... Tin Hinan
Tagi d tukkist seg ungal-iw wis sin urɛad d-yeffiɣ.
D aydi i d allen-is
Tin Hinan
« Tizlatin ara wen-d-cnuɣ seg tura d tasawent inu, ama d aẓawan-nsent, ama d imeslayen-nsent, ssarameɣ ad awen-ɛeǧbent. Tanemmirt » Akka i asen-d-tenna nettat tetturar s snitra yiwet seg lmusiqat-ines.
Tizlit ara asen-d-tecnu urǧin i tt-id-tecna i walbaɛḍ, d taneggarut i d-tesnulfa. Aẓawan i as-tefka yerna akken i ilaq ɣef yimeslayen i d-yekkan seg tasa-s yettḥulfun mačči cwiṭ kan.Azwel i as-tefka d « Anda-kem a tafat ? ». Nnan-as i uderɣal d acu i tebɣiḍ ? Yenna-asen d tafat. Daɣnetta tizlit-a terza wid ur nettwali akked wid yettwalin ma bɣan ad d-rren ciṭ lwelhan-nsen ɣef wid yezgan ttidiren deg tillas.
?Anida-kem a tafat
?A tafat anda telliḍ
Kemm tettwaliḍ
Kra yellan tiṭ-im teẓra-t
A ṭṭlam fell-i mi d-teɣliḍ
Ass-iw terriḍ-t d iḍ
Tesnegreḍ fell-i tafat
Ddunit, sdat-i d lḥiḍ
Aderɣal yettɣiḍ
D taqnuẓt ur nesɛi tifrat
Ṭṭlam yedda-d d tlalit
Ussan berrikit
?Anda-t ubrid ay abrid
Aderɣal tafat tugi-t
Deg yini tɣull-it
Tillas ɣufrent-id deg lɛid
Tiderɣet ziɣ d tawaɣit
Asirem akk tedri-t
Yak tunef-as ad yettmeǧǧid
Win nḥemmel ur t-nettwali
Amzun ur yelli
Alama islef-as ufus
Ulac yewɛren am tikli
Tfukk tlelli
Ɣef win yecban amurḍus
D tarẓagant am yilili
Tudert n yisli
Ur nezmir ad yefsi i wagus
S ccna i d-rriɣ ttar
Asefru iqebber
Ayen i yi-iddan deg nnmara
Ɣas iɣunza-yi zher
D ddunit d amɛebber
Deg waman ṭṭbel ur s-briɣ ara
Issawen neɣ yesgesser
Abrid-iw yenǧer
Ma d nekk ɣer ɣur-i tefra.
Tizlit-a tessers-d yiwen n leḥzen d ameqqran deg tzeqqa akken ma tella ledɣa ɣer ddeqs n yimeɛdar, gar-asen wid ur nettwali, qqimen-d akk ɣer sdat. Tesru-ten-id d tirni.
S uslaf i tɛeqqel medden.