TIKERKAS: Tafsut d tamazight macci d taârabt
Lekteb imzenneq, tacmuxt terreẓ zzit iɛelleq. Tikerkas sehlent ziɣen, akken yennum yeqqar yiwen umaẓwan (propagandiste) Alalman deg tallit-nni n ṭṭrad amaḍlan wis sin: « skudmal lekteb meqqer skudmal yettɛedday ».
Dɣa netta ɣef wayen akka iḍerrun deg Tferka n ugafa seg taggara n tegrest d tazwara n tefsut n useggas-a 2011, tigrawliwin i d-yettnekkaren din mačči deg tmura taɛrabin, semman-asent « Tafsut taɛrabt » neɣ « Tigrawliwin taɛrabin ». Timura anda ḍerrunt tegrawliwin-a d timaziɣin neɣ d tiferɛunin neɣ d tiberkanin, akal-nsent yezga-d deg umenẓaw n Tferka maca arbib i qqnen yineɣmasen aɛraben neɣ ifransisen i wawalen-a d wa: « tafsut d tegrawla » d « aɛrab ». Akka deg yisalan ayen i nsell kra yekka wass d wa: « Tafsut taɛrabt », « Tigrawliwin taɛrabin ». Arbib « Amaziɣ » yenger, yeɣba, ulac-it…
Wissen melmi ad ɣ-d-iwali umaḍal akken nella kan mebla ma yefka-aɣ tamagit taɛrabt amzun d abɛaḍ i yegullen fell-asen ur ssexdamen ara awal « amaziɣ ». Maca akka tura yewweḍ wass ad d-nerr azal i yiman-nneɣ nekkni s yimaziɣen. Ahat « tafsut taɛrabt » neɣ « Tigrawliwin taɛrabin », ɣas ma tinfaliyin-a wwint ismawen aɛraben, netta deg tidet , akud ixeddem i lfayda n tmaziɣt. Ma yella tagrawla tewwi-d tugdudt, tugdudt ad d-teglu s yizerfan n Yimaziɣen anda bɣun ilin deg wakal n Tmazɣa anda i ten-id-yufa lḥal din seg wassen i tebda ddunnit seg zik n zik.
Tafsut tebda-d amecwar-ines deg useggas 1980, deg wass n 20 n wayyur n yebrir deg tmurt n Leqbayel. Tura, a-tt-an, ijeǧǧgen-is ṭṭreḍqen-d deg Tmazɣa merra. Yewweḍ-d lawan ad nečč igumma-ines nekkni s Yimaziɣen n TMAZƔA.
Tafsut n Yimazighen
Malek HOUD