ⴰⵎⵎⴰⵙ ⴰⵍⵉⴱⵉ ⵉ ⵜⵣⵔⴰⵡⵉⵏ ⵜⵉⵎⴰⵣⵉⵖⵉⵏ ⴰⵔ ⵉⵙⵏⵎⵉⵍⵉ ⴰⴱⵔⴰⴳⵔⴰⵡ ⴰⵏⴰⵎⵓⵔ ⵅⴼ ⵜⵎⵍⴰⵍⵜ ⵏ ⵓⵎⵢⴰⵏⴰⵡ ⴰⵙⵏⵉⵍⵙⴰⵏ ⴳ ⵓⵙⴷⵓⵙ ⵏ ⵜⴳⵎⵉ
ⵉⵙⵏⵎⴰⵍⴰ ⵡⴰⵎⵎⴰⵙ ⴰⵍⵉⴱⵉ ⵉ ⵜⵣⵔⴰⵡⵉⵏ ⵜⵉⵎⴰⵣⵉⵖⵉⵏ ⵉⴹⴳⴰⵎ ⵏ ⵓⴽⵕⴰⵙ ⴳ ⵟⴰⵕⴰⴱⵍⵓⵙ, ⴰⴱⵔⴰⴳⵔⴰⵡ ⴰⵏⴰⵎⵓⵔ ⵅⴼ ⵜⵎⵍⴰⵍⵜ ⵏ ⵓⵎⵢⴰⵏⴰⵡ ⴰⵙⵏⵉⵍⵙⴰⵏ ⵅⴼ ⵓⵙⴷⵓⵙ ⵏ ⵜⴳⵎⵉ, ⵙ ⵜⵉⵍⵉⵜ ⵏ ⵓⵏⵎⵀⴰⵍ ⴰⵎⴰⵜⴰⵢ ⵏ ⵓⵏⴳⵎⴰⵎ ⴰⵍⵉⴱⵉ ⵉ ⵓⵔⵣⵣⵓ ⴰⵎⴰⵙⵙⴰⵏ, ⴷ ⵓⵏⵙⵙⵉⵅⴼ ⵏ ⵡⴰⵎⵎⴰⵙ ⴷ ⵜⵓⴳⵜⵜ ⵏ ⵉⵙⵍⵎⴰⴷⵏ ⴷ ⵉⴽⴰⴷⵉⵎⵉⵢⵏ ⴷ ⵉⵎⵔⵣⵓⵜⵏ ⴷ ⵉⵏⴼⵔⴰⵔⵏ ⵙ ⵜⴷⵎⵙⴰ ⴷ ⵜⴳⵎⵉ.
ⵜⴻⵜⵜⵓⵙⵔⴰⵙⵏⵜ ⴳ ⵓⴱⵔⴰⴳⵔⴰⵡ ⵜⴰⴳⵔⵓⵎⵎⴰ ⵏ ⵉⵎⵔⵏⴰ ⵉⵙⴰⵡⴰⵍⵏ ⵅⴼ ⵜⵓⵜⵍⴰⵢⵜ ⴰⵎ ⵢⴰⵏ ⵓⴼⵔⴷⵉⵙ ⵏ ⵓⴷⴳⴰⵔ ⴰⵏⴼⴳⴰⵏ, ⴷ ⵜⵎⵍⴰⵍⵜ ⵏⵏⵙ ⴳ ⵓⵙⴱⵓⵖⵍⵓ ⵏ ⵉⴳⴰⴷⴰⵣⵏ, ⴷ ⵓⵍⴰ ⵉⴹⵉⵚ ⵏⵏⵙ ⴳ ⵜⵎⵔⵏⵉⵡⵜ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ, ⴰⵙⵙⴹⴼⵕ ⵙ ⵜⵎⵍⴰⵍⵜ ⵏ ⵜⵓⵜⵍⴰⵢⵉⵏ ⵜⵉⴷⵖⵔⴰⵏⵉⵏ ⴳ ⵓⵙⵉⴷⴼ ⵏ ⵉⴳⴰⴷⴰⵣⵏ, ⴷ ⵜⴰⵡⵉⵜ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⴷⵓⵙ ⵏ ⵜⴷⵔⴰⵡⵜ ⵜⴰⵖⵔⴼⴰⵏⵜ ⴳ ⵓⵙⴽⴰⵔ ⵏ ⵜⴳⵎⵉ ⵜⴰⴷⵎⵙⴰⵏⵜ.
ⵉⵏⵏⴰ ⵓⵏⵙⵙⵉⵅⴼ ⵏ ⵡⴰⵎⵎⴰⵙ «ⴼⴰⵜⵃⵉ ⴰⴱⵓ ⵣⴰⵅⵅⴰⵔ» ⵉ ⵜⵙⵏⵓⵔⴰⵢⵜ ⵍⵖⴰⵢⵎⴰ ⵜⴰⵍⵉⴱⵉⵜ ⵉ ⵉⵏⵖⵎⵉⵙⵏ, ⴰⵡⵜⵜⴰⵙ ⴳ ⵓⴱⵔⴰⴳⵔⴰⵡ ⴰⴷ ⴷ ⴰⵙⵏⴼⵍ ⵏ ⵜⴰⵏⵏⴰⵢⵜ ⵜⵓⵣⴷⵉⵔⵜ ⵉⵜⵜⵓⵣⵎⵎⴰⵎⵏ ⴳ ⵡⴰⵔ ⴰⴼⵔⴰⴽ ⵏ ⴽⵔⴰ ⵏ ⵉⵍⵉⴱⵉⵢⵏ ⵅⴼ ⵜⵎⴰⵣⵉⵖⵜ, ⵏⵏⴰ ⵉⵣⴷⵉⵏ ⵙ ⵉⵔⵎⵎⵓⵙⵏ ⵉⵜⵜⵓⵣⴳⴰⵍⵏ, ⴷ ⵉⵙⵍⵍⵡⵉ ⵏ ⵜⵡⵀⴰⵍⵉⵏ ⵏ ⵜⵡⵓⵔⵉ ⴷ ⴰⵢⵍⵍⵉ ⵔⴰⴷ ⵏⵏ ⵜⵏⵔⵓ ⵜⵎⴰⵣⵉⵖⵜ ⴳ ⵡⴰⵜⵉⴳ ⴰⵡⵍⴳⴰⵏ ⵉ ⵓⴳⴰⴷⴰⵣ ⴰⵍⵉⴱⵉ, ⵙ ⵜⵎⵔⵏⵓⵜ ⵏ ⵓⵎⵎⵖⵕⴹ ⴰⴱⴷⴷⴰⵢ ⵉ ⵓⵙⵍⵎⴷ ⴰⵎⴰⵜⴰⵢ ⴷ ⵓⵙⵎⵓⵙⵙⵓ ⵏ ⵜⵣⵔⴰⵡⵉⵏ ⵜⵉⵎⴰⵜⵜⴰⵢⵉⵏ.
ⵉⵏⵔⵓ ⵏⵏ « ⴰⴱⵓ ⵣⴰⵅⵅⴰⵔ» ⵜⴻⵜⵜⵓⴼⴽⴰⵏⵜ ⵙⴰ ⵏ ⵜⵏⴼⵓⵍⵉⵏ ⴰⵔ ⵙⴰⵡⴰⵍⵏⵜ ⵅⴼ ⵓⵎⵢⴰⵏⴰⵡ ⵏ ⵜⵓⵜⵍⴰⵢⵜ ⴷ ⵜⵎⵔⵏⵉⵡⵜ ⵏ ⵓⵡⴰⵏⴽ, ⴷ ⵓⴷⵔⵉⵣ ⵏ ⵓⵙⵡⵓⵔⵉ ⵏ ⵡⴰⵙⵙⴰⵖⵏ ⵉⵎⴰⵣⵉⵖⵏ ⵏ ⵉⵢⴰⴼⵓⵜⵏ ⵅⴼ ⵓⵏⵙⵎⵓⵔ ⴰⵍⵉⴱⵉ, ⴷ ⵜⴷⵎⵙⴰⵏⵉⵏ ⵏ ⵜⵓⵜⵍⴰⵢⵜ, ⴷ ⵜⵙⴰⵔⵡⴰ ⵏ ⵜⵓⵜⵍⴰⵢⵉⵏ ⴳ ⵜⴳⵎⵉ ⴷⴰⵔ ⵉⵡⴰⵏⴽⵏ ⵓⵕⵓⴱⴱⵉⵢⵏ, ⴷ ⵙ ⵎⴰⵎⵏⴽ ⵜⵙⴹⵉⵚ ⵜⵓⵜⵍⴰⵢⵜ ⵅⴼ ⵜⵎⵔⵏⵉⵡⵜ ⵜⴰⴷⵎⵙⴰⵏⵜ.
ⵢⵓⵔⴰ ⵜ: ⵄⴱⴷⵍⵡⴰⵃⵉⴷ ⴱⵓⵜⴱⴰⵖⴰ