Abderrehman Bouguermouh yemmut
D netta i yerẓan asalu n sinima amaziɣ.
Dda Ɛebreḥman
Anaẓur yemmut. Ad fell-as yeɛfu Rebbi. Ayen yellan fell-as ixdem-it. D netta i yerẓan asalu n sinima s teqbaylit s usaru-s « Tawrirt yettwattun » i d-yekkes seg udlis n Dda Lmulud At Mɛemmar « La colline oubliée », argaz-nniḍen ageɛmir n tmaziɣt. Akka tura mlalen yimeɣnasen, ahat mmeslayen anda ddant temsal… Ahat diɣ, Dda Ɛebrehman imi ur yessawaḍ ara ad isbedd asaru-a deg useggas 1968, iɛuhed ameddakel-is Dda Lmulud ar d yiwwas ad t-isali akken ad t-walin akk medden, yeggul ur yeḥnit, yeṭṭef deg wawal-is, yesɛedda nnmara-s, ɣas ma uguren deg ubrid ggten, yessaweḍ ad t-id-yessufeɣ deg 1996, yis-s i yeldi tawwurt i yisura-nniḍen am « Amacahu » n Belqasem Ḥeǧǧaǧ neɣ , ad t-id-idekker Rebbi s Lxir, « Adrar n Baya » n Ɛezeddin Meddur, ad fell-as yeɛfu yerḥem. D yisura-nniḍen…
Tiddukla tadelsant n Uqbu tga yiwet n temlilit n wid ixedmen isura imecṭah, dɣa terra tajmilt i Mass Bouguermouh deg tudert-is, ur truja ara ass-a mi d-aɣ-yeǧǧa. Deg tzeqqa Σebderreḥman Fares, yeqqim ɣer sdat, iban ɣef wudem-is yuḍen, ɣas ma akken i yella iwala ddaqqes n yisura imecṭaḥ. Ass-nni i as-d-ɣriɣ asefru-a, tameddit ɣer yiḍ, mi nεedda ad nečč imensi, fkiɣ-as yiwen n wudem n uḍris-a. Iεǧeb-as nezzeh.
Mačči i twacult-is kan n Wat Zellagen i wumi iruḥ, Iruḥ diɣen i twacult-is tameqqrant: tamurt-is. Ad yazen Rebbi ssber i twacult-is, ig-as i Dda Ɛebraḥman, amkan-is deg rreḥma.
!Azul ay Anaẓur
Tajmilt-ik d tameqqrant
Dda Ɛebreḥman
Yerḥem taɛebbuḍt yurwen
Argaz yessagren nnif
Idurar n Wawzellagen
Kksen (ɣe)f tmaziɣt aɣlif
Fkan-d argaz yennuɣen
ɣef yidlis yeččan lḥif
Ad d-yeǧǧ tugniwin yeddren
Beɛdent ɣef yimi n wasif
Dda Ɛebreḥman d amḥuddu
(ɣe)F yiḍelli d wanda nteddu
Yemma-s d tala n yisefra
Ɣur-s yugem-d tamussni
Netta d tasraft n yisura
Ulac ɣef wacu ur d-yewwi
“Amergu”, “Keḥla u Bayḍa”
Ma d “Iẓra-s gren-d tiɣri”
“Tawrirt yettwattun” d anza
Taqbaylit akk d taẓuri
Dda Ɛebreḥman d anaẓur
Yeḍwa deg (yi)genni am wayyur
D argaz n yiwen wawal
Dda Lmulud tewweḍ-it telwit
Deffir n “Tewrirt” nerna nnwal
Ayen i iɛuhhed yewweḍ-it
Yeǧǧa-d ɣer deffir akal
N tarwa i ttett temcict
I tẓuri yefka azal
Ɣas ma ṣṣdaɛ ṣṣbeḥ tameddit
Adɣaɣ yerna i uxxam
Deg umezruy yura deg uzmam
Ih, d amɣar n lbaraka
Yak nettzuxxu yis-s aṭas
Yerra ccan s sinima
I tmeslayt-nni n yamma-s
Tefrawes tergagi tasa
Yefreḥ ula d aɛessas
Axxam amaziɣ yeḍsa
S wafud yennerna lsas
A Dda Ɛebreḥman tanemmirt!
Terriḍ-d azal i teqbaylit
A Dda Ɛebreḥman tanemmirt!
Terriḍ-d azal i tjaddit.
Malek HOUD