Tabrat n tasa
Terra mmi-s deg uḍellaɛ
Saɛdiya yebra urgaz-is, iɛawed fell-as, teggra-d iman-is nettat d mmi-s mazal iteṭṭeḍ, mi temmut yemma-s. I as-d-yeggran ala anejli…
Akka tura tuɣ abrid n Zzayer tamanaɣt. Yugi ad tt-yeffeɣ usnektay acku beṭṭu d mmi-s n tasa-s yerwi-tt. Tenɣa iman-is s tuzzmiwin mi t-in-teǧǧa. Maca ad d-temmekti kan ɣer baba-s ara yili mačči ɣer uberrani dɣa ad tḥulfu i yiman-is am wakken tekcem-itt-id kra n telwit ara isrekden tasa-s yettefriwisen. Temmekta-d diɣen d acu n wawalen i tura deg tebrat-nni i terra deg uḍellaɛ i tger mmi-s Rabaḥ. Tenna-as i umazun : « Tunṭict ara tafeḍ deg uḍellaɛ-a d mmi-k Rabaḥ, d aksum-ik, d idammen-ik. Sekker-it-id akken i d-sekkarayen yirgazen lɛali arraw-nsen. Nekk sekkreɣ-t-id almi d ass-a s lqella u lɛella, s lḥif ur neṭṭixir amnar n tewwurt. Ass-a mi i iyi-teǧǧa ula d taɛzizt n yemma ur zmireɣ ara ad as-fkeɣ i Rabaḥ tudert zeddigen, tin ara t-yerren d argaz ara yilin yezmer i yiɣeblan n ddunit. Rnu aqcic i d-trebba tyemmat war tihewt n ubabat iteffeɣ-d ɣer sdat imal ɣur-s. Imi kečč d argaz, efk-as azal-is n trrugza s ttrebga iwenɛen, imeɛnen, ama s yiselmaden n uɣerbaz ama s timmad-ik, sserwu-as azalen n teqbaylit yettarran imdanen ssnen, ukin, ttqadaren, ttḥezziben, kkaten ɣef yizerfan-nsen ma terra tmara. Rebbi-d argaz ara inefɛen iman-is yenfeɛ timetti.
A-t-an ssawḍeɣ-ak-in yiwet n tegnit ɣer yimi-k, yis-s tzemreḍ ad d-terreḍ tilelli-k, tin akken i tessefsiḍ am teḥjurt n ssekker daxel n tqerɛet n ccrab. Mmi, ur bɣiɣ ara ad yeḍfer abrid n usekṛan. Ihi ɛiwed tikli yelhan, tin ara d-yeǧǧen lǧerrat tizeddganin. Arrac ttɛanaden ibabaten-nsen. Xemmem aṭas, ttrebga mačči d ccɣel n tiqecmeɛt, ɣur-s yiwet n tmasit d tagejdurt.
Ma d nekk ur ttnadi ara fell-i, err iman-ik am wakken ur d-luleɣ, am wakken ur iyi-tessineḍ. Nekk s timmad-iw ur ẓriɣ ara anda ara rreɣ. Akal n Rebbi wessiɛ. Ad sahleɣ ur d-ttaǧǧaɣ tansa-w ula i yiwen ig Rebbi d Rabaḥ. Skiddeb-as ma yella isteqsa-k-id fell-i. Ini-as temmut ass-nni akken i k-id-tesɛa. Err Wardiya, tameṭṭut-nni i tuɣeḍ deffir-i d yemma-s. Kkes aɣilif ur teččḥeɣ ara ma tessaweḍ ad as-tfek cwiṭ n tayri. Nekk ad ferḥeɣ s tidet nezzeh.
Ar wissen…
Saɛdiya »
Aḍris-a d tukkist seg tullist “Terẓeg n tament” n Malek Houd, tiẓrigin TIRA, Bgayet, 2016.
Tabrat n tasa
Teǧǧa mmi-s tennejla…