Si Muḥend u Mḥend
Meɣres d ayyur n tefsut diɣen d win n tmedyezt. Ihi mi ara d-nebder awal-agi n tmedyezt amedyaz amezwaru i d-irezzun s aqerruy d si Muḥend u Mḥend. D yiwen i iεerken awal akken i s-yehwa, ad t-yemsel neɣ ad t-yesker, lxersum ad k-id-issiweḍ akken i t-tebɣiḍ ama d win yelhan ama d win n diri, win i t-yuwin yuklal-it mebla ccek. Mačči d yiwen usentel iɣef d-yuwi awal maca win i yeǧǧa akken i t-id-tesεa yemma-s d « Tayri » ulac d acu ur d-yenni ara fell-as.
Asefru-a ara teɣrem d aglam i d-yeglem amedyaz-a, yenna-d amek i t-yettwali. Walit ma yella akka i t-tettwalim ula d kunwi.
Yekkes εeryan i tayri
Si Muḥend U Mḥend
Yuḍen aṭan n tikli
Yedda d ubeḥri
Tefka-t tmurt i tayeḍ
Awal yeskefkuf deg (yi)mi
Yenna-t ɛinani
Ɣer wul n umdan yewweḍ
Yerwa terzeg n yilili
Ur yessin tili
Tayerrust n zzman teẓmeḍ
Yexreb targit urumi
Yessnegren tayri
Imeṭṭi d yidim yexleḍ
Leḥzen, yessen-it d ilemẓi
Lmut d umerẓi
Adeddic yeɛmer d rrseḍ
Ɣef yal tamsalt yessefra
Ur yunif i kra
Amur ameqqran d tayri
Ɣef zzman ucmit yura
Yessexreb tirga
Ɣef widak ur nettsetḥi
Yenna awal mačči s tuffra
Yecbeḥ d isefra
Yesla-t umdan yergagi
Azal n tmeṭṭut yerna
Iɛedda i usigna
Abrid-is metwal itri
Yessefra mačči d kra
Mazal ar tura
Lehdur-is rran tili
Deg (yi)berdan yewwi asurif
Yedda ur yengif
Asebsi-ines d amwanes
A-t-an iɛedda i Sṭif
Ɛennaba n lḥif
Tefka-t akkin ɣer Tunes
D asemmiḍ, d azɣal kif-kif
Yezdi d uɣilif
Akka i tga tudert-ines
Amzun yettawi-t wasif
Yeṭṭafar rrif
(de)G waluḍ n zzman yexnunes
Asebsi yeččur d lkif
S wawal yeshetrif
Imi-s yettarew-d times.
Yettwehhi anda ara t-yawi uḍar-is
Wa d asefru n Si Muḥend ɣef lɛid
Lɛid tɛedda am waḍu
Kullec yettfukku
Ɣas Rebbi ad d-yeqqimen
Albɛaḍ icedha seksu
Ad yečč ad yerwu
Ad imɣafar d yiḥbiben
Mačči am bu ddeɛwessu
Di lɣerba yettru
Iɛeggden gar ibermilen
Ay ayetma widak nettu
Nemmekti-d nettru
D ddenya i yesneḥwijen
Kul taswiɛt nekkni ndeɛɛu
Ɣer tmurt ad nerzu
D aɛessas ay d-issawalen.
Si Muḥend u Mḥend
Amedyaz ameqqran