Tagi tugar tamezwarut
Yuker-d tabernust
(Ɛellawa d amakur. Yuker-d yiwet n tbernust seg Taddart Wadda. Mi d-yerwel ḍefren-t-id kra n yirgazen n taddart-nni ad as-tt-id-kksen…)
Deg taddart ufella, win iɣeflen ɣef kra n tɣawsa ad tt-id-yaf tuffeg. Fiḥel ma nudan at taddart anwa i tt-yeddmen, d Ɛellawa amakur. Mi yettxemmim akken, tɛedda-d seg uqerruy-is tmeṭṭut-nni ines tamezwarut. Ur yezmir ara ad yettu lehdur i s-d-teqqar mi ara d-yeḍru yid-s kra n wayen n diri. Yennum isell teqqar-as: “Ur ttagad, aql-I da!” Cwiṭ n lehdur-a ttaččaren ul n Ɛellawa d talwit. Tameṭṭut-is tis snat tɛedda-d diɣen deg uqerruy-is, maca ulac d acu ara d-yini fell-as, ur tt-yessin ara ar tura. Yeqqar kan deg wul-is: “Zher-iw yedda d tmezwarut ɣer wanda ur d-nettuɣal”. Anyir yettcercur seg tidi, iles yeffeɣ-d am yiḥder n ukermus, nnhati ta deffir tayeḍ, Ɛellawa yewweḍ kan ɣer yiwet n txerrubt ur neggug ara aṭas ɣef taddart-is –Taddart Ufella- ibelttex ɣer lǧedra-s, isenned ɣur-s yettcehhid : “Tikkelt-a dayen, ur ttɛawadeɣ ara ad mmiẓdeɣ ɣer wayla n medden acku wigi ma ṭṭfen-iyi yifassen-nsen ad xellṣeɣ ayen txelleṣ tuccent”. Tuccent-a iɣef d-yewwi awal, d arraw-is i tt-isteqsan yiwen n wass ma yella tettxelliṣ aksum-a i sen-d-tettawi, neɣ deg tidet i sen-d-tettaker yal ass, ad t-ččen akken ad imɣuren.Tenna-asen: “Assen ur d-ttuɣaleɣ ara ɣur-wen, ḥṣut ass-nni d axelleṣ i xellṣeɣ d ajemmal ayen akk i wen-d-wwiɣ”.
Ɛellawa inegfen yefka tameẓẓuɣt-is s agemmaḍ, yesla i lheffa n waṭas n yiḍarren tettẓiẓi-d ɣur-s. Yugad mačči d kra. Yekker nnig n nnhaya-s, yebda yezzuɣur deg yiman-is s cwiṭeḥ n tezmart i s-d-yeggran. Yewweḍ tawwurt n uxxam-is, teldi-d mi yeɣli d amrar cwiṭ akkin i umnaṛ. Tameṭṭut-is ixelɛen tuzzel-d s lemɣawlat d tergagit ɣur-s. Wissen amek akken i yessaweḍ ad d-issufeɣ kra n wawalen: “Ṭṭef tabernust-a, awi-tt tefreḍ-tt !” Ifukk kan awal-is, iruḥ deg ddux, seg yimiren ur yeẓri anwa i tt-yeksan. Tameṭṭut-is mi i s-d-yuɣal laɛqel, truḥ teffer tabernust-nni, tuɣal-d ɣer urgaz-is. Terfed-it seg tɣerdin am uɛeẓwan acku ixuṣṣ nezzeh, nettat tqebba, tugar-it aṭas deg tezmart.Tessaweḍ-it ɣer wussu, teẓẓel-it tinegnit, tdel-it, teqqim ɣer yiri-s tesbuḥruy-as.
Irgazen n taddart Wadda i d-iḍefren amakur n tbernust, wwḍen-d ɣer tejmaɛt n taddart Ufella, maca win d-squqren ur ẓrin tama i t-yeččan. Steqsan wid d-ufan qqimen ɣef yideknan n tejmaɛt ttqeṣṣiren. Nnan-asen-d : “Ur d-zgint ara wallen-nneɣ deg wagi i d-teqqarem akka yuker-iken.” Maca ikcem-iten merra ccek, ala yiwen i isserwaten deg tigi, wagi d Ɛellawa amakur. Ikker-d Dda Ɛebdella, ameqqran n ugraw yenna : “Ḍefret-iyi-d s axxam n Ɛellawa” . Gguggin ɣef tikkelt s axxam n umakur. Mebla ma seṭbeṭben ɣef tewwurt ččuren axxam n win ur nettḥezzib i wayla n medden. Ufan-t yeẓẓel tinegnit deg wussu-s, allen qemcent, tameṭṭut-is ɣer yiri-s.
–A tameṭṭut ! Err-d tabernust n medden i d-yuker urgaz-im i sat n taddart Wadda. Wellah ala abehdel i ɣ-ittbehdil Ɛellawa seg wasmi i d-yekker.”” I d-yenna Dda Ɛebdella.
-Buh! Waqila yeffeɣ-iken laɛqel, argaz-iw yeɣli d amuḍin, a-t-an sin wussan aya ur yeṭṭaxer seg wussu-s kunwi teqqarem-d yuker tabernust neɣ wissen d acu. Nekk nwiɣ tusam-d ad twalim ma yezga-d cwi, kunwi tusam-d ad d-bellim fell-as ayen ur yexdim. Ma ur tuminem ara ha-t-an uxxam sdat-wen, nadit ɣef yiman-nwen ɣef tbernust-a i d-tettaddrem, nekk ur walaɣ. I sen-d-terra tmeṭṭut n Ɛellawa iwimi yenger yiẓri-s seg yimeṭṭi.
D ayen i sen-d-tenna i xedmen. Nudan akk axxam, ur ǧǧin tiɣmert. Ssutren asuref seg tmeṭṭut n Ɛellawa imi ur tufiḍ d acu i ufan, ffɣen ssersen i wallen-nsen, nneḥcamen. Argaz yesgunfan cwiṭ, s ddaw tiṭ yeḍfer merra ayen yeḍran sdat-s. Yenwa ass-a i d aneggaru-ines. Yettewhem amek ur ufin ara tabernust imi ulac amkan ur zgilen mi tt-ttnadin.
-Ɛni teččiḍ-tt a tameṭṭut. I s-yenna Ɛellawa.
–Ala, ddu-d yid-i. I s-terra.
Teṭṭef-as afus, tewwi-t yid-s ɣer texxamt n uniwel. Deg teɣmert taccuyt tres ɣef lkanun, aseksut yeččuren d seksu yuɣal fell-as, yeqfel s uqeffal. Ɛellawa yettarran iman-is d uḥric, iṭall yeffes, ẓelmeḍ, d asawen, d agessar, ulac kra n tbernust i d-ibanen. Tameṭṭut terra srid ɣer teccuyt-nni, tekkes-as aqeffal, terfed s lemḥadrat aseksut-nni, tejbed-d s laɛqel seg tecḍaḍt tabernust yeffren daxel-is.
Ɛellawa yeldi deg warquqen-is yeqqar: “Tagi tugar tamezwarut”.
Tabernust daxel n teccuyt