!Tikerkas: dayen
Tilelli ad d-tesreḥ i umzur
Dayen neɛya di tkerkas
Lekteb meqqer d awessur
Tewweḍ-d tallit n ufras
Ayen i nwala yeqqur
Imɣi ad telhu ṣṣaba-s
Ma isaḥ-it-id umur
Axxam, ad s-nɛiwed lsas
Yal tama yezzi-d lbur
Ad ires ubeḥri amessas
Tilelli ad d-tesreḥ i umzur
Ad nwali amek i tga ṣṣifa-s
Talwit, ad s-yefsi ukras
Tkuffer ddaw ugennur
(de)G wulawen ad nsent timas
Ara yerɣen d azeqqur
Talwit, ad s-yefsi ukras
I ccedda, ad s-tezzi aɛrur
Tudert ad tali lqima-s
Ad teflali am waggur
Amdan ad d-tezzi ddala-s
Ad yurar ad ittimɣur
Tamurt, ad d-tṣaḥ i tarwa-s
Lekteb meqqer d awessur
Ad tfakk tiyita n wugur
Ad yenqeḍ g tmurt rrṣaṣ
Ad yemmet lḥif d amengur
Ad d-yaki yizimer akessas
Ad iɣunfu ahicur
Ad d-tessemɣi mayna tuɣmas
Ad tɣeẓẓ lbaṭel (de)g uɛrur
Win d-issufuɣen tisuqas
Ad t-yerr zzman d amengur
Tibḥirt, ad tfaz s yizegza-s
Ur s-d-imeqqi umermur
Aṭan, ad yemlil d ddwa-s
Ḥellu ad d-yas ad ɣ-iẓur
Ad yekkes (ɣe)f wallen lixṣaṣ
Rrbaḥ, ad d-yas d acercur.
Talwit, ad s-yefsi ukras
I ccedda, ad s-tezzi aɛrur