ⴰⴼⵍⵙⴰⴼ ⵉⴷⴳⴰⵕ ⵎⵓⵕⴰⵏ ⵉⵙⵙⵉⵎⵖⵓⵔ ⵙ ⵜⵙⵔⵜⵉⵜ ⵏ ⵓⵏⵏⵓⵕⵥⵎ ⵏⵏⴰ ⵜⵙⵙⵎⵔⴰⵙ ⵜⴳⵍⴷⵉⵜ ⵏ ⵍⵎⵖⵔⵉⴱ ⵎⵏⵉⴷ ⵜⴰⵎⵏⵥⴰⵡⵜ ⵜⴰⴼⵔⵉⵇⵉⵜ
ⵉⵙⵙⵉⵎⵖⵓⵔ ⵓⴼⵍⵙⴰⴼ ⴷ ⵓⵎⵙⵏⴰⵎⵓⵏ ⴰⴼⵕⴰⵏⵙⵉⵙ, ⵉⴷⴳⴰⵕ ⵎⵓⵕⴰⵏ, ⴰⵙⵙ ⵏ ⵓⵚⵉⴹⵢⴰⵙ, ⵙ ⵜⵙⵔⵜⵉⵜ ⵏ ⵓⵏⵏⵓⵕⵥⵎ ⵏⵏⴰ ⵜⵙⵙⵎⵔⵙ ⵜⴳⵍⴷⵉⵜ ⵎⴱⵉⴷ ⵏ ⵜⵎⵏⵥⴰⵡⵜ ⵜⴰⴼⵔⵉⵇⵉⵜ ⴳ ⵉⵙⵡⵉⵔⵏ ⴰⴽⴽⵯ.
ⵉⵏⵏⴰ ⵉⴷⴳⴰⵕ ⵎⵓⵕⴰⵏ ⵏⵏⴰ ⵉⴳⴰⵏ ⵉⵏⴱⴳⵉ ⵅⴼ ⵜⵙⴷⴷⵉⵜ ⵏ » ⵓⵎⵏⴰⵍⴰ ⴰⵎⵇⵇⵔⴰⵏ » ⵙⴳ ⵜⵙⵓⵜⵍⵜ ⵜⵉⵙ ⵙⵏⴰⵜ ⵏ ⵓⵏⵎⵓⴳⴳⴰⵔ ⵏ ⵎⵕⵕⴰⴽⵛ ⵉ ⵓⴷⵍⵉⵙ ⴰⴼⵔⵉⵇⵉ ⵏⵏⴰ ⵉⴹⴼⵕⵏ ⵉⵎⵓⵙⵙⵓⵜⵏ ⵏⵏⵙ ⴰⵔ ⴰⵙⵙ ⵏ ⵓⵙⴰⵎⴰⵙ, ⵎⴰⵙ ⴷ ⵍⵎⵖⵔⵉⴱ ⵉⵕⵥⵎ ⵉ » ⵜⵙⵏⵜⴰⵢⵜ ⴱⴰⵀⵔⴰ ⵉⴼⵓⵍⴽⵉⵏ ⵙⴳ ⴽⵔⴰ ⵏ ⵉⵙⴳⴳⵯⴰⵙⵏ ⵙ ⵓⵏⵏⵓⵕⵥⵎ ⵏⵏⵙ ⴰⵙⵔⵜⴰⵏ ⴷ ⵓⴷⴰⵎⵙⴰⵏ ⵅⴼ ⵜⵎⵏⵥⴰⵡⵜ ⵜⴰⴼⵔⵉⵇⵉⵜ ».
ⵉⵙⵎⴷ ⵓⴼⵍⵙⴰⴼ ⴰⴼⵕⴰⵏⵙⵉⵙ ⵎⵏⵉⴷ ⵏ ⵓⴳⴷⵓⴷ ⵏⵏⴰ ⵙ ⵉⴳⴳⵓⴷⵉ ⵓⵙⴰⵢⵔⴰⵔ ⵏ ⵡⴰⵎⵎⴰⵙ ⴰⴷⵍⵙⴰⵏ « ⵉⵜⵔⴰⵏ ⵏ ⵊⴰⵎⵄ ⵍⴼⵏⴰ » ⵏⵏⴰ ⵉⵙⴷⵍⵏ ⵉ ⵓⵎⵓⵙⵙⵓⵜⵏ ⵏ ⵓⵏⵎⵓⴳⴳⴰⵔ, ⵎⴰⵙ ⴷ ⵜⴰⵙⴳⴰ ⵜⴰⴷⵍⵙⴰⵏⵜ ⵓⵔ ⵜⴳⵉ ⵜⴰⵖⴰⵡⵙⴰ ⵜⴰⵏⵙⵎⴰⴷⵜ ⵎⴰⵛⴰ ⵖⵓⵔⵙ ⵢⴰⵏ ⵓⴷⵖⴰⵔ ⴰⴷⵙⵍⴰⵏ ⴳ ⵜⵣⴷⴰⵢⵉⵏ ⴳⵔ ⵍⵎⵖⵔⵉⴱ ⴷ ⵉⵡⴰⵏⴽⵏ ⵏ ⵜⵎⵏⵥⴰⵡⵜ.
ⵉⵙⵙⵉⵙⴼⵉⵡ ⵉⴷⴳⴰⵕ ⵎⵓⵕⴰⵏ ⵎⴰⵙ ⴰⵏⵎⵓⵇⵇⴰⵔ ⵏ ⵎⵕⵕⴰⴽⵛ ⵏ ⵓⴷⵍⵉⵙ ⴰⴼⵔⵉⵇⵉ ⵉⴽⵛⵎ ⵙ ⵜⵓⵥⵍⴰⵢⵜ ⴳ ⵓⵙⴰⵜⵉ ⵏ ⵜⵙⵔⵜⵉⵜ ⴰⴷ ⴷ ⵓⵏⵏⵓⵕⵥⵎ ⴰⴷ ⴰⴷⵍⵙⴰⵏ ⵏ ⵜⴳⵍⴷⵉⵜ, ⵉⵙⵎⴷ ⵢⵉⵏⵉ » ⵓⵎⵎⵔⵖ ⴱⴰⵀⵔⴰ ⵙ ⵜⵙⵔⵜⵉⵜ ⴰⴷ ⵜⴰⵎⵖⵔⵉⴱⵉⵜ ».
ⵎⴽⵍⵍⵉ ⵉⵙⴰⵡⵍ ⵓⴼⵍⵙⴰⴼ ⴰⴼⵕⴰⵏⵙⵉⵙ, ⵏⵏⴰ ⵉⵣⵣⵔⵉⵏ ⵜⵉⵎⵉⴹⵉ ⵏ ⵓⵙⴳⴳⵯⴰⵙ, ⵅⴼ ⵜⵓⵎⵔⵜ ⵏⵏⵙ ⵍⵍⵉⵖ ⵉⵍⵍⴰ ⴳ ⵎⵕⵕⴰⴽⵛ, ⴰⴷ ⵉⵎⵎⴰⴳⴳⴰⵔ ⴷ ⵓⴳⴷⵓⴷ ⴰⵎⵖⵔⵉⴱⵉ ⴷ ⵓⴼⵔⵉⵇⵉ, ⵢⵉⵏⵉ: » ⴰⴷ ⵜⴷⴷⵔ ⵜⴼⵔⵉⵇⵜ, ⴰⴷ ⵉⴷⴷⵔ ⵍⵎⵖⵔⵉⴱ ».
ⵉⴳ ⵓⵏⵎⵓⵇⵇⴰⵔ ⴰⴷ ⵏⵏⴰ ⵓⵜⵜⵓⵙⵏⵎⴰⵍⴰⵏ ⴷⴷⵓ ⵜⵎⴰⵜⴰⵔⵜ » ⵉⴷⴳⴰⵕ ⵎⵓⵕⴰⵏ, ⵉⵏⵉⴳⵉ ⵅⴼ ⵙⵏⴰⵜ ⵜⴰⵙⵓⵜⵉⵏ ⵏ ⵓⵣⵎⵣ, ⴷ ⵜⴱⵓⵚⵓⵍⵜ ⵏ ⵓⵣⵎⵣ ⵏⵏⵖ ⵏ ⵖⵉⵍ ⴰⴷ », ⵢⴰⵏ ⵓⵣⵎⵣⵣⵓ ⵏ ⵓⴱⴷⴰⵔ ⵏ ⵉⵎⵏⴰⴷⵏ ⵏ ⵓⴼⵍⵙⴰⴼ ⴰⴷ ⴷ ⵓⵎⵙⵏⴰⵎⵓⵏ ⴰⴼⵕⴰⵏⵙⵉⵙ ⵙⴳ ⵜⵓⴳⵜⵜ ⵏ ⵜⵎⵙⴰⵔⵉⵏ ⵏ ⵖⵉⵍ ⴰⴷ, ⵖ ⵏⵉⵜ ⵍⵍⴰⵏⵜ ⵜⵣⴷⴰⵢⵉⵏ ⴳⵔ ⵉⵥⵥⵍⵎⴹ ⴷ ⵢⵉⴼⴼⵓⵙ, ⴳ ⵜⴰⵎⴰ ⵏ ⵜⵣⴷⴰⵢⵜ ⵉⵥⵍⵉⵏ ⵏⵏⴰ ⵜ ⵉⵙⵎⵎⵓⵏ ⴷ ⵜⵎⵏⵥⴰⵡⵜ ⵜⴰⴼⵔⵉⵇⵉⵜ.
ⵎⴽⵍⵍⵉ ⵉⴳⴰ ⵓⵏⵎⵓⵇⵇⴰⵔ ⴰⴷ ⵢⴰⵏ ⵓⵣⵎⵣⵣⵓ ⵏ ⵓⵙⴼⵓⴳⵍⵓ ⵙ ⵉⴷⴳⴰⵕ ⵎⵓⵕⴰⵏ ⵙⴳ ⵜⵓⴳⴼⴰ ⴼⵍⵍⴰⵙ ⵓⵜⵜⵓⴼⴽⴰⵏ, ⵉⵙⵙⵎⵏⵉⴷ ⵜⵏⵜ ⵙ ⵜⵓⵥⵍⴰⵢⵜ, ⴽⵓ ⵙⴳ ⵓⴼⵍⵙⴰⴼ ⴰⵙⵉⵏⵉⴳⴰⵍ, ⵙⵓⵍⴰⵢⵎⵣⵏ ⴱⴰⵛⵉⵔ ⴷⴰⵢⴰⵏ, ⴷ ⵓⵎⴰⵔⴰ ⴷ ⵓⵎⵔⵣⵓ ⴰⵎⵖⵔⵉⴱⵉ, ⵄⵍⵉ ⴱⵏ ⵎⵅⵍⵓⴼ, ⴷ ⵓⵏⵖⵍⴰⴼ ⴰⵎⴰⵜⴰⵢ ⵏ ⵓⵏⵎⵓⴳⴳⴰⵔ ⵏ ⵎⵕⵕⴰⴽⵛ ⵉ ⵓⴷⵍⵉⵙ ⴰⴼⵔⵉⵇⵉ, ⵢⵓⵏⵙ ⴰⵊⵔⴰⵢ.
ⵉⵡⴰⵜⵜⵙ ⵓⵏⵎⵓⴳⴳⴰⵔ ⵏ ⵎⵕⵕⴰⴽⵛ ⵉ ⵓⴷⵍⵉⵙ ⴰⴼⵔⵉⵇⵉ, ⵏⵏⴰ ⵜⵙⵏⵎⴰⵍⴰ ⵜⵎⵙⵎⵓⵏⵜ » ⵏⴽⴽⵯⵏⵉ ⴷ ⵜⴰⵥⵓⵕⵉ ⵏ ⵜⴼⵔⵉⵇⵜ » (We Art Africains ) ⴰⵙⴼⵓⴳⵍⵓ ⵙ ⵜⵙⴽⵍⴰ ⴷ ⵜⴷⵍⵙⴰ ⵜⴰⴼⵔⵉⵇⵉⵜ, ⴷ ⵜⵡⴰⵥⵉⵜ ⵏ ⵜⴷⵍⵙⴰ ⴷ ⵜⵥⵓⵕⵉ ⵙⴳ ⵓⴳⴷⵓⴷ.
ⵢⵓⵎⴰ ⵓⵎⵓⵙⵙⵓ ⴰⴷ, ⵏⵏⴰ ⵢⴰⴽⴽⴰⵏ ⵉ ⵓⴷⵍⵉⵙ ⴷ ⵓⴳⴷⵓⴷ ⴰⵣⵎⵣⵣⵓ ⴰⴷ ⵎⵎⵉⴳⴳⵉⵔⵏ ⴳ ⵜⵡⵉⵍⴰⵜⵉⵏ ⴷ ⵉⵏⵎⵓⵇⵇⴰⵔⵏ ⵉⵎⵢⴰⵏⵏⴰⵡⵏ ⵉⴽⵓⵢⴰⵙⵏ, ⵉⴼⵙⴰⵔⵏ ⵏ ⵓⵥⴰⵡⴰⵏ ⴷ ⵜⵖⵓⵔⵉⵡⵉⵏ ⴷ ⵜⵎⴷⵢⴰⵣⵜ. ⵎⴽⵍⵍⵉ ⵉⵙⴷⵉⴽⵏ ⵡⴰⵀⵉⵍ ⵏ ⵜⵙⵓⵜⵍⵜ ⵅⴼ ⵜⵎⴰⵢⵏⵓⵜⵉⵏ ⵜⵉⵎⴰⵙⵙⴰⵏⵉⵏ ⴷ ⵜⵙⴽⵍⴰⵏⵉⵏ ⵏ ⵜⴼⵔⵉⵇⵜ, ⴷ ⵜⵥⵍⵉ ⵢⴰⵏ ⵓⴷⵖⴰⵔ ⵉⵅⴰⵜⵔⵏ ⵏ ⵡⴰⵍⴰⵙ ⵏ ⵓⵙⵎⵓⵙⵙⵓ ⴷ ⵓⵙⴷⵓⵙ ⵏ ⵜⵎⴽⵜⵉⵜ ⴷ ⵉⵙⵖⵡⴰⵏ ⵏⵏⴰ ⵉⵙⵎⵓⵏⵏ ⴳⵔ ⵉⴼⵔⵉⵇⵉⵢⵏ ⴰⴽⴽⵯ ⵉⵏⵏⴰ ⴳ ⵍⵍⴰⵏ.
ⴰⵙⵓⵖⵍ: ⵄⴱⴷⵍⵡⵣⵃⴷ ⴱⵓⵜⴱⴰⵖⴰ