ⵙ ⵓⵙⴼⵓⴳⵍⵓ ⵙ ⵡⴰⵙⵙ ⴰⵎⴰⴹⵍⴰⵏ ⵏ ⵜⴰⴷⴷⴰⴳⵜ ⵏ ⵡⴰⵔⴳⴰⵏ .. ⵚⴰⴱⵉⵕ ⴷⴰ ⵢⴰⵇⵇⵔⴰ ⵙ ⵢⵉⵎⵉⵥ ⵙ ⵡⴰⵢⴷⴰ ⵏ ⵢⵉⵥⵥⵍⵎⴹ ⵏ ⵢⵉⴼⵔⵉⵇⵢⴰ
ⵉⵖⵔⴰ ⵎⵓⵃⵎⵎⴰⴷ ⵚⴰⴱⵉⵕ, ⴰⵙⵍⵎⴰⴷ ⴰⵎⵙⴷⴰⵡ ⴷ ⵓⵏⵎⵀⴰⵍ ⴰⵎⴰⵜⴰⵢ ⵉⵣⵔⵉⵏ ⵏ ⵜⵉⵏⵎⵍ ⵜⴰⵏⴰⵎⵓⵔⵜ ⵏ ⵜⴰⴳⴰⵏⵜ ⵏ ⵉⵎⵜⵡⴰⵍⵏ ⴳ ⵙⵍⴰ, ⵙ ⵓⵔⵣⵣⵓ ⴳ ⵡⴰⵢⴷⴰ ⵏ ⵉⵎⵣⵡⵓⵔⴰ ⴷ ⵜⵎⵢⵓⵔⵉⵏ ⵏⵏⵙⵏ, ⵉ ⵓⵙⵢⴰⴼⴰ ⴰⵎⴷⵢⴰ ⵏ ⵉⵙⵓⴳⴰⵎ ⵏⵏⵖ ⵉⴳⴰⵎⴰⵏⵏ ⴷ ⵉⵏⴼⴳⴰⵏⵏ, ⵉⵙⴷⴷⵉⴷ ⵅⴼ ⵓⵙⵓⵖⵏ ⵏ ⵓⵙⵙⵎⵔⵙ ⴳⵔ ⵓⵙⴱⵓⵔ ⴷ ⵓⵜⵔⴰⵔ ⴷ ⵓⵙⴷⵔⴼⵉ ⵏ ⵓⴼⴳⴰⵏ ⵙⴳ ⵉⵙⴽⵔⴰⴼ ⵏ ⵉⵙⵍⴳⵏⵏ ⵏ ⵓⵙⴷⵓⵔⵔⵉ ⵃⵎⴰ ⴰⴷ ⵢⵉⵍⵉ ⵡⵓⵍⵓⵢ ⵙ ⵡⴰⵎⵓⵏ.
ⵉⵏⵏⴰ ⵕⴰⴱⵉⵔ ⴳ ⵜⵉⵏⴰⵡⵜ ⵏⵏⵙ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵜⴰⴷⴳⴳⵯⴰⵜ ⵏ ⵓⴽⵡⴰⵙ 23 ⵎⴰⵢⵢⵓ 2024, ⵅⴼ ⵓⵙⵏⵜⵍ ⵏ » ⵓⵏⴳⵔⴰⵡ ⵏ ⵡⴰⵔⴳⴰⵏ: ⴰⵏⴳⵔⴰⵡ ⴰⵙⵏⴼⵍⴰⵃ ⴰⵏⴰⴳⴰⵏ ⵖⵓⵔ ⵜⴰⵥⵥⵉⴹⵕⴰ ⵉⵅⴰⵜⵔⵏ ⴳ ⵓⵏⵏⵓⵎⴽ ⴰⴽⴷ ⵉⵙⵏⴼⵍⵏ ⵏ ⵓⵏⴳⵉⴳⵜ », ⵙ ⵜⵎⵍⴷⴰ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵡⴰⵔⴳⴰⵏ, » ⵉⵖ ⵏⵔⴰ ⴰⴷ ⵏⴱⵓⵖⵍⵓ ⴰⵎ ⵡⴰⵎⵓⵏ, ⵉⵇⵇⴰⵏ ⴷ ⴰⴷ ⵏⴰⵖⵓⵍ ⵙ ⵜⵡⵉⵍⴰ ⵜⴰⴷⵙⴰⵍⴰⵏⵜ ⵙ ⴰⵢⵍⵍⵉ ⵙⴽⴰⵔⵏ ⵉⵎⴰⵔⴰⵡⵏ ⵏⵏⵖ ⴷ ⵉⵎⵣⵡⵓⵔⴰ ⵏⵏⵖ ⴷ ⵢⵉⵥⵥⵍⵎⴹ ⵏ ⵢⵉⴼⵔⵉⵇⵢⴰ ».
ⵉⵙⵙⵏⵜⵉ ⵓⵙⵍⵎⴰⴷ ⴰⵎⵔⵣⵓ, ⵜⵉⵏⴰⵡⵜ ⵏⵏⵙ ⵙ ⵓⴼⵙⵔ ⵙ ⵢⴰⵏ ⵓⵙⴰⵔⵓ ⵓⵏⵜⵉⵎ ⵅⴼ ⵉⵔⵣⵣⵓⵜⵏ ⵉⵎⴰⵙⵙⴰⵏⵏ ⵏ ⵓⴱⴰⵔⴰⵣ ⵉⵜⵜⵓⵙⴽⴰⵔⵏ ⵅⴼ ⵡⴰⴷⴷⴰⴳ ⵏ ⵡⴰⵔⴳⴰⵏ, ⴳ ⵓⵙⴰⵜⵉ ⵏ ⵓⵙⵏⵜⵉ ⵏ ⵜⴳⵎⵉ ⵏ ⵡⴰⵔⴳⴰⵏ ⴳ ⵜⵙⴳⴳⵉⵡⵉⵏ ⵔⵛⴰⵏⵉⵏ « DARED » ⵏⵏⴰ ⵅⴼ ⵜⴱⴷⴷ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵜⴳⵎⵉ ⵏ ⵜⵙⴳⴳⵉⵡⵉⵏ ⵏ ⵉⵥⵏⴰⴳⵏ ⴷ ⵜⵙⴳⴳⵉⵡⵉⵏ ⵏ ⵡⴰⵔⴳⴰⵏ, ⴳ ⵜⴰⵎⴰ ⵏ ⵜⵙⵏⵓⵔⴰⵢⵜ ⵏ ⵜⴳⵎⵉ ⵜⴰⵏⴼⵍⴰⵃⵜ ⴷ ⵓⵙⵉⵏⴰⴳ ⴰⵏⴰⵎⵓⵔ ⵏ ⵓⵔⵣⵣⵓ ⴰⴳⴰⵢⴽⴰ, ⵉⵙⵙⵓⵜⵍ ⵓⵙⵏⵜⵉ ⵅⴼ ⵜⴳⵎⵉ ⴷ ⵓⵙⵙⵔⵇⴱ ⵏ ⵓⵏⴳⵔⴰⵡ ⴰⵎⴰⵢⵏⵓ ⵉ ⵜⴽⵔⵣⴰ ⵏ ⵡⴰⵔⴳⴰⵏ ⵏⵏⴰ ⵔⴰⴷ ⵢⴰⵡⵙ ⵙ ⵜⵡⵉⵍⴰ ⵉⵅⴰⵜⵔⵏ ⴳ ⵜⵎⵔⵏⴰ ⵏ ⵜⵢⴰⴼⵓⵜ ⵏ ⵡⴰⵔⴳⴰⵏ.
ⵉⵏⵏⴰ ⵚⴰⴱⵉⵕ ⵎⴰⵙ ⴷ ⵓⵟⵟⵓⵏ ⵏ ⵉⵔⵣⵣⵓⵜⵏ ⵉⵜⵜⵓⵙⴽⴰⵔⵏ ⴳ ⵍⵎⵖⵔⵉⴱ ⵅⴼ ⵡⴰⴷⴷⴰⴳ ⵏ ⵡⴰⵔⴳⴰⵏ ⵉⵙⵙⵏ ⵢⴰⵜ ⵜⵣⵣⵉⴳⵣⵜ ⵉⴼⴰⵡⵏ ⴳ ⵉⵙⴳⴳⵯⴰⵙⵏ ⵉⵎⴳⴳⵓⵔⴰ, ⵍⵍⵉⵖ ⵍⴽⵎⵏ ⴰⵔ 2020 ⵎⴰⴷ ⵢⴰⵥⵏ ⵉ 450 ⵏ ⵜⵣⵔⴰⵡⵜ, ⵢⴰⵖⵓⵍ ⵙ ⵓⵢⴰ ⵍⵎⵖⵔⵉⴱ ⴳ ⵜⵙⴽⵯⴼⵍⵜ ⵜⵉⵙ ⵙⴰ ⴳ ⵓⵎⴰⴹⴰⵍ ⴳ ⵡⵓⵟⵟⵓⵏ ⵏ ⵉⵔⵣⵣⵓⵜⵏ ⵉⵜⵜⵓⵙⴽⴰⵔⵏ ⴳ ⵢⵉⴳⵔ ⴰⴷ, ⴹⴰⵕⵜ ⵏ ⵎⴰⵔⵉⴽⴰⵏ, ⴼⵕⴰⵏⵙⴰ, ⵀⵓⵍⴰⵏⴹⴰ, ⵍⴰⵍⵎⴰⵏ, ⵙⵍⵓⴼⴰⴽⵢⴰ, ⴷ ⵜⴳⵍⴷⵉⵜ ⵉⵎⵓⵏⵏ.
ⵉⵙⵙⵎⵜⵔ ⵓⵎⵙⵉⵡⵍ ⵢⴰⴽⵙⵓⵍⵏ ⵙ ⵉⵎⵉⵣⵉⵜⵏ ⵉⵅⴰⵜⴰⵔⵏ ⵏⵏⴰ ⵉⵙⵙⵉⵡⵉⴷⵏ ⵜⵉⵍⵉⵜ ⵏ ⵡⴰⴷⴷⴰⴳ ⵏ ⵡⴰⵔⴳⴰⵏ, ⵙⴳ ⵉⵙⵏⴼⵍⵏ ⵏ ⵓⵏⴳⵉⴳⵜ ⴷ ⵜⵥⴰⵡⴰ ⴷ ⵓⵙⴼⵕⴹ ⵏ ⵡⴰⴽⴰⵍ, ⴷ ⵓⴽⵛⵛⵓⵎ ⵏ ⵓⴼⴳⴰⵏ ( ⴳⴰⵔ ⵜⴰⵢⵙⵙⴰ, ⴷ ⵜⵓⴱⴱⵢⴰ ⵏ ⵡⴰⴷⴷⴰⴳⵏ), ⵙⵍⴰⵡⴰⵏ ⵖⴰⴽⴽⵯ ⵜⴰⵙⴳⴰ ⵏ ⵜⴰⴳⴰⵏⵜ ⵏⵉⵖ « ⵜⴰⴽⴰⴷⵔⴰⵡⵜ ».
ⵉⵔⵏⵓ ⵎⴰⵙ ⴷ ⵜⵓⴳⴳⴰⵙ ⵏⵏⴰ ⵏⵏ ⵜⴻⵜⵜⴳⴳⴰ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙⵣⵎⵔⵏⵜ ⵙⴳ ⵓⴼⵔⴰⴳ ⴷ ⵓⵙⵉⵔⵉⵡ ⵏ ⵢⵉⴳⵔ ⵏ ⵜⴽⵔⵣⴰ ⵏ ⵡⴰⵔⴳⴰⵏ, ⵉⵙⵙⵎⵜⵔ ⵎⴰⵙ ⴷ ⴰⵣⴰⵜⵉⵎ ⵏ ⵡⴰⵔⴳⴰⵏ ⴷ ⵉⵏⴰⴼⵓⵖⵏ ⵏⵏⵙ ⵣⵎⵔⵏ ⴰⴷ ⵜⵜⵢⴰⴼⴰⵏ ⴳ ⵜⵖⴰⵡⵙⵉⵡⵉⵏ ⵏ ⵓⵙⴼⴰⵍⴽⵉ ⴷ ⵉⵙⴰⴼⴰⵔⵏ ⴷ ⵉⵙⴰⴷⵓⵔⵏ. ⴷ ⴰⵔ ⵉⵏⵜⵜⵓ ⵜⵉⵙⵔⵉ ⵜⴰⴷⵎⵙⴰⵏⵜ ⴳ ⵓⵙⵡⵉⵔ ⴰⴷⵖⵔⴰⵏ ⵏⵉⵖ ⴰⵏⴰⵎⵓⵔ, ⵉⵙⴷⴷⵉⴷ ⵎⴰⵙ ⴷ ⴰⵎⵓⵏⵏ ⵉⴷⵖⵔⴰⵏⵏ ⵙⵙⴱⵖⵔⵏ ⵙⴳ ⵓⵙⵖⵓⴷⵓ ⵏ ⵉⵎⴰⵙⵙⵏ ⵏ ⵜⵓⴷⵔⵜ ⵍⵍⵉⵖ ⵉⵏⵎⵓⵣⵣⴰ ⵢⵉⴳⵔ ⵙ ⵜⵡⵉⵍⴰ ⵉⵅⴰⵜⵔⵏ ⴰⴼⴰⴷ ⴰⴷ ⵢⴰⵎⵓ ⵉⵢⴰⴼⵓⵜⵏ ⵉⵎⴰⵢⵏⵓⵜⵏ.
ⵍⴰ ⵉⵜⵜⵓⵙⵏⵉⵎⴰⵍ ⴳ ⵢⵉⴷⵉⵔ ⵏ 2030 ⴳ ⵓⵙⴰⵜⵉ ⵏ ⵙⵏⴰⵜ ⵜⵙⵜⵕⴰⵜⵉⵊⵉⵢⵉⵏ, ⴰⴷ ⵢⵉⵍⵉ ⵓⴹⴼⵓⵕ ⵏ ⵓⵖⴰⵡⴰⵙ ⵏ ⵜⵓⵥⵓⵜ ⵏ ⵡⴰⵔⴳⴰⵏ ⴰⵏⴼⵍⴰⵃ ⵙ ⵓⵡⵜⵜⴰⵣ ⵏ ⵜⵓⵥⵓⵜ ⵏ 50000 ⵏ ⵓⵀⵉⴽⵟⴰⵕ, ⴷ ⵓⵙⵖⵔⵜ ⵏ 400000 ⵏ ⵓⵀⵉⴽⵟⴰⵕ ⵙⴳ ⵢⵉⴳⵔ ⵏ ⵜⴰⴳⴰⵏⵜ, ⴷ ⵡⴰⵏⵏⴰⵍ ⵏ ⵓⵙⵉⵜⴳ ⵏ ⵓⵙⵢⴰⴼⵓ ⴷ ⵓⵙⵙⵉⴷⵔ ⵏ ⵉⵙⵉⴼⵉⴹⵏ ⵏ ⵓⵣⴰⵜⵉⵎ ⵏ ⵡⴰⵔⴳⴰⵏ, ⴷ ⵡⴰⵏⵏⴰⵍ ⵏ ⵓⵔⵣⵣⵓ ⴰⵎⴰⵙⵙⴰⵏ, ⴷ ⵓⵥⵟⵟⴰ ⵏ ⵓⵙⵏⵎⴰⵍⴰ ⴰⵣⵣⵓⵍⴰⵏ ⵅⴼ ⵉⵙⵏⵜⴰⵢ ⵏ ⵓⵙⵎⵓⵏ ⴰⵏⴼⵍⴰⵃ, ⴷ ⵓⵙⴷⵓⵙ ⴰⴼⵉⴷⵉⵕⴰⵍⵉ ⴰⵏⴳⵔⴰⵣⵣⵓⵍⴰⵏ.
ⴰⴷ ⴷ ⵏⵙⵙⴽⵜⵉ ⵎⴰⵙ ⴷ ⵉⵜⵜⵓⵙⵎⴰⵍ ⴰⴷ ⵉⴳ 10 ⵎⴰⵢⵢⵓ ⴷ ⴰⵙⵙ ⴰⵎⴰⴹⵍⴰⵏ ⵏ ⵡⴰⴷⴷⴰⴳ ⵏ ⵡⴰⵔⴳⴰⵏ ⵙⴳ ⴷⴰⵔ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⵏ ⵜⵎⵜⵜⴰ ⵉⵎⵓⵏⵏ ⴳ 2021 ⵙ ⵜⵙⵏⵜⴰⵢⵜ ⵙⴳ ⴷⴰⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵙ ⵢⵉⵡⵉⵣ ⵏ 114 ⵏ ⵓⵡⴰⵏⴽ ⴰⴳⵎⴰⵎ.
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ