵕⴱⴰⵟ ⵙ ⵓⵙⵏⴰⵍ ⵏ ⵜⵎⴰⴷⴷⴰⵙⵜ ⵜⴰⵍⵉⵎⴰⵏⵜ ⵏ ⴼⵔⵉⴷⵉⵔⵉⵛ ⵏⵓⵎⴰⵏ ⵉ ⵜⵍⴻⵍⵍⵉ ⴷ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ, ⴰⵙⵙ ⵏ ⵓⵙⵉⵎⵡⴰⵙ 31 ⵎⴰⵢⵢⵓ 2024, ⴰⵏⵎⵓⵇⵇⴰⵔ ⴰⵏⴰⵎⵓⵔ ⵡⵉⵙ ⴽⵕⴰⴹ ⵏ ⵉⵎⴰⵣⵉⵖⵏ ⵏ ⵍⵎⵖⵔⵉⴱ ⴳ ⵜⵖⵔⵎⵜ ⵏ ⵕⵕⴱⴰⵟ, ⴷⴷⵓ ⵜⵎⴰⵜⴰⵔⵜ: ⴰⵙⵎⵀⵍ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵢⵉⴳⵔ ⵏ ⵜⵣⵔⴼⵜ.
ⵜⴰⵙⵓⵜⵍⵜ ⵜⵉⵙ ⴽⵕⴰⴹⵜ ⵏ ⵓⵏⵎⵓⵇⵇⴰⵔ ⴰⴷ ⴰⵏⴰⵎⵓⵔ ⴷⵔⵓⵏ ⴳⵉⵙ ⵉⵎⴰⵙⵜⴰⵏⵏ ⵙⴳ ⵎⴰⵕⵕⴰ ⵜⵉⴳⵔⴰⵡⵉⵏ ⵏ ⵍⵎⵖⵔⵉⴱ ⵖⵎⴽ ⴰⵏⵏ ⴷ ⵜⵓⴳⵜ ⵏ ⵉⵎⵖⵏⴰⵙⵏ ⵏ ⵓⵎⵓⵙⵙⵓ ⴰⴷⵍⵙⴰⵏ ⴰⵎⴰⵣⵉⵖ, ⵉⵍⵍⴰ ⴳⵉⵙ ⵓⵎⴹⴰⴽⴰⵕ ⵏ ⵜⵏⴰⵥⴰⵕⵉⵏ ⴷ ⵜⴱⴱⴰⵢⴹⴰⵕⵉⵏ ⵜⵉⵎⵔⵙⵍⴰⵏⵉⵏ ⵍⵍⴰⵏⵉⵏ ⴷⴰⵜ ⵏ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵏⴳⵔⴰⵡ ⵏ ⵜⵣⵔⴼⵜ ⵙ ⵜⵉⴼⴰⵡⵜ ⵏ ⵎⴰⴷ ⵉⵍⵍⴰⵏ ⴳ ⵓⵙⵍⴳⵏ ⴰⵎⴰⴷⴷⴰⵙ ⵉⵥⵍⵉⵏ ⵙ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵍⵍⵉ ⵉⵍⵍⴰⵏ ⵙⴳ 2019.
ⵉⵍⵍⴰ ⵓⵍⴰ ⵓⵙⵉⵙⴼⵉⵡ ⵏ ⵜⵎⵓⴽⵔⵉⵙⵉⵏ ⵍⵍⴰⵏⵉⵏ ⴷⴰⵜ ⵏ ⵜⵙⵏⵙⵉ ⵏ ⵉⵙⵍⴳⵏⵏ ⵟⵟⴰⴼⵏⵉⵏ ⵜⴰⵣⴷⴰⵢⵜ ⴷ ⵓⵙⵎⵔⵙ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵢⵉⴳⵔ ⵏ ⵜⵣⵔⴼⵜ.
ⵎⴰⵙⵙ ⵄⴰⵣⵉⵣ ⵔⵡⵉⴱⵃ, ⴰⵎⵖⴰⵔ ⵏ ⵉⵎⵙⵜⴰⵏⵏ ⴳ ⵜⴳⵔⴰⵡⵜ ⵏ ⵕⵕⴱⴰⵟ, ⵉⵙⵎⵏⵉⴷ ⵢⴰⵜ ⵜⴽⵛⵛⵓⵎⵜ ⵏ ⵓⵏⵏⵓⵕⵥⵎ ⴼ: ⵜⵉⵏⴰⵥⴰⵕⵉⵏ ⵣⴷⵉⵏⵉⵏ ⴷ ⵓⵙⵍⴳⵏ ⴰⵎⴰⴷⴷⴰⵙ ⵏ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⴳ ⵎⴰⴷ ⵉⵥⵍⵉⵏ ⵙ ⵓⵙⵎⵔⵙ ⵏ ⵜⵎⴰⵣⵉⵖⵜ ⴳ ⵓⵏⴳⵔⴰⵡ ⵏ ⵜⵣⵔⴼⵜ ⵜⴰⵎⵖⵔⵉⴱⵉⵜ.
ⵙⴳ ⵜⵉⵍⵍⴰⵍ ⵜⵜⴰⵡⵙⴽⴰⵔⵏⵉⵏ ⴳ ⵓⵏⵎⵓⵇⵇⴰⵔ ⴰⴷ ⴰⵏⴰⵎⵓⵔ, ⵉⵍⵍⴰ ⵓⵙⵏⵎⴰⵍⴰ ⵏ ⵜⴰⵢ ⵜⵉⵏⴰⵡⵜ ⵜⴰⵏⴰⵎⵓⵔⵜ ⴼ ⵓⵙⵉⴷⴼ ⵏ ⵜⵎⴰⵣⵉⵖⵜ ⴳ ⵜⵣⵔⴼⵜ, ⵜⵙⴰⵡⵍ ⴳⵉⵙ ⵎⴰⵙⵙ ⴼⴰⵜⵉⵃⴰ ⵛⵜⴰⵜⵓ ⴼ ⵜⵉⵍⴰⵍⵜ ⵏ ⵓⵙⵍⴳⵏ ⵏ ⵜⵓⵡⵊⴰ ⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⵜⵉⵎⴰⵣⵉⵖⵉⵏ, ⵖⵎⴽ ⵍⵍⵉ ⴳⵉⵙ ⵉⵙⴰⵡⵍ ⵎⴰⵙⵙ ⵎⵓⵃⵎⵎⴰⴷ ⵛⵜⴰⵜⵓ ⴼ ⵓⵣⵔⴼ ⴰⵎⴰⵣⵉⵖ ⴷ ⵓⵙⵉⴷⴼ ⵏⵏⵙ ⴳ ⵓⵏⴳⵔⴰⵡ ⴰⵎⵖⵔⵉⴱⵉ ⵏ ⵜⵣⵔⴼⵜ.
ⵉⵍⵍⴰ ⴳ ⵓⵏⵎⵓⵇⵇⴰⵔ ⴰⴷ ⵓⵍⴰ ⵓⵙⵎⵖⵔ ⵏ ⵉⵎⵙⵜⴰⵏⵏ ⴷ ⵉⵎⵖⵏⴰⵙⵏ ⵉⵎⴰⵣⵉⵖⵏ ⵎⴰⵙⵙ ⴰⵎⵖⴰⵔ ⵃⵎⴰⴷ ⴰⴷⵖⵉⵔⵏⵉ ⴷ ⵎⴰⵙⵙ ⵍⵃⵓⵙⴰⵢⵏ ⵍⵎⵉⵍⴽ, ⵙ ⵜⵉⵍⵉⵜ ⵏ ⵜⴰⵡⵊⵉⵡⵉⵏ ⵏⵏⵙⵏ. ⵉⴼⴽⴰ ⴼⵍⵍⴰⵙⵏ ⵜⵓⴳⴳⴰ ⵎⴰⵙⵙ ⵃⴰⵙⴰⵏ ⵉⴷⴱⵍⵇⴰⵙⵎ ⴰⵎⵖⵏⴰⵙ ⴷ ⵓⵎⵙⵜⴰⵏ ⴰⵎⴰⵣⵉⵖ ⵉⵜⵜⵓⵙⵙⴰⵏⵏ.
ⵉⵎⵙⴰⵙⴰ ⵓⵙⵏⵎⴰⵍⴰ ⵏ ⵓⵏⵎⴰⵇⵇⴰⵔ ⴰⵏⴰⵎⵓⵔ ⵏ ⵉⵎⴰⵣⵉⵖⵏ ⵏ ⵍⵎⵖⵔⵉⴱ ⴷ ⵓⴽⵜⵜⵓⵢ ⵡⵉⵙ 23 ⵏ ⵜⵥⵕⵉⴳⵜ ⵏ ⵓⵖⵎⵉⵙ ⵏ ⵓⵎⴰⴹⴰⵍ ⴰⵎⴰⵣⵉⵖ, ⵍⵍⵉ ⵓⴽⴰⵏ ⵉⵣⵣⵉⴳⵣⵏ ⴳ ⵜⵡⵓⵔⵉ ⵏⵏⵙ ⵜⴰⵏⵖⵎⴰⵙⵜ ⴳ ⵓⴹⴼⵕ ⵏ ⵜⵣⵣⵉⴳⵣⵜ ⵏ ⵜⵎⵙⴰⵔⵜ ⵜⴰⵎⴰⵣⵉⵖⵜ ⴳ ⵉⵙⵡⵉⵔⵏ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ.
ⴰⵙⵓⵖⵍ: ⵕⴰⵛⵉⴷ ⵏⴰⵊⵉⴱ