Talsa i bɣiɣ
Yal yiwen de wayla-s
Yenna Caligula
Amenkad n Rum:
« Lufan talsa
Yiwen uqerruy i tesɛa
Ad as t-id-ɣeḍleɣ
S yiwet n tyita
N llemca
Ur tettaf acu ara
tger deg uqelmun ».
Maca, ur lliɣ d Caligula yezɣezɣen
Neɣ d Néron isaɣen times i Rum.
Nekk, « Talsa i bɣiɣ » d ta :
Yiwen wass deg wussan n tefsut
Ddmeɣ-d ul n talsa
Ssurgeɣ-d seg-s
Kra n lkerh yesɛa
D lkerh ijemden
D aberkan am yiḍ
S tmara i yeffeɣ s tzuliɣt n zzman
Uwin-t yiɣeẓran
Anda ur d-yettuɣal
Ul iwumi d-yeggra cwiṭ n tayri
Smareɣ-as diɣen tayri almi yettenfal
Talsa merra
Tuɣal d leḥmala
Ala aḥemmel kan i tessen
Tisiswa n yimdanen
Ḥlulint, lɣuɣint
Calligula
Ul n wuccen imi ur t-id-ṭṭifeɣ ara
Yeqqim yeččur d tixidas d tɣeccact
Deg-s azeɣbub n tayri
Ur yelli
Talsa, tessebleɛ-itt tayri
Tuɣal bezzaf telha
Tuker-as telweɣ i leḥrir
Terra-tt leḥmala d tayeḍ
D acu ara s-geɣ i wul
Yessnen kan ad yeḥmmel?
Ala aḥemmel kan i yessen…
Ddmeɣ-t-id tikkelt-nniḍen
Rriɣ-as snat n tmiqwa n lkerh
Yuɣal seg wass-nni
Ur iḥemmel ara kan…
Ur ikerreh ara kan…
Ikerreh cwiṭ, iḥemmel aṭas.
Neron