ⴰⵙⵉⵡⴹ ⵏ ⵓⴱⵔⵙⵉⵔⴰ ⴰⴳⵍⴷⴰⵏ
ⴳ ⵎⴰⴷ ⴷ ⵉⴷⴷⴰⵏ ⴰⵙⵉⵡⴹ ⵏ ⵓⴱⵔⵙⵉⵔⴰ ⴰⴳⵍⴷⴰⵏ:
« ⵉⵙⴱⵔⵔⴽ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⵙ ⴰ ⴳ ⵜⴳⴰⴷⵉⵔⵜ ⵜⴰⴳⵍⴷⴰⵏⵜ ⴳ ⵕⵕⴱⴰⵟ, ⵜⵉⵎⵎⵓⵖⵔⴰ ⵎⴰⵙⵙ ⴱⵉⴷⵔⵓ ⵙⴰⵏⵛⵉⵣ, ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵏ ⵜⴳⵍⴷⵉⵜ ⵜⴰⵚⴱⵍⵢⵓⵏⵜ, ⵏⵏⴰ ⵉⵙⴽⴰⵔⵏ ⵢⴰⵏ ⵓⵔⵣⴰⴼ ⵏ ⵜⵡⵓⵔⵉ ⵉ ⵍⵎⵖⵔⵉⴱ.
ⵉⴽⵛⵎ ⵓⵔⵣⴰⴼ ⴰⴷ ⴳ ⵓⵙⴰⵜⵉ ⵏ ⵜⵙⵓⵍⴰⵏⵜ ⵏ ⵜⴷⵉⵏⴰⵎⵉⵜ ⵏⵏⴰ ⵎⵉ ⵜⵕⵥⵎ ⵜⴼⵔⴽⵜ ⵜⴰⵎⴰⵢⵏⵓⵜ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ, ⵏⵏⴰ ⵉⵏⵏⵓⵕⵥⵎⵏ ⵙⴳ ⵓⵏⵎⵓⵇⵇⴰⵔ ⵏ ⴱⴰⴱ ⵏ ⵡⴰⴷⴷⵓⵔ, ⴰⴷ ⵜ ⵉⵄⵣⵣⵓ ⵕⴱⴱⵉ, ⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⵚⴱⵍⵢⵓⵏⵜ ⴳ ⵉⴱⵔⵉⵔ 2022, ⵜⴳ ⵜⵢⴰⴼⵓⵜ ⵏⵏⵙ ⴰⵙⵖⵣⵏ ⵏ ⵓⵙⵎⴰⵍ ⵉⵛⵛⴰⵔⵏ ⴳⵔ ⵙⵏⴰⵜ ⵜⵎⵉⵣⴰⵔ ⴰⴷ.
ⵜⴻⵜⵜⵓⴹⴼⴰⵕ ⵜⴷⵉⵏⴰⵎⵉⵜ ⴰⴷ ⵙ ⵜⵡⵉⵍⴰ ⵢⴰⴽⴽⴰⵏ ⴰⵙⵓⵏⴼⵓ, ⵜⵥⵍⵉ ⵙ ⵓⵙⴷⵓⵙ ⴷ ⵓⵣⴷⴰⵢ ⴷ ⵜⵓⵛⵛⵕⴽⴰ ⴳ ⵢⵉⴳⵔⴰⵏ ⴰⴽⴽⵯ ⴳ ⵜⵔⵙⵍⵜ ⵏ ⵉⵎⵏⵣⴰⵢⵏ ⵏ ⵜⴼⵍⵙⵜ ⴷ ⵓⵣⵔⴰⴽ ⴰⵎⵢⴰⵖ, ⴷ ⵜⴽⴰⵢⵍⴰⵍⵜ, ⴷ ⵜⵏⴰⵔⴰⴳⵜ ⵉⵖⵓⴷⴰⵏ, ⴷ ⵓⵙⵓⴼⵓ ⵙ ⵜⵎⵔⵙⵉⵏ.
ⵙ ⵓⵣⵎⵣⵣⵓ ⵏ ⵓⵙⴱⵔⵔⴽ ⴰⴷ, ⵉⵙⵎⴰⵢⵏⵓ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⵚⴱⵍⵢⵓⵏⵜ ⵉ ⴱⴰⴱ ⵏ ⵡⴰⴷⴷⵓⵔ, ⴰⴷ ⵜ ⵉⴼⵔⴳ ⵕⴱⴱⵉ, ⴰⵙⴷⴷⵉⴷ ⵅⴼ ⵓⵎⵏⴰⴷ ⵏ ⵚⴱⴰⵏⵢⴰ ⵉⵜⵜⵓⴱⴷⴰⵔⵏ ⴳ ⵓⵙⵎⴰⵍ ⵉⵛⵛⴰⵔⵏ ⵏ ⵉⴱⵔⵉⵔ 2022, ⵏⵏⴰ ⵉⵜⵜⴳⴳⴰⵏ ⵜⴰⵙⵏⵜⴰⵢⵜ ⵜⴰⵎⵖⵔⵉⴱⵉⵜ ⵏ ⵉⴱⴹⵉ ⴰⵏⵉⵎⴰⵏ ⴰⵎ ⵜⵉⵔⵙⵍⵜ ⵖⵓⵔ ⵜⴰⴷⵖⵔⵉ ⵜⴰⵎⵓⴼⴰⵢⵜ ⴷ ⵜⵏⵉⵍⴰⵡⵜ ⴷ ⵜⵎⴰⴼⴰⵡⵜ ⵏ ⵓⴼⵓⴽⴽⵓ ⵏ ⵜⵏⵎⵎⵣⵔⴰⵢⵜ ⴰⴷ. ⵉⵙⵙⵎⵏⵉⴷ ⴱⴰⴱ ⵏ ⵡⴰⴷⴷⵓⵔ ⴰⵙⵏⵉⵎⵎⵔ ⵏⵏⵙ ⵉ ⵚⴱⴰⵏⵢⴰ ⵅⴼ ⵓⵎⵏⴰⴷ ⴰⵎⴰⵢⵏⵓ ⴰⵎⵚⴽⴰⵡ ⴷ ⵓⵏⴼⵔⴰⵔ.
ⴳ ⵓⵙⴱⵔⵔⴽ ⴰⴷ, ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ, ⴰⴷ ⵜ ⵉⵙⵏⵔⵓ ⵕⴱⴱⵉ, ⴷ ⵜⵎⵎⵓⵖⵔⴰ ⵎⴰⵙⵙ ⴱⵉⴷⵔⵓ ⵙⴰⵏⵛⵉⵣ, ⵅⴼ ⵉⴷⵉⵔⵏ ⵉⵎⵢⵉⵡⵏ ⵏ ⵓⵎⵢⴰⵡⴰⵙ ⵉⵏⵏⵓⵕⵥⵎⵏ ⵎⵏⵉⴷ ⵏ ⵜⵎⵉⵣⴰⵔ ⴰⴷ ⵜⴰⵏⴰⵔⴰⴳⵉⵏ, ⵉⴳ ⵓⵙⵏⵎⴰⵍⴰ ⵉⵛⵛⴰⵔⵏ – ⴰⴽⴷ ⵍⴱⵔⵜⵇⵉⵣ- ⵏ ⵓⴽⵔⵡⴰⵙ ⵏ ⵓⵎⴰⴹⴰⵍ ⵏ ⵜⵡⵊⵊⴰ ⵏ ⵓⴹⴰⵕ 2030 ⵜⴰⵎⵙⵙⵉⵍⵉⵜ ⵢⴰⴹⵏ ⵏ ⵓⵙⴷⵓⵙ ⵏⵏⵙ.
ⵉⵙⴰⵡⵍ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⵚⴱⵍⵢⵓⵏⵜ ⵅⴼ ⵓⵙⵙⵎⵖⵔ ⵏⵏⵙ ⴷ ⵓⵙⴷⴷⵉⴷ ⵏⵏⵙ ⵅⴼ ⵜⴰⵡⵉⵜ ⵏ ⵚⴱⴰⵏⵢⴰ ⵙ ⵜⵙⵏⵜⴰⵢⵉⵏ ⵜⵉⵙⵜⵕⴰⵜⵉⵊⵉⵢⵉⵏ ⵏⵏⴰ ⵎⵉ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ, ⴰⴷ ⵜ ⵉⵏⵚⵕ ⵕⴱⴱⵉ, ⵙⵍⴰⵡⴰⵏ ⴰⴽⴽⵯ ⵜⴰⵙⵏⵜⴰⵢⵜ ⵏ ⵜⵎⵉⵣⴰⵔ ⵜⵉⴼⵔⵉⵇⵉⵢⵉⵏ ⵉⵙⵙⴰⴳⴳⵯⴰⵏ ⵅⴼ ⵓⴳⴰⵔⵓ ⴰⵟⵍⴰⵏⵟⵉ, ⴷ ⵜⵙⵏⵜⴰⵢⵜ ⵜⴰⴳⵍⴷⴰⵏⵜ ⵏ ⵓⵙⴷⵓⵙ ⵏ ⵓⵙⵉⴷⴼ ⵏ ⵜⵎⵉⵣⴰⵔ ⵏ ⵢⵉⵍⵍ ⵙ ⵓⴳⴰⵔⵓ ⴰⵟⵍⴰⵏⵟⵉ, ⴷ ⵓⵊⵄⴱⵓⴱ ⵏ ⵍⴳⴰⵣ ⴰⴼⵔⵉⵇⵓ ⴰⵟⵍⴰⵏⵟⵉⵢ ⵏⵉⵊⵉⵔⵢⴰ – ⵍⵎⵖⵔⵉⴱ.
ⵉⵍⵍⴰ ⴳ ⵓⵙⵏⴱⴳⵉ ⴳ ⵜⵙⴳⴰ ⵜⴰⵚⴱⵍⵢⵓⵏⵜ, ⵎⴰⵙⵙ ⵅⵓⵙⵉ ⵎⴰⵏⵡⵉⵍ ⴰⵍⴱⴰⵕⵉⵙ, ⴰⵎⴰⵡⵙⴰⵙ ⵏ ⵜⵖⴰⵡⵙⵉⵅⵉⵏ ⵏ ⴱⵕⵕⴰ ⴷ ⵜⵎⵓⵏⵜ ⵜⴰⵡⵕⵓⴱⴱⵉⵜ ⴷ ⵓⵎⵢⴰⵡⴰⵙ, ⴷ ⵎⴰⵙⵙⴰ ⵉⵎⴰ ⴱⴰⵕⵉⵜⵛⵉ, ⵜⵉⵎⵉⵔⵉⵜ ⵜⴰⵎⴰⵜⴰⵢⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⵙ ⵜⵙⵏⵙⵙⵉⵅⴼⵜ ⵏ ⵜⵏⴱⴰⴹⵜ ⵜⴰⵚⴱⵍⵢⵓⵏⵜ, ⴳ ⵜⵙⴳⴰ ⵜⴰⵎⵖⵔⵉⴱⵉⵜ, ⵎⴰⵙⵙ ⴼⵓⴰⴷ ⵄⴰⵍⵉ ⵍⵀⵉⵎⵎⴰ, ⴰⵎⵛⵛⵉⵡⴰⵕ ⵏ ⴱⴰⴱ ⵏ ⵡⴰⴷⴷⵓⵔ, ⴷ ⵎⴰⵙⵙ ⵏⴰⵚⵉⵕ ⴱⵓⵕⵉⵟⴰ, ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵙⵉ ⴷ ⵉⵎⵖⵔⴰⴱⵉⵢⵏ ⵣⴷⵖⵏⵉⵏ ⴳ ⴱⵕⵕⴰ.
ⵜⵉⵣⵉ ⵍⵍⵉ ⵖ ⴷ ⵉⵍⴽⵎ ⵜⴰⴳⴰⴷⵉⵔⵜ ⵜⴰⴳⵍⴷⴰⵏⵜ, ⵉⵙⴼⵙⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⵚⴱⵍⵢⵓⵏⵜ ⵢⴰⵜ ⵜⵔⴰⴱⴱⵓⵜ ⵙⴳ ⵜⵏⴹⴰⴼⵜ ⵜⴰⴳⵍⴷⴰⵏⵜ ⵏⵏⴰ ⵉⵙⴽⵔⵏ ⵢⴰⵏ ⵙⵙⵍⴰⵎ, ⴷⴰⵜ ⴰⴷ ⵜⴻⵜⵜⵓⴼⴽⴰⵏⵜ ⵜⵉⵢⵏⵉ ⴷ ⵓⴽⵯⴼⴰⵢ ⵙ ⵓⴹⴼⵓⵕ ⵏ ⵜⵎⵢⵓⵔⵉⵏ ⵜⵉⵎⵖⵔⴰⴱⵉⵢⵉⵏ ⵜⵉⵕⵚⵍⵉⵢⵉⵏ.
ⴰⵙⵓⵖⵍ: ⵄⴱⴷⵍⵡⴰⵃⵉⴷ ⴱⵓⵜⴱⴰⵖⴰ