Tamedyazt-iw
Seg zɛaf i d-tuɣ aẓar
Tmedyazt uriɣ ar ass-a
Seg zɛaf i d-tuɣ aẓar
Tmedyazt uriɣ ar ass-a
Yeqqim neɣ yedda uḍar
Allaɣ yeskikiḍ tasa
Aɣbel ma izger-d amnar
Ha-t-an deg wul i yensa
Uriɣ (ɣe)f lbaṭel aberkan
Yekkaten mebla aḥezzeb
Uriɣ (ɣe)f lbaṭel aberkan
Yekkaten mebla aḥezzeb
Yettarra imdanen d aklan
Heggan akk i usqizzeb
Aɣiḍi iruḥ ur d-iban
Tudert tmug d asegrireb
Yir tudert
Uriɣ (ɣe)f tmuḥeqranit
Yerran miḥyaf d awal-is
Tudert tuɣal d lḥentit
Ɣef win yeṭṭfen di nnif-is
Leḥkem irebba tacriḥt
Ma d agdud yeqber wul-is
S ufḍis i ifukk ufus-is
Ayen uriɣ ɣef ujujru
Meẓẓi sdat n yisiḍ-is
Tudert yebna-tt ɣef uɣurru
Laɛmer yeṭṭif awal-is
Ur ibennu, yetthuddu
S ufḍis i ifukk ufus-is
Tikerkas sehlent…
Tamurt, zedɣent tkerkas
Fell-as tira ur tettfakka
Yezga ssuq-nsent yal ass
Tikli-nsent tga kanakka
Tidet sɣersen-as tara-s
Nɣan-tt, gren-tt s aẓekka
Ulac am tayri..
Bɣiɣ ad aruɣ ɣef tayri
Tin ay izedɣen ulawen
Ad yeffeɣ wayen n diri
I yelhan ad d-yeqqimen
Timura ad awḍent s itri
Imal d win ara iseggmen.