Tamacahut n yinisi d wuccen neɣ « win yebɣan yedder yemmet »
Win yebɣan yuzur yirqiq
Win yenɣan yedder yemmet
Tamacahut n yinisi d wuccen neɣ « win yebɣan yedder yemmet »
Qqaren-d uccen yeḥrec, d bu txidas, tiḥerciwin yerzan kra yellan diri-t. D tidet yeẓwer nezzeh deg tlufa-a maca yella win i t-yugaren deg tegzi imi acḥal d abrid i mlalen, awal aneggaru yettuɣal ɣer uɣersiw-a amecṭuḥ, bu teɛrurt yedlen s yisennanen, wa tɛeqlem-t akk d inisi. Ihi aḍris-a ad awen-d-isegzu amek i d-yessemneɛ uccen seg lmut ɣas ma uccen yenwa dayen yeǧǧa-t, ixdeɛ-it, netta yuɣal almi yefhem izen i as-d-yeǧǧa send ad isahel…. D anect-a i as-yessɣzefen deg tudert, wanag…
Werǧeǧǧi d anza n unebdu
Wa yesserwat, wa yezzuzur
Takka yettawi-tt waḍu
Annar deg (yi)bawen yeččur
Lexrif yeččur-d tawwurt
Ammad deg tesrafin yeffer
Lewḥuc ttnadin ɣef lqut
(de)G lexlawi yenɣa-ten ccar
Uccen d yinisi mlalen
Laẓ, yewwet-iten i sin
Lehdur ɣlin-d ɣef yibawen
Tasraft n flan ad tt-ldin
Neṭgen, ɣef tirect rsen
Nnan-as tawant ad nerwu
Tiziri teṭallay ɣur-sen
Aɣẓaẓ n yibi iteddu
Segmi bdan ulac asgunfu
Asxertem yeččur tasraft
Iɛebbaḍ rnan deg (u)cuffu
Yekcem-d uzenzar n tafat
« Ilaq tura ad nerwel,
I s-yenna yinisi i wuccen
Ad neɛreḍ amek ara nefel
Ma ufan-aɣ-d ad ɣ-nɣen »
Yeɛreḍ wuccen ur yezmir
Ma d inisi yettxemmim
« Win yellan deg tleqqaɛt n lbir
Ad yimɣur am uɣanim »
Tiḥerci n yinisi..
Yufa-d amek ara menɛen
D uccen ad s-yegren taɛrurt
Asmi ad yaweḍ d asawen
Ad t-id-yekkes ddaw n tmurt
Inisi yeffeɣ-d i tesraft
Uccen yenna: « D nnuba-w! »
« Teẓriḍ ur sɛiɣ tazmert
Ur ttraju kra deg lǧiha-w »
« Win yebɣan yedder yemmet »
I yenna yinisi i wuccen
Bu tyuzaḍ amzun yettwwet
Mi yerwel bu (yi)sennanen
Mi yesla lheffa tetteddu-d
Yerra iman-is yemmut
Argaz d amurḍus i iɛud
Iḍegger-it-d seg tbeḥlust
Yekker yerwel am lebreq
Iteddu ihedder i yiman-is:
« Inisi yesɛa lḥeqq,
Amdan, lmut d tudert-is.
D tiḥerci i yeččan tura
Qqaren-tt rennun deg tmussni
Qqaren-d zik tella nniya
Teggra-d deg (u)salay i tmuɣli.
Tixidas n wuccen…