Kamal ddin Fekhar yemmut.
D arǧaz!
Kamal ddin Fekhar yemmut. Mačči deg uxxam-is i isuffeɣ rruḥ, maɛna deg lḥebs anda i nnumen garren-t imi yezga d amdan yeddan d tidet. Tidet n tmurt, tidet i ttɣummen s rrmel n sseḥra. Ad d-izuff ubeḥri am umussu-a akka n tura, ad d-tban akken ma tella.
Kamal d Amaziɣ, d argaz neɣ d arǧaz ilelli yennuɣen seg wasmi i d-yekker ɣef yizerfan n umdan, wid i rekḍen yal ass i d-ittakk Rebbi, yimḍebbren n tmara n tmurt-nneɣ. Kra n win yugin tasertit-nsen yebnan ɣef tkerkas, ad t-rren d acengu n tmurt, ad t-ɛetben, ad t-gren deg usekref anda ara t-ǧǧen din alma yessukef, alma yeǧǧa-d taǧǧalt d yigujilen.
Iseggasen akka yezrin d abaxix i d-yeḍran deg tmurt n Yimẓabiyen. Nɣan 31 n yimdanen ɣef 300000 n yimezdaɣ n temnaḍt-a. Yekker-d Kamal akked d kra n yimeɣnasen am netta ad ḥebsen anɣal n yidammen n watmaten-nsen d tmerɣiwt betɛemda n yixxamen-nsen. D acu ara sen-xedmen ? Gren-ten ɣer leḥbus. Ur ilaq ara ad d-inin i yizem ifuḥ yimi-k, netta ladɣa yesṭeɛṭiɛ, yugar tazulixt.
Tres ddeɛwa, Kamal d yimeddukal-is ffɣen-d seg lḥebs, uɣalen-d ɣer twaculin-nsen.
Mi d-yekker umussu deg tazwara ass n 16 deg furar deg Xerraṭa, yuɣal yuɣ-d tamurt n Zzayer akken ma tella ass n 22 deg furar, ula d Imẓabiyen am Yizzayren-nniḍen kkren-d ad d-inin i udabu amesbaṭli : « Ɛeffeṭ ! » Rran Kamal anda i nnumen ttarran-t. Maɛna tikkelt-a ur yezmir ara i tudert n usekref imi aṭas n ccwami i as-d-teǧǧa iseggasen yezrin, dɣa yesselqef din.
Ma yella d sseḥ, akken i yettsuɣu umussu deg yizenqan n Zzayer tamaneɣt yal ass n lǧemɛa : « Xawa, Xawa ! » Yeɛni « Tagmat, tagmat : » Ihi argaz-a yemmut akken ad ilin yizerfan n umdan akken ma llan deg tmurt-is Zzayer, tuwi-d fell-awen ad d-trefdem akk tugna-ines, ad tettsuɣum s yisem-is, ad tessutrem ad ɛeddin deg ccraɛ wid yellan d ssebba n tmettant-is. Din ad amneɣ s wazal n tenfalit « Xawa, xawa » Tanfalit-nni nniḍen, « Ce n’est pas le moment » i tmaziɣt, ttum-tt diɣen acku dayen, tura kan i d lawan ad nɛiwed lsas i tmurt.
Ad fell-ak yeɛfu yerḥem yazen ssber i twacult-ik d warraw-ik i kra yellan d ameɣnas yumen s umennuɣ-ik. Ad d-teqqimeḍ d amedya n wid yeqqaren; » Ad nreẓ wala ad neknu ». Amẓabi irfed-d aqerruy-is…
« Xawa, xawa! »?