Ɛacur amjaḥ
Ɛacur afellaḥ
Ɛacur d axeddam, ikerrez akal-is d win n medden segmi ara kecmen iweǧǧiben, asgunfu ur t-yessin. Daɣ netta yessaweḍ ad iɛeyyec tawacult-is i yetteklen kan fell-as. Maca yejba-d yiwen useggas yiwen ur yezmir ad t-yettu, iga ticraḍ ur ntekkes deg wallaɣen n yimdanen. Sin wayyuren deffir n tkerza yeɣli-d yiwen uɣurar iman-is. Irden d temẓin akken ad gmen, steḥqen aṭas n waman, maca aseggas-nni tiqqit n waman ur d-teɣli amzun ayen i d-yeḍran yedda deg lebɣi n wanzi-nni yeqqaren: « Ay asmi akken i terɛed ur tewwit, ɛamayen ur d-tgir tiqqit, akured yebra i telkit… » Aɣbel yessawal i gma-s, aɣurar ur tt-yeqqid ara yerna-d sufella ujrad i d-iɣellin am usigna ɣef yimɣan, kra yellan d azegzaw yečča-t. Iɛreqyab, urtan d tebḥirin, teḍra-yid-sen am win ifreḍsen, ttaken anzi ɣer tneẓruft. Lḥal yuɣal yessewḥac. Ɛacur akken ad iqewwet tawacult-is issenz war lebɣi-s tayuga-s n yizgaren meblac acku tuga imi qlilet azal-is d uraɣ.Tamurt d adrar, teḍyeq ternuḍ ma yerna-d nnig waya n wayen ur nessefraḥ ara, ur tezmir ara ad tessider arraw-is. Yeggra-d yiwen ubrid i Uqbayli akken ad iɛeyyec tawacult-is neɣ ad d-yerr tiferkiwin d tyuga-s n yizgaren yessenz, wagi d tamsalt n nnif, d inig ɣer tmurt n Fransa. D akken i yexdem Ɛacur d waṭas n tizziwin-is n taddart. Amzun d targit i yurga, d aɣerrabu i t-yuwin ɣer wanda ur yessin. Kullec ɣur-s d amaynut. Yeffeɣ tikkelt tamezwarut seg taddart, yufa-d iman-is deg yiwet temdint tareɣruɣt urǧin issugen abrid ad as-teḍru akka. Maca akken qqaren: « Ulac ugur ur nesɛi tifrat ». Yuwi yid-s yiwet n tansa anda ttidiren warraw n tmurt-is yufa-ten, refden-t, nudan-as-d tamezduɣt, yečča, yeswa, yelsa send ad as-d-afen ixeddim. Insayen-nni n tegmat, d uḥebber ɣef wayeḍ, unagen ula d nutni ɣer tmura tiberraniyin. Ɛacur, ur tufiḍ d acu i t-ixussen, yufa iman-is akken i iwata ladɣa mi yebda amahil. Kra n wussan kan iminig amaynut ibeddu izemmer i yiman-is, tuɣal-as-d tlelli-s swayes iteg ayen yebɣa war ma icawer yiwen. Mi yella ɣur-s mraw n yiseggasen deg tudert-is mačči kan d takessawt i yeksa, yelmed azal n krad n yiseggasen tutlayt tafransist send ad d-yeṭṭixer, ad tt-yerr imaren-nni kan i uɛiwen n baba-s deg tkessawt d yimuhal-nniḍen n lexla. Yeḥsa s yiman-is d inebgi n tmurt i t-irefden, dɣa yegza d netta ara iḍefren kra yerzan taɣara n tudert n Fransa am yinsayen d tutlayt. Ɣef waya, tal tikkelt mi ara d-yeffeɣ seg yixeddim-is tameddit, yettarra ɣer yiwen uɣerbaz anda i irennu almad n tutlayt tafransist akken ad yemsefham d yimawlan n tmurt ma yessen-itt akken i iwata.Tal tamsirt ara yerfed, ttuɣalen-d s aqerruy-is wawalen-nni yelmed deg temẓi-s. Ɛacur d win i iḥemmlen ad iɣer, dɣa kra n uḍris yufa sdat-s yeɣra-t. Adlis ifukk s tɣuri ad iɛeddi ɣer wayeḍ. Yezri useggas, yufa-d iman-is yettmeslay tafransist am yimawlan n tmurt. Ula d aselmad-is, Mass Robert, itwehhem deg-s ɣef waya. Daɣ netta, acḥal d abrid i t-id-yeɛreḍ s axxam-is, yettnadi ad iserreḥ ugar n waya yiles n unelmad-is Ɛacur ma yettmeslay d yinebgawen-is.
Aseggas amenzu n lɣerba, ɣas ma yedha-d akken i ilaq d yiman-is, ur yettu ara axxam-is yeǧǧa deg tmurt. Yettazen i twacult-is idrimen d yiselsa i yettawi walbaɛḍ yuwin imuras deg unebdu neɣ deg tallit-nniḍen, ɣer taddart-is. Qqaren-d: « Win iɛerḍen aksum n tsekkurt ur iqenneɛ ara ». Akka i teḍra d Ɛacur, yal aseggas yezrin amzun yettbaɛad cwiṭ cwiṭ ɣef tmurt-is, maca skudmal yettqerrib ɣer tin i t-irefden, tin i t-yerran d wayeḍ. Ula d tutlayt ala tafransist i yekkat imi seg tnezzayt alma yeɣli-d yiḍ d imdanen ifransisen i yettxalaḍ, ama deg wadeg n umahil-is, ama deg leqhawi. Anda akken i yezdeɣ, ala netta i d aqbayli. Inaragen-is ur faqen ansi-t, temlel n uglim-is yeǧǧan iṭij n tmurt, ssifa-nni taqmumsant i as-yefka Rebbi d yiles-is iserrḥen s sshala i wawal mi ara yettutlay tafransist, rran-t amzun d yiwen seg yirumyen. Ula d netta iɛǧeb-as wanect-a imi irennu-d cwiṭ sɣur-s akken ad yekkes kra n ccek i izemren ad t-id-yefḍeḥ.
Iseggasen ttɛeddayen am lebreq netta ur sen-yuki, tuwi-t jjyaḥa. axxam-nni ines deg tmurt, tameṭṭut-is, mmi-s yuɣalen tura d anubi, amɣar n baba-s, yemma-s, yettu-ten akken ma llan, yedha-d kan d yiman-is. Ula d tanṭelt n baba-s yuwḍen leɛfu n Rebbi, ur as-yeḥḍir ara. Tameṭṭut-is tuzen-as acḥal d abrid tibratin, tceyyeɛ-as arraw n tmurt ɣur-s, maca yiwen ur yessin tansa-s.
Sekkura teɛsa Rebbi, d nettat i d-isekkren mmi-s Yidir, d nettat i yellan d lmendad i temɣart-is, acemma ur tt-ixuss. Segmi ara d-yali wass, nettat tferren, tessirid, tettellem taduṭ, teggar iẓeḍwan, tẓeṭ tibernyas d yiɛdilen i tessnuzu. S umahil-a amensay i telmed ɣer yemma-s mi tella meẓẓiyet, i tessaweḍ ad tɛeyyec tawacult-is. Iseggasen imenza tḥulfa ixuss-itt Ɛacur, tedder yid-s ala aseggas, mazal ur t-terwi ara yeffeɣ-as afus. Tkullef-as Rebbi i Fransa i tt-iɣurren deg win i tt-yettwanasen. Ad t-id-temmekti kan ad tt-terr i yiẓri-s s tuffra n temɣart-is i yettarran nettat leɣbayen-is ɣer daxel. Tura a-tt-an teqqim d yiman-is, i tt-yettwanasen d iɣeblan n ddunit. D akud i d ddwa n yifeddixen n wul, zerrin yiseggasen, nnig n wraw d semmus i iruḥen am leffar deg yigenni, argaz-is ur d-yuri ur d-iceyyeɛ ur d-yedli fell-asen, ma d Sekkura dayen tellez. Iɣeblan i tt-iceɣben yal ass ur t-ǧǧin ara ad yeṭṭef kra n umkan deg wul-is, iteffeɣ-it cwiṭ cwiṭ almi ahat amzun urǧin t-yekcim. Ula d at n taddart ikcem-iten lḥir. D acu-t akka tura wagi? Taqcict amzun d lxir-itt, leḥdaqa, rrẓana, ssifa i as-yefka Rebbi ur icuḥḥ, netta ha-t ijaḥ deg Fransa. Maca awal yettazzalen seg yimi ɣer wayeḍ, yuɣ-d akk lebrari d wa: argaz-a ur d-nefki lexbar seg waṭas aya ahat yemmut. Llan kra gezmen-tt deg rray, dayen yemmut acku ala win yuwḍen sanda ara naweḍ akk i wumi yettmettat ssut-is azal n mraw d semmus n yiseggasen.
