.....Karim
Karim yuḍnen tayri.
Teḥzen tayri, dɣa tettru
Mi tt-yeǧǧa win tt-iḥemmlen
Fell-as kan i yettargu
Fell-as d win issefrawen
Ur tumin ad as-yebru
Akka mi iɣab ɣef wallen
Mačči d tayri kan i iɣurr
Iɣurr wid i t-yettɛuzzun
Uqbel ad wwten agejdur
Izzuzen-iten bu wul ameɣbun
Ifukk wass, yeɣli waggur
D tillas berriken i d-irezzun
Nessen-it akk iga d ukyis
Inaw-is d tiẓeḍt n wawal
Aẓawan yedda d uḍris
Karim acennay n tayri.
Tutlayt yefka-as azal
Iṭij-is issefsay agris
S tezlatin ẓiden am tizwal
Mraw d aseggas d amuḍin
Tazmert-is tettaǧǧa-t yal ass
Yesnulfuy-d deg tezlatin
Yeggra-d uglim ɣef yiɣes
Iɣad win ara t-iwalin
Netta ur yeqḍiɛ layas
D anafray iɛeddan tilas
S tezlatin yeẓbubin d tayri
Yecna s tutlayt n yemma-s
Almi nnefs ur d-yeggri
Ddunit yid-s am tiddas
Yurar, tudert-is tekri
Ɣas teǧǧiḍ-aɣ a Karim
Teǧǧiḍ-d ccna-k i lebda
Anef-as ad yezɣeb uglim
Taɣect-ik mi as-nesla
Deg umeẓẓuɣ-nneɣ ad d-teqqim
Am waman yezgan deg tala
Karim meẓẓi.