ⵉⵍⵓⵍ ⴳ ⵜⵇⴱⵉⵍⵜ ⵏ ⵡⴰⵛⵜⵓⴽⵏ ⵎⴰⴷ ⵢⴰⵥⵏ ⵉ ⵓⵙⴳⴳⵯⴰⵙ ⵏ 1900 ⵉⵙⵡⴰ ⴷ ⴳ ⵜⵥⵓⵕⵉ ⵏ ⵕⵕⵡⴰⵢⵙ ⴷ ⵢⵉⵎⵉⵙ ⵏ ⵍⵓⵟⴰⵕ ⴷ ⵔⵔⵉⴱⴰⴱ ⴳⵉⵏ ⵙⴳ ⵡⴰⵢⴷⴰ ⵏ ⵜⵙⴳⴰ.
![ⵉⵍⵓⵍ ⴳ ⵜⵇⴱⵉⵍⵜ ⵏ ⵡⴰⵛⵜⵓⴽⵏ ⵎⴰⴷ ⵢⴰⵥⵏ ⵉ ⵓⵙⴳⴳⵯⴰⵙ ⵏ 1900 ⵉⵙⵡⴰ ⴷ ⴳ ⵜⵥⵓⵕⵉ ⵏ ⵕⵕⵡⴰⵢⵙ ⴷ ⵢⵉⵎⵉⵙ ⵏ ⵍⵓⵟⴰⵕ ⴷ ⵔⵔⵉⴱⴰⴱ ⴳⵉⵏ ⵙⴳ ⵡⴰⵢⴷⴰ ⵏ ⵜⵙⴳⴰ. 14-12](https://i.servimg.com/u/f57/20/22/84/12/14-12.png)
ⴰⵎⴷⵢⴰⵣ ⵏⵏⵖ ⵢⵉⵡⵉ ⵜ ⵓⵥⴰⵡⴰⵏ ⴰⵎⴰⵣⵉⵖ ⵢⵓⵜⵏ ⵙ ⵉⵥⵓⵕⴰⵏ ⴳ ⵜⵙⴳⴰ ⵏ ⵡⴰⵛⵜⵓⴽⵏ, ⵉⵍⵎⴷ ⵉⵎⴰⵙⵙⵏ ⵉⵎⵥⵥⵉ ⵏⵉⵜ ⵙⵓⵍ, ⵍⵍⵉⵖ ⵉⵥⵕⴰ ⵜⵉⴼⴰⴷⵉⵡⵉⵏ ⵏ ⵜⵓⴷⵔⵜ ⵏ ⵜⵡⵊⴰ ⵏⵏⵙ ⴷ ⵎⴰⵎⵏⴽ ⴰ ⵙ ⴷⴷⵔⵏ ⵉⵖⵜⵙ ⴰⴷ ⵉⵎⵎⵓⴷⴷⵓ ⵙ ⵡⴰⵏⴼⴰ ⴰⴷ ⴳⵉⵙ ⵉⵙⵏⵓⴱⴱⵛ ⵙ ⴽⵔⴰ ⵏ ⵜⵡⵓⵔⵉ ⵏⵜⵜⴰ ⴷ ⴳⵯⵎⴰⵙ ⵎⵇⵇⵓⵔⵏ, ⵙ ⵓⵡⵜⴰⵢ ⵏⵏⵙ ⵎⵥⵥⵉⵏ ⵉⵙⵙⵏⵜⵉ ⴷ ⴰⵎⵙⵡⵓⵔⵉ ⴷⴰⵔ ⵢⴰⵜ ⵎⴰⵙⵙⴰ ⵙⴳ ⴼⵕⴰⵏⵙⴰ, ⵙ ⵉⵔⴼⵙⴰⵏ ⵏⵏⵙ ⵃⵍⴰⵏⵉⵏ ⵜⵙⵙⵏⵜⵉ ⴰⵔ ⴰⵙ ⵜⴰⵇⵇⵔⴰ ⵙ « ⵊⵓⵏⵟⵉ » ⴰⵎⴰⴳⵏⵓ « gentil ».
ⵉⴷⴷⵔ ⵊⴰⵏⵟⵉ ⵙ ⵜⵓⴳⵜⵜ ⵏ ⵉⴼⵕⴰⵏⵙⵉⵙⵏ, ⵉⵙⵙⵏ ⵉⵍⵎⵎⴰ ⴰⵏⴰⵡ ⵏ ⵜⵓⴷⵔⵜ ⵏⵏⵙⵏ ⴷ ⵓⵎⵣⴰⵔⴰⵢ ⴳⵔ ⵓⵙⵡⵉⵔ ⵏ ⵜⵓⴷⵔⵜ ⵏⵏⵙⵏ ⴷ ⵜⵉⵏ ⵉⵎⵖⵔⴰⴱⵉⵢⵏ, ⵜⴼⴷⴰⴷⴷⵉ ⴷ ⴳⵉⵙ ⵜⴰⵢⵔⵉ ⵏ ⵜⵎⴰⵣⵉⵔⵜ, ⵢⴰⵙⵉ ⵔⵔⵉⴱⴰⴱ ⵏⵏⵙ ⵉⵙⵙⵏⵜⵉ ⴰⵔ ⵉⵜⵜⴽⴽⴰ ⵉⵙⵓⵏⵏ, ⴰⵔ ⵉⴽⴽⴰⵜ ⵜⴰⵙⵔⵜⵉⵜ ⵏ ⵓⵎⴷⴷⵓⵔⵔⵓⵢ ⴷ ⵡⵉⵏⵏⴰ ⵜⵏ ⵉⵡⴰⵍⴰⵏ ⵙⴳ ⵍⵇⵢⵓⴷ.
ⴰⵔ ⴱⴷⴷⴰ ⵢⴰⵇⵇⵔⴰ ⵊⴰⵏⵟⵉ ⴳ ⵜⵎⴷⵢⴰⵣⵉⵏ ⵏⵏⵙ ⵙ ⵜⴳⵔⴰⵡⵍⴰ ⵎⴳⴰⵍ ⴰⵎⴷⴷⵓⵔⵔⵓⵢ, ⵙ ⵓⵙⵡⵉⵔ ⴰⴷ ⵏⵏⵙ ⵖ ⵓⵔ ⵍⵍⵉⵏ ⵜⴽⵚⵚⴰⴹ, ⵉⵖⵜⵙ ⵓⵎⴷⴷⵓⵔⵔⵓⵢ ⴰⴷ ⵜ ⵉⵇⵇⵏ ⴳ ⵓⵖⵣⵓ ⵎⵏⵏⴰⵡⵜ ⵜⵡⴰⵍ, ⴷ ⵜⵓⴳⵜⵜ ⵏ ⵢⵉⵔⵏ ⴳ ⵜⵣⵏⵉⵜ ⴷ ⵡⴰⵏⴼⴰ ⴷ ⵓⴳⴰⴷⵉⵔ ⵏⵏⴰ ⴳ ⵉⵜⵜⵓⵇⵇⴰⵏ ⴰⵙⴳⴳⵯⴰⵙ ⵏ 1953.
ⵉⵙⵓⵍ ⵊⴰⵏⵟⵉ ⴳ ⵜⵎⴷⵢⴰⵣⵜ ⵍⵍⵉⵖ ⵜⵙⵙⵏⵜⵉ ⵜⵙⵉⵎⴰⵏⵜ ⵎⴰⵛⴰ ⵓⵔ ⴱⴰⵀⵔⴰ ⵉⵃⵎⵍ ⵜⵉⴼⴰⵡⵉⵏ ⴷ ⵡⴰⵙⵉⴷⴷⵏ, ⵓⵔ ⵉⵣⵎⵎⴻⵎ ⵜⵉⵎⴷⵢⴰⵣⵉⵏ ⵏⵏⵙ ⴳ ⵜⵏⵣⵡⴰⵢⵜ ⵜⴰⵏⴰⵎⵓⵔⵜ ⵓⵍⴰ ⴳ ⵜⵎⵙⵙⵓⵔⵉⵏ ⵉⵜⵜⵣⵎⵎⴰⵎⵏ ⴰⵎⴰⵔⴳ. ⴰⵎⴰⵔⴳ ⵏⵏⵙ ⵉⵜⵜⵓⵏⵏⴰ ⵖⴰⵙ ⴳ ⵉⵡⵉⵣⵏ ⴷ ⵜⴼⵓⴳⵍⵉⵡⵉⵏ. ⵉⵎⵎⵓⵜ ⴳ ⵓⵙⴳⴳⵯⴰⵙ ⵏ 1975 ⵜⴰⵎⵍⵍⴰ ⵏ ⵕⴱⴱⵉ ⵖⵉⴼⵙ.
ⵄⴰⴱⴷⵍⵡⴰⵃⵉⴷ ⴱⵓⵜⴱⴰⵖ