ⴰⵎⵢⴰⵡⴰⴹ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵅⴼ ⴰⴹⴼⴼⵓⵕ ⵏ ⵓⵙⵎⴽⵍ ⴰⵖⵎⵙⴰⵏ ⴰⵙⵍⵉⵥⵕ ⵉ ⵓⵏⴷⵓⴷⵉ ⵏ ⵍⵃⵓⵣ
ⴰⴹⴼⴼⵓⵕ ⵏ ⵓⵙⵎⴽⵍ ⴰⵖⵎⵙⴰⵏ ⴰⵙⵍⵉⵥⵕ ⵉ ⵓⵏⴷⵓⴷⵉ ⵏ ⵍⵃⵓⵣ
ⴰⴳⵔⴰⵡ ⴰⵎⴰⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵜⵜⵡⵚⵚⴰ ⵙ ⵓⵙⴷⵓⵙ ⵏ ⵉⵎⵄⵉⵏⵏ ⵉ ⵓⴹⴰⴽⴰⵍ ⵏ ⵓⵣⵔⴼ ⵏ ⵓⵏⵎⵓⵔⵉ ⴳ ⵓⵙⵏⵖⵎⵙ ⵏ ⵜⵎⵢⴰⵎⴰⵏⵜ
ⵉⵡⵏⴰⵏ ⵏ ⵓⵎⵙⴰⴳⴰⵔ ⵏ ⵡⴰⵙⵙ ⵏ 21 ⵛⵜⴰⵎⴱⵉⵔ 2°23, ⵉⵖⵜⵙ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴷ ⵉⵙⵙⴼⵔⵓ ⵉ ⵓⴳⴷⵓⴷ ⵅⴼ ⴽⵉⴳⴰⵏ ⵏ ⵡⴰⵏⵏⴰⵢⵏ ⴷ ⵉⵙⵉⵜⴳⵏ ⵉⵣⴷⵉⵏ ⵙ ⵓⵙⵎⴽⵍ ⴰⵖⵎⵙⴰⵏ ⵏⵏⴰ ⵥⵍⵉⵏⵜ ⵜⵏⵣⵡⴰⵢⵉⵏ ⴷ ⵉⴷⴰⴱⵓⵜⵏ ⵉⵜⵍⴼⴰⵣⵏ ⵉⵏⴰⵎⵓⵔⵏ, ⵉⴳⴷⵓⴷⴰⵏⵏ ⴷ ⵡⵓⵙⵍⵉⴳⵏ, ⵉ ⵓⵏⴷⵓⴷⵉ ⵏⵏⴰ ⵉⵡⵜⴰⵏ ⵉⴹ ⵏ ⵓⵙⵉⵎⵡⴰⵙ 08 ⵛⵜⴰⵎⴱⵉⵔ 2023 ⵜⴰⵎⵏⴰⴹⵜ ⵏ ⵍⵃⵓⵣ. ⵚⴽⴰⵏⵜ ⵜⴰⵏⵏⴰⵢⵉⵏ ⴰⴷ ⵅⴼ ⵜⵡⵓⵔⵉ ⵉⵥⵍⵉⵏ ⵙ ⵡⴰⴳⴳⴰⵢ ⵅⴼ 21 ⵏ ⵜⵏⵣⵡⴰⵢⵉⵏ ⴷ 5 ⵏ ⵜⴷⴰⴱⵓⵜⵉⵏ ⵜⵉⵜⵍⴼⴰⵣⵉⵏ ⴳ ⵓⵎⵏⴰⴹ ⵏ ⵜⵡⴰⵖⵉⵜ ⵜⴰⴳⴰⵎⴰⵏⵜ, ⵔⵏⵓ ⴰⵙ ⵜⵉⵎⵥⵍⵉⵢⵉⵏ ⵏ ⵜⵓⵎⴰⵢⵉⵏ ⵜⵉⵏⵣⵡⴰⵢⵉⵏ ⴷ ⵜⴻⵜⵍⴼⴰⵣⵉⵏ ⵉⵜⵜⵓⵡⴰⵍⴰⵏ ⵉ ⵓⴹⴼⴼⵓⵕ ⵏ ⵓⵣⵣⵉⴳⵣ ⵏ ⵡⴰⴷⴷⴰⴷ ⴳ ⵓⴱⴰⵔⴰⵣ ⴷ ⵜⵙⴳⴳⵯⵉⵏ ⵉⵣⴷⵉⵏ ⴰⴽⴽⵯ ⵙ ⵜⵡⴰⵖⵉⵜ ⴰⴷ.
ⵙ ⵓⵢⴰⴷ, ⵉⵣⵎⵎⴻⵎ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴽⵉⴳⴰⵏ ⵏ ⵉⴼⵔⴷⵉⵙⵏ ⵉⵏⵎⵎⴰⵍⵏ, ⴳⵔ ⴰⵙⵏ :
ⵜⴰⵏⴰⵎⵉⵜ ⵙ ⵓⵖⵉⵡⵍ ⵏ ⵉⵖⴰⵡⴰⵙⵏ ⵉⵎⴰⵜⴰⵢⵏ ⴷ ⵓⵙⵎⵓⵙⵙⵓ ⵏ ⵉⵙⴰⴳⵎⵏ ⵉⵏⴼⴳⴰⵏⵏ ⴷ ⵉⵍⵓⵊⵉⵙⵜⵉⴽⵉⵢⵏ
ⵉⵜⵜⵓⵣⵎⵎⴻⵎ ⵙ ⵓⵎⴰⵜⴰ ⵢⴰⵏ ⵓⵙⵎⵓⵙⵙⵓ ⴰⵅⴰⵜⴰⵔ ⵏ ⵉⵖⴰⵡⴰⵙⵏ ⵉⵎⵖⵉⵡⵍⵏ ⵎⵇⵇⴰⵔ ⵙⵙⵏⵜⵉⵏⵜ ⴳ ⵉⵣⵎⵣⵏ ⵉⵎⵣⴰⵔⴰⵢⵏ ⵅⴼ ⵜⵉⵜⵉ ⵏ ⵓⵏⴷⵓⴷⵉ ⵏ ⵡⴰⴽⴰⵍ ; ⵍⵍⵉⴳ ⵙⵙⵏⵜⵉⵏⵜ ⵉⵜⵙ ⵏ ⵜⵏⵣⵡⴰⵢⵉⵏ ⵜⵓⵙⵍⵉⴳⵉⵏ ⴰⵙⵎⵏⵉⴷ ⵏ ⵓⵏⵖⵎⵉⵙ ⴷ ⵓⵙⵏⴼⵍ ⵏ ⵓⵙⴳⵓⵎ ⵏ ⵓⵖⴰⵡⴰⵙ ⵏⵏⴰ ⵍⵍⴰⵏⵜ ⴷⴰ ⵣⵣⵔⴰⵢⵏⵜ ⴰⴼⴰⴷ ⴰⴷ ⵙⴰⵡⵍⵏⵜ ⵅⴼ ⵜⵡⴰⵖⵉⵜ, ⵍⵓⵎⴰⵔ ⵙ ⵓⴱⵔⵉⴷ ⵏ ⵜⵏⴰⴳⴰⵜⵉⵏ ⴳ ⵉⴼⵉⵍⵉ ⴷ ⵓⵙⵇⵙⵉ ⵏ ⵉⵏⵎⵓⵔⵉⵏ. ⴷⴼⴼⵉⵔ ⴰⵢⴰ, ⴹⴼⴰⵕⵏⵜ ⵜⵏⵣⵡⴰⵢⵉⵏ ⴰⴷ ⴷ ⵜⴷⴰⴱⵓⵜⵉⵏ ⵜⵉⵜⵍⴼⴰⵣⵉⵏ ⵉⵏⵖⵎⵉⵙⵏ ⵙ ⵓⴱⵔⵉⴷ ⵓⵙⵡⴰⵍⴰ ⵏ ⵉⵖⴰⵡⴰⵙⵏ ⵉⵎⴰⵜⴰⵢⵏ ⴷ ⵓⵙⵎⵓⵙⵙⵓ ⴰⵏⴼⴳⴰⵏ ⴷ ⵓⵍⵓⵊⵉⵙⵜⵉⴽ, ⴷ ⵓⵣⵎⵎⴻⵎ ⵏ ⵜⵣⵎⵎⴰⵔ ⵏ ⵜⵏⴼⵔⵓⵜ ⵏ ⵓⵙⵎⵣⴷⴰⵢ ⴳ ⵓⴱⴰⵔⴰⵣ ⴷ ⵉⵖⴰⵡⴰⵙⵏ ⴳⵔ ⵜⴷⴰⴱⵓⵜⵉⵏ ⵏ ⵓⵙⵏⵖⵎⵙ ⴰⴳⴷⵓⴷⴰⵏ, ⴰⴼⴰⴷ ⴰⴷ ⵉⵖⵉⵢⵏ ⵉ ⵓⵎⵏⴰⴹ ⵏ ⵜⵡⴰⵖⵉⵜ ⴰⴷ ⵜⴰⴳⴰⵎⴰⵏⵜ; ⵍⵍⵉⴳ ⵙⵙⵉⴷⴼⵏⵜ ⵜⵉⴳⵣⵣⵓⵎⵉⵏ ⵜⵉⵙⵏⵖⵎⴰⵙⵉⵏ ⵜⵉⵎⴰⵢⵏⵓⵜⵉⵏ ⴷ ⵉⵖⴰⵡⴰⵙⵏ ⵉⵜⵔⴰⵔⵏ ⵏ ⵓⵎⵙⴰⵡⴰⵍ, ⴷ ⵓⵙⵎⵙⴰⵙⴰ ⵏ ⵜⵓⵎⴰⵢⵉⵏ ⵏ ⵉⵖⴰⵡⴰⵙⵏ ⵉⵎⵢⵓⵔⵏ ⴰⴼⴰⴷ ⴰⴷ ⴰⵡⴹⵏ ⵙⵉⵏ ⵉⵡⵜⵜⴰⵙⵏ ⵉⵎⵎⵣⴷⴰⵢⵏ, ⵢⴰⵏ ⴷⵉⴳⵙⵏ ⵉⴳⴰ ⴰⵙⵉⵡⴹ ⵏ ⵉⵙⴼⴽⴰ ⵅⴼ ⵓⵏⴷⵓⴷⵉ ⵉ ⵉⵏⵎⵓⵔⵉⵏ ⵙ ⵓⵖⵉⵡⵍ, ⵡⵉⵙⵙ ⵙⵉⵏ ⵉⴳⴰ ⵜⴰⵏⴼⵔⵓⵜ ⵏ ⵡⴰⴷⴰⴼ ⵏ ⵜⴰⵏⵏⴰⵢⵜ ⵜⴰⵎⴰⵜⴰⵢⵜ ⵖⵔ ⵓⵎⵙⴳⴷⴰⵍ ⴰⴳⴷⵓⴷⴰⵏ ⴷ ⵓⵙⵙⴼⵙⵉ ⵏ ⵉⵎⵓⵣⴰⵢ ⵉ ⵜⵖⵎⵔⵉⵏ ⴰⴽⴽⵯ ⵏ ⵜⵡⴰⵖⵉⵜ ⵜⴰⴳⴰⵎⴰⵏⵜ ⴷ ⵜⵣⵎⵎⴰⵔ ⵏ ⵓⵙⵡⵓⴷⴷⵓ ⵏⵏⵙ. ⵉⵜⵜⵓⵣⵎⵎⴻⵎ ⴷⵉⵖ ⵓⵍⵜⴰⵖ ⵏ ⵜⵏⵣⵡⴰⵢⵉⵏ ⴷ ⵜⴷⴰⴱⵓⵜⵉⵏ ⵜⵉⵜⵍⴼⴰⵣⵉⵏ ⴳ ⵓⴹⴼⴼⵓⵕ ⵏ ⵓⵣⵎⵣ ⵏ ⵓⴼⵛⴰⴷ ⴰⵏⴰⵎⵓⵔ ⵙ ⵓⵙⵎⵏⵉⴷ ⵏ ⵉⵖⴰⵡⴰⵙⵏ ⵉⵎⵙⴰⵙⴰⵏ ⴷ ⵜⵎⵥⵍⵉⵢⵉⵏ ⵏ ⵓⵣⵎⵣ ⴰⴷ, ⵢⵉⵡⴹ ⵓⵙⵎⵓⵙⵙⵓ ⴰⵖⵎⵙⴰⵏ ⵉⵣⴷⵉⵏ ⵙ ⵓⵢⴰⴷ ⵏⵏⴰ ⵥⵍⵉⵏⵜ ⵜⵏⵣⵡⴰⵢⵉⵏ ⴷ ⵜⴷⴰⴱⵓⵜⵉⵏ ⵜⵉⵜⵍⴼⴰⵣⵉⵏ ⵙⴳ ⵎⴰ ⵉⵍⵍⴰ ⵓⵏⴷⵓⴷⵉ ⴰⵔ ⵜⵉⴳⵉⵔⴰ ⵏ ⵓⵣⵎⵣ ⵏ ⵓⴼⵛⴰⴷ ⴳⵔ 75% ⴷ 95% ⵙⴳ ⵉⵖⴰⵡⴰⵙⵏ ⵉⵎⴰⵜⴰⵢⵏ ⵙ ⵡⴰⵏⴰⵡ ⵏ ⴽⵓ ⵜⵏⴰⴼⵓⵜ ⵜⴰⵙⵍⵉⵥⵕⵜ.
ⵜⵓⴽⴽⵉ ⵏ ⵜⵏⴰⴼⵓⵜ ⵜⴰⵖⵎⵙⴰⵏⵜ ⵉⵍⴰⵏ ⵜⵉⴷⵜ ⴷ ⵡⵓⵎⵓ ⴳ ⵓⵙⴱⴷⴷⵉ ⵏ ⵉⵏⵖⵎⵉⵙⵏ ⵏ ⵜⴽⵔⴽⴰⵙ
ⵢⴰⵎⵓ ⵢⵉⵍⵉ ⴳ ⵓⴱⴰⵔⴰⵣ ⵏ ⴽⵉⴳⴰⵏ ⵏ ⵉⵎⴰⵣⴰⵏⵏ ⵏ ⵜⵏⵣⵡⴰⵢⵉⵏ ⴷ ⵜⴷⴰⴱⵓⵜⵉⵏ ⵜⵉⵜⵍⴼⴰⵣⵉⵏ, ⵜⵉⴳⴷⵓⴷⴰⵏⵉⵏ ⴷ ⵜⵓⵙⵍⵉⴳⵉⵏ, ⵎⵇⵇⴰⵔ ⴳ ⵉⵙⵡⵉⵔⵏ ⵉⵎⵣⴰⵔⴰⵢⵏ, ⴳ ⵜⵍⵖⴰ ⴷ ⵜⵓⵎⴰⵢⵜ, ⵜⴰⵙⴳⴰ ⵏ ⵡⴰⵜⵜⴰⴳ ⵏⵏⵙⵏⵜ ⵅⴼ ⵉⵙⴰⴳⴰⵎⵏ ⵏ ⵜⵉⴷⵜ ⴳ ⵢⵉⴳⵎ ⵏ ⵓⵏⵖⵎⵉⵙ ⵓⵏⵖⵉⴷ (ⵉⴳⵏⵙⴰⵙⵏ ⵏ ⵉⴳⵔⴰⵡⵏ ⵏ ⵓⵙⵓⵊⵉ ⴷ ⵉⴳⵔⴰⵡⵏ ⵏ ⵓⵙⵙⵏⵊⵎ, ⴳⴰⵏⵜ ⵉⴳⵔⴰⵡⵏ ⵏ ⴱⵕⵕⴰ ⴷ ⵉⴷⴷⴰⵏ ⴰⴷ ⴰⵡⵙⵏⵜ ⵏⵖ ⵜⵉⵏⴰⴼⵓⵜⵉⵏ ⵏ ⵜⵏⴼⵔⵓⵜ ⴷ ⵉⵙⵔⴷⴰⵙⵏ ⴷ ⵉⵎⴰⵙⴰⵢⵏ ⵉⵏⴰⴱⴰⴹⵏ ⴷ ⵉⴳⵏⵙⴰⵙⵏ ⵏ ⵜⵏⴱⴰⴹⵜ ⵜⴰⴷⵖⵔⴰⵏⵜ…), ⴳ ⵜⵏⴼⵔⵓⵜ ⵏ ⵓⵣⵔⴼ ⵏ ⵓⵏⵎⵓⵔⵉ ⴳ ⵓⵏⵖⵎⵉⵙ ⴰⵎⵙⵏⵜⴰⵎ. ⴰⵢⴰ ⵉⵥⵕⴰ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⵉⴳⴰ ⵜⴰⵎⴷⵔⴰⵡⵜ ⵜⴰⵥⵓⵕⴰⵏⵜ ⴳ ⵓⴼⵔⴰⴳ ⵏ ⵓⵣⵔⴼ ⴰⴷ ⵉⵍⴰⵏ ⴰⵜⵉⴳ ⴰⴷⵓⵙⵜⵓⵔⵉ ⴷ ⵓⵖⴰⵔⴰⵏ ⵏⵏⴰ ⵙ ⵜⵎⵢⵓⵔⵜ ⴷⴰ ⵉⵜⵜⵓⵙⵙⵍⴽⴰ ⴳ ⵉⵎⵏⴰⴹⵏ ⵉⵔⵡⴰⵙⵏ ⴳ ⵜⵍⵍⴰ ⴽⵉⴳⴰⵏ ⵏ ⵜⴰⵙⵙⴰⵙⵜ ⵜⴰⵙⵉⴽⵓⵍⵓⵊⵉⵜ ⵉⵣⴷⵉⵏ ⵙ ⵓⴳⴰⵎⴰ ⵏ ⵜⵡⴰⵖⵉⵜ ⴰⵔ ⵜⵜⴰⵡⵉ ⵖⵔ ⵜⴰⵔⵡⴰ ⵏ ⴽⵉⴳⴰⵏ ⵏ ⵜⵏⴼⵓⵙⵉⵏ ⴷ ⵉⵏⵖⵎⵉⵙⵏ ⵓⵔ ⵉⵍⵉⵏ ⵜⵉⴷⵜ.
ⵢⵓⴽⵣ ⴷⵉⵖ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⵜⴰⵏⴰⴼⵓⵜ ⵜⴰⵙⵖⵎⴰⵙⵜ ⵉⵍⴰⵏ ⵜⵉⴷⵜ ⵢⴰⵎⵓ ⴳ ⵓⵙⵎⵓⵙⵙ ⵏ ⵜⵉⵏⴰⵡⵜ ⵏ ⵓⴼⴰⵔⴰ ⵏⵏⴰ ⵙ ⵓⵎⵏⵏ ⴰⴽⴽⵯ ⵎⴷⴷⵏ ⵏ ⵓⵎⴰⴹⴰⵍ ⴳ ⵓⵣⵎⵣ ⵏ ⵜⴰⵙⵙⴰⵙⵉⵏ ⴷ ⵜⵡⴰⵖⵉⵜⵉⵏ, ⵍⵍⵉⴳ ⵓⵜⴳⵏⵜ ⵜⵏⵣⵡⴰⵢⵉⵏ ⴷ ⵜⴷⴰⴱⵓⵜⵉⵏ ⵜⵉⵜⵍⴼⴰⵣⵉⵏ ⵅⴼ ⵜⵎⵢⴰⴷⴰⵙⵜ ⵏ ⵓⵎⵢⴰⵡⴰⴹ ⴷ ⵓⵙⵙⵎⵓⵙⵙⵓ ⴰⵡⵏⴳⵉⵎ ⵓⵡⵀⵉⵏ, ⵓⵜⴳⵏⵜ ⵅⴼ ⵜⴰⵏⵏⴰⵢⵉⵏ ⵏ ⵉⵎⴰⵙⴰⵢⵏ ⴷ ⵉⵎⵓⵣⴰⵢ ⴳ ⵢⵉⴳⵔⴰⵏ ⵏ ⵜⵊⵉⵢⵓⴼⵉⵣⵉⴽⵜ ⴷ ⵓⵙⵙⵓⵊⵉ ⴰⵡⵏⴳⵉⵎ ⴷ ⵜⵖⴰⵡⵙⵉⵡⵉⵏ ⵏ ⵓⵙⴳⵎⵉ ⴷ ⵜⵓⵙⵙⵏⴰ ⵏ ⵉⵣⵔⴼⴰⵏ ⴷ ⵡⴰⵎⵓⵏ… ⴰⴼⴰⴷ ⴰⴷ ⵙⵙⵉⴽⵣⵏ ⵉ ⵎⴷⴷⵏ ⵉⵙⴽⴽⵉⵏⵏ ⵉⵣⴷⵉⵏ ⵙ ⵓⵏⴷⵓⴷⵉ ⴷ ⵓⵢⵏⵏⴰ ⴷ ⵉⵜⵜⴰⴷⵊⴰ, ⵔⵏⵓ ⵉⵔⵓⴱⵓⵕⵟⴰⵊⵏ ⴳ ⵓⴱⴰⵔⴰⵣ ⵅⴼ ⵉⵎⵥⵕⵉ ⵏ ⵜⵓⵖⴰⵍⵉⵏ ⵖⵔ ⵜⵓⴷⵔⵜ ⵜⴰⴳⴰⵎⴰⵏⵜ (ⵜⴰⵣⴷⵓⵖⵜ, ⵜⴰⵖⵓⵔⵉ, ⴰⵙⵙⵓⵊⵉ, ⵎⵙⵖⵉⵡⵜ, ⵜⵓⵚⴽⴰ ⵏ ⵉⴱⵔⴷⴰⵏ ⴳ ⵉⴷⵔⴰⵔⵏ…) ⴳ ⵓⵡⵜⵜⴰⵙ ⵏ ⵓⵙⵙⴼⵙⵉⵙ ⵏ ⵉⴷⵔⵉⵣⵏ ⵏ ⵜⴰⵡⴷⴰ ⴷ ⵓⴱⵀⴰⴹ.
ⵜⵣⵎⵎⴰⵔ ⵜⵉⵙⵏⵖⵎⴰⵙⵉⵏ ⵜⵉⴱⴰⵔⴰⵣⵉⵏ, ⴷ ⵜⵉⴹⴰⴼ ⵏ ⵜⵓⴽⴽⵉ ⵏ ⵉⵏⵖⵎⵉⵙⵏ ⵏ ⵜⵉⴷⵜ ⴷ ⵡⴰⵜⵜⴰⴳ ⵅⴼ ⵉⵙⴰⴳⵎⵏ ⵏ ⵜⵉⴷⵜ ⵉⵥⵍⵉⵏ ⴳⴰⵏ ⵜⴰⵖⴰⵔⴰⵙⵜ ⵏ ⵜⵎⴷⵔⴰⵡⵜ ⴳ ⵓⵙⵙⴷⵔⵙ ⵏ ⵓⵏⴰⵖⵉⵣ ⵏ ⵉⵏⵖⵎⵉⵙⵏ ⵏ ⵜⴽⵔⴽⴰⵙ ⴷ ⵓⵙⵙⴽⵏⴷ ⵏⵏⴰ ⵉⴳⴳⵓⵜⵏ (ⴰⵙⵏⵉⵎⴰⵍ ⵏ ⵓⵏⵣⵡⵉ, ⴰⵙⵏⵉⵎⴰⵍ ⵏ ⵜⵡⴰⵖⵉⵜⵉⵏ ⵣⵓⵏ ⵜⵙⵓⵏⴰⵎⵉ, ⵉⵏⵖⵎⵉⵙⵏ ⵏ ⵜⴽⵔⴽⴰⵙ ⵅⴼ ⵓⵙⵏⵓⵃⵢⵓ ⵏ ⵜⵎⵏⴰⴹⵉⵏ ⵙⴳ ⵜⵣⵎⵎⴰⵔ ⵏ ⵓⵙⵙⵏⵊⵎ, ⵉⵏⵖⵎⵉⵙⵏ ⵏ ⵜⴽⵔⴽⴰⵙ ⵅⴼ ⵉⴼⵅⵙⴰ ⴳ ⵡⵓⴳⴳⵓⴳ ⵏ ⵜⵎⵏⴰⴹⵜ ⵏ ⵍⵃⵓⵣ…). ⵢⵓⴹⴼ ⴷⵉⵖ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵎⵙⴳⵔⴰⵡ ⵏⵏⵙ ⵅⴼ ⵓⵙⵉⵜⴳ ⵏ ⵡⴰⴷⴰⴼ ⵓⵙⵔⵉⴷ ⵏ ⵜⵏⵣⵡⴰⵢⵉⵏ ⴷ ⵜⴷⴰⴱⵓⵜⵉⵏ ⵜⵉⵜⵍⴼⴰⵣⵉⵏ ⴳ ⵜⵉⴹⴰⴼ ⴷ ⵓⴹⴼⴼⵓⵕ ⵓⵏⵖⵉⴷ ⴷ ⵓⵙⵙⴼⵙⵉ ⵏ ⵓⵢⵏⵏⴰ ⵉⵜⵜⵓⵢⵉⵏⵉⵏ ⵓⵔ ⵉⴳⵉⵏ ⵜⵉⴷⵜ ⵉⴳⴰ ⵖⴰⵙ ⵜⴰⴽⵏⴷⴰⵡⵜ ⵙ ⵜⵖⴱⵉ ⴰⵔ ⴰⴼⵍⵍⴰ, ⴰⵢⵏⵏⴰ ⵉⴳⴰⵏ ⵜⴰⵍⵍⴰⵙⵉⵏ ⵏ ⵜⴽⵏⴷⴰⵡⵜ ⵏⵏⴰ ⴷ ⵉⵡⵉⵏ ⴽⵔⴰ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⵏ ⴱⵕⵕⴰ ⴷ ⵜⵎⵥⵕⵉⵜ ⵏ ⵓⴷⵉⴷⴰ ⴳ ⵉⵏⵖⵎⵉⵙⵏ ⵏⵏⴰ ⴷⴰ ⵙⵙⴽⴰⵔⵏ ⵉⵥⴹⵡⴰⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ. ⵉⵥⵕⴰ ⴷⵉⵖ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⵜⵉⵣⵎⵎⴰⵔ ⴰⴷ ⵉⵇⵇⴰⵏ ⵏ ⴰⴷ ⵜⵏⵜ ⵜⵙⵎⵎⵖⵓⵔ ⴰⵛⴽⵓ ⵜⵉⵏⵣⵡⴰⵢⵉⵏ ⴷ ⵜⴷⴰⴱⵓⵜⵉⵏ ⴷⴰ ⵙⴱⴰⴷⴰⴷⵏⵜ ⵜⵉⴽⵔⴽⴰⵙ ⴷ ⵓⵙⵙⴽⵏⴷ ⴷ ⴽⵍⵍⵅ ⵓⵔ ⴷ ⵖⴰⵙ ⵙ ⵓⵅⵍⵍⴻⵍ ⴷ ⵓⵏⴽⴰⴹ ⵎⴰⵛⴰ ⵙ ⵓⴱⵔⵉⴷ ⵏ ⵓⵙⵢⴰⴼⵓ ⴷ ⵓⵙⵎⵏⵉⴷ ⵏ ⵜⵓⵎⴰⵢⵜ ⵜⴰⵖⵎⵙⴰⵏⵜ ⵢⴰⴹⵏ, ⵜⵉⵏ ⵜⵉⴷⵜ, ⵜⵏⵏⴰ ⵉⵙⵡⵓⵔⵉⵏ ⵜⵎⵢⴰⴷⴰⵙⵜ ⵜⴰⵏⴼⴳⴰⵏⵜ ⵜⴰⴷⵍⵙⴰⵏⵜ ⴰⵔ ⵉⵜⵜⴰⵜⴳ ⵅⴼ ⵓⴱⴰⵔⴰⵣ ⴰⵔ ⵉⵜⵜⵣⵔⴰⴽ ⵜⵉⵖⴰⵔⵉⵡⵉⵏ ⵏ ⵜⵡⵓⵔⵉ ⵜⴰⵣⵣⵓⵍⴰⵏⵜ.
ⵜⴰⵎⴷⵔⴰⵡⵜ ⴳ ⵓⵙⴷⵓⵙ ⵏ ⵡⴰⵜⵉⴳⵏ ⵏ ⵜⴰⵎⵓⵏⵜ ⴷ ⵜⵓⴷⵔⵜ ⵜⴰⵎⴷⵔⴰⵡⵜ ⴷ ⵓⵙⴽⴰⵏ ⵏ ⵓⵎⵣⴷⴰⵢ ⴷ ⵓⵎⵙⴰⵙⴰ ⴰⵏⴰⵎⵓⵏ
ⵢⵓⴹⴼ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴽⵉⴳⴰⵏ ⵏ ⵉⵖⴰⵡⴰⵙⵏ ⴷ ⵉⵕⵓⴱⵓⵕⵟⴰⵊⵏ ⵉⴱⴰⵔⴰⵣⵏ ⴳ ⵜⵍⵍⴰ ⵜⵎⵢⴰⵖⵜ ⵉⵜⵜⵓⵙⴷⵓⵙⵏ ⵙ ⵓⵣⵓⵣⵣⵔ ⴰⵅⴰⵜⴰⵔ ⵏ ⵜⵏⵣⵡⴰⵢⵉⵏ ⴷ ⵜⴷⴰⴱⵓⵜⵉⵏ ⵜⵉⵜⵍⴼⴰⵣⵉⵏ, ⵙ ⵉⵎⵥⵍⵉ ⵙ ⵓⴱⵔⵉⴷ ⵏ ⵓⵙⵙⴼⵍⴷ ⵏ ⵜⴰⵖⵓⵛⵜ ⵏ ⵓⵏⵎⵓⵔⵉ, ⵉⴳⴰ ⵙⴳ ⵜⴰⵡⵊⵉⵡⵉⵏ ⵏ ⵡⵓⵏⴳⵉⵙⵏ ⵏ ⵓⵏⴷⵓⴷⵉ ⵏⵖ ⵉⵎⵜⵔⵓⵙⵏ ⵏⵖ ⵙⴳ ⵉⵏⵎⵓⵔⵉⵏ ⵉⵎⵖⵔⴰⴱⵉⵢⵏ ⵏⵏⴰ ⵉⴰⵔⴰⵏ ⴰⴷ ⵢⵉⵏⵉ ⵜⴰⵏⵏⴰⵢⵜ ⵏⵏⵙⵏ ⴷ ⵜⴰⵙⵙⴰⵙⵜ ⵏⵏⵙⵏ ⴷ ⵜⴰⵎⵓⵏⵜ ⵏⵏⵙⵏ ⴰⴽⴷ ⵜⵉⵎⵏⴰⴹⵉⵏ ⵏⵏⴰ ⵉⵡⵜⴰ ⵓⵏⴷⵓⴷⵉ ⵏ ⵡⴰⴽⴰⵍ.
ⵉⵎⴷⵔⴰⵡ ⴷⵉⵖ ⴳ ⵓⵙⴽⴰⵏ ⵏ ⵜⵡⵍⴰⴼⵉⵏ ⵏ ⵉⵎⵣⵉⵣⵣⵍⵏ ⵏ ⵓⵎⵢⴰⵡⴰⵙ ⵙⴳ ⵜⵙⴳⴳⵯⵉⵏ ⴰⴽⴽⵯ ⵏ ⵜⴳⵍⴷⵉⵜ ⴷ ⵓⵙⵏⵖⵎⵙ ⵙ ⵜⵖⴰⵔⴰⵙⵉⵏ ⵉⵍⵍⴰⵏ ⴳ ⵜⵎⴷⵔⴰⵡⵜ ⴷ ⵜⵓⴽⴽⵉ ⵉ ⵡⵓⵏⴳⵉⵙⵏ ⵏ ⵓⵏⴷⵓⴷⵉ, ⵙ ⵓⵙⵎⵓⵏ ⵏ ⵜⵣⵎⵎⴰⵔ ⴰⴼⴰⴷ ⴰⴷ ⵙⵙⵎⵖⵓⵔⵏ ⵙ ⵓⵖⵉⵡⵍ ⵙⴳ ⵓⵙⵎⵓⵙⵙⵓ ⵏ ⵓⵎⵢⴰⵡⴰⵙ ⴰⵏⴰⵎⵓⵏ, ⴳ ⵓⵣⵎⵣ ⴰⴷ, ⴰⵡⴷ ⵜⴰⵎⴷⵔⴰⵡⵜ ⴳ ⵜⵏⴼⵔⵓⵜ ⵏ ⵜⵕⵡⵉ ⵏⵏⵙ ⴷ ⵓⴼⵔⴰⴳ ⵏ ⵓⵡⵜⵜⴰⵙ ⵏⵏⵙ ⵍⵓⵎⴰⵕ ⵙ ⵓⴱⵔⵉⴷ ⵏ ⵓⵙⵎⵓⵙⵙⵓ ⵙ ⵓⵣⵓⵛⵛⵍ ⵏ ⵓⵙⴷⵓⵙ ⵏ ⵜⵉⴹⴰⴼ ⵉⵣⴷⵉⵏ ⵙ ⵜⵖⴰⵔⴰⵙⵉⵏ ⵏ ⴱⵟⵟⵓ ⵏ ⵢⵉⵡⵙⵏ ⵉⴳⴰⵏ ⵉⴷⵔⵉⵎⵏ, ⴷⵉⵖ ⴰⵙⵎⵓⵙⵙⵓ ⵙ ⵜⵕⵡⵉ ⵏ ⵓⵣⵔⴰⴽ ⵏ ⵜⵎⵥⵍⵉⵡⵉⵏ ⴷ ⵜⵎⵢⵓⵔⵉⵏ ⵏ ⵉⵎⵣⴷⴰⵖ ⵏ ⵜⵎⵏⴰⴹⵉⵏ ⵉⵜⵜⵓⴹⴰⵙⵏ ⵉⵡⵏⴰⵏ ⵏ ⵓⵏⵢⵓⴷⴷⵓ ⵖⵔ ⵜⵎⵉⵣⴰⵔ ⵏⵏⴰⵖ ⵉ ⵓⵡⵏⵏⵉ ⵏ ⵓⵎⵢⴰⵡⴰⵙ ⴷ ⵜⴰⵎⵓⵏⵜ.
ⵉⵣⵎⵎⴻⵎ ⴷⵉⵖ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⵉⴹⴰⴼ ⵏ ⵓⵙⵎⴽⵍ ⴰⵖⵎⵙⴰⵏ ⴰⵏⵣⵡⴰⵢ ⴷ ⵓⵜⵍⴼⴰⵣ ⵅⴼ ⵓⵙⴽⴰⵏ ⵏ ⵜⴰⵎⵓⵏⵜ ⴷ ⵓⵎⵢⴰⵡⴰⵙ ⴰⵏⴰⵎⵓⵔ ⴷ ⵜⵡⵓⵔⵉⵡⵉⵏ ⵏ ⵓⵎⵏⵣⴰⵢ ⵏ ⵓⵎⵢⴰⵏⴰⵡ, ⵍⵍⵉⴳ ⵜⵣⵓⵣⵣⵔ ⵉ ⵜⴰⵏⵏⴰⵢⵜ ⵜⴰⵎⴰⵜⴰⵢⵜ ⵉⵡⵙⵏ ⴷ ⵉⵙⵏⵜⵉⵢⵏ ⵏ ⵓⵎⵢⴰⵡⴰⵙ ⵉ ⵉⵎⵖⵔⴰⴱⵉⵢⵏ ⴰⴽⴽⵯ, ⵙ ⵉⵔⴳⴰⵣⵏ ⴷ ⵜⵓⵜⵎⵉⵏ, ⵙⴳ ⵡⴰⵏⴰⵡⵏ ⵉⵎⵣⴰⵔⴰⵢⵏ ⴳ ⵍⵄⵎⵕ, ⴷⵉⵏⵏⴰ ⴳ ⵍⵍⴰⵏ ⴰⴳⵓⵏⵙ ⵏⵖ ⴱⵕⵕⴰ ⵏ ⵜⵎⵓⵔⵜ ⵖⵓⵔ ⵉⵎⵖⵔⴰⴱⵉⵢⵏ ⵏ ⵓⵎⴰⴹⴰⵍ, ⵙ ⵓⵎⵢⴰⵏⴰⵡ ⵓⵜⵍⴰⵢ ⵏⵏⵙⵏ ⵙ ⵜⵄⵔⴰⴱⵜ, ⴷⴷⴰⵔⵉⵊⴰ, ⵜⴰⵎⴰⵣⵉⵖⵜ ⴷ ⵜⵃⵙⵙⴰⵏⵉⵜ, ⵙⴳ ⵡⴰⵏⴰⵡⵏ ⵉⵙⵓⵙⵢⵓⴷⵍⵙⴰⵏⵏ ⴰⴽⴽⵯ ⵙ ⵢⵉⵎⴰⵏ ⴷ ⵓⵙⵖⴷ ⵏⵏⵙ, ⵉⵎⵓⵏⵙⵍⵎⵏ ⴷ ⵡⵓⴷⴰⵢⵏ, ⴱⵍⴰ ⴰⴷ ⵏⵜⵜⵓ ⵜⵉⵎⴷⵔⴰⵡ ⵏ ⵓⵎⵢⴰⵡⴰⵙ ⵏ ⵉⴱⵕⵔⴰⵏⵉⵢⵏ ⵉⵣⴷⵖⵏ ⵍⵎⵖⵔⵉⴱ.
ⵜⴰⵎⵔⵉⵙⵜ ⵙ ⵓⵣⵔⴰⴽ ⵏ ⵉⵣⵔⴼⴰⵏ ⵉⵏⴼⴳⴰⵏⵏ ⵉⴷⵓⵙⵏ
ⵜⴻⵜⵜⵓⵣⵎⵎⴻⵎ ⵜⵎⵔⵙⵜ ⵏ ⵜⵏⵣⵡⴰⵢⵉⵏ ⴷ ⵜⴷⴰⴱⵓⵜⵉⵏ ⵜⵉⵜⵍⴼⴰⵣⵉⵏ ⵙ ⵜⵖⴰⵔⵉⵡⵉⵏ ⵏ ⵜⵡⵓⵔⵉ ⵜⴰⵖⵎⵙⴰⵏⵜ ⵙ ⵓⵢⵏⵏⴰ ⵉⵜⵜⵓⵢⴰⵙⵙⵏⵏ ⵍⵓⵎⴰⵕ ⴳ ⵓⵢⵏⵏⴰ ⵉⵣⴷⵉⵏ ⵙ ⵓⵣⵔⴰⴽ ⵏ ⵉⵣⵔⴼⴰⵏ ⵉⵏⴼⴳⴰⵏⵏ ⵉⵍⴰⵏ ⴰⵎⵏⵉⴷ ⴰⵖⵣⵡⴰⵔ ⴰⵎⵎ ⵓⵣⵔⴼ ⴳ ⵜⵡⵍⴰⴼⵜ, ⴰⴼⵔⴰⴳ ⵏ ⵉⵎⵥⵢⴰⵏⵏ, ⴰⴼⵔⴰⴳ ⵏ ⵜⵓⴷⵔⵜ ⵉⵥⵍⵉⵏ ⴷ ⵡⵓⴷⴷⵓⵔ ⴰⵏⴼⴳⴰⵏ ; ⵉⵣⵔⴼⴰⵏ ⴰⴷ ⵓⵔ ⴷⴰ ⵜⵜⵓⴹⴰⵙⵏ ⴳ ⵉⵣⵎⵣⵏ ⵏ ⵜⴰⵙⵙⴰⵙⵉⵏ ⴷ ⵜⵡⴰⵖⵉⵜⵉⵏ, ⵙ ⵉⵎⵥⵍⵉ ⴷⴰⵜ ⵜⵅⵉⵜⵔⵜ ⵏ ⵜⵡⵓⵔⵉⵡⵉⵏ ⵏ ⵓⵎⵢⴰⵡⴰⴹ ⴷ ⵓⵙⵏⵖⵎⵙ ⵎⵉ ⵉⴳⴰ ⵓⵡⵜⵜⴰⵙ ⴰⴷ ⵙⵙⴽⵔⵏ ⵍⴱⵓⵣ ⵙ ⵓⵙⵎⵓⵙⵙⵓ ⵏ ⵉⵙⵎⵃⵙⵉⵙⵏ ⴷ ⵓⵙⵀⵢⵢⵊ ⵏ ⵜⴰⵡⴷⵉⵡⵉⵏ. ⵙ ⵓⵢⴰ, ⵙⵎⴽⵍⵏⵜ ⵜⵏⵣⵡⴰⵢⵉⵏ ⴷ ⵜⴷⴰⴱⵓⵜⵉⵏ ⵜⵉⵜⵍⴼⴰⵣⵉⵏ ⵜⴰⵡⴰⵖⵉⵜ ⴰⴷ ⵙ ⵜⵖⴰⵔⴰⵙⵜ ⵏ ⴰⴷ ⵓⵔ ⵙⵙⴽⵏⵏⵜ ⵉⵎⵜⵜⵉⵏⵏ ⵏ ⴷⴷⴰⵡ ⵡⴰⴽⴰⵍ ⵏⵖ ⵉⵡⵏⴰⵏ ⵏ ⵢⵉⴷⵔ ⵏⵏⵙⵏ, ⵔⵓⵔⴰⵏⵜ ⵜⴰⵖⴹⴼⵜ ⵉ ⵜⴰⵙⵙⴰⵙⵜ ⴰⴼⴰⴷ ⴰⴷ ⵓⵔ ⵉⵥⵉⵕⵏ ⵉⵎⵥⵢⴰⵏⵏ ⴰⵢⴰ ⴰⴷⴷⴰⵢ ⵔⴰⵏ ⴰⴷ ⵙⴰⵡⵍⵏ ⵅⴼ ⵜⵏⴰⴳⵉⵜ ⵏⵏⵙⵏ ⵅⴼ ⵓⵢⵏⵏⴰ ⵖⵉⴼⵙⵏ ⵉⴽⴽⴰⵏ ⴳ ⵓⵏⴷⵓⴷⵉ, ⴷ ⵓⴼⵔⴰⴳ ⵏ ⵡⵓⴷⴷⵓⵔ ⵏ ⵉⵎⵜⵔⵓⵙⵏ, ⵔⵏⵓ ⵢⴰⵙ ⴰⵣⵔⴰⴽ ⵏ ⵜⴷⴳⴳⴰⵔⵜ ⵏ ⵜⵣⴷⴳⵉ ⴷⴰⵜ ⵓⵙⴽⴰⵏ ⵏ ⵜⵡⵓⵔⵉⵡⵉⵏ ⵓⵔ ⵉⵎⵓⵏ ⴷ ⵓⵣⵔⴼ ⵏⵏⴰ ⵖⵉⵢⵏ ⴰⴷ ⵙⵙⴽⵔⵏ ⴽⵔⴰ ⵏ ⵉⵎⴷⴰⵏⵏ ⴳ ⵓⵎⵏⴰⴹ ⵏ ⵓⵙⵡⵓⴷⴷⵓ ⵏ ⵉⴷⵔⵉⵣⵏ ⵏ ⵜⵡⴰⵖⵉⵜ.
ⵢⵓⴽⵣ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⵜⵉⵣⵎⵎⴰⵔ ⵜⵉⵏⵖⵎⴰⵙⵉⵏ ⵏⵏⴰ ⵉⵜⵜⵓⵙⴽⵔⵏ ⵙⴳ ⵖⵓⵔ ⵜⵏⵣⵡⴰⵢⵉⵏ ⴷ ⵜⴷⴰⴱⵓⵜⵉⵏ ⵜⵉⵜⵍⴼⴰⵣⵉⵏ ⴳⴰⵏⵜ ⴰⴱⵖⵓⵔ ⵏⵏⴰ ⵉⵙⴷⵓⵙⵏ ⴰⵣⵔⴼ ⵏ ⵓⵏⵎⵓⵔⵉ ⴳ ⵓⵏⵖⵎⵉⵙ. ⴳ ⵜⵙⴳⴰ ⵢⴰⴹⵏ, ⵜⵉⵡⵓⵔⵉⵡⵉⵏ ⵖⵉⵢⵏⵜ ⴰⴷ ⵎⵖⵓⵔⵏⵜ ⵣⵣⵓⴳⵣⵏⵜ ⴰⴼⴰⴷ ⴰⴷ ⵙⵙⵉⵍⵉⵏⵜ ⴳ ⵜⵣⵎⵎⴰⵔ ⵏ ⵓⵙⵏⵖⵎⵙ ⴰⵙⵍⵉⵥⵕ ⴳ ⵓⵍⵜⴰⵖ ⵉⵖⵓⴷⴰⵏ ⴳ ⵜⵣⵎⵎⴰⵔ ⵏ ⵓⵙⵎⵓⵙⵙⵓ ⴰⵏⴰⵎⵓⵔ ⵏⵏⴰ ⵏ ⵉⵇⵇⴰⵏ ⴳ ⵜⴳⵣⵣⵓⵎⵉⵏ ⴷ ⵢⵓⵙⴰⵏ ⵏ ⵓⵙⵡⵓⴷⴷⵓ ⵏ ⵉⴷⵔⵉⵣⵏ ⵏ ⵜⵡⴰⵖⵉⵜ ⴰⴷ ⵜⴰⴳⴰⵎⴰⵏⵜ ⴷⵉⴳⵙⵏⵜ ⵜⵓⵚⴽⴰ ⵜⴰⵎⴰⵢⵏⵓⵜ ⵏ ⵜⵣⴷⵓⵖⵉⵏ, ⴷ ⵢⵉⵙⵉ ⵏ ⵉⵎⵥⵢⴰⵏⵏ ⵉⴳⵓⵊⵉⵍⵏ, ⴷ ⵓⵙⵙⵉⵍⵉ ⵙⴳ ⵜⵕⵡⵉ ⵏ ⵜⵏⴰⴼⵓⵜⵉⵏ ⵜⵉⴳⴷⵓⴷⴰⵏⵉⵏ, ⴰⵙⴷⵓⵙ ⵏ ⵜⵓⵚⴽⵉⵡⵉⵏ… ⵙ ⵓⵢⵏⵏⴰ ⵉⵖⵜⵙ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⴷ ⵡⵉⵙⵙ ⵙⴹⵉⵙ ⵕⴱⴱⵉ ⴰⴷ ⴰⵙ ⵢⴰⵡⵙ. ⵢⵓⴽⵣ ⴷⵉⵖ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⵉⵔⵎ ⴰⴷ ⵉⵙⵙⴽⵏ ⵜⴰⵏⴰⴼⵓⵜ ⵜⴰⴳⴷⵓⴷⴰⵏⵜ ⵏ ⵓⵙⵏⵖⵎⵙ ⴰⵙⵍⵉⵥⵕ ⴷ ⵜⵕⵡⵉ ⵏ ⵜⵉⵔⵔⴰ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵜⵖⵓⴷⵉ ⵏ ⵓⴼⵔⴰⴳ ⵏ ⵓⵎⵢⴰⵎⴰⵏ ⴳⵔ ⵓⵙⵏⵖⵎⵙ ⴷ ⵉⵏⵎⵓⵔⵉⵏ.